Gyaandweep | Narayaneeyam Dashkam

Shloka 1

तव विलोकनाद्गोपिकाजनाः प्रमदसंकुलाः पङ्कजेक्षण । अमृतधारया संप्लुता इव स्तिमिततां दधुस्त्वत्पुरोगताः ॥ 68.1 ॥

tava vilokanādgopikājanāḥ pramadasaṃkulāḥ paṅkajekṣaṇa . amṛtadhārayā saṃplutā iva stimitatāṃ dadhustvatpurogatāḥ .. 68.1 ..

Shloka 2

तदनु काचन त्वत्कराम्बुजं सपदि गृह्णती निर्विशङ्कितम् । घनपयोधरे संविधाय सा पुळकसंवृता तस्थुषी चिरम् ॥ 68.2 ॥

tadanu kācana tvatkarāmbujaṃ sapadi gṛhṇatī nirviśaṅkitam . ghanapayodhare saṃvidhāya sā pul̤akasaṃvṛtā tasthuṣī ciram .. 68.2 ..

Shloka 3

तव विभो पुरा कोमळं भुजं निजगळान्तरे पर्यवेष्टयत् । गळसमुद्गतं प्राणमारुतं प्रतिनिरुन्धतीवातिहर्षुला ॥ 68.3 ॥

tava vibho purā komal̤aṃ bhujaṃ nijagal̤āntare paryaveṣṭayat . gal̤asamudgataṃ prāṇamārutaṃ pratinirundhatīvātiharṣulā .. 68.3 ..

Shloka 4

अपगतत्रपा कापि कामिनी तव मुखाम्बुजात्पूगचर्वितम् । प्रतिगृहय्य तद्वक्त्रपङ्कजे निदधती गता पूर्णकामताम् ॥ 68.4 ॥

apagatatrapā kāpi kāminī tava mukhāmbujātpūgacarvitam . pratigṛhayya tadvaktrapaṅkaje nidadhatī gatā pūrṇakāmatām .. 68.4 ..

Shloka 5

विकरुणो वने संविहाय मामपगतोऽसि का त्वामि स्पृशेत् । इति सरोषया तवदेकया सजललोचनं वीक्षितो भवान् ॥ 68.5 ॥

vikaruṇo vane saṃvihāya māmapagato'si kā tvāmi spṛśet . iti saroṣayā tavadekayā sajalalocanaṃ vīkṣito bhavān .. 68.5 ..

Shloka 6

इति मुदाकुलैर्वल्लवीजनैः सममुपागतो यामुने तटे । मृदुकुचाम्बरैः कल्पितासने घुसृणभासुरे पर्यशोभथाः ॥ 68.6 ॥

iti mudākulairvallavījanaiḥ samamupāgato yāmune taṭe . mṛdukucāmbaraiḥ kalpitāsane ghusṛṇabhāsure paryaśobhathāḥ .. 68.6 ..

Shloka 7

कतिविधा कृपा केऽपि सर्वतो धृतदयोदयाः केचिदाश्रिते । कतिचिदीदृशा मादृशेष्व्पीत्यभिहितो भवान्वल्लवीजनैः ॥ 68.7 ॥

katividhā kṛpā ke'pi sarvato dhṛtadayodayāḥ kecidāśrite . katicidīdṛśā mādṛśeṣvpītyabhihito bhavānvallavījanaiḥ .. 68.7 ..

Shloka 8

अयि कुमारिका नैव शङ्क्यतां कठिनता मयि प्रेमकातरे । मयि यु चेतसो वोऽनुवृत्तये कृतमिदं मयेत्यूचिवान्भवान् ॥ 68.8 ॥

ayi kumārikā naiva śaṅkyatāṃ kaṭhinatā mayi premakātare . mayi yu cetaso vo'nuvṛttaye kṛtamidaṃ mayetyūcivānbhavān .. 68.8 ..

Shloka 9

अयि निशम्यतां जीववल्लभाः प्रियतमो जनो नेदृशो मम । तदिह रम्यतां रम्ययामिनीष्वनुपरोधमित्यालपो विभो ॥ 68.9 ॥

ayi niśamyatāṃ jīvavallabhāḥ priyatamo jano nedṛśo mama . tadiha ramyatāṃ ramyayāminīṣvanuparodhamityālapo vibho .. 68.9 ..

Shloka 10

इति गिराधिकं मोदमेदुरैर्व्रजवधूजनैः साकमारमन् । कलितकौतुको रासखेलने गुरुपुरीपते पाहि मां गदात् ॥ 68.10 ॥

iti girādhikaṃ modamedurairvrajavadhūjanaiḥ sākamāraman . kalitakautuko rāsakhelane gurupurīpate pāhi māṃ gadāt .. 68.10 ..

Languages