Gyaandweep | Rig Veda Mandala , 4

अ॒ग्निर्होता॑ नो अध्व॒रे वा॒जी सन्परि॑ णीयते । दे॒वो दे॒वेषु॑ य॒ज्ञियः॑ ॥ ४.०१५.०१ ॥

agnirhotā no adhvare vājī sanpari ṇīyate | devo deveṣu yajñiyaḥ || 4.015.01 ||

परि॑ त्रिवि॒ष्ट्य॑ध्व॒रं यात्य॒ग्नी र॒थीरि॑व । आ दे॒वेषु॒ प्रयो॒ दध॑त् ॥ ४.०१५.०२ ॥

pari triviṣṭyadhvaraṃ yātyagnī rathīriva | ā deveṣu prayo dadhat || 4.015.02 ||

परि॒ वाज॑पतिः क॒विर॒ग्निर्ह॒व्यान्य॑क्रमीत् । दध॒द्रत्ना॑नि दा॒शुषे॑ ॥ ४.०१५.०३ ॥

pari vājapatiḥ kaviragnirhavyānyakramīt | dadhadratnāni dāśuṣe || 4.015.03 ||

अ॒यं यः सृञ्ज॑ये पु॒रो दै॑ववा॒ते स॑मि॒ध्यते॑ । द्यु॒माँ अ॑मित्र॒दम्भ॑नः ॥ ४.०१५.०४ ॥

ayaṃ yaḥ sṛñjaye puro daivavāte samidhyate | dyumāँ amitradambhanaḥ || 4.015.04 ||

अस्य॑ घा वी॒र ईव॑तो॒ऽग्नेरी॑शीत॒ मर्त्यः॑ । ति॒ग्मज॑म्भस्य मी॒lहुषः॑ ॥ ४.०१५.०५ ॥

asya ghā vīra īvato'gnerīśīta martyaḥ | tigmajambhasya mīlhuṣaḥ || 4.015.05 ||

तमर्व॑न्तं॒ न सा॑न॒सिम॑रु॒षं न दि॒वः शिशु॑म् । म॒र्मृ॒ज्यन्ते॑ दि॒वेदि॑वे ॥ ४.०१५.०६ ॥

tamarvantaṃ na sānasimaruṣaṃ na divaḥ śiśum | marmṛjyante divedive || 4.015.06 ||

बोध॒द्यन्मा॒ हरि॑भ्यां कुमा॒रः सा॑हदे॒व्यः । अच्छा॒ न हू॒त उद॑रम् ॥ ४.०१५.०७ ॥

bodhadyanmā haribhyāṃ kumāraḥ sāhadevyaḥ | acchā na hūta udaram || 4.015.07 ||

उ॒त त्या य॑ज॒ता हरी॑ कुमा॒रात्सा॑हदे॒व्यात् । प्रय॑ता स॒द्य आ द॑दे ॥ ४.०१५.०८ ॥

uta tyā yajatā harī kumārātsāhadevyāt | prayatā sadya ā dade || 4.015.08 ||

ए॒ष वां॑ देवावश्विना कुमा॒रः सा॑हदे॒व्यः । दी॒र्घायु॑रस्तु॒ सोम॑कः ॥ ४.०१५.०९ ॥

eṣa vāṃ devāvaśvinā kumāraḥ sāhadevyaḥ | dīrghāyurastu somakaḥ || 4.015.09 ||

तं यु॒वं दे॑वावश्विना कुमा॒रं सा॑हदे॒व्यम् । दी॒र्घायु॑षं कृणोतन ॥ ४.०१५.१० ॥

taṃ yuvaṃ devāvaśvinā kumāraṃ sāhadevyam | dīrghāyuṣaṃ kṛṇotana || 4.015.10 ||

Languages