दू॒रादि॒हेव॒ यत्स॒त्य॑रु॒णप्सु॒रशि॑श्वितत् । वि भा॒नुं वि॒श्वधा॑तनत् ॥ ८.००५.०१ ॥
dūrādiheva yatsatyaruṇapsuraśiśvitat | vi bhānuṃ viśvadhātanat || 8.005.01 ||
नृ॒वद्द॑स्रा मनो॒युजा॒ रथे॑न पृथु॒पाज॑सा । सचे॑थे अश्विनो॒षस॑म् ॥ ८.००५.०२ ॥
nṛvaddasrā manoyujā rathena pṛthupājasā | sacethe aśvinoṣasam || 8.005.02 ||
यु॒वाभ्यां॑ वाजिनीवसू॒ प्रति॒ स्तोमा॑ अदृक्षत । वाचं॑ दू॒तो यथो॑हिषे ॥ ८.००५.०३ ॥
yuvābhyāṃ vājinīvasū prati stomā adṛkṣata | vācaṃ dūto yathohiṣe || 8.005.03 ||
पु॒रु॒प्रि॒या ण॑ ऊ॒तये॑ पुरुम॒न्द्रा पु॑रू॒वसू॑ । स्तु॒षे कण्वा॑सो अ॒श्विना॑ ॥ ८.००५.०४ ॥
purupriyā ṇa ūtaye purumandrā purūvasū | stuṣe kaṇvāso aśvinā || 8.005.04 ||
मंहि॑ष्ठा वाज॒सात॑मे॒षय॑न्ता शु॒भस्पती॑ । गन्ता॑रा दा॒शुषो॑ गृ॒हम् ॥ ८.००५.०५ ॥
maṃhiṣṭhā vājasātameṣayantā śubhaspatī | gantārā dāśuṣo gṛham || 8.005.05 ||
ता सु॑दे॒वाय॑ दा॒शुषे॑ सुमे॒धामवि॑तारिणीम् । घृ॒तैर्गव्यू॑तिमुक्षतम् ॥ ८.००५.०६ ॥
tā sudevāya dāśuṣe sumedhāmavitāriṇīm | ghṛtairgavyūtimukṣatam || 8.005.06 ||
आ नः॒ स्तोम॒मुप॑ द्र॒वत्तूयं॑ श्ये॒नेभि॑रा॒शुभिः॑ । या॒तमश्वे॑भिरश्विना ॥ ८.००५.०७ ॥
ā naḥ stomamupa dravattūyaṃ śyenebhirāśubhiḥ | yātamaśvebhiraśvinā || 8.005.07 ||
येभि॑स्ति॒स्रः प॑रा॒वतो॑ दि॒वो विश्वा॑नि रोच॒ना । त्रीँर॒क्तून्प॑रि॒दीय॑थः ॥ ८.००५.०८ ॥
yebhistisraḥ parāvato divo viśvāni rocanā | trīँraktūnparidīyathaḥ || 8.005.08 ||
उ॒त नो॒ गोम॑ती॒रिष॑ उ॒त सा॒तीर॑हर्विदा । वि प॒थः सा॒तये॑ सितम् ॥ ८.००५.०९ ॥
uta no gomatīriṣa uta sātīraharvidā | vi pathaḥ sātaye sitam || 8.005.09 ||
आ नो॒ गोम॑न्तमश्विना सु॒वीरं॑ सु॒रथं॑ र॒यिम् । वो॒ळ्हमश्वा॑वती॒रिषः॑ ॥ ८.००५.१० ॥
ā no gomantamaśvinā suvīraṃ surathaṃ rayim | voळ्hamaśvāvatīriṣaḥ || 8.005.10 ||
वा॒वृ॒धा॒ना शु॑भस्पती दस्रा॒ हिर॑ण्यवर्तनी । पिब॑तं सो॒म्यं मधु॑ ॥ ८.००५.११ ॥
vāvṛdhānā śubhaspatī dasrā hiraṇyavartanī | pibataṃ somyaṃ madhu || 8.005.11 ||
अ॒स्मभ्यं॑ वाजिनीवसू म॒घव॑द्भ्यश्च स॒प्रथः॑ । छ॒र्दिर्य॑न्त॒मदा॑भ्यम् ॥ ८.००५.१२ ॥
asmabhyaṃ vājinīvasū maghavadbhyaśca saprathaḥ | chardiryantamadābhyam || 8.005.12 ||
नि षु ब्रह्म॒ जना॑नां॒ यावि॑ष्टं॒ तूय॒मा ग॑तम् । मो ष्व१॒॑न्याँ उपा॑रतम् ॥ ८.००५.१३ ॥
ni ṣu brahma janānāṃ yāviṣṭaṃ tūyamā gatam | mo ṣva1nyāँ upāratam || 8.005.13 ||
अ॒स्य पि॑बतमश्विना यु॒वं मद॑स्य॒ चारु॑णः । मध्वो॑ रा॒तस्य॑ धिष्ण्या ॥ ८.००५.१४ ॥
asya pibatamaśvinā yuvaṃ madasya cāruṇaḥ | madhvo rātasya dhiṣṇyā || 8.005.14 ||
अ॒स्मे आ व॑हतं र॒यिं श॒तव॑न्तं सह॒स्रिण॑म् । पु॒रु॒क्षुं वि॒श्वधा॑यसम् ॥ ८.००५.१५ ॥
asme ā vahataṃ rayiṃ śatavantaṃ sahasriṇam | purukṣuṃ viśvadhāyasam || 8.005.15 ||
पु॒रु॒त्रा चि॒द्धि वां॑ नरा वि॒ह्वय॑न्ते मनी॒षिणः॑ । वा॒घद्भि॑रश्वि॒ना ग॑तम् ॥ ८.००५.१६ ॥
purutrā ciddhi vāṃ narā vihvayante manīṣiṇaḥ | vāghadbhiraśvinā gatam || 8.005.16 ||
जना॑सो वृ॒क्तब॑र्हिषो ह॒विष्म॑न्तो अरं॒कृतः॑ । यु॒वां ह॑वन्ते अश्विना ॥ ८.००५.१७ ॥
janāso vṛktabarhiṣo haviṣmanto araṃkṛtaḥ | yuvāṃ havante aśvinā || 8.005.17 ||
अ॒स्माक॑म॒द्य वा॑म॒यं स्तोमो॒ वाहि॑ष्ठो॒ अन्त॑मः । यु॒वाभ्यां॑ भूत्वश्विना ॥ ८.००५.१८ ॥
asmākamadya vāmayaṃ stomo vāhiṣṭho antamaḥ | yuvābhyāṃ bhūtvaśvinā || 8.005.18 ||
यो ह॑ वां॒ मधु॑नो॒ दृति॒राहि॑तो रथ॒चर्ष॑णे । ततः॑ पिबतमश्विना ॥ ८.००५.१९ ॥
yo ha vāṃ madhuno dṛtirāhito rathacarṣaṇe | tataḥ pibatamaśvinā || 8.005.19 ||
तेन॑ नो वाजिनीवसू॒ पश्वे॑ तो॒काय॒ शं गवे॑ । वह॑तं॒ पीव॑री॒रिषः॑ ॥ ८.००५.२० ॥
tena no vājinīvasū paśve tokāya śaṃ gave | vahataṃ pīvarīriṣaḥ || 8.005.20 ||
उ॒त नो॑ दि॒व्या इष॑ उ॒त सिन्धू॑ँरहर्विदा । अप॒ द्वारे॑व वर्षथः ॥ ८.००५.२१ ॥
uta no divyā iṣa uta sindhūँraharvidā | apa dvāreva varṣathaḥ || 8.005.21 ||
क॒दा वां॑ तौ॒ग्र्यो वि॑धत्समु॒द्रे ज॑हि॒तो न॑रा । यद्वां॒ रथो॒ विभि॒ष्पता॑त् ॥ ८.००५.२२ ॥
kadā vāṃ taugryo vidhatsamudre jahito narā | yadvāṃ ratho vibhiṣpatāt || 8.005.22 ||
यु॒वं कण्वा॑य नासत्या॒ ऋपि॑रिप्ताय ह॒र्म्ये । शश्व॑दू॒तीर्द॑शस्यथः ॥ ८.००५.२३ ॥
yuvaṃ kaṇvāya nāsatyā ṛpiriptāya harmye | śaśvadūtīrdaśasyathaḥ || 8.005.23 ||
ताभि॒रा या॑तमू॒तिभि॒र्नव्य॑सीभिः सुश॒स्तिभिः॑ । यद्वां॑ वृषण्वसू हु॒वे ॥ ८.००५.२४ ॥
tābhirā yātamūtibhirnavyasībhiḥ suśastibhiḥ | yadvāṃ vṛṣaṇvasū huve || 8.005.24 ||
यथा॑ चि॒त्कण्व॒माव॑तं प्रि॒यमे॑धमुपस्तु॒तम् । अत्रिं॑ शि॒ञ्जार॑मश्विना ॥ ८.००५.२५ ॥
yathā citkaṇvamāvataṃ priyamedhamupastutam | atriṃ śiñjāramaśvinā || 8.005.25 ||
यथो॒त कृत्व्ये॒ धनें॒ऽशुं गोष्व॒गस्त्य॑म् । यथा॒ वाजे॑षु॒ सोभ॑रिम् ॥ ८.००५.२६ ॥
yathota kṛtvye dhaneṃ'śuṃ goṣvagastyam | yathā vājeṣu sobharim || 8.005.26 ||
ए॒ताव॑द्वां वृषण्वसू॒ अतो॑ वा॒ भूयो॑ अश्विना । गृ॒णन्तः॑ सु॒म्नमी॑महे ॥ ८.००५.२७ ॥
etāvadvāṃ vṛṣaṇvasū ato vā bhūyo aśvinā | gṛṇantaḥ sumnamīmahe || 8.005.27 ||
रथं॒ हिर॑ण्यवन्धुरं॒ हिर॑ण्याभीशुमश्विना । आ हि स्थाथो॑ दिवि॒स्पृश॑म् ॥ ८.००५.२८ ॥
rathaṃ hiraṇyavandhuraṃ hiraṇyābhīśumaśvinā | ā hi sthātho divispṛśam || 8.005.28 ||
हि॒र॒ण्ययी॑ वां॒ रभि॑री॒षा अक्षो॑ हिर॒ण्ययः॑ । उ॒भा च॒क्रा हि॑र॒ण्यया॑ ॥ ८.००५.२९ ॥
hiraṇyayī vāṃ rabhirīṣā akṣo hiraṇyayaḥ | ubhā cakrā hiraṇyayā || 8.005.29 ||
तेन॑ नो वाजिनीवसू परा॒वत॑श्चि॒दा ग॑तम् । उपे॒मां सु॑ष्टु॒तिं मम॑ ॥ ८.००५.३० ॥
tena no vājinīvasū parāvataścidā gatam | upemāṃ suṣṭutiṃ mama || 8.005.30 ||
आ व॑हेथे परा॒कात्पू॒र्वीर॒श्नन्ता॑वश्विना । इषो॒ दासी॑रमर्त्या ॥ ८.००५.३१ ॥
ā vahethe parākātpūrvīraśnantāvaśvinā | iṣo dāsīramartyā || 8.005.31 ||
आ नो॑ द्यु॒म्नैरा श्रवो॑भि॒रा रा॒या या॑तमश्विना । पुरु॑श्चन्द्रा॒ नास॑त्या ॥ ८.००५.३२ ॥
ā no dyumnairā śravobhirā rāyā yātamaśvinā | puruścandrā nāsatyā || 8.005.32 ||
एह वां॑ प्रुषि॒तप्स॑वो॒ वयो॑ वहन्तु प॒र्णिनः॑ । अच्छा॑ स्वध्व॒रं जन॑म् ॥ ८.००५.३३ ॥
eha vāṃ pruṣitapsavo vayo vahantu parṇinaḥ | acchā svadhvaraṃ janam || 8.005.33 ||
रथं॑ वा॒मनु॑गायसं॒ य इ॒षा वर्त॑ते स॒ह । न च॒क्रम॒भि बा॑धते ॥ ८.००५.३४ ॥
rathaṃ vāmanugāyasaṃ ya iṣā vartate saha | na cakramabhi bādhate || 8.005.34 ||
हि॒र॒ण्यये॑न॒ रथे॑न द्र॒वत्पा॑णिभि॒रश्वैः॑ । धीज॑वना॒ नास॑त्या ॥ ८.००५.३५ ॥
hiraṇyayena rathena dravatpāṇibhiraśvaiḥ | dhījavanā nāsatyā || 8.005.35 ||
यु॒वं मृ॒गं जा॑गृ॒वांसं॒ स्वद॑थो वा वृषण्वसू । ता नः॑ पृङ्क्तमि॒षा र॒यिम् ॥ ८.००५.३६ ॥
yuvaṃ mṛgaṃ jāgṛvāṃsaṃ svadatho vā vṛṣaṇvasū | tā naḥ pṛṅktamiṣā rayim || 8.005.36 ||
ता मे॑ अश्विना सनी॒नां वि॒द्यातं॒ नवा॑नाम् । यथा॑ चिच्चै॒द्यः क॒शुः श॒तमुष्ट्रा॑नां॒ दद॑त्स॒हस्रा॒ दश॒ गोना॑म् ॥ ८.००५.३७ ॥
tā me aśvinā sanīnāṃ vidyātaṃ navānām | yathā ciccaidyaḥ kaśuḥ śatamuṣṭrānāṃ dadatsahasrā daśa gonām || 8.005.37 ||
यो मे॒ हिर॑ण्यसंदृशो॒ दश॒ राज्ञो॒ अमं॑हत । अ॒ध॒स्प॒दा इच्चै॒द्यस्य॑ कृ॒ष्टय॑श्चर्म॒म्ना अ॒भितो॒ जनाः॑ ॥ ८.००५.३८ ॥
yo me hiraṇyasaṃdṛśo daśa rājño amaṃhata | adhaspadā iccaidyasya kṛṣṭayaścarmamnā abhito janāḥ || 8.005.38 ||
माकि॑रे॒ना प॒था गा॒द्येने॒मे यन्ति॑ चे॒दयः॑ । अ॒न्यो नेत्सू॒रिरोह॑ते भूरि॒दाव॑त्तरो॒ जनः॑ ॥ ८.००५.३९ ॥
mākirenā pathā gādyeneme yanti cedayaḥ | anyo netsūrirohate bhūridāvattaro janaḥ || 8.005.39 ||
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
