Gyaandweep | Rig Veda Mandala , 3

वार्त्र॑हत्याय॒ शव॑से पृतना॒षाह्या॑य च । इन्द्र॒ त्वा व॑र्तयामसि ॥ ३.०३७.०१ ॥

vārtra̍hatyāya̱ śava̍se pṛtanā̱ṣāhyā̍ya ca | indra̱ tvā va̍rtayāmasi || 3.037.01 ||

अ॒र्वा॒चीनं॒ सु ते॒ मन॑ उ॒त चक्षुः॑ शतक्रतो । इन्द्र॑ कृ॒ण्वन्तु॑ वा॒घतः॑ ॥ ३.०३७.०२ ॥

a̱rvā̱cīna̱ṁ su te̱ mana̍ u̱ta cakṣu̍ḥ śatakrato | indra̍ kṛ̱ṇvantu̍ vā̱ghata̍ḥ || 3.037.02 ||

नामा॑नि ते शतक्रतो॒ विश्वा॑भिर्गी॒र्भिरी॑महे । इन्द्रा॑भिमाति॒षाह्ये॑ ॥ ३.०३७.०३ ॥

nāmā̍ni te śatakrato̱ viśvā̍bhirgī̱rbhirī̍mahe | indrā̍bhimāti̱ṣāhye̍ || 3.037.03 ||

पु॒रु॒ष्टु॒तस्य॒ धाम॑भिः श॒तेन॑ महयामसि । इन्द्र॑स्य चर्षणी॒धृतः॑ ॥ ३.०३७.०४ ॥

pu̱ru̱ṣṭu̱tasya̱ dhāma̍bhiḥ śa̱tena̍ mahayāmasi | indra̍sya carṣaṇī̱dhṛta̍ḥ || 3.037.04 ||

इन्द्रं॑ वृ॒त्राय॒ हन्त॑वे पुरुहू॒तमुप॑ ब्रुवे । भरे॑षु॒ वाज॑सातये ॥ ३.०३७.०५ ॥

indra̍ṁ vṛ̱trāya̱ hanta̍ve puruhū̱tamupa̍ bruve | bhare̍ṣu̱ vāja̍sātaye || 3.037.05 ||

वाजे॑षु सास॒हिर्भ॑व॒ त्वामी॑महे शतक्रतो । इन्द्र॑ वृ॒त्राय॒ हन्त॑वे ॥ ३.०३७.०६ ॥

vāje̍ṣu sāsa̱hirbha̍va̱ tvāmī̍mahe śatakrato | indra̍ vṛ̱trāya̱ hanta̍ve || 3.037.06 ||

द्यु॒म्नेषु॑ पृत॒नाज्ये॑ पृत्सु॒तूर्षु॒ श्रव॑स्सु च । इन्द्र॒ साक्ष्वा॒भिमा॑तिषु ॥ ३.०३७.०७ ॥

dyu̱mneṣu̍ pṛta̱nājye̍ pṛtsu̱tūrṣu̱ śrava̍ssu ca | indra̱ sākṣvā̱bhimā̍tiṣu || 3.037.07 ||

शु॒ष्मिन्त॑मं न ऊ॒तये॑ द्यु॒म्निनं॑ पाहि॒ जागृ॑विम् । इन्द्र॒ सोमं॑ शतक्रतो ॥ ३.०३७.०८ ॥

śu̱ṣminta̍maṁ na ū̱taye̍ dyu̱mnina̍ṁ pāhi̱ jāgṛ̍vim | indra̱ soma̍ṁ śatakrato || 3.037.08 ||

इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ । इन्द्र॒ तानि॑ त॒ आ वृ॑णे ॥ ३.०३७.०९ ॥

i̱ndri̱yāṇi̍ śatakrato̱ yā te̱ jane̍ṣu pa̱ñcasu̍ | indra̱ tāni̍ ta̱ ā vṛ̍ṇe || 3.037.09 ||

अग॑न्निन्द्र॒ श्रवो॑ बृ॒हद्द्यु॒म्नं द॑धिष्व दु॒ष्टर॑म् । उत्ते॒ शुष्मं॑ तिरामसि ॥ ३.०३७.१० ॥

aga̍nnindra̱ śravo̍ bṛ̱haddyu̱mnaṁ da̍dhiṣva du̱ṣṭara̍m | utte̱ śuṣma̍ṁ tirāmasi || 3.037.10 ||

अ॒र्वा॒वतो॑ न॒ आ ग॒ह्यथो॑ शक्र परा॒वतः॑ । उ॒ लो॒को यस्ते॑ अद्रिव॒ इन्द्रे॒ह तत॒ आ ग॑हि ॥ ३.०३७.११ ॥

a̱rvā̱vato̍ na̱ ā ga̱hyatho̍ śakra parā̱vata̍ḥ | u̱ lo̱ko yaste̍ adriva̱ indre̱ha tata̱ ā ga̍hi || 3.037.11 ||

Languages