॥ नाट्यशास्त्रम् अध्याय २० ॥
|| nāṭyaśāstram adhyāya 20 ||
॥ श्रीरस्तु ॥
|| śrīrastu ||
अथ विंशोऽध्यायः ।
atha viṃśo'dhyāyaḥ |
समुत्थानं तु वृत्तीनां व्याख्याम्यनुपूर्वशः । यथा वस्तूद्भवं चैव काव्यानां च विकल्पनम् ॥ १॥
samutthānaṃ tu vṛttīnāṃ vyākhyāmyanupūrvaśaḥ | yathā vastūdbhavaṃ caiva kāvyānāṃ ca vikalpanam || 1||
एकार्णवं जगत् कृत्वा भगवानच्युतो यदा । शेते स्म नागपर्यङ्के लोकान् संक्षिप्य मायया ॥ २॥
ekārṇavaṃ jagat kṛtvā bhagavānacyuto yadā | śete sma nāgaparyaṅke lokān saṃkṣipya māyayā || 2||
अथ वीर्यबलोन्मतावसुरौ मधुकैअटभौ । तर्जयामासतुर्देवं तरसा युद्धकाङ्क्षया ॥ ३॥
atha vīryabalonmatāvasurau madhukaiaṭabhau | tarjayāmāsaturdevaṃ tarasā yuddhakāṅkṣayā || 3||
निजबाहू विमृदनन्तौ भूतभावनमक्षयम् । जानुभिर्मुष्टिभिश्चैव योधयामासतुः प्रभुम् ॥ ४॥
nijabāhū vimṛdanantau bhūtabhāvanamakṣayam | jānubhirmuṣṭibhiścaiva yodhayāmāsatuḥ prabhum || 4||
बहुभिः परुषैर्वाक्यैरन्योन्यसमभिद्रवम् । नानाधिक्षेपवचनैः कम्पयन्ताविवोदधिम् ॥ ५॥
bahubhiḥ paruṣairvākyairanyonyasamabhidravam | nānādhikṣepavacanaiḥ kampayantāvivodadhim || 5||
तयोर्नानाप्रकाराणि वचांसि वदतोस्तदा । श्रुत्वा त्वभिहतमना द्रुहिणो वाक्यमब्रवीत् ॥ ६॥
tayornānāprakārāṇi vacāṃsi vadatostadā | śrutvā tvabhihatamanā druhiṇo vākyamabravīt || 6||
किमिदं भरतीवृत्तिर्वाग्भिरेव प्रवर्तते । उत्तरोत्तरसम्बद्धा नन्विमौ निधनं नयः ॥ ७॥
kimidaṃ bharatīvṛttirvāgbhireva pravartate | uttarottarasambaddhā nanvimau nidhanaṃ nayaḥ || 7||
पितामहवचः श्रुत्वा प्रोवाच मधुसूदनः । कार्यहेतोर्मया ब्रह्मन् भारतीयं विनिर्मिता ॥ ८॥
pitāmahavacaḥ śrutvā provāca madhusūdanaḥ | kāryahetormayā brahman bhāratīyaṃ vinirmitā || 8||
वदतां वाक्यभूयिष्ठा भारतीयं भविष्यति । तस्मादेतौ निहन्म्यद्येत्युवाच वचनं हरिः ॥ ९॥
vadatāṃ vākyabhūyiṣṭhā bhāratīyaṃ bhaviṣyati | tasmādetau nihanmyadyetyuvāca vacanaṃ hariḥ || 9||
शुद्धैरविकृतैरङ्गैः साङ्गहारैस्तथा भृशम् । योधयामासतुर्दैत्यौ युद्धमार्गविशारदौ ॥ १०॥
śuddhairavikṛtairaṅgaiḥ sāṅgahāraistathā bhṛśam | yodhayāmāsaturdaityau yuddhamārgaviśāradau || 10||
भूमिसंयोगसंस्थानैः पदन्यासैर्हरेस्तदा । अतिभारोऽभवद् भूमेर्भारती तत्र निर्मिता ॥ ११॥
bhūmisaṃyogasaṃsthānaiḥ padanyāsairharestadā | atibhāro'bhavad bhūmerbhāratī tatra nirmitā || 11||
वल्गितैः शार्ङ्गधनुषस्तीव्रैर्दीप्ततथैरथ । सत्वाधिकैरसम्भ्रान्तैः सात्त्वती तत्र निर्मिता ॥ १२॥
valgitaiḥ śārṅgadhanuṣastīvrairdīptatathairatha | satvādhikairasambhrāntaiḥ sāttvatī tatra nirmitā || 12||
विचित्रैरङ्गहारैस्तु देवो लीलासमन्वितैः । बबन्ध यच्छिखापाशं कैशिकी तत्र निर्मिता ॥ १३॥
vicitrairaṅgahāraistu devo līlāsamanvitaiḥ | babandha yacchikhāpāśaṃ kaiśikī tatra nirmitā || 13||
संरम्भावेगबहुलैर्नानाचारी समुत्थितैः । नियुद्धकरणैश्चित्रैरुत्पन्नारभटी ततः ॥ १४॥
saṃrambhāvegabahulairnānācārī samutthitaiḥ | niyuddhakaraṇaiścitrairutpannārabhaṭī tataḥ || 14||
यां यां देवः समाचष्टे क्रियां वृत्तिषु संस्थिताम् । तां तदर्थानुगैर्जप्येऐर्द्रुहिणः प्रत्यपूजयत् ॥१५॥
yāṃ yāṃ devaḥ samācaṣṭe kriyāṃ vṛttiṣu saṃsthitām | tāṃ tadarthānugairjapyeairdruhiṇaḥ pratyapūjayat ||15||
यदा हतौ तावसुरौ हरिणा मधुकैटभौ । ततोऽब्रवीत् पद्मयोनिर्नारायणमरिन्दमम् ॥ १६॥
yadā hatau tāvasurau hariṇā madhukaiṭabhau | tato'bravīt padmayonirnārāyaṇamarindamam || 16||
अहो विचित्रैर्विषमैः स्फुटैः सललितैरपि । अङ्गहारैः कृतं देव त्वया दानवनाशनम् ॥ १७॥
aho vicitrairviṣamaiḥ sphuṭaiḥ salalitairapi | aṅgahāraiḥ kṛtaṃ deva tvayā dānavanāśanam || 17||
तस्मादयं हि लोकस्य नियुद्धसमयक्रमः । सर्वशस्त्रविमोक्षेषु न्यायसन्ज्ञो भविष्यति ॥ १८॥
tasmādayaṃ hi lokasya niyuddhasamayakramaḥ | sarvaśastravimokṣeṣu nyāyasanjño bhaviṣyati || 18||
न्यायाश्रितैरङ्गहारैर्न्यायाच्चैव समुत्थितैः । यस्माद्युद्धानि वर्तन्ते तस्मान्यायाः प्रकीर्तिताः ॥ १९॥
nyāyāśritairaṅgahārairnyāyāccaiva samutthitaiḥ | yasmādyuddhāni vartante tasmānyāyāḥ prakīrtitāḥ || 19||
[चारीषु च समुत्पन्नो नानाचारीसमाश्रयः । न्यायसन्ज्ञः कृतो ह्येष द्रुहिणेन महात्मना॥ २०॥
[cārīṣu ca samutpanno nānācārīsamāśrayaḥ | nyāyasanjñaḥ kṛto hyeṣa druhiṇena mahātmanā|| 20||
ततो वेदेषु निक्षिप्ता द्रुहिणेन महात्मना । पुनरिष्वस्त्रजाते च नानाचारीसमाकुले ॥ २१॥
tato vedeṣu nikṣiptā druhiṇena mahātmanā | punariṣvastrajāte ca nānācārīsamākule || 21||
पुनर्नाट्यप्रयोगेषु नानाभावसम्न्विताः । वृत्तिसन्ज्ञाः कृता ह्येताः काव्यबन्धसमाश्रयाः] ॥ २२॥
punarnāṭyaprayogeṣu nānābhāvasamnvitāḥ | vṛttisanjñāḥ kṛtā hyetāḥ kāvyabandhasamāśrayāḥ] || 22||
चरितैर्यस्य देवस्य जप्यं यद्यादृशं कृतम् । ऋषिभिस्तादृशी वृत्तिअः कृता पाठ्यादिसंयुता ॥ २३॥
caritairyasya devasya japyaṃ yadyādṛśaṃ kṛtam | ṛṣibhistādṛśī vṛttiaḥ kṛtā pāṭhyādisaṃyutā || 23||
नाट्यवेदसमुत्पना वागङ्गाभिनयात्मिका । मया काव्यक्रिअयाहेतोः प्रक्षिप्ता द्रुहिणाज्ञया ॥ २४॥
nāṭyavedasamutpanā vāgaṅgābhinayātmikā | mayā kāvyakriayāhetoḥ prakṣiptā druhiṇājñayā || 24||
ऋग्वेदाद्भारती क्षिप्ता यजुर्वेदाच्च सात्त्वती । कैशिकी सामवेदाच्च शेषा चाथर्वणादपि ॥ २५॥
ṛgvedādbhāratī kṣiptā yajurvedācca sāttvatī | kaiśikī sāmavedācca śeṣā cātharvaṇādapi || 25||
या वाक्प्रधाना पुरुषप्रयोज्या स्त्रीवर्जिता सङ्कृतपाठ्ययुक्ता । स्वनामधेयैर्भरतैः प्रयुक्ता सा भारती नाम भवेत्तु वृत्तिः ॥ २६॥
yā vākpradhānā puruṣaprayojyā strīvarjitā saṅkṛtapāṭhyayuktā | svanāmadheyairbharataiḥ prayuktā sā bhāratī nāma bhavettu vṛttiḥ || 26||
भेदास्तस्यास्तु विज्ञेयाश्चत्वारोऽङ्गत्वमागताः । प्ररोचनामुखं चैव वीथी प्रहसनं तथा ॥ २७॥
bhedāstasyāstu vijñeyāścatvāro'ṅgatvamāgatāḥ | prarocanāmukhaṃ caiva vīthī prahasanaṃ tathā || 27||
जयाभ्युदयिनी चैव मङ्गल्या विजयावहा । सर्वपापप्रशमनी पूर्वरङ्गे प्ररोचना ॥ २८॥
jayābhyudayinī caiva maṅgalyā vijayāvahā | sarvapāpapraśamanī pūrvaraṅge prarocanā || 28||
[उपक्षेपेण काव्यस्य हेतुयुक्तिसमाश्रया । सिद्धेनामन्त्रणा या तु विज्ञेया सा प्ररोचना] ॥ २९॥
[upakṣepeṇa kāvyasya hetuyuktisamāśrayā | siddhenāmantraṇā yā tu vijñeyā sā prarocanā] || 29||
नटी विदूषको वापि पारिपार्श्विक एव वा । सूत्रधारेण सहिताः संलापं यत्तु कुर्वते ॥ ३०॥
naṭī vidūṣako vāpi pāripārśvika eva vā | sūtradhāreṇa sahitāḥ saṃlāpaṃ yattu kurvate || 30||
चित्रैर्वाक्यैः स्वकार्यारोत्थैर्वीत्थ्यङ्गेरन्यथापि वा । आमुखं तत्तु विज्ञेयं बुधैः प्रस्तावनापि वा ॥ ३१॥
citrairvākyaiḥ svakāryārotthairvītthyaṅgeranyathāpi vā | āmukhaṃ tattu vijñeyaṃ budhaiḥ prastāvanāpi vā || 31||
[लक्षणं पूर्वमुक्तं तु वीत्थ्याः प्रहसनस्य च । आमुखाङ्गान्यतो वक्ष्ये यथावदनुपूर्वशः] ॥ ३२॥
[lakṣaṇaṃ pūrvamuktaṃ tu vītthyāḥ prahasanasya ca | āmukhāṅgānyato vakṣye yathāvadanupūrvaśaḥ] || 32||
उद्धात्यकः कथोद्धातः प्रयोगातिशयस्तथा । प्रवृत्तकावलगिते पञ्चाङ्गान्यामुखस्य तु ॥ ३३॥
uddhātyakaḥ kathoddhātaḥ prayogātiśayastathā | pravṛttakāvalagite pañcāṅgānyāmukhasya tu || 33||
उद्धात्यकावलगितलक्षणं कथितं मया । शेषाणां लक्षणं विप्रा व्याख्यास्याम्यानुपूर्वशः ॥ ३४॥
uddhātyakāvalagitalakṣaṇaṃ kathitaṃ mayā | śeṣāṇāṃ lakṣaṇaṃ viprā vyākhyāsyāmyānupūrvaśaḥ || 34||
सुत्रधारस्य वाक्यं वा यत्र वाक्यार्थमेव वा । गृहीतां प्रविशेत्पात्रं कथोद्धातः स कीर्तितः ॥ ३५॥
sutradhārasya vākyaṃ vā yatra vākyārthameva vā | gṛhītāṃ praviśetpātraṃ kathoddhātaḥ sa kīrtitaḥ || 35||
प्रयोगे तु प्रयोगं तु सूत्रधारः प्रयोजयेत् । ततश्च प्रविशेत्पात्रं प्रयोगातिशयो हि सः ॥ ३६॥
prayoge tu prayogaṃ tu sūtradhāraḥ prayojayet | tataśca praviśetpātraṃ prayogātiśayo hi saḥ || 36||
कालप्रवृत्तिमाश्रित्य वर्णना या प्रयुज्यते । तदाश्रयाच्च पात्रस्य प्रवेशस्तत्प्रवृत्तकम् ॥ ३७॥
kālapravṛttimāśritya varṇanā yā prayujyate | tadāśrayācca pātrasya praveśastatpravṛttakam || 37||
एषामन्यतमं श्लिष्टं योजयित्वार्थयुक्तिभिः । [तस्मादङ्गद्वयस्यापि सम्भवो न निवार्यते ॥ ३८॥
eṣāmanyatamaṃ śliṣṭaṃ yojayitvārthayuktibhiḥ | [tasmādaṅgadvayasyāpi sambhavo na nivāryate || 38||
पात्रग्रन्थैरसम्बाध प्रकुर्यादामुखं ततः । एवमेतद्बुधैर्ज्ञेयमामुखं विविधाश्रयम् ॥ ३९॥
pātragranthairasambādha prakuryādāmukhaṃ tataḥ | evametadbudhairjñeyamāmukhaṃ vividhāśrayam || 39||
लक्षणं पूर्वमुक्तं तु वीथ्याः प्रहसनस्य च । [इत्यष्टार्धविकल्पा वृत्तिरियं भारती मयाभिहिता । सात्त्वत्यास्तु विधानं लक्षणयुक्त्या प्रवक्ष्यामि ] ॥ ४०॥
lakṣaṇaṃ pūrvamuktaṃ tu vīthyāḥ prahasanasya ca | [ityaṣṭārdhavikalpā vṛttiriyaṃ bhāratī mayābhihitā | sāttvatyāstu vidhānaṃ lakṣaṇayuktyā pravakṣyāmi ] || 40||
या सात्त्वतेनेह गुणेन युक्ता न्यायेन वृत्तेन समन्विता च । हर्षोत्कटा संहृतशोकभावा सा सात्त्वती नाम भवेत्तु वृत्तिः ॥ ४१॥
yā sāttvateneha guṇena yuktā nyāyena vṛttena samanvitā ca | harṣotkaṭā saṃhṛtaśokabhāvā sā sāttvatī nāma bhavettu vṛttiḥ || 41||
वागङ्गाभिनयवती सत्त्वोत्थानवचनप्रकरणेषु । सत्त्वाधिकारयुक्ता विज्ञेया सात्त्वती वृत्तिः ॥ ४२॥
vāgaṅgābhinayavatī sattvotthānavacanaprakaraṇeṣu | sattvādhikārayuktā vijñeyā sāttvatī vṛttiḥ || 42||
वीराद्भुतरौद्ररसा निरस्तशृङ्गारकरुणनिर्वेदा । उद्धतपुरुषप्राया परस्पराधर्षणकृता च ॥ ४३॥
vīrādbhutaraudrarasā nirastaśṛṅgārakaruṇanirvedā | uddhatapuruṣaprāyā parasparādharṣaṇakṛtā ca || 43||
उत्थापकश्च परिवर्तकश्च सल्लापकश्च सङ्घात्यः । चत्वारोऽस्या भेदा विज्ञेया नाट्यकोविदैअः ॥ ४४॥
utthāpakaśca parivartakaśca sallāpakaśca saṅghātyaḥ | catvāro'syā bhedā vijñeyā nāṭyakovidaiaḥ || 44||
अहमप्युत्थास्यामि त्वं तावद्दर्शयात्मनः शक्तिम् । इति सङ्घर्षसमुत्थस्तज्ज्ञैरुत्थापको ज्ञेयः ॥ ४५॥
ahamapyutthāsyāmi tvaṃ tāvaddarśayātmanaḥ śaktim | iti saṅgharṣasamutthastajjñairutthāpako jñeyaḥ || 45||
उत्थानसमारब्धानर्थानुत्सृज्य योऽर्थयोगवशात् । अन्यानर्थान् भजते स चापि परिवर्तको ज्ञेयः ॥ ४६॥
utthānasamārabdhānarthānutsṛjya yo'rthayogavaśāt | anyānarthān bhajate sa cāpi parivartako jñeyaḥ || 46||
[निर्दिष्टवस्तुविषयः प्रपञ्चबद्धस्त्रिहास्यसंयुक्तः । सङ्घर्षविशेषकृतस्त्रिविधः परिवर्तको ज्ञेयः] ॥ ४७॥
[nirdiṣṭavastuviṣayaḥ prapañcabaddhastrihāsyasaṃyuktaḥ | saṅgharṣaviśeṣakṛtastrividhaḥ parivartako jñeyaḥ] || 47||
साधर्षजो निराधर्षजोऽपि वा रागवचसंयुक्तः । साधिक्षेपालापो ज्ञेयः सल्लापकः सोऽपि ॥ ४८॥
sādharṣajo nirādharṣajo'pi vā rāgavacasaṃyuktaḥ | sādhikṣepālāpo jñeyaḥ sallāpakaḥ so'pi || 48||
[धर्माधर्मसमुत्थं यत्र भवेद्रागदोषसंयुक्तम् । साधिक्षेपं च वचो ज्ञेयः संलापको नाम] ॥ ४९॥
[dharmādharmasamutthaṃ yatra bhavedrāgadoṣasaṃyuktam | sādhikṣepaṃ ca vaco jñeyaḥ saṃlāpako nāma] || 49||
मन्त्रर्थवाक्यशक्त्या दैववशादात्मदोषयोगाद्वा । सङ्घातभेदजननस्तज्ज्ञैः सङ्घात्यको ज्ञेयः ॥ ५०॥
mantrarthavākyaśaktyā daivavaśādātmadoṣayogādvā | saṅghātabhedajananastajjñaiḥ saṅghātyako jñeyaḥ || 50||
[बहुकपटसंश्रयाणां परोपघाताशयप्रयुक्तानाम् । कूटानां सङ्घातो विज्ञेयः कूटसङ्घात्यः ] ॥ ५१॥
[bahukapaṭasaṃśrayāṇāṃ paropaghātāśayaprayuktānām | kūṭānāṃ saṅghāto vijñeyaḥ kūṭasaṅghātyaḥ ] || 51||
इत्यष्टार्धविकल्पा वृत्तिरियं सात्त्वती मयाभिहिता । कैशिक्यास्त्वथ लक्षणमतःपरं सम्प्रवक्ष्यामि ॥ ५२॥
ityaṣṭārdhavikalpā vṛttiriyaṃ sāttvatī mayābhihitā | kaiśikyāstvatha lakṣaṇamataḥparaṃ sampravakṣyāmi || 52||
या श्लक्ष्णनैपथ्यविशेषचित्रा स्त्रीसंयुता या बहुनृत्तगीता । कामोपभोगप्रभवोपचारा तां कैशिकीं वृत्तिमुदाहरन्ति ॥ ५३॥
yā ślakṣṇanaipathyaviśeṣacitrā strīsaṃyutā yā bahunṛttagītā | kāmopabhogaprabhavopacārā tāṃ kaiśikīṃ vṛttimudāharanti || 53||
[बहुवद्यनृत्तगीता शृङ्गाराभिनयचित्रनैपथ्या । माल्यालङ्कारयुक्ता प्रशस्तवेषा च कान्ता च ॥ ५४॥
[bahuvadyanṛttagītā śṛṅgārābhinayacitranaipathyā | mālyālaṅkārayuktā praśastaveṣā ca kāntā ca || 54||
चित्रपदवाक्यबन्धैरलङ्कृता हसितरुदितरोषादैः । स्त्रीपुरुषकामयुक्ता विज्ञेया कैशिकीवृत्तिः] ॥ ५५॥
citrapadavākyabandhairalaṅkṛtā hasitaruditaroṣādaiḥ | strīpuruṣakāmayuktā vijñeyā kaiśikīvṛttiḥ] || 55||
नर्म च नर्मस्फुञ्जो नर्मस्फोटोऽथ नर्मगर्भश्च । कैशिक्याश्चत्वारो भेदा ह्येते समाख्याताः ॥ ५६॥
narma ca narmasphuñjo narmasphoṭo'tha narmagarbhaśca | kaiśikyāścatvāro bhedā hyete samākhyātāḥ || 56||
आस्थापितशृङ्गारं विशुद्धकरणं निवृत्तवीररसम् । हास्यप्रवचनबहुलं नर्म त्रिविधं विजानीयात् ॥ ५७॥
āsthāpitaśṛṅgāraṃ viśuddhakaraṇaṃ nivṛttavīrarasam | hāsyapravacanabahulaṃ narma trividhaṃ vijānīyāt || 57||
ईर्ष्याक्रोधप्रायं सोपालम्भकरणानुविद्धं च । आत्मोपक्षेपकृतं सविप्रलम्भं स्मृतं नर्म ॥ ५८॥
īrṣyākrodhaprāyaṃ sopālambhakaraṇānuviddhaṃ ca | ātmopakṣepakṛtaṃ savipralambhaṃ smṛtaṃ narma || 58||
नवसङ्गमसम्भोगो रतिसमुदयवेषवाक्यसंयुक्तः । ज्ञेयो नर्मस्फुञ्जो ह्यवसानभयात्मकश्चैव ॥ ५९॥
navasaṅgamasambhogo ratisamudayaveṣavākyasaṃyuktaḥ | jñeyo narmasphuñjo hyavasānabhayātmakaścaiva || 59||
विविधानां भवानां लवैर्लवैर्भूषितो बहुविशेषैः । असमग्राक्षिप्तरसो नर्मस्फोटस्तु विज्ञेयः ॥ ६०॥
vividhānāṃ bhavānāṃ lavairlavairbhūṣito bahuviśeṣaiḥ | asamagrākṣiptaraso narmasphoṭastu vijñeyaḥ || 60||
विज्ञानरूपशोभा धनादिभिर्नायको गणैर्यत्र । प्रच्छनां व्यवहर्ते कर्यवषान्नर्मगर्भोऽसौ ॥ ६१॥
vijñānarūpaśobhā dhanādibhirnāyako gaṇairyatra | pracchanāṃ vyavaharte karyavaṣānnarmagarbho'sau || 61||
[पूर्वस्थितौ विपद्येत नायको यत्र चापरस्तिष्ठेत् । तमपीह नर्मगर्भं विद्यान्नाट्यप्रयोगेषु ] ॥ ६२॥
[pūrvasthitau vipadyeta nāyako yatra cāparastiṣṭhet | tamapīha narmagarbhaṃ vidyānnāṭyaprayogeṣu ] || 62||
इत्यष्टार्शविकल्पा वृत्तिरियं कैशिकी मयाभिहिता । अत ऊर्ध्वमुद्धतरसामरभटिं सम्प्रवक्ष्य्यमि ॥ ६३॥
ityaṣṭārśavikalpā vṛttiriyaṃ kaiśikī mayābhihitā | ata ūrdhvamuddhatarasāmarabhaṭiṃ sampravakṣyyami || 63||
आरभटप्रायगुणा तथैव बहुकपटवञ्चनोपेता । दम्भानृतवचनवती त्वारभटी नाम विज्ञेया ॥ ६४॥
ārabhaṭaprāyaguṇā tathaiva bahukapaṭavañcanopetā | dambhānṛtavacanavatī tvārabhaṭī nāma vijñeyā || 64||
[आवपाताप्लुलङ्गितानि च्छेद्यानि मायाकृतमिन्द्रजालम् । चित्राणी युद्धानि च यत्र नित्यं तां तादृशीमारभटीं वदन्ति ॥ ६५॥
[āvapātāplulaṅgitāni cchedyāni māyākṛtamindrajālam | citrāṇī yuddhāni ca yatra nityaṃ tāṃ tādṛśīmārabhaṭīṃ vadanti || 65||
शाड्गुण्यसमार्ब्धा हठातिसन्धानविद्रवोपेता । लाभालाभार्थकृता विज्ञेया वृत्तिरारभटी ॥ ६६॥
śāḍguṇyasamārbdhā haṭhātisandhānavidravopetā | lābhālābhārthakṛtā vijñeyā vṛttirārabhaṭī || 66||
संक्षिप्तकावपतौ वस्तूत्थापनमथापि सम्फेटः । एते ह्यस्या भेदा लक्षणमेषं प्रवक्ष्यामि ॥ ६७॥
saṃkṣiptakāvapatau vastūtthāpanamathāpi sampheṭaḥ | ete hyasyā bhedā lakṣaṇameṣaṃ pravakṣyāmi || 67||
अन्वर्थशिल्पयुक्तो बहुपुस्तोत्थानचित्रनेपथ्यः । संक्षिप्तवस्तु विषयो ज्ञेयः संक्षिप्तकओ नाम ॥ ६८॥
anvarthaśilpayukto bahupustotthānacitranepathyaḥ | saṃkṣiptavastu viṣayo jñeyaḥ saṃkṣiptakao nāma || 68||
भयहर्षसमुत्थानं विद्रवविनिपातसम्भ्रमाचरणम् । क्षिप्रप्रवेशनिर्गममवपातमिमं विजानीयात् ॥ ६९॥
bhayaharṣasamutthānaṃ vidravavinipātasambhramācaraṇam | kṣiprapraveśanirgamamavapātamimaṃ vijānīyāt || 69||
सर्वरससमासकृतं सविद्रव्व्विद्रवाश्रयं व्वपि । नाट्यं विभाव्यते यत्तद्वस्तूत्थापनं ज्ञेयम् ॥ ७०॥
sarvarasasamāsakṛtaṃ savidravvvidravāśrayaṃ vvapi | nāṭyaṃ vibhāvyate yattadvastūtthāpanaṃ jñeyam || 70||
संरम्भसम्प्रयुक्तो बहुयुद्धकपटनिर्भेदः । शस्त्रप्रहरबहुलः सम्फेटो नाम विज्ञेयः ॥ ७१॥
saṃrambhasamprayukto bahuyuddhakapaṭanirbhedaḥ | śastrapraharabahulaḥ sampheṭo nāma vijñeyaḥ || 71||
एवमेता बुधैर्ज्ञेया वृत्तयो नाट्यसंश्रया । रसप्रयोगमासां च कीर्त्यमानं निबोधत ॥ ७२॥
evametā budhairjñeyā vṛttayo nāṭyasaṃśrayā | rasaprayogamāsāṃ ca kīrtyamānaṃ nibodhata || 72||
हास्यशृङ्गरबहुला कैशिकी परिचक्षिता । सत्त्वती चापि विज्ञेया वीराद्भुतशमाश्रयाः ॥ ७३॥
hāsyaśṛṅgarabahulā kaiśikī paricakṣitā | sattvatī cāpi vijñeyā vīrādbhutaśamāśrayāḥ || 73||
रौद्रे भयानके चैव विज्ञेयारभटी बुधैः । बीभत्से करुणे चैव भारती सम्प्रकीर्तिता ॥ ७४॥
raudre bhayānake caiva vijñeyārabhaṭī budhaiḥ | bībhatse karuṇe caiva bhāratī samprakīrtitā || 74||
[ न ह्येकरसजं कव्यं किञ्चिदस्ति प्रयोगतः । भावो वापि रसो वापि प्रवृत्तिर्वृत्तिरेव वा ॥ ७५॥
[ na hyekarasajaṃ kavyaṃ kiñcidasti prayogataḥ | bhāvo vāpi raso vāpi pravṛttirvṛttireva vā || 75||
सर्वेषां समवेतानां यस्य रूपं भवेद्बहु । स मन्तव्यो रस स्थायि शेषाः सञ्चारिणः स्मृताः] ॥ ७६॥
sarveṣāṃ samavetānāṃ yasya rūpaṃ bhavedbahu | sa mantavyo rasa sthāyi śeṣāḥ sañcāriṇaḥ smṛtāḥ] || 76||
वृत्यन्त एशोऽभिनयो मयोक्तो वागङ्गसत्त्वप्रभवो यथावद् । आहार्यमेवाभिनयं प्रयोगे वक्ष्यामि नेपथ्यकृतं तु भूयः ॥ ७७॥
vṛtyanta eśo'bhinayo mayokto vāgaṅgasattvaprabhavo yathāvad | āhāryamevābhinayaṃ prayoge vakṣyāmi nepathyakṛtaṃ tu bhūyaḥ || 77||
इति भारतीये नाट्यशास्त्रे वृत्तिविकल्पनं नाम विंशोऽध्यायः ।
iti bhāratīye nāṭyaśāstre vṛttivikalpanaṃ nāma viṃśo'dhyāyaḥ |
ॐ श्री परमात्मने नमः