Gyaandweep | Rig Veda Mandala , 5

यद॒द्य स्थः प॑रा॒वति॒ यद॑र्वा॒वत्य॑श्विना । यद्वा॑ पु॒रू पु॑रुभुजा॒ यद॒न्तरि॑क्ष॒ आ ग॑तम् ॥ ५.०७३.०१ ॥

yadadya sthaḥ parāvati yadarvāvatyaśvinā | yadvā purū purubhujā yadantarikṣa ā gatam || 5.073.01

इ॒ह त्या पु॑रु॒भूत॑मा पु॒रू दंसां॑सि॒ बिभ्र॑ता । व॒र॒स्या या॒म्यध्रि॑गू हु॒वे तु॒विष्ट॑मा भु॒जे ॥ ५.०७३.०२ ॥

iha tyā purubhūtamā purū daṃsāṃsi bibhratā | varasyā yāmyadhrigū huve tuviṣṭamā bhuje || 5.073.02

ई॒र्मान्यद्वपु॑षे॒ वपु॑श्च॒क्रं रथ॑स्य येमथुः । पर्य॒न्या नाहु॑षा यु॒गा म॒ह्ना रजां॑सि दीयथः ॥ ५.०७३.०३ ॥

īrmānyadvapuṣe vapuścakraṃ rathasya yemathuḥ | paryanyā nāhuṣā yugā mahnā rajāṃsi dīyathaḥ || 5.073.03

तदू॒ षु वा॑मे॒ना कृ॒तं विश्वा॒ यद्वा॒मनु॒ ष्टवे॑ । नाना॑ जा॒ताव॑रे॒पसा॒ सम॒स्मे बन्धु॒मेय॑थुः ॥ ५.०७३.०४ ॥

tadū ṣu vāmenā kṛtaṃ viśvā yadvāmanu ṣṭave | nānā jātāvarepasā samasme bandhumeyathuḥ || 5.073.04

आ यद्वां॑ सू॒र्या रथं॒ तिष्ठ॑द्रघु॒ष्यदं॒ सदा॑ । परि॑ वामरु॒षा वयो॑ घृ॒णा व॑रन्त आ॒तपः॑ ॥ ५.०७३.०५ ॥

ā yadvāṃ sūryā rathaṃ tiṣṭhadraghuṣyadaṃ sadā | pari vāmaruṣā vayo ghṛṇā varanta ātapaḥ || 5.073.05

यु॒वोरत्रि॑श्चिकेतति॒ नरा॑ सु॒म्नेन॒ चेत॑सा । घ॒र्मं यद्वा॑मरे॒पसं॒ नास॑त्या॒स्ना भु॑र॒ण्यति॑ ॥ ५.०७३.०६ ॥

yuvoratriściketati narā sumnena cetasā | gharmaṃ yadvāmarepasaṃ nāsatyāsnā bhuraṇyati || 5.073.06

उ॒ग्रो वां॑ ककु॒हो य॒यिः श‍ृ॒ण्वे यामे॑षु संत॒निः । यद्वां॒ दंसो॑भिरश्वि॒नात्रि॑र्नराव॒वर्त॑ति ॥ ५.०७३.०७ ॥

ugro vāṃ kakuho yayiḥ śa‍्ṛṇve yāmeṣu saṃtaniḥ | yadvāṃ daṃsobhiraśvinātrirnarāvavartati || 5.073.07

मध्व॑ ऊ॒ षु म॑धूयुवा॒ रुद्रा॒ सिष॑क्ति पि॒प्युषी॑ । यत्स॑मु॒द्राति॒ पर्ष॑थः प॒क्वाः पृक्षो॑ भरन्त वाम् ॥ ५.०७३.०८ ॥

madhva ū ṣu madhūyuvā rudrā siṣakti pipyuṣī | yatsamudrāti parṣathaḥ pakvāḥ pṛkṣo bharanta vām || 5.073.08

स॒त्यमिद्वा उ॑ अश्विना यु॒वामा॑हुर्मयो॒भुवा॑ । ता याम॑न्याम॒हूत॑मा॒ याम॒न्ना मृ॑ळ॒यत्त॑मा ॥ ५.०७३.०९ ॥

satyamidvā u aśvinā yuvāmāhurmayobhuvā | tā yāmanyāmahūtamā yāmannā mṛळyattamā || 5.073.09

इ॒मा ब्रह्मा॑णि॒ वर्ध॑ना॒श्विभ्यां॑ सन्तु॒ शंत॑मा । या तक्षा॑म॒ रथा॑ँ इ॒वावो॑चाम बृ॒हन्नमः॑ ॥ ५.०७३.१० ॥

imā brahmāṇi vardhanāśvibhyāṃ santu śaṃtamā | yā takṣāma rathāँ ivāvocāma bṛhannamaḥ || 5.073.10

Languages