Gyaandweep | Rig Veda Mandala , 8

दे॒वाना॒मिदवो॑ म॒हत्तदा वृ॑णीमहे व॒यम् । वृष्णा॑म॒स्मभ्य॑मू॒तये॑ ॥ ८.०८३.०१ ॥

devānāmidavo mahattadā vṛṇīmahe vayam | vṛṣṇāmasmabhyamūtaye || 8.083.01 ||

ते नः॑ सन्तु॒ युजः॒ सदा॒ वरु॑णो मि॒त्रो अ॑र्य॒मा । वृ॒धास॑श्च॒ प्रचे॑तसः ॥ ८.०८३.०२ ॥

te naḥ santu yujaḥ sadā varuṇo mitro aryamā | vṛdhāsaśca pracetasaḥ || 8.083.02 ||

अति॑ नो विष्पि॒ता पु॒रु नौ॒भिर॒पो न प॑र्षथ । यू॒यमृ॒तस्य॑ रथ्यः ॥ ८.०८३.०३ ॥

ati no viṣpitā puru naubhirapo na parṣatha | yūyamṛtasya rathyaḥ || 8.083.03 ||

वा॒मं नो॑ अस्त्वर्यमन्वा॒मं व॑रुण॒ शंस्य॑म् । वा॒मं ह्या॑वृणी॒महे॑ ॥ ८.०८३.०४ ॥

vāmaṃ no astvaryamanvāmaṃ varuṇa śaṃsyam | vāmaṃ hyāvṛṇīmahe || 8.083.04 ||

वा॒मस्य॒ हि प्र॑चेतस॒ ईशा॑नाशो रिशादसः । नेमा॑दित्या अ॒घस्य॒ यत् ॥ ८.०८३.०५ ॥

vāmasya hi pracetasa īśānāśo riśādasaḥ | nemādityā aghasya yat || 8.083.05 ||

व॒यमिद्वः॑ सुदानवः क्षि॒यन्तो॒ यान्तो॒ अध्व॒न्ना । देवा॑ वृ॒धाय॑ हूमहे ॥ ८.०८३.०६ ॥

vayamidvaḥ sudānavaḥ kṣiyanto yānto adhvannā | devā vṛdhāya hūmahe || 8.083.06 ||

अधि॑ न इन्द्रैषां॒ विष्णो॑ सजा॒त्या॑नाम् । इ॒ता मरु॑तो॒ अश्वि॑ना ॥ ८.०८३.०७ ॥

adhi na indraiṣāṃ viṣṇo sajātyānām | itā maruto aśvinā || 8.083.07 ||

प्र भ्रा॑तृ॒त्वं सु॑दान॒वोऽध॑ द्वि॒ता स॑मा॒न्या । मा॒तुर्गर्भे॑ भरामहे ॥ ८.०८३.०८ ॥

pra bhrātṛtvaṃ sudānavo'dha dvitā samānyā | māturgarbhe bharāmahe || 8.083.08 ||

यू॒यं हि ष्ठा सु॑दानव॒ इन्द्र॑ज्येष्ठा अ॒भिद्य॑वः । अधा॑ चिद्व उ॒त ब्रु॑वे ॥ ८.०८३.०९ ॥

yūyaṃ hi ṣṭhā sudānava indrajyeṣṭhā abhidyavaḥ | adhā cidva uta bruve || 8.083.09 ||

Languages