Gyaandweep | Narayaneeyam Dashkam

Shloka 1

गूढं वसुदेवगिरा कर्तुं ते निष्क्रियस्य संस्कारान् । हृद्गतहोरातत्वो गर्गमुनिस्त्वद्गृहं विभो गतवान् ॥ 44.1 ॥

gūḍhaṃ vasudevagirā kartuṃ te niṣkriyasya saṃskārān . hṛdgatahorātatvo gargamunistvadgṛhaṃ vibho gatavān .. 44.1 ..

Shloka 2

नन्दोऽथ नन्दितात्मा वृन्दिष्टं मानयन्नमुं यमिनाम् । मन्दस्मितार्द्रमूचे त्वत्संस्कारान् विधातुमुत्सुकधीः ॥ 44.2 ॥

nando'tha nanditātmā vṛndiṣṭaṃ mānayannamuṃ yaminām . mandasmitārdramūce tvatsaṃskārān vidhātumutsukadhīḥ .. 44.2 ..

Shloka 3

यदुवंशाचार्यत्वात् सुनिभृतमिदमार्य कार्यमिति कथयन् । गर्गो निर्गतपुळकश्चक्रे तव साग्रजस्य नामानि ॥ 44.3 ॥

yaduvaṃśācāryatvāt sunibhṛtamidamārya kāryamiti kathayan . gargo nirgatapul̤akaścakre tava sāgrajasya nāmāni .. 44.3 ..

Shloka 4

कथमस्य नाम कुर्वे सहस्रनाम्नो ह्यनन्तनाम्नो वा । इति नूनं गर्गमुनिश्चक्रे तव नाम नाम रहसि विभो ॥ 44.4 ॥

kathamasya nāma kurve sahasranāmno hyanantanāmno vā . iti nūnaṃ gargamuniścakre tava nāma nāma rahasi vibho .. 44.4 ..

Shloka 5

कृषिधातुणकाराभ्यां सत्तानन्दात्मतां किलाभिलपत् । जगदघकर्षित्वं वा कथयदृषिः कृष्णनाम ते व्यतनोत् ॥ 44.5 ॥

kṛṣidhātuṇakārābhyāṃ sattānandātmatāṃ kilābhilapat . jagadaghakarṣitvaṃ vā kathayadṛṣiḥ kṛṣṇanāma te vyatanot .. 44.5 ..

Shloka 6

अन्यांश्च नामभेदान् व्याकुर्वन्नग्रजे च रामादीन् । अतिमानुषानुभावं न्यगदत्त्वामप्रकाशयन्पित्रे ॥ 44.6 ॥

anyāṃśca nāmabhedān vyākurvannagraje ca rāmādīn . atimānuṣānubhāvaṃ nyagadattvāmaprakāśayanpitre .. 44.6 ..

Shloka 7

स्निह्यति यत्सव पुत्रे मुह्यति स न मायिकैः पुनश्शोकैः । दृह्यति यस्स तु नश्येदित्यवदत्ते महत्त्वमृषिवर्यः ॥ 44.7 ॥

snihyati yatsava putre muhyati sa na māyikaiḥ punaśśokaiḥ . dṛhyati yassa tu naśyedityavadatte mahattvamṛṣivaryaḥ .. 44.7 ..

Shloka 8

जेष्यति बहुतरदैत्यान् नेष्यति निजबन्धुलोकममलपदम् । श्रोष्यति सुविमलकीर्तीरस्येति भवद्विभूतिमृषिरूचे ॥ 44.8 ॥

jeṣyati bahutaradaityān neṣyati nijabandhulokamamalapadam . śroṣyati suvimalakīrtīrasyeti bhavadvibhūtimṛṣirūce .. 44.8 ..

Shloka 9

अमुनैव सर्वदुर्गं तरितास्थ कृतास्थमत्र तिष्ठध्वम् । हरिरेवेत्यनभिलपन्नित्यादि त्वामवर्णयत् स मुनिः ॥ 44.9 ॥

amunaiva sarvadurgaṃ taritāstha kṛtāsthamatra tiṣṭhadhvam . harirevetyanabhilapannityādi tvāmavarṇayat sa muniḥ .. 44.9 ..

Shloka 10

गर्गेऽथ निर्गतेऽस्मिन् नन्दितनन्दादिनन्द्यमानस्त्वम् । मद्गदमुद्गतकरुणो निर्गमय श्रीमरुत्पुराधीश ॥ 44.10 ॥

garge'tha nirgate'smin nanditanandādinandyamānastvam . madgadamudgatakaruṇo nirgamaya śrīmarutpurādhīśa .. 44.10 ..

Languages