Gyaandweep | Rig Veda Mandala , 9

ए॒ष दे॒वो अम॑र्त्यः पर्ण॒वीरि॑व दीयति । अ॒भि द्रोणा॑न्या॒सद॑म् ॥ ९.००३.०१ ॥

eṣa devo amartyaḥ parṇavīriva dīyati | abhi droṇānyāsadam || 9.003.01 ||

ए॒ष दे॒वो वि॒पा कृ॒तोऽति॒ ह्वरां॑सि धावति । पव॑मानो॒ अदा॑भ्यः ॥ ९.००३.०२ ॥

eṣa devo vipā kṛto'ti hvarāṃsi dhāvati | pavamāno adābhyaḥ || 9.003.02 ||

ए॒ष दे॒वो वि॑प॒न्युभिः॒ पव॑मान ऋता॒युभिः॑ । हरि॒र्वाजा॑य मृज्यते ॥ ९.००३.०३ ॥

eṣa devo vipanyubhiḥ pavamāna ṛtāyubhiḥ | harirvājāya mṛjyate || 9.003.03 ||

ए॒ष विश्वा॑नि॒ वार्या॒ शूरो॒ यन्नि॑व॒ सत्व॑भिः । पव॑मानः सिषासति ॥ ९.००३.०४ ॥

eṣa viśvāni vāryā śūro yanniva satvabhiḥ | pavamānaḥ siṣāsati || 9.003.04 ||

ए॒ष दे॒वो र॑थर्यति॒ पव॑मानो दशस्यति । आ॒विष्कृ॑णोति वग्व॒नुम् ॥ ९.००३.०५ ॥

eṣa devo ratharyati pavamāno daśasyati | āviṣkṛṇoti vagvanum || 9.003.05 ||

ए॒ष विप्रै॑र॒भिष्टु॑तो॒ऽपो दे॒वो वि गा॑हते । दध॒द्रत्ना॑नि दा॒शुषे॑ ॥ ९.००३.०६ ॥

eṣa viprairabhiṣṭuto'po devo vi gāhate | dadhadratnāni dāśuṣe || 9.003.06 ||

ए॒ष दिवं॒ वि धा॑वति ति॒रो रजां॑सि॒ धार॑या । पव॑मानः॒ कनि॑क्रदत् ॥ ९.००३.०७ ॥

eṣa divaṃ vi dhāvati tiro rajāṃsi dhārayā | pavamānaḥ kanikradat || 9.003.07 ||

ए॒ष दिवं॒ व्यास॑रत्ति॒रो रजां॒स्यस्पृ॑तः । पव॑मानः स्वध्व॒रः ॥ ९.००३.०८ ॥

eṣa divaṃ vyāsarattiro rajāṃsyaspṛtaḥ | pavamānaḥ svadhvaraḥ || 9.003.08 ||

ए॒ष प्र॒त्नेन॒ जन्म॑ना दे॒वो दे॒वेभ्यः॑ सु॒तः । हरिः॑ प॒वित्रे॑ अर्षति ॥ ९.००३.०९ ॥

eṣa pratnena janmanā devo devebhyaḥ sutaḥ | hariḥ pavitre arṣati || 9.003.09 ||

ए॒ष उ॒ स्य पु॑रुव्र॒तो ज॑ज्ञा॒नो ज॒नय॒न्निषः॑ । धार॑या पवते सु॒तः ॥ ९.००३.१० ॥

eṣa u sya puruvrato jajñāno janayanniṣaḥ | dhārayā pavate sutaḥ || 9.003.10 ||

Languages