Gyaandweep | Rig Veda Mandala , 9

म॒न्द्रया॑ सोम॒ धार॑या॒ वृषा॑ पवस्व देव॒युः । अव्यो॒ वारे॑ष्वस्म॒युः ॥ ९.००६.०१ ॥

mandrayā soma dhārayā vṛṣā pavasva devayuḥ | avyo vāreṣvasmayuḥ || 9.006.01 ||

अ॒भि त्यं मद्यं॒ मद॒मिन्द॒विन्द्र॒ इति॑ क्षर । अ॒भि वा॒जिनो॒ अर्व॑तः ॥ ९.००६.०२ ॥

abhi tyaṃ madyaṃ madamindavindra iti kṣara | abhi vājino arvataḥ || 9.006.02 ||

अ॒भि त्यं पू॒र्व्यं मदं॑ सुवा॒नो अ॑र्ष प॒वित्र॒ आ । अ॒भि वाज॑मु॒त श्रवः॑ ॥ ९.००६.०३ ॥

abhi tyaṃ pūrvyaṃ madaṃ suvāno arṣa pavitra ā | abhi vājamuta śravaḥ || 9.006.03 ||

अनु॑ द्र॒प्सास॒ इन्द॑व॒ आपो॒ न प्र॒वता॑सरन् । पु॒ना॒ना इन्द्र॑माशत ॥ ९.००६.०४ ॥

anu drapsāsa indava āpo na pravatāsaran | punānā indramāśata || 9.006.04 ||

यमत्य॑मिव वा॒जिनं॑ मृ॒जन्ति॒ योष॑णो॒ दश॑ । वने॒ क्रीळ॑न्त॒मत्य॑विम् ॥ ९.००६.०५ ॥

yamatyamiva vājinaṃ mṛjanti yoṣaṇo daśa | vane krīळntamatyavim || 9.006.05 ||

तं गोभि॒र्वृष॑णं॒ रसं॒ मदा॑य दे॒ववी॑तये । सु॒तं भरा॑य॒ सं सृ॑ज ॥ ९.००६.०६ ॥

taṃ gobhirvṛṣaṇaṃ rasaṃ madāya devavītaye | sutaṃ bharāya saṃ sṛja || 9.006.06 ||

दे॒वो दे॒वाय॒ धार॒येन्द्रा॑य पवते सु॒तः । पयो॒ यद॑स्य पी॒पय॑त् ॥ ९.००६.०७ ॥

devo devāya dhārayendrāya pavate sutaḥ | payo yadasya pīpayat || 9.006.07 ||

आ॒त्मा य॒ज्ञस्य॒ रंह्या॑ सुष्वा॒णः प॑वते सु॒तः । प्र॒त्नं नि पा॑ति॒ काव्य॑म् ॥ ९.००६.०८ ॥

ātmā yajñasya raṃhyā suṣvāṇaḥ pavate sutaḥ | pratnaṃ ni pāti kāvyam || 9.006.08 ||

ए॒वा पु॑ना॒न इ॑न्द्र॒युर्मदं॑ मदिष्ठ वी॒तये॑ । गुहा॑ चिद्दधिषे॒ गिरः॑ ॥ ९.००६.०९ ॥

evā punāna indrayurmadaṃ madiṣṭha vītaye | guhā ciddadhiṣe giraḥ || 9.006.09 ||

Languages