रुचिरकम्पितकुण्डलमण्डलः सुचिरमीश ननर्तिथ पन्नगे । अमरताडितदुन्दुभिसुन्दरं वियति गायति दैवतयौवते ॥ 56.1 ॥
rucirakampitakuṇḍalamaṇḍalaḥ suciramīśa nanartitha pannage | amaratāḍitadundubhisundaraṃ viyati gāyati daivatayauvate || 56.1 ||
नमति यद्यदमुष्य शिरो हरे परिविहाय तदुन्नतमुन्नतम् । परिमथन्पदपङ्करुहा चिरं व्यहरथाः करताळमनोहरम् ॥ 56.2 ॥
namati yadyadamuṣya śiro hare parivihāya tadunnatamunnatam | parimathanpadapaṅkaruhā ciraṃ vyaharathāḥ karatāळmanoharam || 56.2 ||
त्वदवभग्नविभुग्नफणागणे गलितशोणितशोणितपाथसि । फणिपताववसीदति सन्नतास्तदबलास्तव माधव पादयोः ॥ 56.3 ॥
tvadavabhagnavibhugnaphaṇāgaṇe galitaśoṇitaśoṇitapāthasi | phaṇipatāvavasīdati sannatāstadabalāstava mādhava pādayoḥ || 56.3 ||
अयि पुरैव चिराय परिश्रुतत्वदनुभावविलीनहृदो हि ताः । मुनिभिरप्यनवाष्यपथैः स्तवैर्नुनुवुरीश भवन्तमयन्त्रितम् ॥ 56.4 ॥
ayi puraiva cirāya pariśrutatvadanubhāvavilīnahṛdo hi tāḥ | munibhirapyanavāṣyapathaiḥ stavairnunuvurīśa bhavantamayantritam || 56.4 ||
फणिवधूजनभक्तिविलोकनप्रविकसत्करुणाकुलचेतसा । फणिपतिर्भवताच्युत जीवितस्त्वजि समर्पितमूर्तिरवानमत् ॥ 56.5 ॥
phaṇivadhūjanabhaktivilokanapravikasatkaruṇākulacetasā | phaṇipatirbhavatācyuta jīvitastvaji samarpitamūrtiravānamat || 56.5 ||
रमणकं व्रजे वारिधिमध्यगं फणिरिपुर्न करोति विरोधिताम् । इति भवद्वचनान्यतिमानयन् फणिपतिर्निरगादुरगैः समम् ॥ 56.6 ॥
ramaṇakaṃ vraje vāridhimadhyagaṃ phaṇiripurna karoti virodhitām | iti bhavadvacanānyatimānayan phaṇipatirniragāduragaiḥ samam || 56.6 ||
फणिवधूजनदत्तमणिव्रजज्वलितहारदुकूलविभूषितः । तटगतैः प्रमदाश्रुविमिश्रितैः समगथाः स्वजनैर्दिवसावधौ ॥ 56.7 ॥
phaṇivadhūjanadattamaṇivrajajvalitahāradukūlavibhūṣitaḥ | taṭagataiḥ pramadāśruvimiśritaiḥ samagathāḥ svajanairdivasāvadhau || 56.7 ||
निशि पुनस्तमसा व्रजमन्दिरं व्रजितुमक्षम एव जनोत्करे । स्वपति तत्र भवच्चरणाश्रये दवकृशानुररुन्ध समन्ततः ॥ 56.8 ॥
niśi punastamasā vrajamandiraṃ vrajitumakṣama eva janotkare | svapati tatra bhavaccaraṇāśraye davakṛśānurarundha samantataḥ || 56.8 ||
प्रबुधितानथ पालय पालयेत्युदयदार्तरवान् पशुपालकान् । अवितुमाशु पपाथ महानलं किमिह चित्रमयं खलु ते मुखम् ॥ 56.9 ॥
prabudhitānatha pālaya pālayetyudayadārtaravān paśupālakān | avitumāśu papātha mahānalaṃ kimiha citramayaṃ khalu te mukham || 56.9 ||
शिखिन वर्णत एव हि पीतता परिलसत्युधना क्रिययाऽप्यसौ । इति नुतः पशुपैर्मुदितैर्विभो हर हरे दुरितैः सह मे गदान् ॥ 56.10 ॥
śikhina varṇata eva hi pītatā parilasatyudhanā kriyayā'pyasau | iti nutaḥ paśupairmuditairvibho hara hare duritaiḥ saha me gadān || 56.10 ||