This overlay will guide you through the buttons:

| |
|
Sarga Begins
श्रीमद्वाल्मीकियरामायणे अरण्यकाण्डे द्वितीयः सर्गः ॥३-२॥
śrīmadvālmīkiyarāmāyaṇe araṇyakāṇḍe dvitīyaḥ sargaḥ ..3-2..
Shloka 1
कृतातिथ्योऽथ रामस्तु सूर्यस्योदयनं प्रति । आमन्त्र्य स मुनीन् सर्वान् वनमेवान्वगाहत॥ १॥
kṛtātithyo'tha rāmastu sūryasyodayanaṃ prati . āmantrya sa munīn sarvān vanamevānvagāhata.. 1..
Shloka 2
नानामृगगणाकीर्णमृक्षशार्दूलसेवितम् । ध्वस्तवृक्षलतागुल्मं दुर्दर्शसलिलाशयम्॥ २॥
nānāmṛgagaṇākīrṇamṛkṣaśārdūlasevitam . dhvastavṛkṣalatāgulmaṃ durdarśasalilāśayam.. 2..
Shloka 3
निष्कूजमानशकुनिं झिल्लिकागणनादितम् । लक्ष्मणानुचरो रामो वनमध्यं ददर्श ह॥ ३॥
niṣkūjamānaśakuniṃ jhillikāgaṇanāditam . lakṣmaṇānucaro rāmo vanamadhyaṃ dadarśa ha.. 3..
Shloka 4
सीतया सह काकुत्स्थस्तस्मिन् घोरमृगायुते । ददर्श गिरिशृङ्गाभं पुरुषादं महास्वनम्॥ ४॥
sītayā saha kākutsthastasmin ghoramṛgāyute . dadarśa giriśṛṅgābhaṃ puruṣādaṃ mahāsvanam.. 4..
Shloka 5
गभीराक्षं महावक्त्रं विकटं विकटोदरम् । बीभत्सं विषमं दीर्घं विकृतं घोरदर्शनम्॥ ५॥
gabhīrākṣaṃ mahāvaktraṃ vikaṭaṃ vikaṭodaram . bībhatsaṃ viṣamaṃ dīrghaṃ vikṛtaṃ ghoradarśanam.. 5..
Shloka 6
वसानं चर्म वैयाघ्रं वसार्द्रं रुधिरोक्षितम् । त्रासनं सर्वभूतानां व्यादितास्यमिवान्तकम्॥ ६॥
vasānaṃ carma vaiyāghraṃ vasārdraṃ rudhirokṣitam . trāsanaṃ sarvabhūtānāṃ vyāditāsyamivāntakam.. 6..
Shloka 7
त्रीन् सिंहांश्चतुरो व्याघ्रान् द्वौ वृकौ पृषतान् दश । सविषाणं वसादिग्धं गजस्य च शिरो महत्॥ ७॥
trīn siṃhāṃścaturo vyāghrān dvau vṛkau pṛṣatān daśa . saviṣāṇaṃ vasādigdhaṃ gajasya ca śiro mahat.. 7..
Shloka 8
अवसज्यायसे शूले विनदन्तं महास्वनम् । स रामं लक्ष्मणं चैव सीतां दृष्ट्वा च मैथिलीम्॥ ८॥
avasajyāyase śūle vinadantaṃ mahāsvanam . sa rāmaṃ lakṣmaṇaṃ caiva sītāṃ dṛṣṭvā ca maithilīm.. 8..
Shloka 9
अभ्यधावत् सुसंक्रुद्धः प्रजाः काल इवान्तकःस कृत्वा भैरवं नादं चालयन्निव मेदिनीम्॥ ९॥
abhyadhāvat susaṃkruddhaḥ prajāḥ kāla ivāntakaḥsa kṛtvā bhairavaṃ nādaṃ cālayanniva medinīm.. 9..
Shloka 10
अङ्केनादाय वैदेहीमपक्रम्य तदाब्रवीत् । युवां जटाचीरधरौ सभार्यौ क्षीणजीवितौ॥ १०॥
aṅkenādāya vaidehīmapakramya tadābravīt . yuvāṃ jaṭācīradharau sabhāryau kṣīṇajīvitau.. 10..
Shloka 11
प्रविष्टौ दण्डकारण्यं शरचापासिपाणिनौ । कथं तापसयोर्वां च वासः प्रमदया सह॥ ११॥
praviṣṭau daṇḍakāraṇyaṃ śaracāpāsipāṇinau . kathaṃ tāpasayorvāṃ ca vāsaḥ pramadayā saha.. 11..
Shloka 12
अधर्मचारिणौ पापौ कौ युवां मुनिदूषकौ । अहं वनमिदं दुर्गं विराधो नाम राक्षसः॥ १२॥
adharmacāriṇau pāpau kau yuvāṃ munidūṣakau . ahaṃ vanamidaṃ durgaṃ virādho nāma rākṣasaḥ.. 12..
Shloka 13
चरामि सायुधो नित्यमृषिमांसानि भक्षयन् । इयं नारी वरारोहा मम भार्या भविष्यति॥ १३॥
carāmi sāyudho nityamṛṣimāṃsāni bhakṣayan . iyaṃ nārī varārohā mama bhāryā bhaviṣyati.. 13..
Shloka 14
युवयोः पापयोश्चाहं पास्यामि रुधिरं मृधे । तस्यैवं ब्रुवतो दुष्टं विराधस्य दुरात्मनः॥ १४॥
yuvayoḥ pāpayoścāhaṃ pāsyāmi rudhiraṃ mṛdhe . tasyaivaṃ bruvato duṣṭaṃ virādhasya durātmanaḥ.. 14..
Shloka 15
श्रुत्वा सगर्वितं वाक्यं सम्भ्रान्ता जनकात्मजा । सीता प्रवेपितोद्वेगात् प्रवाते कदली यथा॥ १५॥
śrutvā sagarvitaṃ vākyaṃ sambhrāntā janakātmajā . sītā pravepitodvegāt pravāte kadalī yathā.. 15..
Shloka 16
तां दृष्ट्वा राघवः सीतां विराधाङ्कगतां शुभाम् । अब्रवील्लक्ष्मणं वाक्यं मुखेन परिशुष्यता॥ १६॥
tāṃ dṛṣṭvā rāghavaḥ sītāṃ virādhāṅkagatāṃ śubhām . abravīllakṣmaṇaṃ vākyaṃ mukhena pariśuṣyatā.. 16..
Shloka 17
पश्य सौम्य नरेन्द्रस्य जनकस्यात्मसम्भवाम् । मम भार्यां शुभाचारां विराधाङ्के प्रवेशिताम्॥ १७॥
paśya saumya narendrasya janakasyātmasambhavām . mama bhāryāṃ śubhācārāṃ virādhāṅke praveśitām.. 17..
Shloka 18
अत्यन्तसुखसंवृद्धां राजपुत्रीं यशस्विनीम् । यदभिप्रेतमस्मासु प्रियं वरवृतं च यत्॥ १८॥
atyantasukhasaṃvṛddhāṃ rājaputrīṃ yaśasvinīm . yadabhipretamasmāsu priyaṃ varavṛtaṃ ca yat.. 18..
Shloka 19
कैकेय्यास्तु सुसंवृत्तं क्षिप्रमद्यैव लक्ष्मण । या न तुष्यति राज्येन पुत्रार्थे दीर्घदर्शिनी॥ १९॥
kaikeyyāstu susaṃvṛttaṃ kṣipramadyaiva lakṣmaṇa . yā na tuṣyati rājyena putrārthe dīrghadarśinī.. 19..
Shloka 20
ययाहं सर्वभूतानां प्रियः प्रस्थापितो वनम् । अद्येदानीं सकामा सा या माता मध्यमा मम॥ २०॥
yayāhaṃ sarvabhūtānāṃ priyaḥ prasthāpito vanam . adyedānīṃ sakāmā sā yā mātā madhyamā mama.. 20..
Shloka 21
परस्पर्शात् तु वैदेह्या न दुःखतरमस्ति मे । पितुर्विनाशात् सौमित्रे स्वराज्य हरणात् तथा॥ २१॥
parasparśāt tu vaidehyā na duḥkhataramasti me . piturvināśāt saumitre svarājya haraṇāt tathā.. 21..
Shloka 22
इति ब्रुवति काकुत्स्थे बाष्पशोकपरिप्लुतः । अब्रवील्लक्ष्मणः क्रुद्धो रुद्धो नाग इव श्वसन्॥ २२॥
iti bruvati kākutsthe bāṣpaśokapariplutaḥ . abravīllakṣmaṇaḥ kruddho ruddho nāga iva śvasan.. 22..
Shloka 23
अनाथ इव भूतानां नाथस्त्वं वासवोपमः । मया प्रेष्येण काकुत्स्थ किमर्थं परितप्यसे॥ २३॥
anātha iva bhūtānāṃ nāthastvaṃ vāsavopamaḥ . mayā preṣyeṇa kākutstha kimarthaṃ paritapyase.. 23..
Shloka 24
शरेण निहतस्याद्य मया क्रुद्धेन रक्षसः । विराधस्य गतासोर्हि मही पास्यति शोणितम्॥ २४॥
śareṇa nihatasyādya mayā kruddhena rakṣasaḥ . virādhasya gatāsorhi mahī pāsyati śoṇitam.. 24..
Shloka 25
राज्यकामे मम क्रोधो भरते यो बभूव ह । तं विराधे विमोक्ष्यामि वज्री वज्रमिवाचले॥ २५॥
rājyakāme mama krodho bharate yo babhūva ha . taṃ virādhe vimokṣyāmi vajrī vajramivācale.. 25..
Shloka 26
मम भुजबलवेगवेगितः पततु शरोऽस्य महान् महोरसि । व्यपनयतु तनोश्च जीवितं पततु ततश्च महीं विघूर्णितः॥ २६॥
mama bhujabalavegavegitaḥ patatu śaro'sya mahān mahorasi . vyapanayatu tanośca jīvitaṃ patatu tataśca mahīṃ vighūrṇitaḥ.. 26..
Shloka 27
इत्यार्षे श्रीमद्रामायणे वाल्मीकीये आदिकाव्ये अरण्यकाण्डे द्वितीयः सर्गः ॥३-२॥
ityārṣe śrīmadrāmāyaṇe vālmīkīye ādikāvye araṇyakāṇḍe dvitīyaḥ sargaḥ ..3-2..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In