Gyaandweep | Rig Veda Mandala , 5

तत्स॑वि॒तुर्वृ॑णीमहे व॒यं दे॒वस्य॒ भोज॑नम् । श्रेष्ठं॑ सर्व॒धात॑मं॒ तुरं॒ भग॑स्य धीमहि ॥ ५.०८२.०१ ॥

tatsaviturvṛṇīmahe vayaṃ devasya bhojanam | śreṣṭhaṃ sarvadhātamaṃ turaṃ bhagasya dhīmahi || 5.082.01

अस्य॒ हि स्वय॑शस्तरं सवि॒तुः कच्च॒न प्रि॒यम् । न मि॒नन्ति॑ स्व॒राज्य॑म् ॥ ५.०८२.०२ ॥

asya hi svayaśastaraṃ savituḥ kaccana priyam | na minanti svarājyam || 5.082.02

स हि रत्ना॑नि दा॒शुषे॑ सु॒वाति॑ सवि॒ता भगः॑ । तं भा॒गं चि॒त्रमी॑महे ॥ ५.०८२.०३ ॥

sa hi ratnāni dāśuṣe suvāti savitā bhagaḥ | taṃ bhāgaṃ citramīmahe || 5.082.03

अ॒द्या नो॑ देव सवितः प्र॒जाव॑त्सावीः॒ सौभ॑गम् । परा॑ दु॒ष्ष्वप्न्यं॑ सुव ॥ ५.०८२.०४ ॥

adyā no deva savitaḥ prajāvatsāvīḥ saubhagam | parā duṣṣvapnyaṃ suva || 5.082.04

विश्वा॑नि देव सवितर्दुरि॒तानि॒ परा॑ सुव । यद्भ॒द्रं तन्न॒ आ सु॑व ॥ ५.०८२.०५ ॥

viśvāni deva savitarduritāni parā suva | yadbhadraṃ tanna ā suva || 5.082.05

अना॑गसो॒ अदि॑तये दे॒वस्य॑ सवि॒तुः स॒वे । विश्वा॑ वा॒मानि॑ धीमहि ॥ ५.०८२.०६ ॥

anāgaso aditaye devasya savituḥ save | viśvā vāmāni dhīmahi || 5.082.06

आ वि॒श्वदे॑वं॒ सत्प॑तिं सू॒क्तैर॒द्या वृ॑णीमहे । स॒त्यस॑वं सवि॒तार॑म् ॥ ५.०८२.०७ ॥

ā viśvadevaṃ satpatiṃ sūktairadyā vṛṇīmahe | satyasavaṃ savitāram || 5.082.07

य इ॒मे उ॒भे अह॑नी पु॒र एत्यप्र॑युच्छन् । स्वा॒धीर्दे॒वः स॑वि॒ता ॥ ५.०८२.०८ ॥

ya ime ubhe ahanī pura etyaprayucchan | svādhīrdevaḥ savitā || 5.082.08

य इ॒मा विश्वा॑ जा॒तान्या॑श्रा॒वय॑ति॒ श्लोके॑न । प्र च॑ सु॒वाति॑ सवि॒ता ॥ ५.०८२.०९ ॥

ya imā viśvā jātānyāśrāvayati ślokena | pra ca suvāti savitā || 5.082.09

Languages