Gyaandweep | Narayaneeyam Dashkam

Shloka 1

मदनातुरचेतसोऽन्वहं भवदङ्घ्रिद्वयदास्यकाम्यया । यमुनातटसीम्नि सैकतीं तरळाक्ष्यो गिरिजां समार्चिचन् ॥ 60.1 ॥

madanāturacetaso'nvahaṃ bhavadaṅghridvayadāsyakāmyayā . yamunātaṭasīmni saikatīṃ taral̤ākṣyo girijāṃ samārcican .. 60.1 ..

Shloka 2

तव नामकथारताः समं सुदृशः प्रातरुपागताः नदीम् । उपहारशतैरपूजयन् दयितो नन्दसुतो भवेदिति ॥ 60.2 ॥

tava nāmakathāratāḥ samaṃ sudṛśaḥ prātarupāgatāḥ nadīm . upahāraśatairapūjayan dayito nandasuto bhavediti .. 60.2 ..

Shloka 3

इति मासमुपाहितव्रतास्तरळाक्षीरभिवीक्ष्य ता भवान् । करुणामृदुलो नदीतटं समयासीत्तदनुग्रहेच्छया ॥ 60.3 ॥

iti māsamupāhitavratāstaral̤ākṣīrabhivīkṣya tā bhavān . karuṇāmṛdulo nadītaṭaṃ samayāsīttadanugrahecchayā .. 60.3 ..

Shloka 4

नियमावसितौ निजाम्बरं तटसीमन्यवमुच्य तास्तदा । यमुनाजलखेलनाकुलाः पुरतस्त्वामवलोक्य लज्जिताः ॥ 60.4 ॥

niyamāvasitau nijāmbaraṃ taṭasīmanyavamucya tāstadā . yamunājalakhelanākulāḥ puratastvāmavalokya lajjitāḥ .. 60.4 ..

Shloka 5

त्रपया नमिताननास्वथो वनितास्वम्बरजालमन्तिके । निहितं परिगृह्य भूरुहो विटपं त्वं तरसाधिरूढवान् ॥ 60.5 ॥

trapayā namitānanāsvatho vanitāsvambarajālamantike . nihitaṃ parigṛhya bhūruho viṭapaṃ tvaṃ tarasādhirūḍhavān .. 60.5 ..

Shloka 6

इह तावदुपेत्य नीयतां वसनं वः सुदृशो यथायथम् । इति नर्ममृदुस्मिते त्वयि व्रुवति व्यामुमुहे वधूजनैः ॥ 60.6 ॥

iha tāvadupetya nīyatāṃ vasanaṃ vaḥ sudṛśo yathāyatham . iti narmamṛdusmite tvayi vruvati vyāmumuhe vadhūjanaiḥ .. 60.6 ..

Shloka 7

अयि जीव चिरं किशोर नस्तव दासीरवशीकरोषि किम् । प्रदिशाम्बरमम्बुजेक्षणेत्युदितस्त्वं स्मितमेव दत्तवान् ॥ 60.7 ॥

ayi jīva ciraṃ kiśora nastava dāsīravaśīkaroṣi kim . pradiśāmbaramambujekṣaṇetyuditastvaṃ smitameva dattavān .. 60.7 ..

Shloka 8

अधिरुह्य तटं कृताञ्जलीः परिशुद्धाः स्वगतीर्निरीक्ष्य ताः । वसनान्यखिलान्यनुग्रहं पुनरेवं गिरमप्यदा मुदा ॥ 60.8 ॥

adhiruhya taṭaṃ kṛtāñjalīḥ pariśuddhāḥ svagatīrnirīkṣya tāḥ . vasanānyakhilānyanugrahaṃ punarevaṃ giramapyadā mudā .. 60.8 ..

Shloka 9

विदितं ननु वो मनीषितं वदितारस्त्विह योग्यमुत्तरम् । यमुनापुलिने सचन्द्रिकाः क्षणदा इत्यबलास्त्वमूचिवान् ॥ 60.9 ॥

viditaṃ nanu vo manīṣitaṃ vaditārastviha yogyamuttaram . yamunāpuline sacandrikāḥ kṣaṇadā ityabalāstvamūcivān .. 60.9 ..

Shloka 10

उपकर्ण्य भवन्मुखच्युतं मधुनिष्यन्दि वचो मृगीदृशः । प्रणयादयि वीक्ष्य वीक्ष्य ते वदनाब्जं शनकैर्गृहं गताः ॥ 60.10 ॥

upakarṇya bhavanmukhacyutaṃ madhuniṣyandi vaco mṛgīdṛśaḥ . praṇayādayi vīkṣya vīkṣya te vadanābjaṃ śanakairgṛhaṃ gatāḥ .. 60.10 ..

Shloka 11

इति नन्वनुगृह्य बल्लवीर्विपिनान्तेषु पुरेव सञ्चरन् । करुणाशिशिरो हरे हर त्वरया मे सकलामयावलिम् ॥ 60.11 ॥

iti nanvanugṛhya ballavīrvipinānteṣu pureva sañcaran . karuṇāśiśiro hare hara tvarayā me sakalāmayāvalim .. 60.11 ..

Languages