Gyaandweep | Bhagavata Purana, Dashamo Skanda, Adhyaya 9

Shloka 1

एकदा गृहदासीषु यशोदा नन्दगेहिनी । कर्मान्तरनियुक्तासु निर्ममन्थ स्वयं दधि ॥ १ ॥

ekadā gṛhadāsīṣu yaśodā nandagehinī . karmāntaraniyuktāsu nirmamantha svayaṃ dadhi .. 1 ..

Shloka 2

यानि यानीह गीतानि तद्बालचरितानि च । दधिनिर्मन्थने काले स्मरन्ती तान्यगायत ॥ २ ॥

yāni yānīha gītāni tadbālacaritāni ca . dadhinirmanthane kāle smarantī tānyagāyata .. 2 ..

Shloka 3

क्षौमं वासः पृथुकटितटे बिभ्रती सूत्रनद्धं । पुत्रस्नेहस्नुतकुचयुगं जातकम्पं च सुभ्रूः । रज्ज्वाकर्षश्रमभुजचलत् कङ्कणौ कुण्डले च स्विन्नं वक्त्रं कबरविगलन् मालती निर्ममन्थ ॥ ३ ॥

kṣaumaṃ vāsaḥ pṛthukaṭitaṭe bibhratī sūtranaddhaṃ . putrasnehasnutakucayugaṃ jātakampaṃ ca subhrūḥ . rajjvākarṣaśramabhujacalat kaṅkaṇau kuṇḍale ca svinnaṃ vaktraṃ kabaravigalan mālatī nirmamantha .. 3 ..

Shloka 4

तां स्तन्यकाम आसाद्य मथ्नन्तीं जननीं हरिः । गृहीत्वा दधिमन्थानं न्यषेधत्प्रीतिमावहन् ॥ ४ ॥

tāṃ stanyakāma āsādya mathnantīṃ jananīṃ hariḥ . gṛhītvā dadhimanthānaṃ nyaṣedhatprītimāvahan .. 4 ..

Shloka 5

तमङ्कमारूढमपाययत् स्तनं स्नेहस्नुतं सस्मितमीक्षती मुखम् । अतृप्तमुत्सृज्य जवेन सा ययौ उत्सिच्यमाने पयसि त्वधिश्रिते ॥ ५ ॥

tamaṅkamārūḍhamapāyayat stanaṃ snehasnutaṃ sasmitamīkṣatī mukham . atṛptamutsṛjya javena sā yayau utsicyamāne payasi tvadhiśrite .. 5 ..

Shloka 6

सञ्जातकोपः स्फुरितारुणाधरं सन्दश्य दद्भिर्दधिमन्थभाजनम् । भित्त्वा मृषाश्रुर्दृषदश्मना रहो जघास हैयङ्गवमन्तरं गतः ॥ ६ ॥

sañjātakopaḥ sphuritāruṇādharaṃ sandaśya dadbhirdadhimanthabhājanam . bhittvā mṛṣāśrurdṛṣadaśmanā raho jaghāsa haiyaṅgavamantaraṃ gataḥ .. 6 ..

Shloka 7

उत्तार्य गोपी सुशृतं पयः पुनः प्रविश्य संदृश्य च दध्यमत्रकम् । भग्नं विलोक्य स्वसुतस्य कर्म तज्जहास तं चापि न तत्र पश्यती ॥ ७ ॥

uttārya gopī suśṛtaṃ payaḥ punaḥ praviśya saṃdṛśya ca dadhyamatrakam . bhagnaṃ vilokya svasutasya karma tajjahāsa taṃ cāpi na tatra paśyatī .. 7 ..

Shloka 8

उलूखलाङ्घ्रेरुपरि व्यवस्थितं मर्काय कामं ददतं शिचि स्थितम् । हैयङ्गवं चौर्यविशङ्कितेक्षणं निरीक्ष्य पश्चात् सुतमागमच्छनैः ॥ ८ ॥

ulūkhalāṅghrerupari vyavasthitaṃ markāya kāmaṃ dadataṃ śici sthitam . haiyaṅgavaṃ cauryaviśaṅkitekṣaṇaṃ nirīkṣya paścāt sutamāgamacchanaiḥ .. 8 ..

Shloka 9

तां आत्तयष्टिं प्रसमीक्ष्य सत्वरः ततोऽवरुह्यापससार भीतवत् । गोप्यन्वधावन्न यमाप योगिनां क्षमं प्रवेष्टुं तपसेरितं मनः ॥ ९ ॥

tāṃ āttayaṣṭiṃ prasamīkṣya satvaraḥ tato'varuhyāpasasāra bhītavat . gopyanvadhāvanna yamāpa yogināṃ kṣamaṃ praveṣṭuṃ tapaseritaṃ manaḥ .. 9 ..

Shloka 10

अन्वञ्चमाना जननी बृहच्चलत् श्रोणीभराक्रान्तगतिः सुमध्यमा । जवेन विस्रंसितकेशबन्धन च्युतप्रसूनानुगतिः परामृशत् ॥ १० ॥

anvañcamānā jananī bṛhaccalat śroṇībharākrāntagatiḥ sumadhyamā . javena visraṃsitakeśabandhana cyutaprasūnānugatiḥ parāmṛśat .. 10 ..

Shloka 11

कृतागसं तं प्ररुदन्तमक्षिणी कर्षन्तमञ्जन्मषिणी स्वपाणिना । उद्वीक्षमाणं भयविह्वलेक्षणं हस्ते गृहीत्वा भिषयन्त्यवागुरत् ॥ ११ ॥

kṛtāgasaṃ taṃ prarudantamakṣiṇī karṣantamañjanmaṣiṇī svapāṇinā . udvīkṣamāṇaṃ bhayavihvalekṣaṇaṃ haste gṛhītvā bhiṣayantyavāgurat .. 11 ..

Shloka 12

त्यक्त्वा यष्टिं सुतं भीतं विज्ञायार्भकवत्सला । इयेष किल तं बद्धुं दाम्नातद्वीर्यकोविदा ॥ १२ ॥

tyaktvā yaṣṭiṃ sutaṃ bhītaṃ vijñāyārbhakavatsalā . iyeṣa kila taṃ baddhuṃ dāmnātadvīryakovidā .. 12 ..

Shloka 13

न चान्तर्न बहिर्यस्य न पूर्वं नापि चापरम् । पूर्वापरं बहिश्चान्तः जगतो यो जगच्च यः ॥ १३ ॥

na cāntarna bahiryasya na pūrvaṃ nāpi cāparam . pūrvāparaṃ bahiścāntaḥ jagato yo jagacca yaḥ .. 13 ..

Shloka 14

तं मत्वात्मजमव्यक्तं मर्त्यलिङ्गमधोक्षजम् । गोपिकोलूखले दाम्ना बबन्ध प्राकृतं यथा ॥ १४ ॥

taṃ matvātmajamavyaktaṃ martyaliṅgamadhokṣajam . gopikolūkhale dāmnā babandha prākṛtaṃ yathā .. 14 ..

Shloka 15

तद्दाम बध्यमानस्य स्वार्भकस्य कृतागसः । द्व्यङ्गुलोनमभूत्तेन सन्दधेऽन्यच्च गोपिका ॥ १५ ॥

taddāma badhyamānasya svārbhakasya kṛtāgasaḥ . dvyaṅgulonamabhūttena sandadhe'nyacca gopikā .. 15 ..

Shloka 16

यदाऽऽसीत् तदपि न्यूनं तेनान्यदपि सन्दधे । तदपि द्व्यङ्गुलं न्यूनं यद् यद् आदत्त बन्धनम् ॥ १६ ॥

yadā''sīt tadapi nyūnaṃ tenānyadapi sandadhe . tadapi dvyaṅgulaṃ nyūnaṃ yad yad ādatta bandhanam .. 16 ..

Shloka 17

एवं स्वगेहदामानि यशोदा सन्दधत्यपि । गोपीनां सुस्मयन्तीनां स्मयन्ती विस्मिताभवत् ॥ १७ ॥

evaṃ svagehadāmāni yaśodā sandadhatyapi . gopīnāṃ susmayantīnāṃ smayantī vismitābhavat .. 17 ..

Shloka 18

स्वमातुः स्विन्नगात्राया विस्रस्तकबरस्रजः । दृष्ट्वा परिश्रमं कृष्णः कृपयाऽऽसीत् स्वबन्धने ॥ १८ ॥

svamātuḥ svinnagātrāyā visrastakabarasrajaḥ . dṛṣṭvā pariśramaṃ kṛṣṇaḥ kṛpayā''sīt svabandhane .. 18 ..

Shloka 19

एवं सन्दर्शिता ह्यङ्ग हरिणा भृत्यवश्यता । स्ववशेनापि कृष्णेन यस्येदं सेश्वरं वशे ॥ १९ ॥

evaṃ sandarśitā hyaṅga hariṇā bhṛtyavaśyatā . svavaśenāpi kṛṣṇena yasyedaṃ seśvaraṃ vaśe .. 19 ..

Shloka 20

नेमं विरिञ्चो न भवो न श्रीरप्यङ्गसंश्रया । प्रसादं लेभिरे गोपी यत् तत्प्राप विमुक्तिदात् ॥ २० ॥

nemaṃ viriñco na bhavo na śrīrapyaṅgasaṃśrayā . prasādaṃ lebhire gopī yat tatprāpa vimuktidāt .. 20 ..

Shloka 21

नायं सुखापो भगवान् देहिनां गोपिकासुतः । ज्ञानिनां चात्मभूतानां यथा भक्तिमतां इह ॥ २१ ॥

nāyaṃ sukhāpo bhagavān dehināṃ gopikāsutaḥ . jñānināṃ cātmabhūtānāṃ yathā bhaktimatāṃ iha .. 21 ..

Shloka 22

कृष्णस्तु गृहकृत्येषु व्यग्रायां मातरि प्रभुः । अद्राक्षीत् अर्जुनौ पूर्वं गुह्यकौ धनदात्मजौ ॥ २२ ॥

kṛṣṇastu gṛhakṛtyeṣu vyagrāyāṃ mātari prabhuḥ . adrākṣīt arjunau pūrvaṃ guhyakau dhanadātmajau .. 22 ..

Shloka 23

पुरा नारदशापेन वृक्षतां प्रापितौ मदात् । नलकूवरमणिग्रीवौ इति ख्यातौ श्रियान्वितौ ॥ २३ ॥

purā nāradaśāpena vṛkṣatāṃ prāpitau madāt . nalakūvaramaṇigrīvau iti khyātau śriyānvitau .. 23 ..

Shloka 24

इति श्रीमद्भागवते महापुराणे पारमहंस्यां संहितायां दशमस्कन्धे पूर्वार्धे नवमोऽध्यायः ॥ ९ ॥

iti śrīmadbhāgavate mahāpurāṇe pāramahaṃsyāṃ saṃhitāyāṃ daśamaskandhe pūrvārdhe navamo'dhyāyaḥ .. 9 ..

Languages

Saved

Languages

Saved

Mudra Cost for Each Feature

Practice Later

No Playlist Found

Create a Verse Post

namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.