This overlay will guide you through the buttons:

| |
|
Sarga Begins
श्रीमद्वाल्मीकियरामायणे अरण्यकाण्डे त्रिंशः सर्गः ॥३-३०॥
śrīmadvālmīkiyarāmāyaṇe araṇyakāṇḍe triṃśaḥ sargaḥ ..3-30..
Shloka 1
भित्त्वा तु तां गदां बाणै राघवो धर्मवत्सलः । स्मयमान इदं वाक्यं संरब्धमिदमब्रवीत्॥ १॥
bhittvā tu tāṃ gadāṃ bāṇai rāghavo dharmavatsalaḥ . smayamāna idaṃ vākyaṃ saṃrabdhamidamabravīt.. 1..
Shloka 2
एतत् ते बलसर्वस्वं दर्शितं राक्षसाधम । शक्तिहीनतरो मत्तो वृथा त्वमुपगर्जसि॥ २॥
etat te balasarvasvaṃ darśitaṃ rākṣasādhama . śaktihīnataro matto vṛthā tvamupagarjasi.. 2..
Shloka 3
एषा बाणविनिर्भिन्ना गदा भूमितलं गता । अभिधानप्रगल्भस्य तव प्रत्ययघातिनी॥ ३॥
eṣā bāṇavinirbhinnā gadā bhūmitalaṃ gatā . abhidhānapragalbhasya tava pratyayaghātinī.. 3..
Shloka 4
यत् त्वयोक्तं विनष्टानामिदमश्रुप्रमार्जनम् । राक्षसानां करोमीति मिथ्या तदपि ते वचः॥ ४॥
yat tvayoktaṃ vinaṣṭānāmidamaśrupramārjanam . rākṣasānāṃ karomīti mithyā tadapi te vacaḥ.. 4..
Shloka 5
नीचस्य क्षुद्रशीलस्य मिथ्यावृत्तस्य रक्षसः । प्राणानपहरिष्यामि गरुत्मानमृतं यथा॥ ५॥
nīcasya kṣudraśīlasya mithyāvṛttasya rakṣasaḥ . prāṇānapahariṣyāmi garutmānamṛtaṃ yathā.. 5..
Shloka 6
अद्य ते भिन्नकण्ठस्य फेनबुद्बुदभूषितम् । विदारितस्य मद्बाणैर्मही पास्यति शोणितम्॥ ६॥
adya te bhinnakaṇṭhasya phenabudbudabhūṣitam . vidāritasya madbāṇairmahī pāsyati śoṇitam.. 6..
Shloka 7
पांसुरूषितसर्वाङ्गः स्रस्तन्यस्तभुजद्वयः । स्वप्स्यसे गां समाश्लिष्य दुर्लभां प्रमदामिव॥ ७॥
pāṃsurūṣitasarvāṅgaḥ srastanyastabhujadvayaḥ . svapsyase gāṃ samāśliṣya durlabhāṃ pramadāmiva.. 7..
Shloka 8
प्रवृद्धनिद्रे शयिते त्वयि राक्षसपांसने । भविष्यन्ति शरण्यानां शरण्या दण्डका इमे॥ ८॥
pravṛddhanidre śayite tvayi rākṣasapāṃsane . bhaviṣyanti śaraṇyānāṃ śaraṇyā daṇḍakā ime.. 8..
Shloka 9
जनस्थाने हतस्थाने तव राक्षस मच्छरैः । निर्भया विचरिष्यन्ति सर्वतो मुनयो वने॥ ९॥
janasthāne hatasthāne tava rākṣasa maccharaiḥ . nirbhayā vicariṣyanti sarvato munayo vane.. 9..
Shloka 10
अद्य विप्रसरिष्यन्ति राक्षस्यो हतबान्धवाः । बाष्पार्द्रवदना दीना भयादन्यभयावहाः॥ १०॥
adya viprasariṣyanti rākṣasyo hatabāndhavāḥ . bāṣpārdravadanā dīnā bhayādanyabhayāvahāḥ.. 10..
Shloka 11
अद्य शोकरसज्ञास्ता भविष्यन्ति निरर्थिकाः । अनुरूपकुलाः पत्न्यो यासां त्वं पतिरीदृशः॥ ११॥
adya śokarasajñāstā bhaviṣyanti nirarthikāḥ . anurūpakulāḥ patnyo yāsāṃ tvaṃ patirīdṛśaḥ.. 11..
Shloka 12
नृशंसशील क्षुद्रात्मन् नित्यं ब्राह्मणकण्टक । त्वत्कृते शङ्कितैरग्नौ मुनिभिः पात्यते हविः॥ १२॥
nṛśaṃsaśīla kṣudrātman nityaṃ brāhmaṇakaṇṭaka . tvatkṛte śaṅkitairagnau munibhiḥ pātyate haviḥ.. 12..
Shloka 13
तमेवमभिसंरब्धं ब्रुवाणं राघवं वने । खरो निर्भर्त्सयामास रोषात् खरतरस्वरः॥ १३॥
tamevamabhisaṃrabdhaṃ bruvāṇaṃ rāghavaṃ vane . kharo nirbhartsayāmāsa roṣāt kharatarasvaraḥ.. 13..
Shloka 14
दृढं खल्ववलिप्तोऽसि भयेष्वपि च निर्भयः । वाच्यावाच्यं ततो हि त्वं मृत्योर्वश्यो न बुध्यसे॥ १४॥
dṛḍhaṃ khalvavalipto'si bhayeṣvapi ca nirbhayaḥ . vācyāvācyaṃ tato hi tvaṃ mṛtyorvaśyo na budhyase.. 14..
Shloka 15
कालपाशपरिक्षिप्ता भवन्ति पुरुषा हि ये । कार्याकार्यं न जानन्ति ते निरस्तषडिन्द्रियाः॥ १५॥
kālapāśaparikṣiptā bhavanti puruṣā hi ye . kāryākāryaṃ na jānanti te nirastaṣaḍindriyāḥ.. 15..
Shloka 16
एवमुक्त्वा ततो रामं संरुध्य भृकुटिं ततः । स ददर्श महासालमविदूरे निशाचरः॥ १६॥
evamuktvā tato rāmaṃ saṃrudhya bhṛkuṭiṃ tataḥ . sa dadarśa mahāsālamavidūre niśācaraḥ.. 16..
Shloka 17
रणे प्रहरणस्यार्थे सर्वतो ह्यवलोकयन् । स तमुत्पाटयामास संदष्टदशनच्छदम्॥ १७॥
raṇe praharaṇasyārthe sarvato hyavalokayan . sa tamutpāṭayāmāsa saṃdaṣṭadaśanacchadam.. 17..
Shloka 18
तं समुत्क्षिप्य बाहुभ्यां विनर्दित्वा महाबलः । राममुद्दिश्य चिक्षेप हतस्त्वमिति चाब्रवीत्॥ १८॥
taṃ samutkṣipya bāhubhyāṃ vinarditvā mahābalaḥ . rāmamuddiśya cikṣepa hatastvamiti cābravīt.. 18..
Shloka 19
तमापतन्तं बाणौघैश्छित्त्वा रामः प्रतापवान् । रोषमाहारयत् तीव्रं निहन्तुं समरे खरम्॥ १९॥
tamāpatantaṃ bāṇaughaiśchittvā rāmaḥ pratāpavān . roṣamāhārayat tīvraṃ nihantuṃ samare kharam.. 19..
Shloka 20
जातस्वेदस्ततो रामो रोषरक्तान्तलोचनः । निर्बिभेद सहस्रेण बाणानां समरे खरम्॥ २०॥
jātasvedastato rāmo roṣaraktāntalocanaḥ . nirbibheda sahasreṇa bāṇānāṃ samare kharam.. 20..
Shloka 21
तस्य बाणान्तराद् रक्तं बहु सुस्राव फेनिलम् । गिरेः प्रस्रवणस्येव धाराणां च परिस्रवः॥ २१॥
tasya bāṇāntarād raktaṃ bahu susrāva phenilam . gireḥ prasravaṇasyeva dhārāṇāṃ ca parisravaḥ.. 21..
Shloka 22
विकलः स कृतो बाणैः खरो रामेण संयुगे । मत्तो रुधिरगन्धेन तमेवाभ्यद्रवद् द्रुतम्॥ २२॥
vikalaḥ sa kṛto bāṇaiḥ kharo rāmeṇa saṃyuge . matto rudhiragandhena tamevābhyadravad drutam.. 22..
Shloka 23
तमापतन्तं संक्रुद्धं कृतास्त्रो रुधिराप्लुतम् । अपासर्पद् द्वित्रिपदं किंचित्त्वरितविक्रमः॥ २३॥
tamāpatantaṃ saṃkruddhaṃ kṛtāstro rudhirāplutam . apāsarpad dvitripadaṃ kiṃcittvaritavikramaḥ.. 23..
Shloka 24
ततः पावकसंकाशं वधाय समरे शरम् । खरस्य रामो जग्राह ब्रह्मदण्डमिवापरम्॥ २४॥
tataḥ pāvakasaṃkāśaṃ vadhāya samare śaram . kharasya rāmo jagrāha brahmadaṇḍamivāparam.. 24..
Shloka 25
स तद् दत्तं मघवता सुरराजेन धीमता । संदधे च स धर्मात्मा मुमोच च खरं प्रति॥ २५॥
sa tad dattaṃ maghavatā surarājena dhīmatā . saṃdadhe ca sa dharmātmā mumoca ca kharaṃ prati.. 25..
Shloka 26
स विमुक्तो महाबाणो निर्घातसमनिःस्वनः । रामेण धनुरायम्य खरस्योरसि चापतत्॥ २६॥
sa vimukto mahābāṇo nirghātasamaniḥsvanaḥ . rāmeṇa dhanurāyamya kharasyorasi cāpatat.. 26..
Shloka 27
स पपात खरो भूमौ दह्यमानः शराग्निना । रुद्रेणेव विनिर्दग्धः श्वेतारण्ये यथान्धकः॥ २७॥
sa papāta kharo bhūmau dahyamānaḥ śarāgninā . rudreṇeva vinirdagdhaḥ śvetāraṇye yathāndhakaḥ.. 27..
Shloka 28
स वृत्र इव वज्रेण फेनेन नमुचिर्यथा । बलो वेन्द्राशनिहतो निपपात हतः खरः॥ २८॥
sa vṛtra iva vajreṇa phenena namuciryathā . balo vendrāśanihato nipapāta hataḥ kharaḥ.. 28..
Shloka 29
एतस्मिन्नन्तरे देवाश्चारणैः सह संगताः । दुन्दुभींश्चाभिनिघ्नन्तः पुष्पवर्षं समन्ततः॥ २९॥
etasminnantare devāścāraṇaiḥ saha saṃgatāḥ . dundubhīṃścābhinighnantaḥ puṣpavarṣaṃ samantataḥ.. 29..
Shloka 30
रामस्योपरि संहृष्टा ववर्षुर्विस्मितास्तदा । अर्धाधिकमुहूर्तेन रामेण निशितैः शरैः॥ ३०॥
rāmasyopari saṃhṛṣṭā vavarṣurvismitāstadā . ardhādhikamuhūrtena rāmeṇa niśitaiḥ śaraiḥ.. 30..
Shloka 31
चतुर्दश सहस्राणि रक्षसां कामरूपिणाम् । खरदूषणमुख्यानां निहतानि महामृधे॥ ३१॥
caturdaśa sahasrāṇi rakṣasāṃ kāmarūpiṇām . kharadūṣaṇamukhyānāṃ nihatāni mahāmṛdhe.. 31..
Shloka 32
अहो बत महत्कर्म रामस्य विदितात्मनः । अहो वीर्यमहो दार्ढ्यं विष्णोरिव हि दृश्यते॥ ३२॥
aho bata mahatkarma rāmasya viditātmanaḥ . aho vīryamaho dārḍhyaṃ viṣṇoriva hi dṛśyate.. 32..
Shloka 33
इत्येवमुक्त्वा ते सर्वे ययुर्देवा यथागतम् । ततो राजर्षयः सर्वे संगताः परमर्षयः॥ ३३॥
ityevamuktvā te sarve yayurdevā yathāgatam . tato rājarṣayaḥ sarve saṃgatāḥ paramarṣayaḥ.. 33..
Shloka 34
सभाज्य मुदिता रामं सागस्त्या इदमब्रुवन् । एतदर्थं महातेजा महेन्द्रः पाकशासनः॥ ३४॥
sabhājya muditā rāmaṃ sāgastyā idamabruvan . etadarthaṃ mahātejā mahendraḥ pākaśāsanaḥ.. 34..
Shloka 35
शरभङ्गाश्रमं पुण्यमाजगाम पुरंदरः । आनीतस्त्वमिमं देशमुपायेन महर्षिभिः॥ ३५॥
śarabhaṅgāśramaṃ puṇyamājagāma puraṃdaraḥ . ānītastvamimaṃ deśamupāyena maharṣibhiḥ.. 35..
Shloka 36
एषां वधार्थं शत्रूणां रक्षसां पापकर्मणाम् । तदिदं नः कृतं कार्यं त्वया दशरथात्मज॥ ३६॥
eṣāṃ vadhārthaṃ śatrūṇāṃ rakṣasāṃ pāpakarmaṇām . tadidaṃ naḥ kṛtaṃ kāryaṃ tvayā daśarathātmaja.. 36..
Shloka 37
स्वधर्मं प्रचरिष्यन्ति दण्डकेषु महर्षयः । एतस्मिन्नन्तरे वीरो लक्ष्मणः सह सीतया॥ ३७॥
svadharmaṃ pracariṣyanti daṇḍakeṣu maharṣayaḥ . etasminnantare vīro lakṣmaṇaḥ saha sītayā.. 37..
Shloka 38
गिरिदुर्गाद् विनिष्क्रम्य संविवेशाश्रमे सुखी ततो रामस्तु विजयी पूज्यमानो महर्षिभिः॥ ३८॥
giridurgād viniṣkramya saṃviveśāśrame sukhī tato rāmastu vijayī pūjyamāno maharṣibhiḥ.. 38..
Shloka 39
प्रविवेशाश्रमं वीरो लक्ष्मणेनाभिपूजितः । तं दृष्ट्वा शत्रुहन्तारं महर्षीणां सुखावहम्॥ ३९॥
praviveśāśramaṃ vīro lakṣmaṇenābhipūjitaḥ . taṃ dṛṣṭvā śatruhantāraṃ maharṣīṇāṃ sukhāvaham.. 39..
Shloka 40
बभूव हृष्टा वैदेही भर्तारं परिषस्वजे । मुदा परमया युक्ता दृष्ट्वा रक्षोगणान् हतान् । रामं चैवाव्ययं दृष्ट्वा तुतोष जनकात्मजा॥ ४०॥
babhūva hṛṣṭā vaidehī bhartāraṃ pariṣasvaje . mudā paramayā yuktā dṛṣṭvā rakṣogaṇān hatān . rāmaṃ caivāvyayaṃ dṛṣṭvā tutoṣa janakātmajā.. 40..
Shloka 41
ततस्तु तं राक्षससङ्घमर्दनं सम्पूज्यमानं मुदितैर्महात्मभिः । पुनः परिष्वज्य मुदान्वितानना बभूव हृष्टा जनकात्मजा तदा॥ ४१॥
tatastu taṃ rākṣasasaṅghamardanaṃ sampūjyamānaṃ muditairmahātmabhiḥ . punaḥ pariṣvajya mudānvitānanā babhūva hṛṣṭā janakātmajā tadā.. 41..
Shloka 42
इत्यार्षे श्रीमद्रामायणे वाल्मीकीये आदिकाव्ये अरण्यकाण्डे त्रिंशः सर्गः ॥३-३०॥
ityārṣe śrīmadrāmāyaṇe vālmīkīye ādikāvye araṇyakāṇḍe triṃśaḥ sargaḥ ..3-30..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In