सूत उवाच ।
क्रोष्टोरेकोऽभवत् पुत्रो वज्रवानिति विश्रुतः । तस्य पुत्रोऽभवतच्छान्तिः कुशिकस्तत्सुतोऽभवत् ॥ २४.१॥
kroṣṭoreko'bhavat putro vajravāniti viśrutaḥ | tasya putro'bhavatacchāntiḥ kuśikastatsuto'bhavat || 24.1||
उशद्गोरभवत् पुत्रो नाम्ना चित्ररथो बली । अथ चैत्ररथिर्लोके शशबिन्दुरिति स्मृतः ॥ २४.२॥
uśadgorabhavat putro nāmnā citraratho balī | atha caitrarathirloke śaśabinduriti smṛtaḥ || 24.2||
तस्य पुत्रः पृथुयशा राजाऽभूद् धर्मतत्परः । पृथुकर्मा च तत्पुत्रस्तस्मात् पृथुजयोऽभवत् ॥ २४.३॥
tasya putraḥ pṛthuyaśā rājā'bhūd dharmatatparaḥ | pṛthukarmā ca tatputrastasmāt pṛthujayo'bhavat || 24.3||
पृथुकीर्तिरभूत् तस्मात् पृथुदानस्ततोऽभवत् । पृथुश्रवास्तस्य पुत्रस्तस्यासीत् पृथुसत्तमः ॥ २४.४॥
pṛthukīrtirabhūt tasmāt pṛthudānastato'bhavat | pṛthuśravāstasya putrastasyāsīt pṛthusattamaḥ || 24.4||
उशनास्तस्य पुत्रोऽभूच्छतेषुस्तत्सुतोऽभवत् । तस्याभूद् रुक्मकवचः परावृतश्च तत्सुतः ॥ २४.५॥
uśanāstasya putro'bhūcchateṣustatsuto'bhavat | tasyābhūd rukmakavacaḥ parāvṛtaśca tatsutaḥ || 24.5||
परावृतः सुतो जज्ञे यामघो लोकविश्रुतः । तस्माद् विदर्भः संजज्ञे विदर्भात् क्रथकैशिकौ ॥ २४.६॥
parāvṛtaḥ suto jajñe yāmagho lokaviśrutaḥ | tasmād vidarbhaḥ saṃjajñe vidarbhāt krathakaiśikau || 24.6||
रोमपादस्तृतीयस्तु बभ्रुस्तस्यात्मजो नृपः । धृतिस्तस्याभवत् पुत्रः संन्तस्तस्याप्यभूत् सुतः ॥ २४.७॥
romapādastṛtīyastu babhrustasyātmajo nṛpaḥ | dhṛtistasyābhavat putraḥ saṃntastasyāpyabhūt sutaḥ || 24.7||
संन्तस्य पुत्रो बलवान् नाम्ना विश्वसहः स्मृतः। तस्य पुत्रो महावीर्यः प्रजावान् कौशिक स्मृतः॥ २४.८॥
saṃntasya putro balavān nāmnā viśvasahaḥ smṛtaḥ| tasya putro mahāvīryaḥ prajāvān kauśika smṛtaḥ|| 24.8||
अभूत् तस्य सुतो धीमान् सुमन्तुस्तत्सुतोऽनलः । कैशिकस्य सुतश्चेदिश्चैद्यास्तस्याभवन् सुताः ॥ २४.९॥
abhūt tasya suto dhīmān sumantustatsuto'nalaḥ | kaiśikasya sutaścediścaidyāstasyābhavan sutāḥ || 24.9||
तेषां प्रधानो द्युतिमान् वपुष्मांस्तत्सुतोऽभवत् । वपुष्मतो बृहन्मेधा श्रीदेवस्तत्सुतोऽभवत् ॥ २४.१॥
teṣāṃ pradhāno dyutimān vapuṣmāṃstatsuto'bhavat | vapuṣmato bṛhanmedhā śrīdevastatsuto'bhavat || 24.1||
तस्य वीतरथो विप्रा रुद्रभक्तो महाबलः । क्रथस्याप्यभवत् कुन्ती वृष्णी तस्याभवत् सुतः ॥ २४.११॥
tasya vītaratho viprā rudrabhakto mahābalaḥ | krathasyāpyabhavat kuntī vṛṣṇī tasyābhavat sutaḥ || 24.11||
तस्मान्नवरथो नाम बभुव सुमहाबलः। .कदाचिन्मृगयां यातो दृष्ट्वा राक्षसमूर्जितम् ॥ २४.१२॥
tasmānnavaratho nāma babhuva sumahābalaḥ| .kadācinmṛgayāṃ yāto dṛṣṭvā rākṣasamūrjitam || 24.12||
दुद्राव महातविष्टो भयेन मुनिपुंगवाः । अन्वधावत संक्रुद्धो राक्षसस्तं महाबलः॥ २४.१३॥
dudrāva mahātaviṣṭo bhayena munipuṃgavāḥ | anvadhāvata saṃkruddho rākṣasastaṃ mahābalaḥ|| 24.13||
दुर्योधनोऽग्निसंकाशः शूलासक्तमहाकरः । राजा नवरथो भीत्या नातिदूरादवस्थितम् ॥ २४.१४॥
duryodhano'gnisaṃkāśaḥ śūlāsaktamahākaraḥ | rājā navaratho bhītyā nātidūrādavasthitam || 24.14||
अपश्यत् परमं स्थानं सरस्वत्या सुगोपितम् । स तद्वेगेन महता संप्राप्य मतिमान् नृपः॥ २४.१५॥
apaśyat paramaṃ sthānaṃ sarasvatyā sugopitam | sa tadvegena mahatā saṃprāpya matimān nṛpaḥ|| 24.15||
ववन्दे शिरसा दृष्ट्वा साक्षाद् देवीं सरस्वतीम् । तुष्टाव वाग्भिरिष्टाभिर्बद्धाञ्जलिरमित्रजित् ॥ २४.१६॥
vavande śirasā dṛṣṭvā sākṣād devīṃ sarasvatīm | tuṣṭāva vāgbhiriṣṭābhirbaddhāñjaliramitrajit || 24.16||
पपात दण्डवद् भूमौ त्वामहं शरणं गतः । नमस्यामि महादेवीं साक्षाद् देवीं सरस्वतीम् ।॥ २४.१७॥
papāta daṇḍavad bhūmau tvāmahaṃ śaraṇaṃ gataḥ | namasyāmi mahādevīṃ sākṣād devīṃ sarasvatīm ||| 24.17||
वाग्देवतामनाद्यन्तामीश्वरीं ब्रह्मचारिणीम् । नमस्ये जगतां योनिं योगिनीं परमां कलाम् । ॥ २४.१८॥
vāgdevatāmanādyantāmīśvarīṃ brahmacāriṇīm | namasye jagatāṃ yoniṃ yoginīṃ paramāṃ kalām | || 24.18||
हिरण्यगर्भमहिषीं त्रिनेत्रां चन्द्रशेखराम् । नमस्ये परमानन्दां चित्कलां ब्रह्मरूपिणीम् । ॥ २४.१९॥
hiraṇyagarbhamahiṣīṃ trinetrāṃ candraśekharām | namasye paramānandāṃ citkalāṃ brahmarūpiṇīm | || 24.19||
पाहि मां परमेशानि भीतं शरणमागतम् । एतस्मिन्नन्तरे क्रुद्धो राजानं राक्षसेश्वरः ।॥ २४.२॥
pāhi māṃ parameśāni bhītaṃ śaraṇamāgatam | etasminnantare kruddho rājānaṃ rākṣaseśvaraḥ ||| 24.2||
हन्तुं समागतः स्थानं यत्र देवी सरस्वती । समुद्यम्य तदा शूलं प्रवेष्टुं बलदर्पितः ॥ २४.२१॥
hantuṃ samāgataḥ sthānaṃ yatra devī sarasvatī | samudyamya tadā śūlaṃ praveṣṭuṃ baladarpitaḥ || 24.21||
त्रिलोकमातुस्तत्स्थानं शशाङ्कादित्यसंन्निभम् । तदन्तरे महद्भूतं युगान्तादित्यसन्निभम् ।॥ २४.२२॥
trilokamātustatsthānaṃ śaśāṅkādityasaṃnnibham | tadantare mahadbhūtaṃ yugāntādityasannibham ||| 24.22||
शूलेनोरसि निर्भिद्य पातयामास तं भुवि । गच्छेत्याह महाराज न स्थातव्यं त्वया पुनः ॥ २४.२३॥
śūlenorasi nirbhidya pātayāmāsa taṃ bhuvi | gacchetyāha mahārāja na sthātavyaṃ tvayā punaḥ || 24.23||
इदानीं निर्भयस्तूर्णं स्थानेऽस्मिन् राक्षसो हतः । ततः प्रणम्य हृष्टात्मा राजा नवरथः पराम् ॥ २४.२४॥
idānīṃ nirbhayastūrṇaṃ sthāne'smin rākṣaso hataḥ | tataḥ praṇamya hṛṣṭātmā rājā navarathaḥ parām || 24.24||
पुरीं जगाम विप्रेन्द्राः पुरंदरपुरोपमाम् । स्थापयामास देवेशीं तत्र भक्तिसमन्वितः ॥ २४.२५॥
purīṃ jagāma viprendrāḥ puraṃdarapuropamām | sthāpayāmāsa deveśīṃ tatra bhaktisamanvitaḥ || 24.25||
ईजे च विविधैर्यज्ञैर्होमैर्देवीं सरस्वतीम् । तस्य चासीद् दशरथः पुत्रः परमधार्मिकः॥ २४.२६॥
īje ca vividhairyajñairhomairdevīṃ sarasvatīm | tasya cāsīd daśarathaḥ putraḥ paramadhārmikaḥ|| 24.26||
देव्या भक्तो महातेजाः शकुनिस्तस्य चात्मजः । तस्मात् करम्भः संभूतो देवरातोऽभवत् ततः ।॥ २४.२७॥
devyā bhakto mahātejāḥ śakunistasya cātmajaḥ | tasmāt karambhaḥ saṃbhūto devarāto'bhavat tataḥ ||| 24.27||
ईजे स चाश्वमेधेन देवक्षत्रश्च तत्सुतः । मधुस्तस्य तु दायादस्तस्मात् कुरुवशोऽभवत् ॥ २४.२८॥
īje sa cāśvamedhena devakṣatraśca tatsutaḥ | madhustasya tu dāyādastasmāt kuruvaśo'bhavat || 24.28||
पुत्रद्वयमभूत् तस्य सुत्रामा चानुरेव च । अनोस्तु पुरुकुत्सोऽभूदंशुस्तस्य च रिक्थभाक्॥ २४.२९॥
putradvayamabhūt tasya sutrāmā cānureva ca | anostu purukutso'bhūdaṃśustasya ca rikthabhāk|| 24.29||
अथांशोःरन्धको नाम विष्णुभक्तः प्रतापवान् । महात्मा दाननिरतो धनुर्वेदविदां वरः ॥ २४.३॥
athāṃśoḥrandhako nāma viṣṇubhaktaḥ pratāpavān | mahātmā dānanirato dhanurvedavidāṃ varaḥ || 24.3||
स नारदस्य वचनाद् वासुदेवार्चने रतः । शास्त्रं प्रवर्तयामास कुण्डगोलादिभिः श्रुतम् ॥ २४.३१॥
sa nāradasya vacanād vāsudevārcane rataḥ | śāstraṃ pravartayāmāsa kuṇḍagolādibhiḥ śrutam || 24.31||
तस्य नाम्ना तु विख्यातं सात्त्वतं नाम शोभनम् । प्रवर्तते महाशास्त्रं कुण्डादीनां हितावहम् ॥ २४.३२॥
tasya nāmnā tu vikhyātaṃ sāttvataṃ nāma śobhanam | pravartate mahāśāstraṃ kuṇḍādīnāṃ hitāvaham || 24.32||
सात्त्वतस्तस्य पुत्रोऽभूत् सर्वशास्त्रविशारदः । पुण्यश्लोको महाराजस्तेन वै तत्प्रवर्तितम् ॥ २४.३३॥
sāttvatastasya putro'bhūt sarvaśāstraviśāradaḥ | puṇyaśloko mahārājastena vai tatpravartitam || 24.33||
सात्त्वतः सत्त्वसंपन्नः कौशल्यां सुषुवे सुतान् । अन्धकं वै महाभोजं वृष्णिं देवावृधं नृपम् ॥ २४.३४॥
sāttvataḥ sattvasaṃpannaḥ kauśalyāṃ suṣuve sutān | andhakaṃ vai mahābhojaṃ vṛṣṇiṃ devāvṛdhaṃ nṛpam || 24.34||
ज्येष्ठं च भजमानाख्यं धनुर्वेदविदां वरम् । तेषां देवावृधो राजा चचार परमं तपः ॥ २४.३५॥
jyeṣṭhaṃ ca bhajamānākhyaṃ dhanurvedavidāṃ varam | teṣāṃ devāvṛdho rājā cacāra paramaṃ tapaḥ || 24.35||
पुत्रः सर्वगुणोपेतो मम भूयादिति प्रभुः । तस्य बभ्रुरिति ख्यातः पुण्यश्लोकोऽभवन्नृपः ॥ २४.३६॥
putraḥ sarvaguṇopeto mama bhūyāditi prabhuḥ | tasya babhruriti khyātaḥ puṇyaśloko'bhavannṛpaḥ || 24.36||
धार्मिको रूपसंपन्नस्तत्त्वज्ञानरतः सदा । भजमानस्य मृञ्जय्यां भजमानाद्विजज्ञिरे ॥ २४.३७॥
dhārmiko rūpasaṃpannastattvajñānarataḥ sadā | bhajamānasya mṛñjayyāṃ bhajamānādvijajñire || 24.37||
तेषां प्रधानौ विख्यातौ निमिः कृकण एव च । महाभोजकुले जाता भोजा वैमातृकास्तथा ॥ २४.३८॥
teṣāṃ pradhānau vikhyātau nimiḥ kṛkaṇa eva ca | mahābhojakule jātā bhojā vaimātṛkāstathā || 24.38||
वृष्णेः सुमित्रो बलवाननमित्रस्तिमिस्तथा । अनमित्रादभून्निघ्नो निघ्नस्य द्वौ बभूवतुः ॥ २४.३९॥
vṛṣṇeḥ sumitro balavānanamitrastimistathā | anamitrādabhūnnighno nighnasya dvau babhūvatuḥ || 24.39||
प्रसेनस्तु महाभागः सत्राजिन्नाम चोत्तमः । अनमित्राच्छिनिर्जज्ञे कनिष्ठाद् वृष्णिनन्दनात्॥ २४.४॥
prasenastu mahābhāgaḥ satrājinnāma cottamaḥ | anamitrācchinirjajñe kaniṣṭhād vṛṣṇinandanāt|| 24.4||
सत्यवान् सत्यसंपन्नः सत्यकस्तत्सुतोऽभवत् । सात्यकिर्युयुधानस्तु तस्यासङ्गोऽभवत् सुतः॥ २४.४१॥
satyavān satyasaṃpannaḥ satyakastatsuto'bhavat | sātyakiryuyudhānastu tasyāsaṅgo'bhavat sutaḥ|| 24.41||
कुणिस्तस्य सुतो धीमांस्तस्य पुत्रो युगंधरः । माद्र्या वृष्णेः सुतो जज्ञे वृष्णेर्वै यदुनन्दनः ॥ २४.४२॥
kuṇistasya suto dhīmāṃstasya putro yugaṃdharaḥ | mādryā vṛṣṇeḥ suto jajñe vṛṣṇervai yadunandanaḥ || 24.42||
जज्ञाते तनयौ पृश्नेः श्वफल्कश्चित्रकश्च हि । श्वफल्कः काशिराजस्यसुतां भार्यामविन्दत॥ २४.४३॥
jajñāte tanayau pṛśneḥ śvaphalkaścitrakaśca hi | śvaphalkaḥ kāśirājasyasutāṃ bhāryāmavindata|| 24.43||
तस्यामजनयत् पुत्रमक्रूरं नाम धार्मिकम् । उपमङ्गुस्तथा मङ्गुरन्ये च बहवः सुताः ॥ २४.४४॥
tasyāmajanayat putramakrūraṃ nāma dhārmikam | upamaṅgustathā maṅguranye ca bahavaḥ sutāḥ || 24.44||
अक्रूरस्य स्मृतः पुत्रो देववानिति विश्रुतः । उपदेवश्च पुण्यात्मा तयोर्विश्वप्रमाथिनौ ॥ २४.४५॥
akrūrasya smṛtaḥ putro devavāniti viśrutaḥ | upadevaśca puṇyātmā tayorviśvapramāthinau || 24.45||
चित्रकस्याभवत् पुत्रः पृथुर्विपृथुरेव च । अश्वग्रीवः सुबाहुश्च सुपार्श्वकगवेषणौ ॥ २४.४६॥
citrakasyābhavat putraḥ pṛthurvipṛthureva ca | aśvagrīvaḥ subāhuśca supārśvakagaveṣaṇau || 24.46||
अन्धकात् कास्यदुहिता लेभे च चतुरः सुतान् । कुकुरं भजमानं च शमीकं बलगर्वितम्॥ २४.४७॥
andhakāt kāsyaduhitā lebhe ca caturaḥ sutān | kukuraṃ bhajamānaṃ ca śamīkaṃ balagarvitam|| 24.47||
कुकुरस्य सुतो वृष्णिर्वृष्णेस्तु तनयोऽभवत् । कपोतरोमा विपुलस्तस्य पुत्रो विलोमकः ॥ २४.४८॥
kukurasya suto vṛṣṇirvṛṣṇestu tanayo'bhavat | kapotaromā vipulastasya putro vilomakaḥ || 24.48||
तस्यासीत् तुम्बुरुसखा विद्वान् पुत्रस्तलः किल । स्थीयते तस्यनाम्नातु तयोरानकदुन्दुभिः ॥ २४.४९॥
tasyāsīt tumburusakhā vidvān putrastalaḥ kila | sthīyate tasyanāmnātu tayorānakadundubhiḥ || 24.49||
स गोवर्धनमासाद्य तताप विपुलं तपः । वरं तस्मै ददौ देवो ब्रह्मा लोकमहेश्वरः ॥ २४.५॥
sa govardhanamāsādya tatāpa vipulaṃ tapaḥ | varaṃ tasmai dadau devo brahmā lokamaheśvaraḥ || 24.5||
वंशस्य चाक्षयां कीर्ति ज्ञानयोगमनुत्तमम् । गुरोरप्यधिकं विप्राः कामरूपित्वमेव च ॥ २४.५१॥
vaṃśasya cākṣayāṃ kīrti jñānayogamanuttamam | gurorapyadhikaṃ viprāḥ kāmarūpitvameva ca || 24.51||
स लब्ध्वा वरमव्यग्रो वरेण्यं वृषवाहनम् । पूजयामास गानेन स्थाणुं त्रिदशपूजितम् ॥ २४.५२॥
sa labdhvā varamavyagro vareṇyaṃ vṛṣavāhanam | pūjayāmāsa gānena sthāṇuṃ tridaśapūjitam || 24.52||
तस्य गानरतस्याथ भगवानम्बिकापतिः । कन्यारत्नं ददौ देवो दुर्लभं त्रिदशैरपि ॥ २४.५३॥
tasya gānaratasyātha bhagavānambikāpatiḥ | kanyāratnaṃ dadau devo durlabhaṃ tridaśairapi || 24.53||
तया स सङ्गतो राजा गानयोगमनुत्तमम् । अशिक्षयदमित्रघ्नः प्रियां तां भ्रान्तलोचनाम् ॥ २४.५४॥
tayā sa saṅgato rājā gānayogamanuttamam | aśikṣayadamitraghnaḥ priyāṃ tāṃ bhrāntalocanām || 24.54||
तस्यामुत्पादयामास सुभुजं नाम शोभनम् । रूपलावण्यसंपन्नां ह्रीमतीमपि कन्यकाम् ॥ २४.५५॥
tasyāmutpādayāmāsa subhujaṃ nāma śobhanam | rūpalāvaṇyasaṃpannāṃ hrīmatīmapi kanyakām || 24.55||
ततस्तं जननी पुत्रं बाल्ये वयसि शोभनम् । शिक्षयामास विधिवद् गानविद्यां च कन्यकाम् ॥ २४.५६॥
tatastaṃ jananī putraṃ bālye vayasi śobhanam | śikṣayāmāsa vidhivad gānavidyāṃ ca kanyakām || 24.56||
कृतोपनयनो वेदानधीत्य विधिवद् गुरोः । उद्ववाहात्मजां कन्यां गन्धर्वाणां तु मानसीम् ॥ २४.५७॥
kṛtopanayano vedānadhītya vidhivad guroḥ | udvavāhātmajāṃ kanyāṃ gandharvāṇāṃ tu mānasīm || 24.57||
तस्यामुत्पादयामास पञ्च पुत्राननुत्तमान् । वीणावादनतत्त्वज्ञान् गानशास्त्रविशारदान् ॥ २४.५८॥
tasyāmutpādayāmāsa pañca putrānanuttamān | vīṇāvādanatattvajñān gānaśāstraviśāradān || 24.58||
पुत्रैः पौत्रैः सपत्नीको राजा गानविशारदः । पूजयामास गानेन देवं त्रिपुरनाशनम् ॥ २४.५९॥
putraiḥ pautraiḥ sapatnīko rājā gānaviśāradaḥ | pūjayāmāsa gānena devaṃ tripuranāśanam || 24.59||
ह्रीमती चापि या कन्या श्रीरिवायतलोचना । सुबाहुर्नाम गन्धर्वस्तामादाय ययौ पुरीम् ॥ २४.६॥
hrīmatī cāpi yā kanyā śrīrivāyatalocanā | subāhurnāma gandharvastāmādāya yayau purīm || 24.6||
तस्यामप्यभवन् पुत्रा गन्धर्वस्य सुतेजसः । सुषेणधीरसुग्रीवसुभोजनरवाहनाः ॥ २४.६१॥
tasyāmapyabhavan putrā gandharvasya sutejasaḥ | suṣeṇadhīrasugrīvasubhojanaravāhanāḥ || 24.61||
अथासीदभिजित् पुत्रो वीरस्त्वानकदुन्दुभेः । पुनर्वसुश्चाभिजितः संबभूवाहुकस्ततः ॥ २४.६२॥
athāsīdabhijit putro vīrastvānakadundubheḥ | punarvasuścābhijitaḥ saṃbabhūvāhukastataḥ || 24.62||
आहुकस्योग्रसेनश्च देवकश्च द्विजोत्तमाः । देवकस्य सुता वीरा जज्ञिरे त्रिदशोपमाः ॥ २४.६३॥
āhukasyograsenaśca devakaśca dvijottamāḥ | devakasya sutā vīrā jajñire tridaśopamāḥ || 24.63||
देववानुपदेवश्च सुदेवो देवरक्षितः । तेषां स्वसारः सप्तासन् वसुदेवाय ता ददौ ॥ २४.६४॥
devavānupadevaśca sudevo devarakṣitaḥ | teṣāṃ svasāraḥ saptāsan vasudevāya tā dadau || 24.64||
वृकदेवोपदेवा च तथान्या देवरक्षिता । श्रीदेवा शान्तिदेवा च सहदेवा च सुव्रता ॥ २४.६५॥
vṛkadevopadevā ca tathānyā devarakṣitā | śrīdevā śāntidevā ca sahadevā ca suvratā || 24.65||
देवकी चापि तासां तु वरिष्ठाऽभूत् सुमध्यमा । उग्रसेनस्य पुत्रोऽभून्न्यग्रोधः कंस एव च ॥ २४.६६॥
devakī cāpi tāsāṃ tu variṣṭhā'bhūt sumadhyamā | ugrasenasya putro'bhūnnyagrodhaḥ kaṃsa eva ca || 24.66||
सुभूमी राष्ट्रपालश्च तुष्टिमाञ्छङ्कुरेव च । भजमानादबूत् पुत्रः प्रख्यातोऽसौ विदूरथः॥ २४.६७॥
subhūmī rāṣṭrapālaśca tuṣṭimāñchaṅkureva ca | bhajamānādabūt putraḥ prakhyāto'sau vidūrathaḥ|| 24.67||
तस्य सूरसमस्तस्मात् प्रतिक्षत्रस्ततोऽभवत् । स्वयंभोजस्ततस्तस्माद् हृदिकः शत्रुतापनः ॥ २४.६८॥
tasya sūrasamastasmāt pratikṣatrastato'bhavat | svayaṃbhojastatastasmād hṛdikaḥ śatrutāpanaḥ || 24.68||
कृतवर्माऽथ तत्पुत्रो देवलस्तत्सुतः स्मृतः । स शूरस्तत्सुतो धीमान् वसुदेवोऽथ तत्सुतः ॥ २४.६९॥
kṛtavarmā'tha tatputro devalastatsutaḥ smṛtaḥ | sa śūrastatsuto dhīmān vasudevo'tha tatsutaḥ || 24.69||
वसुदेवावन्महाबाहुर्वासुदेवो जगद्गुरुः । बभूव देवकीपुत्रो देवैरभ्यर्थितो हरिः ॥ २४.७॥
vasudevāvanmahābāhurvāsudevo jagadguruḥ | babhūva devakīputro devairabhyarthito hariḥ || 24.7||
रोहिणी च महाभागा वसुदेवस्य शोभना । असूत पत्नी संकर्षं रामं ज्येष्ठं हलायुधम् ॥ २४.७१॥
rohiṇī ca mahābhāgā vasudevasya śobhanā | asūta patnī saṃkarṣaṃ rāmaṃ jyeṣṭhaṃ halāyudham || 24.71||
स एव परमात्माऽसौ वासुदेवो जगन्मयः । हलायुधः स्वयं साक्षाच्छेषः संकर्षणः प्रभुः ॥ २४.७२॥
sa eva paramātmā'sau vāsudevo jaganmayaḥ | halāyudhaḥ svayaṃ sākṣāccheṣaḥ saṃkarṣaṇaḥ prabhuḥ || 24.72||
भृगुशापच्छलेनैव मानयन् मानुषीं तनुम् । बभूत तस्यां देवक्यां रोहिण्यामपि माधवः ॥ २४.७३॥
bhṛguśāpacchalenaiva mānayan mānuṣīṃ tanum | babhūta tasyāṃ devakyāṃ rohiṇyāmapi mādhavaḥ || 24.73||
उमादेहसमुद्भूता योगनिद्रा च कौशीकी । नियोगाद् वासुदेवस्य यशोदातनया ह्यभूत् ॥ २४.७४॥
umādehasamudbhūtā yoganidrā ca kauśīkī | niyogād vāsudevasya yaśodātanayā hyabhūt || 24.74||
ये चान्ये वसुदेवस्य वासुदेवाग्रजाः सुताः । प्रागेव कंसस्तान् सर्वान् जघान मुनिपुंगवाः ॥ २४.७५॥
ye cānye vasudevasya vāsudevāgrajāḥ sutāḥ | prāgeva kaṃsastān sarvān jaghāna munipuṃgavāḥ || 24.75||
सुषेणश्च तथोदायी भद्रसेनो महाबलः । ऋजुदासो भद्रदासः कीर्तिमानपि पूर्वजः ॥ २४.७६॥
suṣeṇaśca tathodāyī bhadraseno mahābalaḥ | ṛjudāso bhadradāsaḥ kīrtimānapi pūrvajaḥ || 24.76||
हतेष्वेतेषु सर्वेषु रोहिणी वसुदेवतः । असूत रामं लोकेशं बलभद्रं हलायुधम् ॥ २४.७७॥
hateṣveteṣu sarveṣu rohiṇī vasudevataḥ | asūta rāmaṃ lokeśaṃ balabhadraṃ halāyudham || 24.77||
जातेऽथ रामे देवानामादिमात्मानमच्युतम् । असूत देवकी कृष्णं श्रीवत्साङ्कितवक्षसम् ॥ २४.७८॥
jāte'tha rāme devānāmādimātmānamacyutam | asūta devakī kṛṣṇaṃ śrīvatsāṅkitavakṣasam || 24.78||
रेवती नाम रामस्य भार्यासीत् सुगुणान्विता । तस्यामुत्पादयामास पुत्रौ द्वौ निशितोल्मुकौ ॥ २४.७९॥
revatī nāma rāmasya bhāryāsīt suguṇānvitā | tasyāmutpādayāmāsa putrau dvau niśitolmukau || 24.79||
षोडशस्त्रीसहस्त्राणि कृष्णस्याक्लिष्टकर्मणः । बभूवुरात्मजास्तासु शतशोऽथ सहस्त्रशः ॥ २४.८॥
ṣoḍaśastrīsahastrāṇi kṛṣṇasyākliṣṭakarmaṇaḥ | babhūvurātmajāstāsu śataśo'tha sahastraśaḥ || 24.8||
चारुदेष्णः सुचारुश्च चारुवेषो यशोधरः । चारुश्रवाश्चारुयशाः प्रद्युम्नः शंख एव च ॥ २४.८१॥
cārudeṣṇaḥ sucāruśca cāruveṣo yaśodharaḥ | cāruśravāścāruyaśāḥ pradyumnaḥ śaṃkha eva ca || 24.81||
रुक्मिण्यां वासुदेवस्य महाबलपराक्रमाः । विशिष्टाः सर्वपुत्राणां संबभूवुरिमे सुताः ॥ २४.८२॥
rukmiṇyāṃ vāsudevasya mahābalaparākramāḥ | viśiṣṭāḥ sarvaputrāṇāṃ saṃbabhūvurime sutāḥ || 24.82||
तान् दृष्ट्वा तनयान् वीरान् रौक्मिणेयाञ्जनार्दनात् । जाम्बवत्यब्रवीत् कृष्णं भार्या तस्य शुचिस्मिता ॥ २४.८३॥
tān dṛṣṭvā tanayān vīrān raukmiṇeyāñjanārdanāt | jāmbavatyabravīt kṛṣṇaṃ bhāryā tasya śucismitā || 24.83||
मम त्वं पुण्डरीकाक्ष विशिष्टं गुणवत्तमम् । सुरेशसदृशं पुत्रं देहि दानवसूदन ॥ २४.८४॥
mama tvaṃ puṇḍarīkākṣa viśiṣṭaṃ guṇavattamam | sureśasadṛśaṃ putraṃ dehi dānavasūdana || 24.84||
जाम्बवत्या वचः श्रुत्वा जगन्नाथः स्वयं हरिः । समारेभे तपः कर्त्तुं तपोनिधिररिंदमः ॥ २४.८५॥
jāmbavatyā vacaḥ śrutvā jagannāthaḥ svayaṃ hariḥ | samārebhe tapaḥ karttuṃ taponidhirariṃdamaḥ || 24.85||
तच्छृणुध्वं मुनिश्रेष्ठा यथाऽसौ देवकीसुतः । दृष्ट्वा लेभे सुतं रुद्रं तप्त्वा तीव्रं महत् तपः ॥ २४.८६॥
tacchṛṇudhvaṃ muniśreṣṭhā yathā'sau devakīsutaḥ | dṛṣṭvā lebhe sutaṃ rudraṃ taptvā tīvraṃ mahat tapaḥ || 24.86||
इति श्रीकूर्मपुराणे षट्साहस्त्र्यां संहितायां पूर्वविभागे चतुर्विंशोऽध्यायः॥ ॥
iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge caturviṃśo'dhyāyaḥ|| ||
ॐ श्री परमात्मने नमः
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
