प्रय॑ज्यवो म॒रुतो॒ भ्राज॑दृष्टयो बृ॒हद्वयो॑ दधिरे रु॒क्मव॑क्षसः । ईय॑न्ते॒ अश्वैः॑ सु॒यमे॑भिरा॒शुभिः॒ शुभं॑ या॒तामनु॒ रथा॑ अवृत्सत ॥ ५.०५५.०१ ॥
prayajyavo maruto bhrājadṛṣṭayo bṛhadvayo dadhire rukmavakṣasaḥ | īyante aśvaiḥ suyamebhirāśubhiḥ śubhaṃ yātāmanu rathā avṛtsata || 5.055.01
स्व॒यं द॑धिध्वे॒ तवि॑षीं॒ यथा॑ वि॒द बृ॒हन्म॑हान्त उर्वि॒या वि रा॑जथ । उ॒तान्तरि॑क्षं ममिरे॒ व्योज॑सा॒ शुभं॑ या॒तामनु॒ रथा॑ अवृत्सत ॥ ५.०५५.०२ ॥
svayaṃ dadhidhve taviṣīṃ yathā vida bṛhanmahānta urviyā vi rājatha | utāntarikṣaṃ mamire vyojasā śubhaṃ yātāmanu rathā avṛtsata || 5.055.02
सा॒कं जा॒ताः सु॒भ्वः॑ सा॒कमु॑क्षि॒ताः श्रि॒ये चि॒दा प्र॑त॒रं वा॑वृधु॒र्नरः॑ । वि॒रो॒किणः॒ सूर्य॑स्येव र॒श्मयः॒ शुभं॑ या॒तामनु॒ रथा॑ अवृत्सत ॥ ५.०५५.०३ ॥
sākaṃ jātāḥ subhvaḥ sākamukṣitāḥ śriye cidā prataraṃ vāvṛdhurnaraḥ | virokiṇaḥ sūryasyeva raśmayaḥ śubhaṃ yātāmanu rathā avṛtsata || 5.055.03
आ॒भू॒षेण्यं॑ वो मरुतो महित्व॒नं दि॑दृ॒क्षेण्यं॒ सूर्य॑स्येव॒ चक्ष॑णम् । उ॒तो अ॒स्माँ अ॑मृत॒त्वे द॑धातन॒ शुभं॑ या॒तामनु॒ रथा॑ अवृत्सत ॥ ५.०५५.०४ ॥
ābhūṣeṇyaṃ vo maruto mahitvanaṃ didṛkṣeṇyaṃ sūryasyeva cakṣaṇam | uto asmāँ amṛtatve dadhātana śubhaṃ yātāmanu rathā avṛtsata || 5.055.04
उदी॑रयथा मरुतः समुद्र॒तो यू॒यं वृ॒ष्टिं व॑र्षयथा पुरीषिणः । न वो॑ दस्रा॒ उप॑ दस्यन्ति धे॒नवः॒ शुभं॑ या॒तामनु॒ रथा॑ अवृत्सत ॥ ५.०५५.०५ ॥
udīrayathā marutaḥ samudrato yūyaṃ vṛṣṭiṃ varṣayathā purīṣiṇaḥ | na vo dasrā upa dasyanti dhenavaḥ śubhaṃ yātāmanu rathā avṛtsata || 5.055.05
यदश्वा॑न्धू॒र्षु पृष॑ती॒रयु॑ग्ध्वं हिर॒ण्यया॒न्प्रत्यत्का॒ँ अमु॑ग्ध्वम् । विश्वा॒ इत्स्पृधो॑ मरुतो॒ व्य॑स्यथ॒ शुभं॑ या॒तामनु॒ रथा॑ अवृत्सत ॥ ५.०५५.०६ ॥
yadaśvāndhūrṣu pṛṣatīrayugdhvaṃ hiraṇyayānpratyatkāँ amugdhvam | viśvā itspṛdho maruto vyasyatha śubhaṃ yātāmanu rathā avṛtsata || 5.055.06
न पर्व॑ता॒ न न॒द्यो॑ वरन्त वो॒ यत्राचि॑ध्वं मरुतो॒ गच्छ॒थेदु॒ तत् । उ॒त द्यावा॑पृथि॒वी या॑थना॒ परि॒ शुभं॑ या॒तामनु॒ रथा॑ अवृत्सत ॥ ५.०५५.०७ ॥
na parvatā na nadyo varanta vo yatrācidhvaṃ maruto gacchathedu tat | uta dyāvāpṛthivī yāthanā pari śubhaṃ yātāmanu rathā avṛtsata || 5.055.07
यत्पू॒र्व्यं म॑रुतो॒ यच्च॒ नूत॑नं॒ यदु॒द्यते॑ वसवो॒ यच्च॑ श॒स्यते॑ । विश्व॑स्य॒ तस्य॑ भवथा॒ नवे॑दसः॒ शुभं॑ या॒तामनु॒ रथा॑ अवृत्सत ॥ ५.०५५.०८ ॥
yatpūrvyaṃ maruto yacca nūtanaṃ yadudyate vasavo yacca śasyate | viśvasya tasya bhavathā navedasaḥ śubhaṃ yātāmanu rathā avṛtsata || 5.055.08
मृ॒ळत॑ नो मरुतो॒ मा व॑धिष्टना॒स्मभ्यं॒ शर्म॑ बहु॒लं वि य॑न्तन । अधि॑ स्तो॒त्रस्य॑ स॒ख्यस्य॑ गातन॒ शुभं॑ या॒तामनु॒ रथा॑ अवृत्सत ॥ ५.०५५.०९ ॥
mṛळta no maruto mā vadhiṣṭanāsmabhyaṃ śarma bahulaṃ vi yantana | adhi stotrasya sakhyasya gātana śubhaṃ yātāmanu rathā avṛtsata || 5.055.09
यू॒यम॒स्मान्न॑यत॒ वस्यो॒ अच्छा॒ निरं॑ह॒तिभ्यो॑ मरुतो गृणा॒नाः । जु॒षध्वं॑ नो ह॒व्यदा॑तिं यजत्रा व॒यं स्या॑म॒ पत॑यो रयी॒णाम् ॥ ५.०५५.१० ॥
yūyamasmānnayata vasyo acchā niraṃhatibhyo maruto gṛṇānāḥ | juṣadhvaṃ no havyadātiṃ yajatrā vayaṃ syāma patayo rayīṇām || 5.055.10