Gyaandweep | Rig Veda Mandala , 3

उप॑ नः सु॒तमा ग॑हि॒ सोम॑मिन्द्र॒ गवा॑शिरम् । हरि॑भ्यां॒ यस्ते॑ अस्म॒युः ॥ ३.०४२.०१ ॥

upa̍ naḥ su̱tamā ga̍hi̱ soma̍mindra̱ gavā̍śiram | hari̍bhyā̱ṁ yaste̍ asma̱yuḥ || 3.042.01 ||

तमि॑न्द्र॒ मद॒मा ग॑हि बर्हिः॒ष्ठां ग्राव॑भिः सु॒तम् । कु॒विन्न्व॑स्य तृ॒प्णवः॑ ॥ ३.०४२.०२ ॥

tami̍ndra̱ mada̱mā ga̍hi barhi̱ḥṣṭhāṁ grāva̍bhiḥ su̱tam | ku̱vinnva̍sya tṛ̱pṇava̍ḥ || 3.042.02 ||

इन्द्र॑मि॒त्था गिरो॒ ममाच्छा॑गुरिषि॒ता इ॒तः । आ॒वृते॒ सोम॑पीतये ॥ ३.०४२.०३ ॥

indra̍mi̱tthā giro̱ mamācchā̍guriṣi̱tā i̱taḥ | ā̱vṛte̱ soma̍pītaye || 3.042.03 ||

इन्द्रं॒ सोम॑स्य पी॒तये॒ स्तोमै॑रि॒ह ह॑वामहे । उ॒क्थेभिः॑ कु॒विदा॒गम॑त् ॥ ३.०४२.०४ ॥

indra̱ṁ soma̍sya pī̱taye̱ stomai̍ri̱ha ha̍vāmahe | u̱kthebhi̍ḥ ku̱vidā̱gama̍t || 3.042.04 ||

इन्द्र॒ सोमाः॑ सु॒ता इ॒मे तान्द॑धिष्व शतक्रतो । ज॒ठरे॑ वाजिनीवसो ॥ ३.०४२.०५ ॥

indra̱ somā̍ḥ su̱tā i̱me tānda̍dhiṣva śatakrato | ja̱ṭhare̍ vājinīvaso || 3.042.05 ||

वि॒द्मा हि त्वा॑ धनंज॒यं वाजे॑षु दधृ॒षं क॑वे । अधा॑ ते सु॒म्नमी॑महे ॥ ३.०४२.०६ ॥

vi̱dmā hi tvā̍ dhanaṁja̱yaṁ vāje̍ṣu dadhṛ̱ṣaṁ ka̍ve | adhā̍ te su̱mnamī̍mahe || 3.042.06 ||

इ॒ममि॑न्द्र॒ गवा॑शिरं॒ यवा॑शिरं च नः पिब । आ॒गत्या॒ वृष॑भिः सु॒तम् ॥ ३.०४२.०७ ॥

i̱mami̍ndra̱ gavā̍śira̱ṁ yavā̍śiraṁ ca naḥ piba | ā̱gatyā̱ vṛṣa̍bhiḥ su̱tam || 3.042.07 ||

तुभ्येदि॑न्द्र॒ स्व ओ॒क्ये॒॑ सोमं॑ चोदामि पी॒तये॑ । ए॒ष रा॑रन्तु ते हृ॒दि ॥ ३.०४२.०८ ॥

tubhyedi̍ndra̱ sva o̱kye̱3̱̍ soma̍ṁ codāmi pī̱taye̍ | e̱ṣa rā̍rantu te hṛ̱di || 3.042.08 ||

त्वां सु॒तस्य॑ पी॒तये॑ प्र॒त्नमि॑न्द्र हवामहे । कु॒शि॒कासो॑ अव॒स्यवः॑ ॥ ३.०४२.०९ ॥

tvāṁ su̱tasya̍ pī̱taye̍ pra̱tnami̍ndra havāmahe | ku̱śi̱kāso̍ ava̱syava̍ḥ || 3.042.09 ||

Languages