Gyaandweep | Rig Veda Mandala , 3

इन्द्र॑ त्वा वृष॒भं व॒यं सु॒ते सोमे॑ हवामहे । स पा॑हि॒ मध्वो॒ अन्ध॑सः ॥ ३.०४०.०१ ॥

indra̍ tvā vṛṣa̱bhaṁ va̱yaṁ su̱te some̍ havāmahe | sa pā̍hi̱ madhvo̱ andha̍saḥ || 3.040.01 ||

इन्द्र॑ क्रतु॒विदं॑ सु॒तं सोमं॑ हर्य पुरुष्टुत । पिबा वृ॑षस्व॒ तातृ॑पिम् ॥ ३.०४०.०२ ॥

indra̍ kratu̱vida̍ṁ su̱taṁ soma̍ṁ harya puruṣṭuta | pibā vṛ̍ṣasva̱ tātṛ̍pim || 3.040.02 ||

इन्द्र॒ प्र णो॑ धि॒तावा॑नं य॒ज्ञं विश्वे॑भिर्दे॒वेभिः॑ । ति॒र स्त॑वान विश्पते ॥ ३.०४०.०३ ॥

indra̱ pra ṇo̍ dhi̱tāvā̍naṁ ya̱jñaṁ viśve̍bhirde̱vebhi̍ḥ | ti̱ra sta̍vāna viśpate || 3.040.03 ||

इन्द्र॒ सोमाः॑ सु॒ता इ॒मे तव॒ प्र य॑न्ति सत्पते । क्षयं॑ च॒न्द्रास॒ इन्द॑वः ॥ ३.०४०.०४ ॥

indra̱ somā̍ḥ su̱tā i̱me tava̱ pra ya̍nti satpate | kṣaya̍ṁ ca̱ndrāsa̱ inda̍vaḥ || 3.040.04 ||

द॒धि॒ष्वा ज॒ठरे॑ सु॒तं सोम॑मिन्द्र॒ वरे॑ण्यम् । तव॑ द्यु॒क्षास॒ इन्द॑वः ॥ ३.०४०.०५ ॥

da̱dhi̱ṣvā ja̱ṭhare̍ su̱taṁ soma̍mindra̱ vare̍ṇyam | tava̍ dyu̱kṣāsa̱ inda̍vaḥ || 3.040.05 ||

गिर्व॑णः पा॒हि नः॑ सु॒तं मधो॒र्धारा॑भिरज्यसे । इन्द्र॒ त्वादा॑त॒मिद्यशः॑ ॥ ३.०४०.०६ ॥

girva̍ṇaḥ pā̱hi na̍ḥ su̱taṁ madho̱rdhārā̍bhirajyase | indra̱ tvādā̍ta̱midyaśa̍ḥ || 3.040.06 ||

अ॒भि द्यु॒म्नानि॑ व॒निन॒ इन्द्रं॑ सचन्ते॒ अक्षि॑ता । पी॒त्वी सोम॑स्य वावृधे ॥ ३.०४०.०७ ॥

a̱bhi dyu̱mnāni̍ va̱nina̱ indra̍ṁ sacante̱ akṣi̍tā | pī̱tvī soma̍sya vāvṛdhe || 3.040.07 ||

अ॒र्वा॒वतो॑ न॒ आ ग॑हि परा॒वत॑श्च वृत्रहन् । इ॒मा जु॑षस्व नो॒ गिरः॑ ॥ ३.०४०.०८ ॥

a̱rvā̱vato̍ na̱ ā ga̍hi parā̱vata̍śca vṛtrahan | i̱mā ju̍ṣasva no̱ gira̍ḥ || 3.040.08 ||

यद॑न्त॒रा प॑रा॒वत॑मर्वा॒वतं॑ च हू॒यसे॑ । इन्द्रे॒ह तत॒ आ ग॑हि ॥ ३.०४०.०९ ॥

yada̍nta̱rā pa̍rā̱vata̍marvā̱vata̍ṁ ca hū̱yase̍ | indre̱ha tata̱ ā ga̍hi || 3.040.09 ||

Languages