मणिं दत्त्वा ततः सीता हनूमन्तमथाब्रवीत् । अभिज्ञानमभिज्ञातमेतद् रामस्य तत्त्वतः ।।१।।
manim dattva tatah sita hanumantamathabravit | abhijnanamabhijnatametad ramasya tattvatah ||1||
मणिं तु दृष्ट्वा रामो वै त्रयाणां संस्मरिष्यति । वीरो जनन्या मम च राज्ञो दशरथस्य च ।।२।।
manim tu drstva ramo vai trayanam samsmarisyati | viro jananya mama ca rajno dasarathasya ca ||2||
स भूयस्त्वं समुत्साहे चोदितो हरिसत्तम । अस्मिन्कार्यसमारम्भे प्रचिन्तय यदुत्तरम् ।।३।।
sa bhuyastvam samutsahe codito harisattama | asminkaryasamarambhe pracintaya yaduttaram ||3||
त्वमस्मिन्कार्यनिर्योगे प्रमाणं हरिसत्तम । तस्य चिन्तय यो यत्नो दुःखक्षयकरो भवेत् ।।४।।
tvamasminkaryaniryoge pramanam harisattama | tasya cintaya yo yatno duhkhaksayakaro bhavet ||4||
हनुमन्यत्नमास्थाय दुःखक्षयकरो भव । स तथेति प्रतिज्ञाय मारुतिर्भीमविक्रमः । शिरसावन्द्य वैदेहीं गमनायोपचक्रमे ।।५।।
hanumanyatnamasthaya duhkhaksayakaro bhava | sa tatheti pratijnaya marutirbhimavikramah | sirasavandya vaidehim gamanayopacakrame ||5||
ज्ञात्वा सम्प्रस्थितं देवी वानरं मारुतात्मजम् ।।।६।।
jnatva samprasthitam devi vanaram marutatmajam |||6||
बाष्पगद्गदया वाचा मैथिली वाक्यमब्रवीत् । हनुमन् कुशलं ब्रूयाः सहितौ रामलक्ष्मणौ ।।७।।
baspagadgadaya vaca maithili vakyamabravit | hanuman kusalam bruyah sahitau ramalaksmanau ||7||
सुग्रीवं च सहामात्यं वृद्धान्सर्वांश्च वानरान् । ब्रूयास्त्वं वानरश्रेष्ठ कुशलं धर्मसंहितम्।।८।।
sugrivam ca sahamatyam vrddhansarvamsca vanaran | bruyastvam vanarasrestha kusalam dharmasamhitam||8||
यथा च स महाबाहुर्मां तारयति राघवः । अस्माद्दुःखाम्बुसंरोधात्त्वं समाधातुमर्हसि ।।९।।
yatha ca sa mahabahurmam tarayati raghavah | asmadduhkhambusamrodhattvam samadhatumarhasi ||9||
जीवन्तीं मां यथा रामः सम्भावयति कीर्तिमान् । तत्त्वया हनुमन्वाच्यं वाचा धर्ममवाप्नुहि ।।१०।।
jivantim mam yatha ramah sambhavayati kirtiman | tattvaya hanumanvacyam vaca dharmamavapnuhi ||10||
नित्यमुत्साहयुक्ताश्च वाचः श्रुत्वा मयेरिताः । वर्धिष्यते दाशरथेः पौरुषं मदवाप्तये ।।११।।
nityamutsahayuktasca vacah srutva mayeritah | vardhisyate dasaratheh paurusam madavaptaye ||11||
मत्सन्देशयुता वाचस्त्वत्तः श्रुत्वैव राघवः । पराक्रमविधिं वीरो विधिवत्संविधास्यति ।।१२।।
matsandesayuta vacastvattah srutvaiva raghavah | parakramavidhim viro vidhivatsamvidhasyati ||12||
सीतायास्तद्वचः श्रुत्वा हनुमान्मारुतात्मजः । शिरस्यञ्जलिमाधाय वाक्यमुत्तरमब्रवीत् ।।१३।।
sitayastadvacah srutva hanumanmarutatmajah | sirasyanjalimadhaya vakyamuttaramabravit ||13||
क्षिप्रमेष्यति काकुत्स्थो हर्यृक्षप्रवरैर्वृतः । यस्ते युधि विजित्यारीञ्शोकं व्यपनयिष्यति ।।१४।।
ksipramesyati kakutstho haryrksapravarairvrtah | yaste yudhi vijityarinsokam vyapanayisyati ||14||
न हि पश्यामि मर्त्येषु नामरेष्वसुरेषु वा । यस्तस्य वमतो बाणान्स्थातुमुत्सहतेऽग्रतः ।।१५।।
na hi pasyami martyesu namaresvasuresu va | yastasya vamato banansthatumutsahate'gratah ||15||
अप्यर्कमपि पर्जन्यमपि वैवस्वतं यमम् । स हि सोढुं रणे शक्तस्तवहेतोर्विशेषतः ।।१६।।
apyarkamapi parjanyamapi vaivasvatam yamam | sa hi sodhum rane saktastavahetorvisesatah ||16||
स हि सागरपर्यन्तां महीं शासितुमीहते । त्वन्निमित्तो हि रामस्य जयो जनकनन्दिनि ।।१७।।
sa hi sagaraparyantam mahim sasitumihate | tvannimitto hi ramasya jayo janakanandini ||17||
तस्य तद्वचनं श्रुत्वा सम्यक्सत्यं सुभाषितम् । जानकी बहु मेनेऽथ वचनं चेदमब्रवीत् ।।१८।।
tasya tadvacanam srutva samyaksatyam subhasitam | janaki bahu mene'tha vacanam cedamabravit ||18||
ततस्तं प्रस्थितं सीता वीक्षमाणा पुनः पुनः । भर्तुः स्नेहान्वितं वाक्यं सौहार्दादनुमानयत् ।।१९।।
tatastam prasthitam sita viksamana punah punah | bhartuh snehanvitam vakyam sauhardadanumanayat ||19||
यदि वा मन्यसे वीर वसैकाहमरिन्दम । कस्मिंश्चित्संवृते देशे विश्रान्तः श्वो गमिष्यसि ।।२०।।
yadi va manyase vira vasaikahamarindama | kasmimscitsamvrte dese visrantah svo gamisyasi ||20||
मम चेदल्पभाग्यायाः साम्निध्यात्तव वीर्यवान् । अस्य शोकस्य महतो मुहूर्तं मोक्षणं भवेत् ।।२१।।
mama cedalpabhagyayah samnidhyattava viryavan | asya sokasya mahato muhurtam moksanam bhavet ||21||
ततो हि हरिशार्दूल पुनरागमनाय तु । प्राणानामपि सन्देहो मम स्यान्नात्र संशयः ।।२२।।
tato hi harisardula punaragamanaya tu | prananamapi sandeho mama syannatra samsayah ||22||
तवादर्शनजः शोको भूयो मां परितापयेत् । दुःखाद्दुःखपरामृष्टां दीपयन्निव वानर ।।२३।।
tavadarsanajah soko bhuyo mam paritapayet | duhkhadduhkhaparamrstam dipayanniva vanara ||23||
अयं च वीर सन्देहस्तिष्ठतीव ममाग्रतः । सुमहांस्त्वत्सहायेषु हर्यृक्षेषु हरीश्वर ।।२४।।
ayam ca vira sandehastisthativa mamagratah | sumahamstvatsahayesu haryrksesu harisvara ||24||
कथं नु खलु दुष्पारं तरिष्यन्ति महोदधिम् । तानि हर्यृक्षसैन्यानि तौ वा नरवरात्मजौ ।।२५।।
katham nu khalu dusparam tarisyanti mahodadhim | tani haryrksasainyani tau va naravaratmajau ||25||
त्रयाणामेव भूतानां सागरस्येह लङ्घने । शक्तिः स्याद्वैनतेयस्य तव वा मारुतस्य वा ।।२६।।
trayanameva bhutanam sagarasyeha laṅghane | saktih syadvainateyasya tava va marutasya va ||26||
तदस्मिन्कार्यनिर्योगे वीरैवं दुरतिक्रमे । किं पश्यसि समाधानं त्वं हि कार्यविदां वरः ।।२७।।
tadasminkaryaniryoge viraivam duratikrame | kim pasyasi samadhanam tvam hi karyavidam varah ||27||
काममस्य त्वमेवैकः कार्यस्य परिसाधने । पर्याप्तः परवीरघ्न यशस्यस्ते बलोदयः ।।२८।।
kamamasya tvamevaikah karyasya parisadhane | paryaptah paraviraghna yasasyaste balodayah ||28||
बलैः समग्रैर्यदि मां रावणं जित्य संयुगे । विजयी स्वपुरं यायात्तत्तु मे स्याद्यशस्करम् ।।२९।।
balaih samagrairyadi mam ravanam jitya samyuge | vijayi svapuram yayattattu me syadyasaskaram ||29||
बलैस्तु सङ्कुलां कृत्वा लङ्कां परबलार्दनः । मां नयेद्यदि काकुत्स्थस्तत्तस्य सदृशं भवेत् ।।३०।।
balaistu saṅkulam krtva laṅkam parabalardanah | mam nayedyadi kakutsthastattasya sadrsam bhavet ||30||
तद्यथा तस्य विक्रान्तमनुरूपं महात्मनः । भवेदाहव शूरस्य तथा त्वमुपपादय ।।३१।।
tadyatha tasya vikrantamanurupam mahatmanah | bhavedahava surasya tatha tvamupapadaya ||31||
तदर्थोपहितं वाक्यं सहितं हेतुसंहितम् । निशम्य हनुमाञ्शेषं वाक्यमुत्तरमब्रवीत् ।।३२।।
tadarthopahitam vakyam sahitam hetusamhitam | nisamya hanumansesam vakyamuttaramabravit ||32||
देवि हर्यृक्षसैन्यानामीश्वरः प्लवतां वरः । सुग्रीवः सत्त्वसम्पन्नस्तवार्थे कृतनिश्चयः ।।३३।।
devi haryrksasainyanamisvarah plavatam varah | sugrivah sattvasampannastavarthe krtaniscayah ||33||
स वानरसहस्राणां कोटीभिरभिसंवृतः । क्षिप्रमेष्यति वैदेहि राक्षसानां निबर्हणः ।।३४।।
sa vanarasahasranam kotibhirabhisamvrtah | ksipramesyati vaidehi raksasanam nibarhanah ||34||
तस्य विक्रमसम्पन्नाः सत्त्ववन्तो महाबलाः । मनःसङ्कल्पसम्पाता निदेशे हरयः स्थिताः ।।३५।।
tasya vikramasampannah sattvavanto mahabalah | manahsaṅkalpasampata nidese harayah sthitah ||35||
येषां नोपरि नाधस्तान्न तिर्यक्सज्जते गतिः । न च कर्मसु सीदन्ति महत्स्वमिततेजसः ।।३६।।
yesam nopari nadhastanna tiryaksajjate gatih | na ca karmasu sidanti mahatsvamitatejasah ||36||
असकृत्तैर्महोत्सहैः ससागरधराधरा । प्रदक्षिणीकृता भूमिर्वायुमार्गानुसारिभिः ।।३७।।
asakrttairmahotsahaih sasagaradharadhara | pradaksinikrta bhumirvayumarganusaribhih ||37||
मद्विशिष्टाश्च तुल्याश्च सन्ति तत्र वनौकसः । मत्तः प्रत्यवरः कश्चिन्नास्ति सुग्रीवसंनिधौ ।।३८।।
madvisistasca tulyasca santi tatra vanaukasah | mattah pratyavarah kascinnasti sugrivasamnidhau ||38||
अहं तावदिह प्राप्तः किं पुनस्ते महाबलाः । न हि प्रकृष्टाः प्रेष्यन्ते प्रेष्यन्ते हीतरे जनाः ।।३९।।
aham tavadiha praptah kim punaste mahabalah | na hi prakrstah presyante presyante hitare janah ||39||
तदलं परितापेन देवि शोको व्यपैतु ते । एकोत्पातेन ते लङ्कामेष्यन्ति हरियूथपाः ।।४०।।
tadalam paritapena devi soko vyapaitu te | ekotpatena te laṅkamesyanti hariyuthapah ||40||
मम पृष्ठगतौ तौ च चन्द्रसूर्याविवोदितौ । त्वत्सकाशं महासत्त्वौ नृसिंहावागमिष्यतः ।।४१।।
mama prsthagatau tau ca candrasuryavivoditau | tvatsakasam mahasattvau nrsimhavagamisyatah ||41||
तौ हि वीरौ नरवरौ सहितौ रामलक्ष्मणौ । आगम्य नगरीं लङ्कां सायकैर्विधमिष्यतः ।।४२।।
tau hi virau naravarau sahitau ramalaksmanau | agamya nagarim laṅkam sayakairvidhamisyatah ||42||
सगणं रावणं हत्वा राघवो रघुनन्दनः । त्वामादाय वरारोहे स्वपुरं प्रतियास्यति ।।४३।।
saganam ravanam hatva raghavo raghunandanah | tvamadaya vararohe svapuram pratiyasyati ||43||
तदाश्वसिहि भद्रं ते भव त्वं कालकाङ्क्षिणी । नचिराद्द्रक्ष्यसे रामं प्रज्वजन्तमिवानिलम् ।।४४।।
tadasvasihi bhadram te bhava tvam kalakaṅksini | naciraddraksyase ramam prajvajantamivanilam ||44||
निहते राक्षसेन्द्रे च सपुत्रामात्यबान्धवे । त्वं समेष्यसि रामेण शशाङ्केनेव रोहिणी ।।४५।।
nihate raksasendre ca saputramatyabandhave | tvam samesyasi ramena sasaṅkeneva rohini ||45||
क्षिप्रं त्वं देवि शोकस्य पारं यास्यसि मैथिलि । रावणं चैव रामेण निहतं द्रक्ष्यसेऽचिरात् ।।४६।।
ksipram tvam devi sokasya param yasyasi maithili | ravanam caiva ramena nihatam draksyase'cirat ||46||
एवमाश्वस्य वैदेहीं हनूमान्मारुतात्मजः । गमनाय मतिं कृत्वा वैदेहीं पुनरब्रवीत् ।।४७।।
evamasvasya vaidehim hanumanmarutatmajah | gamanaya matim krtva vaidehim punarabravit ||47||
तमरिघ्नं कृतात्मानं क्षिप्रं द्रक्ष्यसि राघवम् । लक्ष्मणं च धनुष्पाणिं लङ्काद्वारमुपस्थितम् ।।४८।।
tamarighnam krtatmanam ksipram draksyasi raghavam | laksmanam ca dhanuspanim laṅkadvaramupasthitam ||48||
नखदंष्ट्रायुधान्वीरान्सिंहशार्दूलविक्रमान् । वानरान् वारणेन्द्राभान् क्षिप्रं द्रक्ष्यसि सङ्गतान् ।।४९।।
nakhadamstrayudhan viran simhasardulavikraman | vanaran varanendrabhan ksipram draksyasi saṅgatan ||49||
शैलाम्बुदनिकाशानां लङ्कामलयसानुषु । नर्दतां कपिमुख्यानामार्ये यूथान्यनेकशः ।।५०।।
sailambudanikasanam laṅkamalayasanusu | nardatam kapimukhyanamarye yuthanyanekasah ||50||
स तु मर्मणि घोरेण ताडितो मन्मथेषुणा । न शर्म लभते रामः सिंहार्दित इव द्विपः ।।५१।।
sa tu marmani ghorena tadito manmathesuna | na sarma labhate ramah simhardita iva dvipah ||51||
रुद मा देवि शोकेन मा भूत्ते मनसोऽप्रियम् । शचीव पथ्या शक्रेण भर्त्रा नाथवती ह्यसि ।।५२।।
ruda ma devi sokena ma bhutte manaso'priyam | saciva pathya sakrena bhartra nathavati hyasi ||52||
रामाद्विशिष्टः कोऽन्योऽस्ति कश्चित्सौमित्रिणा समः । अग्निमारुतकल्पौ तौ भ्रातरौ तव संश्रयौ ।।५३।।
ramadvisistah ko'nyo'sti kascitsaumitrina samah | agnimarutakalpau tau bhratarau tava samsrayau ||53||
नास्मिंश्चिरं वत्स्यसि देवि देशे रक्षोगणैरध्युषितोऽतिरौद्रे । न ते चिरादागमनं प्रियस्य क्षमस्व मत्सङ्गमकालमात्रम् ।।५४।।
nasmimsciram vatsyasi devi dese raksoganairadhyusito'tiraudre | na te ciradagamanam priyasya ksamasva matsaṅgamakalamatram ||54||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
