सन्दिष्टो राक्षसेन्द्रेण प्रहस्तस्य सुतो बली । जम्बुमाली महादंष्ट्रो निर्जगाम धनुर्धरः ।। १।।
sandisto raksasendrena prahastasya suto bali । jambumali mahadamstro nirjagama dhanurdharah ।। 1।।
रक्तमाल्याम्बरधरः स्रग्वी रुचिरकुण्डलः । महान्विवृत्तनयनश्चण्डः समरदुर्जयः ।। २।।
raktamalyambaradharah sragvi rucirakundalah । mahanvivrttanayanascandah samaradurjayah ।। 2।।
धनुः शक्रधनुः प्रख्यं महद्रुचिरसायकम् । विस्फारयाणो वेगेन वज्राशनिसमस्वनम् ।। ३।।
dhanuh sakradhanuh prakhyam mahadrucirasayakam । vispharayano vegena vajrasanisamasvanam ।। 3।।
तस्य विस्फारघोषेण धनुषो महता दिशः । प्रदिशश्च नभश्चैव सहसा समपूर्यत ।। ४।।
tasya vispharaghosena dhanuso mahata disah । pradisasca nabhascaiva sahasa samapuryata ।। 4।।
रथेन खरयुक्तेन तमागतमुदीक्ष्य सः । हनूमान्वेगसम्पन्नो जहर्ष च ननाद च ।। ५।।
rathena kharayuktena tamagatamudiksya sah । hanumanvegasampanno jaharsa ca nanada ca ।। 5।।
तं तोरणविटङ्कस्थं हनूमन्तं महाकपिम् । जम्बुमाली महाबाहुर्विव्याध निशितैः शरैः ।। ६।।
tam toranavitankastham hanumantam mahakapim । jambumali mahabahurvivyadha nisitaih saraih ।। 6।।
अर्धचन्द्रेण वदने शिरस्येकेन कर्णिना । बाह्वोर्विव्याध नाराचैर्दशभिस्तं कपीश्वरम् ।। ७।।
ardhacandrena vadane sirasyekena karnina । bahvorvivyadha naracairdasabhistam kapisvaram ।। 7।।
तस्य तच्छुशुभे ताम्रं शरेणाभिहतं मुखम् । शरदीवाम्बुजं फुल्लं विद्धं भास्कररश्मिना ।। ८।।
tasya tacchusubhe tamram sarenabhihatam mukham । saradivambujam phullam viddham bhaskararasmina ।। 8।।
तत्तस्य रक्तं रक्तेन रञ्जितं शुशुभे मुखम् । यथाकाशे महापद्मं सिक्तं चन्दनबिन्दुभिः।।९।।
tattasya raktam raktena ranjitam susubhe mukham | yathakase mahapadmam siktam candanabindubhih||9||
चुकोप बाणाभिहतो राक्षसस्य महाकपिः । ततः पार्श्वेऽतिविपुलां ददर्श महतीं शिलाम् ।।१०।।
cukopa banabhihato raksasasya mahakapih | tatah parsve'tivipulam dadarsa mahatim silam ||10||
तरसा तां समुत्पाट्य चिक्षेप बलवद्बली । तां शरैर्दशभिः क्रुद्धस्ताडयामास राक्षसः ।।११।।
tarasa tam samutpatya ciksepa balavadbali | tam sarairdasabhih kruddhastadayamasa raksasah ||11||
विपन्नं कर्म तद्दृष्ट्वा हनूमांश्चण्डविक्रमः । सालं विपुलमुत्पाट्य भ्रामयामास वीर्यवान् ।।१२।।
vipannam karma taddrstva hanumamscandavikramah | salam vipulamutpatya bhramayamasa viryavan ||12||
भ्रामयन्तं कपिं दृष्ट्वा सालवृक्षं महाबलम् । चिक्षेप सुबहून्बाणाञ्जम्बुमाली महाबलः ।।१३।।
bhramayantam kapim drstva salavrksam mahabalam | ciksepa subahunbananjambumali mahabalah ||13||
सालं चतुर्भिर्चिच्छेद वानरं पञ्चभिर्भुजे । उरस्येकेन बाणेन दशभिस्तु स्तनान्तरे ।।१४।।
salam caturbhirciccheda vanaram pancabhirbhuje | urasyekena banena dasabhistu stanantare ||14||
स शरैः पूरिततनुः क्रोधेन महता वृतः । तमेव परिघं गृह्य भ्रामयामास वेगितः ।।१५।।
sa saraih puritatanuh krodhena mahata vrtah | tameva parigham grhya bhramayamasa vegitah ||15||
अतिवेगोऽतिवेगेन भ्रामयित्वा बलोत्कटः । परिघं पातयामास जम्बुमालेर्महोरसि ।।१६।।
ativego'tivegena bhramayitva balotkatah | parigham patayamasa jambumalermahorasi ||16||
तस्य चैव शिरो नास्ति न बाहू न च जानुनी । न धनुर्न रथो नाश्वास्तत्रादृश्यन्त नेषवः ।।१७।।
tasya caiva siro nasti na bahu na ca januni | na dhanurna ratho nasvastatradrsyanta nesavah ||17||
स हतस्तरसा तेन जम्बुमाली महारथः । पपात निहतो भूमौ चूर्णिताङ्गविभूषणः ।।१८।।
sa hatastarasa tena jambumali maharathah | papata nihato bhumau curnitaṅgavibhusanah ||18||
जम्बुमालिं च निहतं किङ्करांश्च महाबलान् । चुक्रोध रावणः श्रुत्वा कोपसंरक्तलोचनः ।।१९।।
jambumalim ca nihatam kiṅkaramsca mahabalan | cukrodha ravanah srutva kopasamraktalocanah ||19||
स रोषसंवर्तितताम्रलोचनः प्रहस्तपुत्रे निहते महाबले । अमात्यपुत्रानतिवीर्यविक्रमान् समादिदेशाशु निशाचरेश्वरः ।।२०।।
sa rosasamvartitatamralocanah prahastaputre nihate mahabale | amatyaputranativiryavikraman samadidesasu nisacaresvarah ||20||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
