प्र मि॒त्रयो॒र्वरु॑णयोः॒ स्तोमो॑ न एतु शू॒ष्यः॑ । नम॑स्वान्तुविजा॒तयोः॑ ॥ ७.०६६.०१ ॥
pra mitrayorvaruṇayoḥ stomo na etu śūṣyaḥ | namasvāntuvijātayoḥ || 7.066.01 ||
या धा॒रय॑न्त दे॒वाः सु॒दक्षा॒ दक्ष॑पितरा । अ॒सु॒र्या॑य॒ प्रम॑हसा ॥ ७.०६६.०२ ॥
yā dhārayanta devāḥ sudakṣā dakṣapitarā | asuryāya pramahasā || 7.066.02 ||
ता नः॑ स्ति॒पा त॑नू॒पा वरु॑ण जरितॄ॒णाम् । मित्र॑ सा॒धय॑तं॒ धियः॑ ॥ ७.०६६.०३ ॥
tā naḥ stipā tanūpā varuṇa jaritṝṇām | mitra sādhayataṃ dhiyaḥ || 7.066.03 ||
यद॒द्य सूर॒ उदि॒तेऽना॑गा मि॒त्रो अ॑र्य॒मा । सु॒वाति॑ सवि॒ता भगः॑ ॥ ७.०६६.०४ ॥
yadadya sūra udite'nāgā mitro aryamā | suvāti savitā bhagaḥ || 7.066.04 ||
सु॒प्रा॒वीर॑स्तु॒ स क्षयः॒ प्र नु याम॑न्सुदानवः । ये नो॒ अंहो॑ऽति॒पिप्र॑ति ॥ ७.०६६.०५ ॥
suprāvīrastu sa kṣayaḥ pra nu yāmansudānavaḥ | ye no aṃho'tipiprati || 7.066.05 ||
उ॒त स्व॒राजो॒ अदि॑ति॒रद॑ब्धस्य व्र॒तस्य॒ ये । म॒हो राजा॑न ईशते ॥ ७.०६६.०६ ॥
uta svarājo aditiradabdhasya vratasya ye | maho rājāna īśate || 7.066.06 ||
प्रति॑ वां॒ सूर॒ उदि॑ते मि॒त्रं गृ॑णीषे॒ वरु॑णम् । अ॒र्य॒मणं॑ रि॒शाद॑सम् ॥ ७.०६६.०७ ॥
prati vāṃ sūra udite mitraṃ gṛṇīṣe varuṇam | aryamaṇaṃ riśādasam || 7.066.07 ||
रा॒या हि॑रण्य॒या म॒तिरि॒यम॑वृ॒काय॒ शव॑से । इ॒यं विप्रा॑ मे॒धसा॑तये ॥ ७.०६६.०८ ॥
rāyā hiraṇyayā matiriyamavṛkāya śavase | iyaṃ viprā medhasātaye || 7.066.08 ||
ते स्या॑म देव वरुण॒ ते मि॑त्र सू॒रिभिः॑ स॒ह । इषं॒ स्व॑श्च धीमहि ॥ ७.०६६.०९ ॥
te syāma deva varuṇa te mitra sūribhiḥ saha | iṣaṃ svaśca dhīmahi || 7.066.09 ||
ब॒हवः॒ सूर॑चक्षसोऽग्निजि॒ह्वा ऋ॑ता॒वृधः॑ । त्रीणि॒ ये ये॒मुर्वि॒दथा॑नि धी॒तिभि॒र्विश्वा॑नि॒ परि॑भूतिभिः ॥ ७.०६६.१० ॥
bahavaḥ sūracakṣaso'gnijihvā ṛtāvṛdhaḥ | trīṇi ye yemurvidathāni dhītibhirviśvāni paribhūtibhiḥ || 7.066.10 ||
वि ये द॒धुः श॒रदं॒ मास॒मादह॑र्य॒ज्ञम॒क्तुं चादृच॑म् । अ॒ना॒प्यं वरु॑णो मि॒त्रो अ॑र्य॒मा क्ष॒त्रं राजा॑न आशत ॥ ७.०६६.११ ॥
vi ye dadhuḥ śaradaṃ māsamādaharyajñamaktuṃ cādṛcam | anāpyaṃ varuṇo mitro aryamā kṣatraṃ rājāna āśata || 7.066.11 ||
तद्वो॑ अ॒द्य म॑नामहे सू॒क्तैः सूर॒ उदि॑ते । यदोह॑ते॒ वरु॑णो मि॒त्रो अ॑र्य॒मा यू॒यमृ॒तस्य॑ रथ्यः ॥ ७.०६६.१२ ॥
tadvo adya manāmahe sūktaiḥ sūra udite | yadohate varuṇo mitro aryamā yūyamṛtasya rathyaḥ || 7.066.12 ||
ऋ॒तावा॑न ऋ॒तजा॑ता ऋता॒वृधो॑ घो॒रासो॑ अनृत॒द्विषः॑ । तेषां॑ वः सु॒म्ने सु॑च्छ॒र्दिष्ट॑मे नरः॒ स्याम॒ ये च॑ सू॒रयः॑ ॥ ७.०६६.१३ ॥
ṛtāvāna ṛtajātā ṛtāvṛdho ghorāso anṛtadviṣaḥ | teṣāṃ vaḥ sumne succhardiṣṭame naraḥ syāma ye ca sūrayaḥ || 7.066.13 ||
उदु॒ त्यद्द॑र्श॒तं वपु॑र्दि॒व ए॑ति प्रतिह्व॒रे । यदी॑मा॒शुर्वह॑ति दे॒व एत॑शो॒ विश्व॑स्मै॒ चक्ष॑से॒ अर॑म् ॥ ७.०६६.१४ ॥
udu tyaddarśataṃ vapurdiva eti pratihvare | yadīmāśurvahati deva etaśo viśvasmai cakṣase aram || 7.066.14 ||
शी॒र्ष्णःशी॑र्ष्णो॒ जग॑तस्त॒स्थुष॒स्पतिं॑ स॒मया॒ विश्व॒मा रजः॑ । स॒प्त स्वसा॑रः सुवि॒ताय॒ सूर्यं॒ वह॑न्ति ह॒रितो॒ रथे॑ ॥ ७.०६६.१५ ॥
śīrṣṇaḥśīrṣṇo jagatastasthuṣaspatiṃ samayā viśvamā rajaḥ | sapta svasāraḥ suvitāya sūryaṃ vahanti harito rathe || 7.066.15 ||
तच्चक्षु॑र्दे॒वहि॑तं शु॒क्रमु॒च्चर॑त् । पश्ये॑म श॒रदः॑ श॒तं जीवे॑म श॒रदः॑ श॒तम् ॥ ७.०६६.१६ ॥
taccakṣurdevahitaṃ śukramuccarat | paśyema śaradaḥ śataṃ jīvema śaradaḥ śatam || 7.066.16 ||
काव्ये॑भिरदा॒भ्या या॑तं वरुण द्यु॒मत् । मि॒त्रश्च॒ सोम॑पीतये ॥ ७.०६६.१७ ॥
kāvyebhiradābhyā yātaṃ varuṇa dyumat | mitraśca somapītaye || 7.066.17 ||
दि॒वो धाम॑भिर्वरुण मि॒त्रश्चा या॑तम॒द्रुहा॑ । पिब॑तं॒ सोम॑मातु॒जी ॥ ७.०६६.१८ ॥
divo dhāmabhirvaruṇa mitraścā yātamadruhā | pibataṃ somamātujī || 7.066.18 ||
आ या॑तं मित्रावरुणा जुषा॒णावाहु॑तिं नरा । पा॒तं सोम॑मृतावृधा ॥ ७.०६६.१९ ॥
ā yātaṃ mitrāvaruṇā juṣāṇāvāhutiṃ narā | pātaṃ somamṛtāvṛdhā || 7.066.19 ||
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
