Gyaandweep | Rig Veda Mandala , 6

सं पू॑षन्वि॒दुषा॑ नय॒ यो अञ्ज॑सानु॒शास॑ति । य ए॒वेदमिति॒ ब्रव॑त् ॥ ६.०५४.०१ ॥

saṃ pūṣanviduṣā naya yo añjasānuśāsati | ya evedamiti bravat || 6.054.01 ||

समु॑ पू॒ष्णा ग॑मेमहि॒ यो गृ॒हाँ अ॑भि॒शास॑ति । इ॒म ए॒वेति॑ च॒ ब्रव॑त् ॥ ६.०५४.०२ ॥

samu pūṣṇā gamemahi yo gṛhāँ abhiśāsati | ima eveti ca bravat || 6.054.02 ||

पू॒ष्णश्च॒क्रं न रि॑ष्यति॒ न कोशोऽव॑ पद्यते । नो अ॑स्य व्यथते प॒विः ॥ ६.०५४.०३ ॥

pūṣṇaścakraṃ na riṣyati na kośo'va padyate | no asya vyathate paviḥ || 6.054.03 ||

यो अ॑स्मै ह॒विषावि॑ध॒न्न तं पू॒षापि॑ मृष्यते । प्र॒थ॒मो वि॑न्दते॒ वसु॑ ॥ ६.०५४.०४ ॥

yo asmai haviṣāvidhanna taṃ pūṣāpi mṛṣyate | prathamo vindate vasu || 6.054.04 ||

पू॒षा गा अन्वे॑तु नः पू॒षा र॑क्ष॒त्वर्व॑तः । पू॒षा वाजं॑ सनोतु नः ॥ ६.०५४.०५ ॥

pūṣā gā anvetu naḥ pūṣā rakṣatvarvataḥ | pūṣā vājaṃ sanotu naḥ || 6.054.05 ||

पूष॒न्ननु॒ प्र गा इ॑हि॒ यज॑मानस्य सुन्व॒तः । अ॒स्माकं॑ स्तुव॒तामु॒त ॥ ६.०५४.०६ ॥

pūṣannanu pra gā ihi yajamānasya sunvataḥ | asmākaṃ stuvatāmuta || 6.054.06 ||

माकि॑र्नेश॒न्माकीं॑ रिष॒न्माकीं॒ सं शा॑रि॒ केव॑टे । अथारि॑ष्टाभि॒रा ग॑हि ॥ ६.०५४.०७ ॥

mākirneśanmākīṃ riṣanmākīṃ saṃ śāri kevaṭe | athāriṣṭābhirā gahi || 6.054.07 ||

श‍ृ॒ण्वन्तं॑ पू॒षणं॑ व॒यमिर्य॒मन॑ष्टवेदसम् । ईशा॑नं रा॒य ई॑महे ॥ ६.०५४.०८ ॥

śa‍्ṛṇvantaṃ pūṣaṇaṃ vayamiryamanaṣṭavedasam | īśānaṃ rāya īmahe || 6.054.08 ||

पूष॒न्तव॑ व्र॒ते व॒यं न रि॑ष्येम॒ कदा॑ च॒न । स्तो॒तार॑स्त इ॒ह स्म॑सि ॥ ६.०५४.०९ ॥

pūṣantava vrate vayaṃ na riṣyema kadā cana | stotārasta iha smasi || 6.054.09 ||

परि॑ पू॒षा प॒रस्ता॒द्धस्तं॑ दधातु॒ दक्षि॑णम् । पुन॑र्नो न॒ष्टमाज॑तु ॥ ६.०५४.१० ॥

pari pūṣā parastāddhastaṃ dadhātu dakṣiṇam | punarno naṣṭamājatu || 6.054.10 ||

Languages