Gyaandweep | Bhagavata Purana, Dashamo Skanda, Adhyaya 25

Shloka 1

इन्द्रस्तदाऽऽत्मनः पूजां विज्ञाय विहतां नृप । गोपेभ्यः कृष्णनाथेभ्यो नन्दादिभ्यश्चुकोप ह ॥ १ ॥

indrastadā''tmanaḥ pūjāṃ vijñāya vihatāṃ nṛpa . gopebhyaḥ kṛṣṇanāthebhyo nandādibhyaścukopa ha .. 1 ..

Shloka 2

गणं सांवर्तकं नाम मेघानां चान्तकारिणाम् । इन्द्रः प्रचोदयत् क्रुद्धो वाक्यं चाहेशमान्युत ॥ २ ॥

gaṇaṃ sāṃvartakaṃ nāma meghānāṃ cāntakāriṇām . indraḥ pracodayat kruddho vākyaṃ cāheśamānyuta .. 2 ..

Shloka 3

अहो श्रीमदमाहात्म्यं गोपानां काननौकसाम् । कृष्णं मर्त्यमुपाश्रित्य ये चक्रुर्देवहेलनम् ॥ ३ ॥

aho śrīmadamāhātmyaṃ gopānāṃ kānanaukasām . kṛṣṇaṃ martyamupāśritya ye cakrurdevahelanam .. 3 ..

Shloka 4

यथादृढैः कर्ममयैः क्रतुभिर्नामनौनिभैः । विद्यां आन्वीक्षिकीं हित्वा तितीर्षन्ति भवार्णवम् ॥ ४ ॥

yathādṛḍhaiḥ karmamayaiḥ kratubhirnāmanaunibhaiḥ . vidyāṃ ānvīkṣikīṃ hitvā titīrṣanti bhavārṇavam .. 4 ..

Shloka 5

वाचालं बालिशं स्तब्धं अज्ञं पण्डितमानिनम् । कृष्णं मर्त्यमुपाश्रित्य गोपा मे चक्रुरप्रियम् ॥ ५ ॥

vācālaṃ bāliśaṃ stabdhaṃ ajñaṃ paṇḍitamāninam . kṛṣṇaṃ martyamupāśritya gopā me cakrurapriyam .. 5 ..

Shloka 6

एषां श्रियावलिप्तानां कृष्णेनाध्मापितात्मनाम् । धुनुत श्रीमदस्तम्भं पशून् नयत सङ्क्षयम् ॥ ६ ॥

eṣāṃ śriyāvaliptānāṃ kṛṣṇenādhmāpitātmanām . dhunuta śrīmadastambhaṃ paśūn nayata saṅkṣayam .. 6 ..

Shloka 7

अहं चैरावतं नागं आरुह्यानुव्रजे व्रजम् । मरुद्गणैर्महावेगैः नन्दगोष्ठजिघांसया ॥ ७ ॥

ahaṃ cairāvataṃ nāgaṃ āruhyānuvraje vrajam . marudgaṇairmahāvegaiḥ nandagoṣṭhajighāṃsayā .. 7 ..

Shloka 8

इत्थं मघवताऽऽज्ञप्ता मेघा निर्मुक्तबन्धनाः । नन्दगोकुलमासारैः पीडयामासुरोजसा ॥ ८ ॥

itthaṃ maghavatā''jñaptā meghā nirmuktabandhanāḥ . nandagokulamāsāraiḥ pīḍayāmāsurojasā .. 8 ..

Shloka 9

विद्योतमाना विद्युद्भिः स्तनन्तः स्तनयित्नुभिः । तीव्रैर्मरुद्गणैर्नुन्ना ववृषुर्जलशर्कराः ॥ ९ ॥

vidyotamānā vidyudbhiḥ stanantaḥ stanayitnubhiḥ . tīvrairmarudgaṇairnunnā vavṛṣurjalaśarkarāḥ .. 9 ..

Shloka 10

स्थूणास्थूला वर्षधारा मुञ्चत्स्वभ्रेष्व-भीक्ष्णशः । जलौघैः प्लाव्यमाना भूः नादृश्यत नतोन्नतम् ॥ १० ॥

sthūṇāsthūlā varṣadhārā muñcatsvabhreṣva-bhīkṣṇaśaḥ . jalaughaiḥ plāvyamānā bhūḥ nādṛśyata natonnatam .. 10 ..

Shloka 11

अत्यासारातिवातेन पशवो जातवेपनाः । गोपा गोप्यश्च शीतार्ता गोविन्दं शरणं ययुः ॥ ११ ॥

atyāsārātivātena paśavo jātavepanāḥ . gopā gopyaśca śītārtā govindaṃ śaraṇaṃ yayuḥ .. 11 ..

Shloka 12

शिरः सुतांश्च कायेन प्रच्छाद्या सारपीडिताः । वेपमाना भगवतः पादमूलमुपाययुः ॥ १२ ॥

śiraḥ sutāṃśca kāyena pracchādyā sārapīḍitāḥ . vepamānā bhagavataḥ pādamūlamupāyayuḥ .. 12 ..

Shloka 13

कृष्ण कृष्ण महाभाग त्वन्नाथं गोकुलं प्रभो । त्रातुमर्हसि देवान्नः कुपिताद् भक्तवत्सल ॥ १३ ॥

kṛṣṇa kṛṣṇa mahābhāga tvannāthaṃ gokulaṃ prabho . trātumarhasi devānnaḥ kupitād bhaktavatsala .. 13 ..

Shloka 14

शिलावर्षानिपातेन हन्यमानमचेतनम् । निरीक्ष्य भगवान् मेने कुपितेन्द्रकृतं हरिः ॥ १४ ॥

śilāvarṣānipātena hanyamānamacetanam . nirīkṣya bhagavān mene kupitendrakṛtaṃ hariḥ .. 14 ..

Shloka 15

अपर्त्त्वत्युल्बणं वर्षं अतिवातं शिलामयम् । स्वयागे विहतेऽस्माभिः इन्द्रो नाशाय वर्षति ॥ १५ ॥

aparttvatyulbaṇaṃ varṣaṃ ativātaṃ śilāmayam . svayāge vihate'smābhiḥ indro nāśāya varṣati .. 15 ..

Shloka 16

तत्र प्रतिविधिं सम्यग् आत्मयोगेन साधये । लोकेशमानिनां मौढ्याद् हनिष्ये श्रीमदं तमः ॥ १६ ॥

tatra pratividhiṃ samyag ātmayogena sādhaye . lokeśamānināṃ mauḍhyād haniṣye śrīmadaṃ tamaḥ .. 16 ..

Shloka 17

न हि सद्भावयुक्तानां सुराणामीशविस्मयः । मत्तोऽसतां मानभङ्गः प्रशमायोपकल्पते ॥ १७ ॥

na hi sadbhāvayuktānāṃ surāṇāmīśavismayaḥ . matto'satāṃ mānabhaṅgaḥ praśamāyopakalpate .. 17 ..

Shloka 18

तस्मात् मच्छरणं गोष्ठं मन्नाथं मत्परिग्रहम् । गोपाये स्वात्मयोगेन सोऽयं मे व्रत आहितः ॥ १८ ॥

tasmāt maccharaṇaṃ goṣṭhaṃ mannāthaṃ matparigraham . gopāye svātmayogena so'yaṃ me vrata āhitaḥ .. 18 ..

Shloka 19

इत्युक्त्वैकेन हस्तेन कृत्वा गोवर्धनाचलम् । दधार लीलया कृष्णः छत्राकमिव बालकः ॥ १९ ॥

ityuktvaikena hastena kṛtvā govardhanācalam . dadhāra līlayā kṛṣṇaḥ chatrākamiva bālakaḥ .. 19 ..

Shloka 20

अथाह भगवान् गोपान् हेऽम्ब तात व्रजौकसः । यथोपजोषं विशत गिरिगर्तं सगोधनाः ॥ २० ॥

athāha bhagavān gopān he'mba tāta vrajaukasaḥ . yathopajoṣaṃ viśata girigartaṃ sagodhanāḥ .. 20 ..

Shloka 21

न त्रास इह वः कार्यो मद्धस्ताद्रिनिपातने । वातवर्षभयेनालं तत्त्राणं विहितं हि वः ॥ २१ ॥

na trāsa iha vaḥ kāryo maddhastādrinipātane . vātavarṣabhayenālaṃ tattrāṇaṃ vihitaṃ hi vaḥ .. 21 ..

Shloka 22

तथा निर्विविशुर्गर्तं कृष्णाश्वासितमानसः । यथावकाशं सधनाः सव्रजाः सोपजीविनः ॥ २२ ॥

tathā nirviviśurgartaṃ kṛṣṇāśvāsitamānasaḥ . yathāvakāśaṃ sadhanāḥ savrajāḥ sopajīvinaḥ .. 22 ..

Shloka 23

क्षुत्तृड्व्यथां सुखापेक्षां हित्वा तैर्व्रजवासिभिः । वीक्ष्यमाणो दधावद्रिं सप्ताहं नाचलत् पदात् ॥ २३ ॥

kṣuttṛḍvyathāṃ sukhāpekṣāṃ hitvā tairvrajavāsibhiḥ . vīkṣyamāṇo dadhāvadriṃ saptāhaṃ nācalat padāt .. 23 ..

Shloka 24

कृष्णयोगानुभावं तं निशम्येन्द्रोऽतिविस्मितः । निःस्तम्भो भ्रष्टसङ्कल्पः स्वान् मेघान् संन्यवारयत् ॥ २४ ॥

kṛṣṇayogānubhāvaṃ taṃ niśamyendro'tivismitaḥ . niḥstambho bhraṣṭasaṅkalpaḥ svān meghān saṃnyavārayat .. 24 ..

Shloka 25

खं व्यभ्रमुदितादित्यं वातवर्षं च दारुणम् । निशम्योपरतं गोपान् गोवर्धनधरोऽब्रवीत् ॥ ॥

khaṃ vyabhramuditādityaṃ vātavarṣaṃ ca dāruṇam . niśamyoparataṃ gopān govardhanadharo'bravīt .. ..

Shloka 26

निर्यात त्यजत त्रासं गोपाः सस्त्रीधनार्भकाः । उपारतं वातवर्षं व्युदप्रायाश्च निम्नगाः ॥ २६ ॥

niryāta tyajata trāsaṃ gopāḥ sastrīdhanārbhakāḥ . upārataṃ vātavarṣaṃ vyudaprāyāśca nimnagāḥ .. 26 ..

Shloka 27

ततस्ते निर्ययुर्गोपाः स्वं स्वमादाय गोधनम् । शकटोढोपकरणं स्त्रीबालस्थविराः शनैः ॥ २७ ॥

tataste niryayurgopāḥ svaṃ svamādāya godhanam . śakaṭoḍhopakaraṇaṃ strībālasthavirāḥ śanaiḥ .. 27 ..

Shloka 28

भगवानपि तं शैलं स्वस्थाने पूर्ववत्प्रभुः । पश्यतां सर्वभूतानां स्थापयामास लीलया ॥ २८ ॥

bhagavānapi taṃ śailaṃ svasthāne pūrvavatprabhuḥ . paśyatāṃ sarvabhūtānāṃ sthāpayāmāsa līlayā .. 28 ..

Shloka 29

तं प्रेमवेगान् निभृता व्रजौकसो यथा समीयुः परिरम्भणादिभिः । गोप्यश्च सस्नेहमपूजयन् मुदा दध्यक्षताद्भिर्युयुजुः सदाशिषः ॥ २९ ॥

taṃ premavegān nibhṛtā vrajaukaso yathā samīyuḥ parirambhaṇādibhiḥ . gopyaśca sasnehamapūjayan mudā dadhyakṣatādbhiryuyujuḥ sadāśiṣaḥ .. 29 ..

Shloka 30

यशोदा रोहिणी नन्दो रामश्च बलिनां वरः । कृष्णमालिङ्ग्य युयुजुः आशिषः स्नेहकातराः ॥ ३० ॥

yaśodā rohiṇī nando rāmaśca balināṃ varaḥ . kṛṣṇamāliṅgya yuyujuḥ āśiṣaḥ snehakātarāḥ .. 30 ..

Shloka 31

दिवि देवगणाः सिद्धाः साध्या गन्धर्वचारणाः । तुष्टुवुर्मुमुचुस्तुष्टाः पुष्पवर्षाणि पार्थिव ॥ ३१ ॥

divi devagaṇāḥ siddhāḥ sādhyā gandharvacāraṇāḥ . tuṣṭuvurmumucustuṣṭāḥ puṣpavarṣāṇi pārthiva .. 31 ..

Shloka 32

शङ्खदुन्दुभयो नेदुर्दिवि देवप्रचोदिताः । जगुर्गन्धर्वपतयः तुंबुरुप्रमुखा नृप ॥ ३२ ॥

śaṅkhadundubhayo nedurdivi devapracoditāḥ . jagurgandharvapatayaḥ tuṃburupramukhā nṛpa .. 32 ..

Shloka 33

ततोऽनुरक्तैः पशुपैः परिश्रितो राजन् स्वगोष्ठं सबलोऽव्रजद्धरिः । तथाविधान्यस्य कृतानि गोपिका गायन्त्य ईयुर्मुदिता हृदिस्पृशः ॥ ३३ ॥

tato'nuraktaiḥ paśupaiḥ pariśrito rājan svagoṣṭhaṃ sabalo'vrajaddhariḥ . tathāvidhānyasya kṛtāni gopikā gāyantya īyurmuditā hṛdispṛśaḥ .. 33 ..

Shloka 34

इति श्रीमद्भागवते महापुराणे पारमहंस्यां संहितायां दशमस्कन्धे पूर्वार्धे पञ्चविंशोऽध्यायः ॥ २५ ॥

iti śrīmadbhāgavate mahāpurāṇe pāramahaṃsyāṃ saṃhitāyāṃ daśamaskandhe pūrvārdhe pañcaviṃśo'dhyāyaḥ .. 25 ..

Shloka 35

हरिः ॐ तत्सत् श्रीकृष्णार्पणमस्तु ॥

hariḥ oṃ tatsat śrīkṛṣṇārpaṇamastu ..

Languages

Saved

Languages

Saved

Mudra Cost for Each Feature

Practice Later

No Playlist Found

Create a Verse Post

namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.