Gyaandweep | Rig Veda Mandala , 3

प्र वो॒ वाजा॑ अ॒भिद्य॑वो ह॒विष्म॑न्तो घृ॒ताच्या॑ । दे॒वाञ्जि॑गाति सुम्न॒युः ॥ ३.०२७.०१ ॥

pra vo̱ vājā̍ a̱bhidya̍vo ha̱viṣma̍nto ghṛ̱tācyā̍ | de̱vāñji̍gāti sumna̱yuḥ || 3.027.01 ||

ईळे॑ अ॒ग्निं वि॑प॒श्चितं॑ गि॒रा य॒ज्ञस्य॒ साध॑नम् । श्रु॒ष्टी॒वानं॑ धि॒तावा॑नम् ॥ ३.०२७.०२ ॥

īḻe̍ a̱gniṁ vi̍pa̱ścita̍ṁ gi̱rā ya̱jñasya̱ sādha̍nam | śru̱ṣṭī̱vāna̍ṁ dhi̱tāvā̍nam || 3.027.02 ||

अग्ने॑ श॒केम॑ ते व॒यं यमं॑ दे॒वस्य॑ वा॒जिनः॑ । अति॒ द्वेषां॑सि तरेम ॥ ३.०२७.०३ ॥

agne̍ śa̱kema̍ te va̱yaṁ yama̍ṁ de̱vasya̍ vā̱jina̍ḥ | ati̱ dveṣā̍ṁsi tarema || 3.027.03 ||

स॒मि॒ध्यमा॑नो अध्व॒रे॒॑ऽग्निः पा॑व॒क ईड्यः॑ । शो॒चिष्के॑श॒स्तमी॑महे ॥ ३.०२७.०४ ॥

sa̱mi̱dhyamā̍no adhva̱re̱3̱̍'gniḥ pā̍va̱ka īḍya̍ḥ | śo̱ciṣke̍śa̱stamī̍mahe || 3.027.04 ||

पृ॒थु॒पाजा॒ अम॑र्त्यो घृ॒तनि॑र्णि॒क्स्वा॑हुतः । अ॒ग्निर्य॒ज्ञस्य॑ हव्य॒वाट् ॥ ३.०२७.०५ ॥

pṛ̱thu̱pājā̱ ama̍rtyo ghṛ̱tani̍rṇi̱ksvā̍hutaḥ | a̱gnirya̱jñasya̍ havya̱vāṭ || 3.027.05 ||

तं स॒बाधो॑ य॒तस्रु॑च इ॒त्था धि॒या य॒ज्ञव॑न्तः । आ च॑क्रुर॒ग्निमू॒तये॑ ॥ ३.०२७.०६ ॥

taṁ sa̱bādho̍ ya̱tasru̍ca i̱tthā dhi̱yā ya̱jñava̍ntaḥ | ā ca̍krura̱gnimū̱taye̍ || 3.027.06 ||

होता॑ दे॒वो अम॑र्त्यः पु॒रस्ता॑देति मा॒यया॑ । वि॒दथा॑नि प्रचो॒दय॑न् ॥ ३.०२७.०७ ॥

hotā̍ de̱vo ama̍rtyaḥ pu̱rastā̍deti mā̱yayā̍ | vi̱dathā̍ni praco̱daya̍n || 3.027.07 ||

वा॒जी वाजे॑षु धीयतेऽध्व॒रेषु॒ प्र णी॑यते । विप्रो॑ य॒ज्ञस्य॒ साध॑नः ॥ ३.०२७.०८ ॥

vā̱jī vāje̍ṣu dhīyate'dhva̱reṣu̱ pra ṇī̍yate | vipro̍ ya̱jñasya̱ sādha̍naḥ || 3.027.08 ||

धि॒या च॑क्रे॒ वरे॑ण्यो भू॒तानां॒ गर्भ॒मा द॑धे । दक्ष॑स्य पि॒तरं॒ तना॑ ॥ ३.०२७.०९ ॥

dhi̱yā ca̍kre̱ vare̍ṇyo bhū̱tānā̱ṁ garbha̱mā da̍dhe | dakṣa̍sya pi̱tara̱ṁ tanā̍ || 3.027.09 ||

नि त्वा॑ दधे॒ वरे॑ण्यं॒ दक्ष॑स्ये॒ळा स॑हस्कृत । अग्ने॑ सुदी॒तिमु॒शिज॑म् ॥ ३.०२७.१० ॥

ni tvā̍ dadhe̱ vare̍ṇya̱ṁ dakṣa̍sye̱ḻā sa̍haskṛta | agne̍ sudī̱timu̱śija̍m || 3.027.10 ||

अ॒ग्निं य॒न्तुर॑म॒प्तुर॑मृ॒तस्य॒ योगे॑ व॒नुषः॑ । विप्रा॒ वाजैः॒ समि॑न्धते ॥ ३.०२७.११ ॥

a̱gniṁ ya̱ntura̍ma̱ptura̍mṛ̱tasya̱ yoge̍ va̱nuṣa̍ḥ | viprā̱ vājai̱ḥ sami̍ndhate || 3.027.11 ||

ऊ॒र्जो नपा॑तमध्व॒रे दी॑दि॒वांस॒मुप॒ द्यवि॑ । अ॒ग्निमी॑ळे क॒विक्र॑तुम् ॥ ३.०२७.१२ ॥

ū̱rjo napā̍tamadhva̱re dī̍di̱vāṁsa̱mupa̱ dyavi̍ | a̱gnimī̍ḻe ka̱vikra̍tum || 3.027.12 ||

ई॒ळेन्यो॑ नम॒स्य॑स्ति॒रस्तमां॑सि दर्श॒तः । सम॒ग्निरि॑ध्यते॒ वृषा॑ ॥ ३.०२७.१३ ॥

ī̱ḻenyo̍ nama̱sya̍sti̱rastamā̍ṁsi darśa̱taḥ | sama̱gniri̍dhyate̱ vṛṣā̍ || 3.027.13 ||

वृषो॑ अ॒ग्निः समि॑ध्य॒तेऽश्वो॒ न दे॑व॒वाह॑नः । तं ह॒विष्म॑न्त ईळते ॥ ३.०२७.१४ ॥

vṛṣo̍ a̱gniḥ sami̍dhya̱te'śvo̱ na de̍va̱vāha̍naḥ | taṁ ha̱viṣma̍nta īḻate || 3.027.14 ||

वृष॑णं त्वा व॒यं वृ॑ष॒न्वृष॑णः॒ समि॑धीमहि । अग्ने॒ दीद्य॑तं बृ॒हत् ॥ ३.०२७.१५ ॥

vṛṣa̍ṇaṁ tvā va̱yaṁ vṛ̍ṣa̱nvṛṣa̍ṇa̱ḥ sami̍dhīmahi | agne̱ dīdya̍taṁ bṛ̱hat || 3.027.15 ||

Languages