Gyaandweep | Rig Veda Mandala , 8

प्र स॒म्राजं॑ चर्षणी॒नामिन्द्रं॑ स्तोता॒ नव्यं॑ गी॒र्भिः । नरं॑ नृ॒षाहं॒ मंहि॑ष्ठम् ॥ ८.०१६.०१ ॥

pra samrājaṃ carṣaṇīnāmindraṃ stotā navyaṃ gīrbhiḥ | naraṃ nṛṣāhaṃ maṃhiṣṭham || 8.016.01 ||

यस्मि॑न्नु॒क्थानि॒ रण्य॑न्ति॒ विश्वा॑नि च श्रव॒स्या॑ । अ॒पामवो॒ न स॑मु॒द्रे ॥ ८.०१६.०२ ॥

yasminnukthāni raṇyanti viśvāni ca śravasyā | apāmavo na samudre || 8.016.02 ||

तं सु॑ष्टु॒त्या वि॑वासे ज्येष्ठ॒राजं॒ भरे॑ कृ॒त्नुम् । म॒हो वा॒जिनं॑ स॒निभ्यः॑ ॥ ८.०१६.०३ ॥

taṃ suṣṭutyā vivāse jyeṣṭharājaṃ bhare kṛtnum | maho vājinaṃ sanibhyaḥ || 8.016.03 ||

यस्यानू॑ना गभी॒रा मदा॑ उ॒रव॒स्तरु॑त्राः । ह॒र्षु॒मन्तः॒ शूर॑सातौ ॥ ८.०१६.०४ ॥

yasyānūnā gabhīrā madā uravastarutrāḥ | harṣumantaḥ śūrasātau || 8.016.04 ||

तमिद्धने॑षु हि॒तेष्व॑धिवा॒काय॑ हवन्ते । येषा॒मिन्द्र॒स्ते ज॑यन्ति ॥ ८.०१६.०५ ॥

tamiddhaneṣu hiteṣvadhivākāya havante | yeṣāmindraste jayanti || 8.016.05 ||

तमिच्च्यौ॒त्नैरार्य॑न्ति॒ तं कृ॒तेभि॑श्चर्ष॒णयः॑ । ए॒ष इन्द्रो॑ वरिव॒स्कृत् ॥ ८.०१६.०६ ॥

tamiccyautnairāryanti taṃ kṛtebhiścarṣaṇayaḥ | eṣa indro varivaskṛt || 8.016.06 ||

इन्द्रो॑ ब्र॒ह्मेन्द्र॒ ऋषि॒रिन्द्रः॑ पु॒रू पु॑रुहू॒तः । म॒हान्म॒हीभिः॒ शची॑भिः ॥ ८.०१६.०७ ॥

indro brahmendra ṛṣirindraḥ purū puruhūtaḥ | mahānmahībhiḥ śacībhiḥ || 8.016.07 ||

स स्तोम्यः॒ स हव्यः॑ स॒त्यः सत्वा॑ तुविकू॒र्मिः । एक॑श्चि॒त्सन्न॒भिभू॑तिः ॥ ८.०१६.०८ ॥

sa stomyaḥ sa havyaḥ satyaḥ satvā tuvikūrmiḥ | ekaścitsannabhibhūtiḥ || 8.016.08 ||

तम॒र्केभि॒स्तं साम॑भि॒स्तं गा॑य॒त्रैश्च॑र्ष॒णयः॑ । इन्द्रं॑ वर्धन्ति क्षि॒तयः॑ ॥ ८.०१६.०९ ॥

tamarkebhistaṃ sāmabhistaṃ gāyatraiścarṣaṇayaḥ | indraṃ vardhanti kṣitayaḥ || 8.016.09 ||

प्र॒णे॒तारं॒ वस्यो॒ अच्छा॒ कर्ता॑रं॒ ज्योतिः॑ स॒मत्सु॑ । सा॒स॒ह्वांसं॑ यु॒धामित्रा॑न् ॥ ८.०१६.१० ॥

praṇetāraṃ vasyo acchā kartāraṃ jyotiḥ samatsu | sāsahvāṃsaṃ yudhāmitrān || 8.016.10 ||

स नः॒ पप्रिः॑ पारयाति स्व॒स्ति ना॒वा पु॑रुहू॒तः । इन्द्रो॒ विश्वा॒ अति॒ द्विषः॑ ॥ ८.०१६.११ ॥

sa naḥ papriḥ pārayāti svasti nāvā puruhūtaḥ | indro viśvā ati dviṣaḥ || 8.016.11 ||

स त्वं न॑ इन्द्र॒ वाजे॑भिर्दश॒स्या च॑ गातु॒या च॑ । अच्छा॑ च नः सु॒म्नं ने॑षि ॥ ८.०१६.१२ ॥

sa tvaṃ na indra vājebhirdaśasyā ca gātuyā ca | acchā ca naḥ sumnaṃ neṣi || 8.016.12 ||

Languages