श्रीमद्वाल्मीकियरामायणे अयोध्याकाण्डे पञ्चनवतितम: सर्गः ॥२-९५॥
śrīmadvālmīkiyarāmāyaṇe ayodhyākāṇḍe pañcanavatitama: sargaḥ ||2-95||
अथ शैलाद्विनिष्क्रम्य मैथिलीं कोसलेश्वर: । अदर्शयच्छुभजलां रम्यां मन्दाकिनीं नदीम् ।। २.९५.१ ।।
atha śailādviniṣkramya maithilīṃ kosaleśvara: | adarśayacchubhajalāṃ ramyāṃ mandākinīṃ nadīm || 2.95.1 ||
अब्रवीच्च वरारोहां चारुचन्द्रनिभाननाम् । विदेहराजस्य सुतां रामो राजीवलोचन: ।। २.९५.२ ।।
abravīcca varārohāṃ cārucandranibhānanām | videharājasya sutāṃ rāmo rājīvalocana: || 2.95.2 ||
विचित्रपुलिनां रम्यां हंससारससेविताम् । कमलैरुपसम्पन्नां पश्य मन्दाकिनीं नदीम् ।। २.९५.३ ।।
vicitrapulināṃ ramyāṃ haṃsasārasasevitām | kamalairupasampannāṃ paśya mandākinīṃ nadīm || 2.95.3 ||
नानाविधैस्तीररुहैर्वृतां पुष्पफलद्रुमै: । राजन्तीं राजराजस्य नलिनीमिव सर्वत: ।। २.९५.४ ।।
nānāvidhaistīraruhairvṛtāṃ puṣpaphaladrumai: | rājantīṃ rājarājasya nalinīmiva sarvata: || 2.95.4 ||
मृगयूथनिपीतानि कलुषाम्भांसि साम्प्रतम् । तीर्थानि रमणीयानि रतिं सञ्जनयन्ति मे ।। २.९५.५ ।।
mṛgayūthanipītāni kaluṣāmbhāṃsi sāmpratam | tīrthāni ramaṇīyāni ratiṃ sañjanayanti me || 2.95.5 ||
जटाजिनधरा: काले वल्कलोत्तरवासस: । ऋषयस्त्ववगाहन्ते नदीं मन्दाकिनीं प्रिये ।। २.९५.६ ।।
jaṭājinadharā: kāle valkalottaravāsasa: | ṛṣayastvavagāhante nadīṃ mandākinīṃ priye || 2.95.6 ||
आदित्यमुपतिष्ठन्ते नियमादूर्द्ध्वबाहव: । एते परे विशालाक्षि मुनय: संशितव्रता: ।। २.९५.७ ।।
ādityamupatiṣṭhante niyamādūrddhvabāhava: | ete pare viśālākṣi munaya: saṃśitavratā: || 2.95.7 ||
मारुतोद्धूतशिखरै: प्रनृत्त इव पर्वत: । पादपै: पत्ऺत्रपुष्पाणि सृजद्भिरभितो नदीम् ।। २.९५.८ ।।
mārutoddhūtaśikharai: pranṛtta iva parvata: | pādapai: patऺtrapuṣpāṇi sṛjadbhirabhito nadīm || 2.95.8 ||
क्वचिन्मणिनिकाशोदां क्वचित्पुलिनशालिनीम् । क्वचित्सिद्धजनाकीर्णां पश्य मन्दाकिनीं नदीम् ।। २.९५.९ ।।
kvacinmaṇinikāśodāṃ kvacitpulinaśālinīm | kvacitsiddhajanākīrṇāṃ paśya mandākinīṃ nadīm || 2.95.9 ||
निर्द्धूतान् वायुना पश्य विततान् पुष्पसञ्चयान् । पोप्लूयमानानपरान् पश्य त्वं जलमध्यगान् ।। २.९५.१० ।।
nirddhūtān vāyunā paśya vitatān puṣpasañcayān | poplūyamānānaparān paśya tvaṃ jalamadhyagān || 2.95.10 ||
तांश्चातिवल्गुवचसो रथाङ्गाह्वयना द्विजा: । अधिरोहन्ति कल्याणि विकूजन्त: शुभा गिर: ।। २.९५.११ ।।
tāṃścātivalguvacaso rathāṅgāhvayanā dvijā: | adhirohanti kalyāṇi vikūjanta: śubhā gira: || 2.95.11 ||
दर्शनं चित्र कूटस्य मन्दाकिन्याश्च शोभने । अधिकं पुरवासाच्च मन्ये च तव दर्शनात् ।। २.९५.१२ ।।
darśanaṃ citra kūṭasya mandākinyāśca śobhane | adhikaṃ puravāsācca manye ca tava darśanāt || 2.95.12 ||
विधूतकलुषै: सिद्धैस्तपोदमशमान्वितै: । नित्यविक्षोभितजलां विगाहस्व मया सह ।। २.९५.१३ ।।
vidhūtakaluṣai: siddhaistapodamaśamānvitai: | nityavikṣobhitajalāṃ vigāhasva mayā saha || 2.95.13 ||
सखीवच्च विगाहस्व सीते मन्दाकिनीं नदीम् । कमलान्यवमज्जन्ती पुष्कराणि च भामिनि ।। २.९५.१४ ।।
sakhīvacca vigāhasva sīte mandākinīṃ nadīm | kamalānyavamajjantī puṣkarāṇi ca bhāmini || 2.95.14 ||
त्वं पौरजनवद्व्यालानयोध्यामिव पर्वतम् । मन्यस्व वनिते नित्यं सरयूवदिमां नदीम् ।। २.९५.१५ ।।
tvaṃ paurajanavadvyālānayodhyāmiva parvatam | manyasva vanite nityaṃ sarayūvadimāṃ nadīm || 2.95.15 ||
लक्ष्मणश्चापि धर्मात्मा मन्निदेशे व्यवस्थित: । त्वं चानुकूला वैदेहि प्रीतिं जनयथो मम ।। २.९५.१६ ।।
lakṣmaṇaścāpi dharmātmā mannideśe vyavasthita: | tvaṃ cānukūlā vaidehi prītiṃ janayatho mama || 2.95.16 ||
उपस्पृशंस्त्रिषवणं मधुमूलफलाशन: । नायोध्यायै न राज्याय स्पृहये ऽद्य त्वया सह ।। २.९५.१७ ।।
upaspṛśaṃstriṣavaṇaṃ madhumūlaphalāśana: | nāyodhyāyai na rājyāya spṛhaye 'dya tvayā saha || 2.95.17 ||
इमां हि रम्यां मृगयूथशालिनीं निपीततोयां गजसिंहवानरै: । सुपुष्पितै: पुष्पधरैरलङ्कृतां न सो ऽस्ति य: स्यादगतक्लम: सुखी ।। २.९५.१८ ।।
imāṃ hi ramyāṃ mṛgayūthaśālinīṃ nipītatoyāṃ gajasiṃhavānarai: | supuṣpitai: puṣpadharairalaṅkṛtāṃ na so 'sti ya: syādagataklama: sukhī || 2.95.18 ||
इतीव रामो बहुसङ्गतं वच: प्रियासहाय: सरितं प्रति ब्रुवन् । चचार रम्यं नयनाञ्जनप्रभं स चित्रकूटं रघुवंशवर्द्धन: ।। २.९५.१९ ।।
itīva rāmo bahusaṅgataṃ vaca: priyāsahāya: saritaṃ prati bruvan | cacāra ramyaṃ nayanāñjanaprabhaṃ sa citrakūṭaṃ raghuvaṃśavarddhana: || 2.95.19 ||
इत्यार्षे श्रीमद्रामायणे वाल्मीकीये आदिकाव्ये श्रीमदयोध्याकाण्डे पञ्चनवतितमः सर्गः ।। ९५।।
ityārṣe śrīmadrāmāyaṇe vālmīkīye ādikāvye śrīmadayodhyākāṇḍe pañcanavatitamaḥ sargaḥ || 95||
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
