Gyaandweep | Rig Veda Mandala , 9

परि॑ प्रि॒या दि॒वः क॒विर्वयां॑सि न॒प्त्यो॑र्हि॒तः । सु॒वा॒नो या॑ति क॒विक्र॑तुः ॥ ९.००९.०१ ॥

pari priyā divaḥ kavirvayāṃsi naptyorhitaḥ | suvāno yāti kavikratuḥ || 9.009.01 ||

प्रप्र॒ क्षया॑य॒ पन्य॑से॒ जना॑य॒ जुष्टो॑ अ॒द्रुहे॑ । वी॒त्य॑र्ष॒ चनि॑ष्ठया ॥ ९.००९.०२ ॥

prapra kṣayāya panyase janāya juṣṭo adruhe | vītyarṣa caniṣṭhayā || 9.009.02 ||

स सू॒नुर्मा॒तरा॒ शुचि॑र्जा॒तो जा॒ते अ॑रोचयत् । म॒हान्म॒ही ऋ॑ता॒वृधा॑ ॥ ९.००९.०३ ॥

sa sūnurmātarā śucirjāto jāte arocayat | mahānmahī ṛtāvṛdhā || 9.009.03 ||

स स॒प्त धी॒तिभि॑र्हि॒तो न॒द्यो॑ अजिन्वद॒द्रुहः॑ । या एक॒मक्षि॑ वावृ॒धुः ॥ ९.००९.०४ ॥

sa sapta dhītibhirhito nadyo ajinvadadruhaḥ | yā ekamakṣi vāvṛdhuḥ || 9.009.04 ||

ता अ॒भि सन्त॒मस्तृ॑तं म॒हे युवा॑न॒मा द॑धुः । इन्दु॑मिन्द्र॒ तव॑ व्र॒ते ॥ ९.००९.०५ ॥

tā abhi santamastṛtaṃ mahe yuvānamā dadhuḥ | indumindra tava vrate || 9.009.05 ||

अ॒भि वह्नि॒रम॑र्त्यः स॒प्त प॑श्यति॒ वाव॑हिः । क्रिवि॑र्दे॒वीर॑तर्पयत् ॥ ९.००९.०६ ॥

abhi vahniramartyaḥ sapta paśyati vāvahiḥ | krivirdevīratarpayat || 9.009.06 ||

अवा॒ कल्पे॑षु नः पुम॒स्तमां॑सि सोम॒ योध्या॑ । तानि॑ पुनान जङ्घनः ॥ ९.००९.०७ ॥

avā kalpeṣu naḥ pumastamāṃsi soma yodhyā | tāni punāna jaṅghanaḥ || 9.009.07 ||

नू नव्य॑से॒ नवी॑यसे सू॒क्ताय॑ साधया प॒थः । प्र॒त्न॒वद्रो॑चया॒ रुचः॑ ॥ ९.००९.०८ ॥

nū navyase navīyase sūktāya sādhayā pathaḥ | pratnavadrocayā rucaḥ || 9.009.08 ||

पव॑मान॒ महि॒ श्रवो॒ गामश्वं॑ रासि वी॒रव॑त् । सना॑ मे॒धां सना॒ स्वः॑ ॥ ९.००९.०९ ॥

pavamāna mahi śravo gāmaśvaṃ rāsi vīravat | sanā medhāṃ sanā svaḥ || 9.009.09 ||

Languages