Gyaandweep | Rig Veda Mandala , 9

असृ॑ग्र॒मिन्द॑वः प॒था धर्म॑न्नृ॒तस्य॑ सु॒श्रियः॑ । वि॒दा॒ना अ॑स्य॒ योज॑नम् ॥ ९.००७.०१ ॥

asṛgramindavaḥ pathā dharmannṛtasya suśriyaḥ | vidānā asya yojanam || 9.007.01 ||

प्र धारा॒ मध्वो॑ अग्रि॒यो म॒हीर॒पो वि गा॑हते । ह॒विर्ह॒विष्षु॒ वन्द्यः॑ ॥ ९.००७.०२ ॥

pra dhārā madhvo agriyo mahīrapo vi gāhate | havirhaviṣṣu vandyaḥ || 9.007.02 ||

प्र यु॒जो वा॒चो अ॑ग्रि॒यो वृषाव॑ चक्रद॒द्वने॑ । सद्मा॒भि स॒त्यो अ॑ध्व॒रः ॥ ९.००७.०३ ॥

pra yujo vāco agriyo vṛṣāva cakradadvane | sadmābhi satyo adhvaraḥ || 9.007.03 ||

परि॒ यत्काव्या॑ क॒विर्नृ॒म्णा वसा॑नो॒ अर्ष॑ति । स्व॑र्वा॒जी सि॑षासति ॥ ९.००७.०४ ॥

pari yatkāvyā kavirnṛmṇā vasāno arṣati | svarvājī siṣāsati || 9.007.04 ||

पव॑मानो अ॒भि स्पृधो॒ विशो॒ राजे॑व सीदति । यदी॑मृ॒ण्वन्ति॑ वे॒धसः॑ ॥ ९.००७.०५ ॥

pavamāno abhi spṛdho viśo rājeva sīdati | yadīmṛṇvanti vedhasaḥ || 9.007.05 ||

अव्यो॒ वारे॒ परि॑ प्रि॒यो हरि॒र्वने॑षु सीदति । रे॒भो व॑नुष्यते म॒ती ॥ ९.००७.०६ ॥

avyo vāre pari priyo harirvaneṣu sīdati | rebho vanuṣyate matī || 9.007.06 ||

स वा॒युमिन्द्र॑म॒श्विना॑ सा॒कं मदे॑न गच्छति । रणा॒ यो अ॑स्य॒ धर्म॑भिः ॥ ९.००७.०७ ॥

sa vāyumindramaśvinā sākaṃ madena gacchati | raṇā yo asya dharmabhiḥ || 9.007.07 ||

आ मि॒त्रावरु॑णा॒ भगं॒ मध्वः॑ पवन्त ऊ॒र्मयः॑ । वि॒दा॒ना अ॑स्य॒ शक्म॑भिः ॥ ९.००७.०८ ॥

ā mitrāvaruṇā bhagaṃ madhvaḥ pavanta ūrmayaḥ | vidānā asya śakmabhiḥ || 9.007.08 ||

अ॒स्मभ्यं॑ रोदसी र॒यिं मध्वो॒ वाज॑स्य सा॒तये॑ । श्रवो॒ वसू॑नि॒ सं जि॑तम् ॥ ९.००७.०९ ॥

asmabhyaṃ rodasī rayiṃ madhvo vājasya sātaye | śravo vasūni saṃ jitam || 9.007.09 ||

Languages