तस्मिन् प्रविष्टे लङ्कां तु कृतार्थे रावणात्मजे । राघवं परिवार्यार्ता ररक्षुर्वानरर्षभाः ।। 1 ।।
tasmin praviṣṭe laṅkāṃ tu kṛtārthe rāvaṇātmaje | rāghavaṃ parivāryārtā rarakṣurvānararṣabhāḥ || 1 ||
हनूमानङ्गदो नीलः सुषेणः कुमुदो नलः । गजो गवाक्षो गवयः शरभो गन्धमादनः ।। 2 ।।
hanūmānaṅgado nīlaḥ suṣeṇaḥ kumudo nalaḥ | gajo gavākṣo gavayaḥ śarabho gandhamādanaḥ || 2 ||
जाम्बवानृषभः सुन्दो रम्भः शतबलिः पृथुः । व्यूढानीकाश्च यत्ताश्च द्रुमानादाय सर्वतः ।। 3 ।।
jāmbavānṛṣabhaḥ sundo rambhaḥ śatabaliḥ pṛthuḥ | vyūḍhānīkāśca yattāśca drumānādāya sarvataḥ || 3 ||
वीक्षमाणा दिशः सर्वास्तिर्यगूर्ध्वं च वानराः । तृणेष्वपि च चेष्टत्सु राक्षसा इति मेनिरे ।। 4 ।।
vīkṣamāṇā diśaḥ sarvāstiryagūrdhvaṃ ca vānarāḥ | tṛṇeṣvapi ca ceṣṭatsu rākṣasā iti menire || 4 ||
रावणश्चापि संहृष्टो विसृज्येन्द्रजितं सुतम् । आजुहाव ततः सीता रक्षणी राक्षसीस्तदा ।। 5 ।।
rāvaṇaścāpi saṃhṛṣṭo visṛjyendrajitaṃ sutam | ājuhāva tataḥ sītā rakṣaṇī rākṣasīstadā || 5 ||
राक्षस्यस्त्रिजटा चापि शासनात्तमुपस्थिताः । ता उवाच ततो हृष्टो राक्षसी राक्षसेश्वरः ।। 6 ।।
rākṣasyastrijaṭā cāpi śāsanāttamupasthitāḥ | tā uvāca tato hṛṣṭo rākṣasī rākṣaseśvaraḥ || 6 ||
हताविन्द्रजिताख्यात वैदेह्या रामलक्ष्मणौ । पुष्पकं च समारोप्य दर्शयध्वं हतौ रणे ।। 7 ।।
hatāvindrajitākhyāta vaidehyā rāmalakṣmaṇau | puṣpakaṃ ca samāropya darśayadhvaṃ hatau raṇe || 7 ||
यदाश्रयादवष्टब्धो नेयं मामुपतिष्ठति । सोऽस्या भर्ता सह भ्रात्रा निरस्तो रणमूर्धनि ।। 8 ।।
yadāśrayādavaṣṭabdho neyaṃ māmupatiṣṭhati | so'syā bhartā saha bhrātrā nirasto raṇamūrdhani || 8 ||
निर्विशङ्का निरुद्विग्ना निरपेक्षा च मैथिली । मामुपस्थास्यते सीता सर्वाभरणभूषिता ।। 9 ।।
nirviśaṅkā nirudvignā nirapekṣā ca maithilī | māmupasthāsyate sītā sarvābharaṇabhūṣitā || 9 ||
अद्य कालवशं प्राप्तं रणे रामं सलक्ष्मणम् । अवेक्ष्य विनिवृत्ताशा नान्यां गतिमपश्यती ।। 10 ।।
adya kālavaśaṃ prāptaṃ raṇe rāmaṃ salakṣmaṇam | avekṣya vinivṛttāśā nānyāṃ gatimapaśyatī || 10 ||
अनपेक्षा विशालाक्षी मामुपस्थास्यते स्वयम् । तस्य तद्वचनं श्रुत्वा रावणस्य दुरात्मनः ।। 11 ।।
anapekṣā viśālākṣī māmupasthāsyate svayam | tasya tadvacanaṃ śrutvā rāvaṇasya durātmanaḥ || 11 ||
राक्षस्यस्तास्तथेत्युक्त्वा प्रजग्मुर्यत्र पुष्पकम् । ततः पुष्पकमादय राक्षस्यो रावणाज्ञया ।। 12 ।।
rākṣasyastāstathetyuktvā prajagmuryatra puṣpakam | tataḥ puṣpakamādaya rākṣasyo rāvaṇājñayā || 12 ||
अशोकवनिकास्थां तां मैथिलीं समुपानयन् । तामादाय तु राक्षस्यो भर्तृशोकपरायणाम् ।। 13 ।।
aśokavanikāsthāṃ tāṃ maithilīṃ samupānayan | tāmādāya tu rākṣasyo bhartṛśokaparāyaṇām || 13 ||
सीतामारोपयामासुर्विमानं पुष्पकं तदा । ततः पुष्पकमारोप्य सीतां त्रिजटया सह ।। 14 ।।
sītāmāropayāmāsurvimānaṃ puṣpakaṃ tadā | tataḥ puṣpakamāropya sītāṃ trijaṭayā saha || 14 ||
जग्मुर्दर्शयितुं तस्यै राक्षस्यो रामलक्ष्मणौ । रावणश्चारयामास पताकाध्वजमालिनीम् ।। 15 ।।
jagmurdarśayituṃ tasyai rākṣasyo rāmalakṣmaṇau | rāvaṇaścārayāmāsa patākādhvajamālinīm || 15 ||
प्राघोषयत हृष्टश्च लङ्कायां राक्षसेश्वरः । राघवो लक्ष्मणश्चैव हताविन्द्रजिता रणे ।। 16 ।।
prāghoṣayata hṛṣṭaśca laṅkāyāṃ rākṣaseśvaraḥ | rāghavo lakṣmaṇaścaiva hatāvindrajitā raṇe || 16 ||
विमानेनापि सीता तु गत्वा त्रिजटया सह । ददर्श वानराणां तु सर्वं सिन्यं निपातितम् ।। 17 ।।
vimānenāpi sītā tu gatvā trijaṭayā saha | dadarśa vānarāṇāṃ tu sarvaṃ sinyaṃ nipātitam || 17 ||
प्रहृष्टमनसश्चापि ददर्श पिशिताशनान् । वानरांश्चापि दुःखार्तान्रामलक्ष्मणपार्श्वतः ।। 18 ।।
prahṛṣṭamanasaścāpi dadarśa piśitāśanān | vānarāṃścāpi duḥkhārtānrāmalakṣmaṇapārśvataḥ || 18 ||
ततः सीता ददर्शोभौ शयानौ शततल्पयोः । लक्ष्मणं चैव रामं च विसंज्ञौ शरपीडितौ ।। 19 ।।
tataḥ sītā dadarśobhau śayānau śatatalpayoḥ | lakṣmaṇaṃ caiva rāmaṃ ca visaṃjñau śarapīḍitau || 19 ||
विध्वस्तकवचौ वीरौ विप्रविद्धशरासनौ । सायकैश्छिन्नसर्वाङ्गौ शरस्तम्भमयौ क्षितौ ।। 20 ।।
vidhvastakavacau vīrau vipraviddhaśarāsanau | sāyakaiśchinnasarvāṅgau śarastambhamayau kṣitau || 20 ||
तौ दृष्ट्वा भ्रातरौ तत्र वीरौ सा पुरुषर्षभौ । शयानौ पुण्डरीकाक्षौ कुमाराविव पावकी ।। 21 ।।
tau dṛṣṭvā bhrātarau tatra vīrau sā puruṣarṣabhau | śayānau puṇḍarīkākṣau kumārāviva pāvakī || 21 ||
शरतल्पगतौ वीरौ तथाभूतौ नरर्षभौ । दुःखार्ता सुभृशं सीता करुणं विललाप ह ।। 22 ।।
śaratalpagatau vīrau tathābhūtau nararṣabhau | duḥkhārtā subhṛśaṃ sītā karuṇaṃ vilalāpa ha || 22 ||
भर्तारमनवद्याङ्गी लक्ष्मणं चासितेक्षणा । प्रेक्ष्य पांसुषु चेष्टन्तौ रुरोद जनकात्मजा ।। 23 ।।
bhartāramanavadyāṅgī lakṣmaṇaṃ cāsitekṣaṇā | prekṣya pāṃsuṣu ceṣṭantau ruroda janakātmajā || 23 ||
सबाष्पशोकाभिहता समीक्ष्य तौ भ्रातरौ देवसमप्रभावौ । वितर्कयन्ती निधनं तयोः सा दुःखान्विता वाक्यमिदं जगाद ।। 24 ।।
sabāṣpaśokābhihatā samīkṣya tau bhrātarau devasamaprabhāvau | vitarkayantī nidhanaṃ tayoḥ sā duḥkhānvitā vākyamidaṃ jagāda || 24 ||
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
