Gyaandweep | Rig Veda Mandala , 8

ज॒ज्ञा॒नो नु श॒तक्र॑तु॒र्वि पृ॑च्छ॒दिति॑ मा॒तर॑म् । क उ॒ग्राः के ह॑ श‍ृण्विरे ॥ ८.०७७.०१ ॥

jajñāno nu śatakraturvi pṛcchaditi mātaram | ka ugrāḥ ke ha śa‍्ṛṇvire || 8.077.01 ||

आदीं॑ शव॒स्य॑ब्रवीदौर्णवा॒भम॑ही॒शुव॑म् । ते पु॑त्र सन्तु नि॒ष्टुरः॑ ॥ ८.०७७.०२ ॥

ādīṃ śavasyabravīdaurṇavābhamahīśuvam | te putra santu niṣṭuraḥ || 8.077.02 ||

समित्तान्वृ॑त्र॒हाखि॑द॒त्खे अ॒राँ इ॑व॒ खेद॑या । प्रवृ॑द्धो दस्यु॒हाभ॑वत् ॥ ८.०७७.०३ ॥

samittānvṛtrahākhidatkhe arāँ iva khedayā | pravṛddho dasyuhābhavat || 8.077.03 ||

एक॑या प्रति॒धापि॑बत्सा॒कं सरां॑सि त्रिं॒शत॑म् । इन्द्रः॒ सोम॑स्य काणु॒का ॥ ८.०७७.०४ ॥

ekayā pratidhāpibatsākaṃ sarāṃsi triṃśatam | indraḥ somasya kāṇukā || 8.077.04 ||

अ॒भि ग॑न्ध॒र्वम॑तृणदबु॒ध्नेषु॒ रज॒स्स्वा । इन्द्रो॑ ब्र॒ह्मभ्य॒ इद्वृ॒धे ॥ ८.०७७.०५ ॥

abhi gandharvamatṛṇadabudhneṣu rajassvā | indro brahmabhya idvṛdhe || 8.077.05 ||

निरा॑विध्यद्गि॒रिभ्य॒ आ धा॒रय॑त्प॒क्वमो॑द॒नम् । इन्द्रो॑ बु॒न्दं स्वा॑ततम् ॥ ८.०७७.०६ ॥

nirāvidhyadgiribhya ā dhārayatpakvamodanam | indro bundaṃ svātatam || 8.077.06 ||

श॒तब्र॑ध्न॒ इषु॒स्तव॑ स॒हस्र॑पर्ण॒ एक॒ इत् । यमि॑न्द्र चकृ॒षे युज॑म् ॥ ८.०७७.०७ ॥

śatabradhna iṣustava sahasraparṇa eka it | yamindra cakṛṣe yujam || 8.077.07 ||

तेन॑ स्तो॒तृभ्य॒ आ भ॑र॒ नृभ्यो॒ नारि॑भ्यो॒ अत्त॑वे । स॒द्यो जा॒त ऋ॑भुष्ठिर ॥ ८.०७७.०८ ॥

tena stotṛbhya ā bhara nṛbhyo nāribhyo attave | sadyo jāta ṛbhuṣṭhira || 8.077.08 ||

ए॒ता च्यौ॒त्नानि॑ ते कृ॒ता वर्षि॑ष्ठानि॒ परी॑णसा । हृ॒दा वी॒ड्व॑धारयः ॥ ८.०७७.०९ ॥

etā cyautnāni te kṛtā varṣiṣṭhāni parīṇasā | hṛdā vīḍvadhārayaḥ || 8.077.09 ||

विश्वेत्ता विष्णु॒राभ॑रदुरुक्र॒मस्त्वेषि॑तः । श॒तं म॑हि॒षान्क्षी॑रपा॒कमो॑द॒नं व॑रा॒हमिन्द्र॑ एमु॒षम् ॥ ८.०७७.१० ॥

viśvettā viṣṇurābharadurukramastveṣitaḥ | śataṃ mahiṣānkṣīrapākamodanaṃ varāhamindra emuṣam || 8.077.10 ||

तु॒वि॒क्षं ते॒ सुकृ॑तं सू॒मयं॒ धनुः॑ सा॒धुर्बु॒न्दो हि॑र॒ण्ययः॑ । उ॒भा ते॑ बा॒हू रण्या॒ सुसं॑स्कृत ऋदू॒पे चि॑दृदू॒वृधा॑ ॥ ८.०७७.११ ॥

tuvikṣaṃ te sukṛtaṃ sūmayaṃ dhanuḥ sādhurbundo hiraṇyayaḥ | ubhā te bāhū raṇyā susaṃskṛta ṛdūpe cidṛdūvṛdhā || 8.077.11 ||

Languages