Gyaandweep | Rig Veda Mandala , 5

अश्वि॑ना॒वेह ग॑च्छतं॒ नास॑त्या॒ मा वि वे॑नतम् । हं॒सावि॑व पतत॒मा सु॒ताँ उप॑ ॥ ५.०७८.०१ ॥

aśvināveha gacchataṃ nāsatyā mā vi venatam | haṃsāviva patatamā sutāँ upa || 5.078.01

अश्वि॑ना हरि॒णावि॑व गौ॒रावि॒वानु॒ यव॑सम् । हं॒सावि॑व पतत॒मा सु॒ताँ उप॑ ॥ ५.०७८.०२ ॥

aśvinā hariṇāviva gaurāvivānu yavasam | haṃsāviva patatamā sutāँ upa || 5.078.02

अश्वि॑ना वाजिनीवसू जु॒षेथां॑ य॒ज्ञमि॒ष्टये॑ । हं॒सावि॑व पतत॒मा सु॒ताँ उप॑ ॥ ५.०७८.०३ ॥

aśvinā vājinīvasū juṣethāṃ yajñamiṣṭaye | haṃsāviva patatamā sutāँ upa || 5.078.03

अत्रि॒र्यद्वा॑मव॒रोह॑न्नृ॒बीस॒मजो॑हवी॒न्नाध॑मानेव॒ योषा॑ । श्ये॒नस्य॑ चि॒ज्जव॑सा॒ नूत॑ने॒नाग॑च्छतमश्विना॒ शंत॑मेन ॥ ५.०७८.०४ ॥

atriryadvāmavarohannṛbīsamajohavīnnādhamāneva yoṣā | śyenasya cijjavasā nūtanenāgacchatamaśvinā śaṃtamena || 5.078.04

वि जि॑हीष्व वनस्पते॒ योनिः॒ सूष्य॑न्त्या इव । श्रु॒तं मे॑ अश्विना॒ हवं॑ स॒प्तव॑ध्रिं च मुञ्चतम् ॥ ५.०७८.०५ ॥

vi jihīṣva vanaspate yoniḥ sūṣyantyā iva | śrutaṃ me aśvinā havaṃ saptavadhriṃ ca muñcatam || 5.078.05

भी॒ताय॒ नाध॑मानाय॒ ऋष॑ये स॒प्तव॑ध्रये । मा॒याभि॑रश्विना यु॒वं वृ॒क्षं सं च॒ वि चा॑चथः ॥ ५.०७८.०६ ॥

bhītāya nādhamānāya ṛṣaye saptavadhraye | māyābhiraśvinā yuvaṃ vṛkṣaṃ saṃ ca vi cācathaḥ || 5.078.06

यथा॒ वातः॑ पुष्क॒रिणीं॑ समि॒ङ्गय॑ति स॒र्वतः॑ । ए॒वा ते॒ गर्भ॑ एजतु नि॒रैतु॒ दश॑मास्यः ॥ ५.०७८.०७ ॥

yathā vātaḥ puṣkariṇīṃ samiṅgayati sarvataḥ | evā te garbha ejatu niraitu daśamāsyaḥ || 5.078.07

यथा॒ वातो॒ यथा॒ वनं॒ यथा॑ समु॒द्र एज॑ति । ए॒वा त्वं द॑शमास्य स॒हावे॑हि ज॒रायु॑णा ॥ ५.०७८.०८ ॥

yathā vāto yathā vanaṃ yathā samudra ejati | evā tvaṃ daśamāsya sahāvehi jarāyuṇā || 5.078.08

दश॒ मासा॑ञ्छशया॒नः कु॑मा॒रो अधि॑ मा॒तरि॑ । नि॒रैतु॑ जी॒वो अक्ष॑तो जी॒वो जीव॑न्त्या॒ अधि॑ ॥ ५.०७८.०९ ॥

daśa māsāñchaśayānaḥ kumāro adhi mātari | niraitu jīvo akṣato jīvo jīvantyā adhi || 5.078.09

Languages