इन्द्र॒ सोमं॑ सोमपते॒ पिबे॒मं माध्यं॑दिनं॒ सव॑नं॒ चारु॒ यत्ते॑ । प्र॒प्रुथ्या॒ शिप्रे॑ मघवन्नृजीषिन्वि॒मुच्या॒ हरी॑ इ॒ह मा॑दयस्व ॥ ३.०३२.०१ ॥
indra̱ soma̍ṁ somapate̱ pibe̱maṁ mādhya̍ṁdina̱ṁ sava̍na̱ṁ cāru̱ yatte̍ | pra̱pruthyā̱ śipre̍ maghavannṛjīṣinvi̱mucyā̱ harī̍ i̱ha mā̍dayasva || 3.032.01 ||
गवा॑शिरं म॒न्थिन॑मिन्द्र शु॒क्रं पिबा॒ सोमं॑ ररि॒मा ते॒ मदा॑य । ब्र॒ह्म॒कृता॒ मारु॑तेना ग॒णेन॑ स॒जोषा॑ रु॒द्रैस्तृ॒पदा वृ॑षस्व ॥ ३.०३२.०२ ॥
gavā̍śiraṁ ma̱nthina̍mindra śu̱kraṁ pibā̱ soma̍ṁ rari̱mā te̱ madā̍ya | bra̱hma̱kṛtā̱ māru̍tenā ga̱ṇena̍ sa̱joṣā̍ ru̱draistṛ̱padā vṛ̍ṣasva || 3.032.02 ||
ये ते॒ शुष्मं॒ ये तवि॑षी॒मव॑र्ध॒न्नर्च॑न्त इन्द्र म॒रुत॑स्त॒ ओजः॑ । माध्यं॑दिने॒ सव॑ने वज्रहस्त॒ पिबा॑ रु॒द्रेभिः॒ सग॑णः सुशिप्र ॥ ३.०३२.०३ ॥
ye te̱ śuṣma̱ṁ ye tavi̍ṣī̱mava̍rdha̱nnarca̍nta indra ma̱ruta̍sta̱ oja̍ḥ | mādhya̍ṁdine̱ sava̍ne vajrahasta̱ pibā̍ ru̱drebhi̱ḥ saga̍ṇaḥ suśipra || 3.032.03 ||
त इन्न्व॑स्य॒ मधु॑मद्विविप्र॒ इन्द्र॑स्य॒ शर्धो॑ म॒रुतो॒ य आस॑न् । येभि॑र्वृ॒त्रस्ये॑षि॒तो वि॒वेदा॑म॒र्मणो॒ मन्य॑मानस्य॒ मर्म॑ ॥ ३.०३२.०४ ॥
ta innva̍sya̱ madhu̍madvivipra̱ indra̍sya̱ śardho̍ ma̱ruto̱ ya āsa̍n | yebhi̍rvṛ̱trasye̍ṣi̱to vi̱vedā̍ma̱rmaṇo̱ manya̍mānasya̱ marma̍ || 3.032.04 ||
म॒नु॒ष्वदि॑न्द्र॒ सव॑नं जुषा॒णः पिबा॒ सोमं॒ शश्व॑ते वी॒र्या॑य । स आ व॑वृत्स्व हर्यश्व य॒ज्ञैः स॑र॒ण्युभि॑र॒पो अर्णा॑ सिसर्षि ॥ ३.०३२.०५ ॥
ma̱nu̱ṣvadi̍ndra̱ sava̍naṁ juṣā̱ṇaḥ pibā̱ soma̱ṁ śaśva̍te vī̱ryā̍ya | sa ā va̍vṛtsva haryaśva ya̱jñaiḥ sa̍ra̱ṇyubhi̍ra̱po arṇā̍ sisarṣi || 3.032.05 ||
त्वम॒पो यद्ध॑ वृ॒त्रं ज॑घ॒न्वाँ अत्या॑ँ इव॒ प्रासृ॑जः॒ सर्त॒वाजौ । शया॑नमिन्द्र॒ चर॑ता व॒धेन॑ वव्रि॒वांसं॒ परि॑ दे॒वीरदे॑वम् ॥ ३.०३२.०६ ॥
tvama̱po yaddha̍ vṛ̱traṁ ja̍gha̱nvā atyā̍ iva̱ prāsṛ̍ja̱ḥ sarta̱vājau | śayā̍namindra̱ cara̍tā va̱dhena̍ vavri̱vāṁsa̱ṁ pari̍ de̱vīrade̍vam || 3.032.06 ||
यजा॑म॒ इन्नम॑सा वृ॒द्धमिन्द्रं॑ बृ॒हन्त॑मृ॒ष्वम॒जरं॒ युवा॑नम् । यस्य॑ प्रि॒ये म॒मतु॑र्य॒ज्ञिय॑स्य॒ न रोद॑सी महि॒मानं॑ म॒माते॑ ॥ ३.०३२.०७ ॥
yajā̍ma̱ innama̍sā vṛ̱ddhamindra̍ṁ bṛ̱hanta̍mṛ̱ṣvama̱jara̱ṁ yuvā̍nam | yasya̍ pri̱ye ma̱matu̍rya̱jñiya̍sya̱ na roda̍sī mahi̱māna̍ṁ ma̱māte̍ || 3.032.07 ||
इन्द्र॑स्य॒ कर्म॒ सुकृ॑ता पु॒रूणि॑ व्र॒तानि॑ दे॒वा न मि॑नन्ति॒ विश्वे॑ । दा॒धार॒ यः पृ॑थि॒वीं द्यामु॒तेमां ज॒जान॒ सूर्य॑मु॒षसं॑ सु॒दंसाः॑ ॥ ३.०३२.०८ ॥
indra̍sya̱ karma̱ sukṛ̍tā pu̱rūṇi̍ vra̱tāni̍ de̱vā na mi̍nanti̱ viśve̍ | dā̱dhāra̱ yaḥ pṛ̍thi̱vīṁ dyāmu̱temāṁ ja̱jāna̱ sūrya̍mu̱ṣasa̍ṁ su̱daṁsā̍ḥ || 3.032.08 ||
अद्रो॑घ स॒त्यं तव॒ तन्म॑हि॒त्वं स॒द्यो यज्जा॒तो अपि॑बो ह॒ सोम॑म् । न द्याव॑ इन्द्र त॒वस॑स्त॒ ओजो॒ नाहा॒ न मासाः॑ श॒रदो॑ वरन्त ॥ ३.०३२.०९ ॥
adro̍gha sa̱tyaṁ tava̱ tanma̍hi̱tvaṁ sa̱dyo yajjā̱to api̍bo ha̱ soma̍m | na dyāva̍ indra ta̱vasa̍sta̱ ojo̱ nāhā̱ na māsā̍ḥ śa̱rado̍ varanta || 3.032.09 ||
त्वं स॒द्यो अ॑पिबो जा॒त इ॑न्द्र॒ मदा॑य॒ सोमं॑ पर॒मे व्यो॑मन् । यद्ध॒ द्यावा॑पृथि॒वी आवि॑वेशी॒रथा॑भवः पू॒र्व्यः का॒रुधा॑याः ॥ ३.०३२.१० ॥
tvaṁ sa̱dyo a̍pibo jā̱ta i̍ndra̱ madā̍ya̱ soma̍ṁ para̱me vyo̍man | yaddha̱ dyāvā̍pṛthi̱vī āvi̍veśī̱rathā̍bhavaḥ pū̱rvyaḥ kā̱rudhā̍yāḥ || 3.032.10 ||
अह॒न्नहिं॑ परि॒शया॑न॒मर्ण॑ ओजा॒यमा॑नं तुविजात॒ तव्या॑न् । न ते॑ महि॒त्वमनु॑ भू॒दध॒ द्यौर्यद॒न्यया॑ स्फि॒ग्या॒॑ क्षामव॑स्थाः ॥ ३.०३२.११ ॥
aha̱nnahi̍ṁ pari̱śayā̍na̱marṇa̍ ojā̱yamā̍naṁ tuvijāta̱ tavyā̍n | na te̍ mahi̱tvamanu̍ bhū̱dadha̱ dyauryada̱nyayā̍ sphi̱gyā̱3̱̍ kṣāmava̍sthāḥ || 3.032.11 ||
य॒ज्ञो हि त॑ इन्द्र॒ वर्ध॑नो॒ भूदु॒त प्रि॒यः सु॒तसो॑मो मि॒येधः॑ । य॒ज्ञेन॑ य॒ज्ञम॑व य॒ज्ञियः॒ सन्य॒ज्ञस्ते॒ वज्र॑महि॒हत्य॑ आवत् ॥ ३.०३२.१२ ॥
ya̱jño hi ta̍ indra̱ vardha̍no̱ bhūdu̱ta pri̱yaḥ su̱taso̍mo mi̱yedha̍ḥ | ya̱jñena̍ ya̱jñama̍va ya̱jñiya̱ḥ sanya̱jñaste̱ vajra̍mahi̱hatya̍ āvat || 3.032.12 ||
य॒ज्ञेनेन्द्र॒मव॒सा च॑क्रे अ॒र्वागैनं॑ सु॒म्नाय॒ नव्य॑से ववृत्याम् । यः स्तोमे॑भिर्वावृ॒धे पू॒र्व्येभि॒र्यो म॑ध्य॒मेभि॑रु॒त नूत॑नेभिः ॥ ३.०३२.१३ ॥
ya̱jñenendra̱mava̱sā ca̍kre a̱rvāgaina̍ṁ su̱mnāya̱ navya̍se vavṛtyām | yaḥ stome̍bhirvāvṛ̱dhe pū̱rvyebhi̱ryo ma̍dhya̱mebhi̍ru̱ta nūta̍nebhiḥ || 3.032.13 ||
वि॒वेष॒ यन्मा॑ धि॒षणा॑ ज॒जान॒ स्तवै॑ पु॒रा पार्या॒दिन्द्र॒मह्नः॑ । अंह॑सो॒ यत्र॑ पी॒पर॒द्यथा॑ नो ना॒वेव॒ यान्त॑मु॒भये॑ हवन्ते ॥ ३.०३२.१४ ॥
vi̱veṣa̱ yanmā̍ dhi̱ṣaṇā̍ ja̱jāna̱ stavai̍ pu̱rā pāryā̱dindra̱mahna̍ḥ | aṁha̍so̱ yatra̍ pī̱para̱dyathā̍ no nā̱veva̱ yānta̍mu̱bhaye̍ havante || 3.032.14 ||
आपू॑र्णो अस्य क॒लशः॒ स्वाहा॒ सेक्ते॑व॒ कोशं॑ सिसिचे॒ पिब॑ध्यै । समु॑ प्रि॒या आव॑वृत्र॒न्मदा॑य प्रदक्षि॒णिद॒भि सोमा॑स॒ इन्द्र॑म् ॥ ३.०३२.१५ ॥
āpū̍rṇo asya ka̱laśa̱ḥ svāhā̱ sekte̍va̱ kośa̍ṁ sisice̱ piba̍dhyai | samu̍ pri̱yā āva̍vṛtra̱nmadā̍ya pradakṣi̱ṇida̱bhi somā̍sa̱ indra̍m || 3.032.15 ||
न त्वा॑ गभी॒रः पु॑रुहूत॒ सिन्धु॒र्नाद्र॑यः॒ परि॒ षन्तो॑ वरन्त । इ॒त्था सखि॑भ्य इषि॒तो यदि॒न्द्रा दृ॒lहं चि॒दरु॑जो॒ गव्य॑मू॒र्वम् ॥ ३.०३२.१६ ॥
na tvā̍ gabhī̱raḥ pu̍ruhūta̱ sindhu̱rnādra̍ya̱ḥ pari̱ ṣanto̍ varanta | i̱tthā sakhi̍bhya iṣi̱to yadi̱ndrā dṛ̱ḻhaṁ ci̱daru̍jo̱ gavya̍mū̱rvam || 3.032.16 ||
शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ । शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥ ३.०३२.१७ ॥
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau | śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.032.17 ||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
