इ॒दमु॒ त्यत्पु॑रु॒तमं॑ पु॒रस्ता॒ज्ज्योति॒स्तम॑सो व॒युना॑वदस्थात् । नू॒नं दि॒वो दु॑हि॒तरो॑ विभा॒तीर्गा॒तुं कृ॑णवन्नु॒षसो॒ जना॑य ॥ ४.०५१.०१ ॥
idamu tyatpurutamaṃ purastājjyotistamaso vayunāvadasthāt | nūnaṃ divo duhitaro vibhātīrgātuṃ kṛṇavannuṣaso janāya || 4.051.01 ||
अस्थु॑रु चि॒त्रा उ॒षसः॑ पु॒रस्ता॑न्मि॒ता इ॑व॒ स्वर॑वोऽध्व॒रेषु॑ । व्यू॑ व्र॒जस्य॒ तम॑सो॒ द्वारो॒च्छन्ती॑रव्र॒ञ्छुच॑यः पाव॒काः ॥ ४.०५१.०२ ॥
asthuru citrā uṣasaḥ purastānmitā iva svaravo'dhvareṣu | vyū vrajasya tamaso dvārocchantīravrañchucayaḥ pāvakāḥ || 4.051.02 ||
उ॒च्छन्ती॑र॒द्य चि॑तयन्त भो॒जान्रा॑धो॒देया॑यो॒षसो॑ म॒घोनीः॑ । अ॒चि॒त्रे अ॒न्तः प॒णयः॑ सस॒न्त्वबु॑ध्यमाना॒स्तम॑सो॒ विम॑ध्ये ॥ ४.०५१.०३ ॥
ucchantīradya citayanta bhojānrādhodeyāyoṣaso maghonīḥ | acitre antaḥ paṇayaḥ sasantvabudhyamānāstamaso vimadhye || 4.051.03 ||
कु॒वित्स दे॑वीः स॒नयो॒ नवो॑ वा॒ यामो॑ बभू॒यादु॑षसो वो अ॒द्य । येना॒ नव॑ग्वे॒ अङ्गि॑रे॒ दश॑ग्वे स॒प्तास्ये॑ रेवती रे॒वदू॒ष ॥ ४.०५१.०४ ॥
kuvitsa devīḥ sanayo navo vā yāmo babhūyāduṣaso vo adya | yenā navagve aṅgire daśagve saptāsye revatī revadūṣa || 4.051.04 ||
यू॒यं हि दे॑वीरृत॒युग्भि॒रश्वैः॑ परिप्रया॒थ भुव॑नानि स॒द्यः । प्र॒बो॒धय॑न्तीरुषसः स॒सन्तं॑ द्वि॒पाच्चतु॑ष्पाच्च॒रथा॑य जी॒वम् ॥ ४.०५१.०५ ॥
yūyaṃ hi devīrṛtayugbhiraśvaiḥ pariprayātha bhuvanāni sadyaḥ | prabodhayantīruṣasaḥ sasantaṃ dvipāccatuṣpāccarathāya jīvam || 4.051.05 ||
क्व॑ स्विदासां कत॒मा पु॑रा॒णी यया॑ वि॒धाना॑ विद॒धुरृ॑भू॒णाम् । शुभं॒ यच्छु॒भ्रा उ॒षस॒श्चर॑न्ति॒ न वि ज्ञा॑यन्ते स॒दृशी॑रजु॒र्याः ॥ ४.०५१.०६ ॥
kva svidāsāṃ katamā purāṇī yayā vidhānā vidadhurṛbhūṇām | śubhaṃ yacchubhrā uṣasaścaranti na vi jñāyante sadṛśīrajuryāḥ || 4.051.06 ||
ता घा॒ ता भ॒द्रा उ॒षसः॑ पु॒रासु॑रभि॒ष्टिद्यु॑म्ना ऋ॒तजा॑तसत्याः । यास्वी॑जा॒नः श॑शमा॒न उ॒क्थैः स्तु॒वञ्छंस॒न्द्रवि॑णं स॒द्य आप॑ ॥ ४.०५१.०७ ॥
tā ghā tā bhadrā uṣasaḥ purāsurabhiṣṭidyumnā ṛtajātasatyāḥ | yāsvījānaḥ śaśamāna ukthaiḥ stuvañchaṃsandraviṇaṃ sadya āpa || 4.051.07 ||
ता आ च॑रन्ति सम॒ना पु॒रस्ता॑त्समा॒नतः॑ सम॒ना प॑प्रथा॒नाः । ऋ॒तस्य॑ दे॒वीः सद॑सो बुधा॒ना गवां॒ न सर्गा॑ उ॒षसो॑ जरन्ते ॥ ४.०५१.०८ ॥
tā ā caranti samanā purastātsamānataḥ samanā paprathānāḥ | ṛtasya devīḥ sadaso budhānā gavāṃ na sargā uṣaso jarante || 4.051.08 ||
ता इन्न्वे॒३॒॑व स॑म॒ना स॑मा॒नीरमी॑तवर्णा उ॒षस॑श्चरन्ति । गूह॑न्ती॒रभ्व॒मसि॑तं॒ रुश॑द्भिः शु॒क्रास्त॒नूभिः॒ शुच॑यो रुचा॒नाः ॥ ४.०५१.०९ ॥
tā innve3va samanā samānīramītavarṇā uṣasaścaranti | gūhantīrabhvamasitaṃ ruśadbhiḥ śukrāstanūbhiḥ śucayo rucānāḥ || 4.051.09 ||
र॒यिं दि॑वो दुहितरो विभा॒तीः प्र॒जाव॑न्तं यच्छता॒स्मासु॑ देवीः । स्यो॒नादा वः॑ प्रति॒बुध्य॑मानाः सु॒वीर्य॑स्य॒ पत॑यः स्याम ॥ ४.०५१.१० ॥
rayiṃ divo duhitaro vibhātīḥ prajāvantaṃ yacchatāsmāsu devīḥ | syonādā vaḥ pratibudhyamānāḥ suvīryasya patayaḥ syāma || 4.051.10 ||
तद्वो॑ दिवो दुहितरो विभा॒तीरुप॑ ब्रुव उषसो य॒ज्ञके॑तुः । व॒यं स्या॑म य॒शसो॒ जने॑षु॒ तद्द्यौश्च॑ ध॒त्तां पृ॑थि॒वी च॑ दे॒वी ॥ ४.०५१.११ ॥
tadvo divo duhitaro vibhātīrupa bruva uṣaso yajñaketuḥ | vayaṃ syāma yaśaso janeṣu taddyauśca dhattāṃ pṛthivī ca devī || 4.051.11 ||