आ धे॒नवः॒ पय॑सा॒ तूर्ण्य॑र्था॒ अम॑र्धन्ती॒रुप॑ नो यन्तु॒ मध्वा॑ । म॒हो रा॒ये बृ॑ह॒तीः स॒प्त विप्रो॑ मयो॒भुवो॑ जरि॒ता जो॑हवीति ॥ ५.०४३.०१ ॥
ā dhenavaḥ payasā tūrṇyarthā amardhantīrupa no yantu madhvā | maho rāye bṛhatīḥ sapta vipro mayobhuvo jaritā johavīti || 5.043.01
आ सु॑ष्टु॒ती नम॑सा वर्त॒यध्यै॒ द्यावा॒ वाजा॑य पृथि॒वी अमृ॑ध्रे । पि॒ता मा॒ता मधु॑वचाः सु॒हस्ता॒ भरे॑भरे नो य॒शसा॑वविष्टाम् ॥ ५.०४३.०२ ॥
ā suṣṭutī namasā vartayadhyai dyāvā vājāya pṛthivī amṛdhre | pitā mātā madhuvacāḥ suhastā bharebhare no yaśasāvaviṣṭām || 5.043.02
अध्व॑र्यवश्चकृ॒वांसो॒ मधू॑नि॒ प्र वा॒यवे॑ भरत॒ चारु॑ शु॒क्रम् । होते॑व नः प्रथ॒मः पा॑ह्य॒स्य देव॒ मध्वो॑ ररि॒मा ते॒ मदा॑य ॥ ५.०४३.०३ ॥
adhvaryavaścakṛvāṃso madhūni pra vāyave bharata cāru śukram | hoteva naḥ prathamaḥ pāhyasya deva madhvo rarimā te madāya || 5.043.03
दश॒ क्षिपो॑ युञ्जते बा॒हू अद्रिं॒ सोम॑स्य॒ या श॑मि॒तारा॑ सु॒हस्ता॑ । मध्वो॒ रसं॑ सु॒गभ॑स्तिर्गिरि॒ष्ठां चनि॑श्चदद्दुदुहे शु॒क्रमं॒शुः ॥ ५.०४३.०४ ॥
daśa kṣipo yuñjate bāhū adriṃ somasya yā śamitārā suhastā | madhvo rasaṃ sugabhastirgiriṣṭhāṃ caniścadadduduhe śukramaṃśuḥ || 5.043.04
असा॑वि ते जुजुषा॒णाय॒ सोमः॒ क्रत्वे॒ दक्षा॑य बृह॒ते मदा॑य । हरी॒ रथे॑ सु॒धुरा॒ योगे॑ अ॒र्वागिन्द्र॑ प्रि॒या कृ॑णुहि हू॒यमा॑नः ॥ ५.०४३.०५ ॥
asāvi te jujuṣāṇāya somaḥ kratve dakṣāya bṛhate madāya | harī rathe sudhurā yoge arvāgindra priyā kṛṇuhi hūyamānaḥ || 5.043.05
आ नो॑ म॒हीम॒रम॑तिं स॒जोषा॒ ग्नां दे॒वीं नम॑सा रा॒तह॑व्याम् । मधो॒र्मदा॑य बृह॒तीमृ॑त॒ज्ञामाग्ने॑ वह प॒थिभि॑र्देव॒यानैः॑ ॥ ५.०४३.०६ ॥
ā no mahīmaramatiṃ sajoṣā gnāṃ devīṃ namasā rātahavyām | madhormadāya bṛhatīmṛtajñāmāgne vaha pathibhirdevayānaiḥ || 5.043.06
अ॒ञ्जन्ति॒ यं प्र॒थय॑न्तो॒ न विप्रा॑ व॒पाव॑न्तं॒ नाग्निना॒ तप॑न्तः । पि॒तुर्न पु॒त्र उ॒पसि॒ प्रेष्ठ॒ आ घ॒र्मो अ॒ग्निमृ॒तय॑न्नसादि ॥ ५.०४३.०७ ॥
añjanti yaṃ prathayanto na viprā vapāvantaṃ nāgninā tapantaḥ | piturna putra upasi preṣṭha ā gharmo agnimṛtayannasādi || 5.043.07
अच्छा॑ म॒ही बृ॑ह॒ती शंत॑मा॒ गीर्दू॒तो न ग॑न्त्व॒श्विना॑ हु॒वध्यै॑ । म॒यो॒भुवा॑ स॒रथा या॑तम॒र्वाग्ग॒न्तं नि॒धिं धुर॑मा॒णिर्न नाभि॑म् ॥ ५.०४३.०८ ॥
acchā mahī bṛhatī śaṃtamā gīrdūto na gantvaśvinā huvadhyai | mayobhuvā sarathā yātamarvāggantaṃ nidhiṃ dhuramāṇirna nābhim || 5.043.08
प्र तव्य॑सो॒ नम॑उक्तिं तु॒रस्या॒हं पू॒ष्ण उ॒त वा॒योर॑दिक्षि । या राध॑सा चोदि॒तारा॑ मती॒नां या वाज॑स्य द्रविणो॒दा उ॒त त्मन् ॥ ५.०४३.०९ ॥
pra tavyaso namauktiṃ turasyāhaṃ pūṣṇa uta vāyoradikṣi | yā rādhasā coditārā matīnāṃ yā vājasya draviṇodā uta tman || 5.043.09
आ नाम॑भिर्म॒रुतो॑ वक्षि॒ विश्वा॒ना रू॒पेभि॑र्जातवेदो हुवा॒नः । य॒ज्ञं गिरो॑ जरि॒तुः सु॑ष्टु॒तिं च॒ विश्वे॑ गन्त मरुतो॒ विश्व॑ ऊ॒ती ॥ ५.०४३.१० ॥
ā nāmabhirmaruto vakṣi viśvānā rūpebhirjātavedo huvānaḥ | yajñaṃ giro jarituḥ suṣṭutiṃ ca viśve ganta maruto viśva ūtī || 5.043.10
आ नो॑ दि॒वो बृ॑ह॒तः पर्व॑ता॒दा सर॑स्वती यज॒ता ग॑न्तु य॒ज्ञम् । हवं॑ दे॒वी जु॑जुषा॒णा घृ॒ताची॑ श॒ग्मां नो॒ वाच॑मुश॒ती शृ॑णोतु ॥ ५.०४३.११ ॥
ā no divo bṛhataḥ parvatādā sarasvatī yajatā gantu yajñam | havaṃ devī jujuṣāṇā ghṛtācī śagmāṃ no vācamuśatī śa्ṛṇotu || 5.043.11
आ वे॒धसं॒ नील॑पृष्ठं बृ॒हन्तं॒ बृह॒स्पतिं॒ सद॑ने सादयध्वम् । सा॒दद्यो॑निं॒ दम॒ आ दी॑दि॒वांसं॒ हिर॑ण्यवर्णमरु॒षं स॑पेम ॥ ५.०४३.१२ ॥
ā vedhasaṃ nīlapṛṣṭhaṃ bṛhantaṃ bṛhaspatiṃ sadane sādayadhvam | sādadyoniṃ dama ā dīdivāṃsaṃ hiraṇyavarṇamaruṣaṃ sapema || 5.043.12
आ ध॑र्ण॒सिर्बृ॒हद्दि॑वो॒ ररा॑णो॒ विश्वे॑भिर्ग॒न्त्वोम॑भिर्हुवा॒नः । ग्ना वसा॑न॒ ओष॑धी॒रमृ॑ध्रस्त्रि॒धातु॑शृङ्गो वृष॒भो व॑यो॒धाः ॥ ५.०४३.१३ ॥
ā dharṇasirbṛhaddivo rarāṇo viśvebhirgantvomabhirhuvānaḥ | gnā vasāna oṣadhīramṛdhrastridhātuśa्ṛṅgo vṛṣabho vayodhāḥ || 5.043.13
मा॒तुष्प॒दे प॑र॒मे शु॒क्र आ॒योर्वि॑प॒न्यवो॑ रास्पि॒रासो॑ अग्मन् । सु॒शेव्यं॒ नम॑सा रा॒तह॑व्याः॒ शिशुं॑ मृजन्त्या॒यवो॒ न वा॒से ॥ ५.०४३.१४ ॥
mātuṣpade parame śukra āyorvipanyavo rāspirāso agman | suśevyaṃ namasā rātahavyāḥ śiśuṃ mṛjantyāyavo na vāse || 5.043.14
बृ॒हद्वयो॑ बृह॒ते तुभ्य॑मग्ने धिया॒जुरो॑ मिथु॒नासः॑ सचन्त । दे॒वोदे॑वः सु॒हवो॑ भूतु॒ मह्यं॒ मा नो॑ मा॒ता पृ॑थि॒वी दु॑र्म॒तौ धा॑त् ॥ ५.०४३.१५ ॥
bṛhadvayo bṛhate tubhyamagne dhiyājuro mithunāsaḥ sacanta | devodevaḥ suhavo bhūtu mahyaṃ mā no mātā pṛthivī durmatau dhāt || 5.043.15
उ॒रौ दे॑वा अनिबा॒धे स्या॑म ॥ ५.०४३.१६ ॥
urau devā anibādhe syāma || 5.043.16
सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम । आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि ॥ ५.०४३.१७ ॥
samaśvinoravasā nūtanena mayobhuvā supraṇītī gamema | ā no rayiṃ vahatamota vīrānā viśvānyamṛtā saubhagāni || 5.043.17
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
