This overlay will guide you through the buttons:

| |
|
Shloka 1
तयोस्तदा सादितयो रणाग्रे मुमोह सैन्यं हरियूथपानाम् । सुग्रीवनीलाङ्गदजाम्बवन्तो न चापि किं चित्प्रतिपेदिरे ते ॥ १॥
tayostadā sāditayo raṇāgre mumoha sainyaṃ hariyūthapānām . sugrīvanīlāṅgadajāmbavanto na cāpi kiṃ citpratipedire te .. 1..
Shloka 2
ततो विषण्णं समवेक्ष्य सैन्यं विभीषणो बुद्धिमतां वरिष्ठः । उवाच शाखामृगराजवीरानाश्वासयन्नप्रतिमैर्वचोभिः ॥ २॥
tato viṣaṇṇaṃ samavekṣya sainyaṃ vibhīṣaṇo buddhimatāṃ variṣṭhaḥ . uvāca śākhāmṛgarājavīrānāśvāsayannapratimairvacobhiḥ .. 2..
Shloka 3
मा भैष्ट नास्त्यत्र विषादकालो यदार्यपुत्रौ ह्मवशौ विषण्णौ । स्वयम्भुवो वाक्यमथोद्वहन्तौ यत्सादिताविन्द्रजिदस्त्रजालैः ॥ ३॥
mā bhaiṣṭa nāstyatra viṣādakālo yadāryaputrau hmavaśau viṣaṇṇau . svayambhuvo vākyamathodvahantau yatsāditāvindrajidastrajālaiḥ .. 3..
Shloka 4
तस्मै तु दत्तं परमास्त्रमेतत् स्वयम्भुवा ब्राह्मममोघवीर्यम् । तन्मानयन्तौ यदि राजपुत्रौ निपातितौ कोऽत्र विषादकालः ॥ ४ ॥
tasmai tu dattaṃ paramāstrametat svayambhuvā brāhmamamoghavīryam . tanmānayantau yadi rājaputrau nipātitau ko'tra viṣādakālaḥ .. 4 ..
Shloka 5
ब्राह्ममस्त्रं ततो धीमान् मानयित्वा तु मारुतिः । विभीषणवचः श्रुत्वा हनूमांस्तमथाब्रवीत् ॥ ५॥
brāhmamastraṃ tato dhīmān mānayitvā tu mārutiḥ . vibhīṣaṇavacaḥ śrutvā hanūmāṃstamathābravīt .. 5..
Shloka 6
अस्मिन्निस्त्रहते सैन्ये वानराणां तरस्विनाम् । यो यो धारयते प्राणांस्तं तमाश्वासयावहे ॥ ६ ॥
asminnistrahate sainye vānarāṇāṃ tarasvinām . yo yo dhārayate prāṇāṃstaṃ tamāśvāsayāvahe .. 6 ..
Shloka 7
तावुभौ युगपद् वीरौ हनूमद्राक्षसोत्तमौ । उल्काहस्तौ तदा रात्रौ रणशीर्षे विचेरतुः ॥ ७॥
tāvubhau yugapad vīrau hanūmadrākṣasottamau . ulkāhastau tadā rātrau raṇaśīrṣe viceratuḥ .. 7..
Shloka 8
भिन्नलाङ्गूलहस्तोरुपादाङ्गुलिशिरोधरैः । स्रवद्भिः क्षतजं गात्रैः प्रस्रवद्भिः समन्ततः ॥ ८॥
bhinnalāṅgūlahastorupādāṅguliśirodharaiḥ . sravadbhiḥ kṣatajaṃ gātraiḥ prasravadbhiḥ samantataḥ .. 8..
Shloka 9
पतितैः पर्वताकारैर्वानरैरभिसंवृताम् । शस्त्रैश्च पतितैर्दीप्तैर्ददृशाते वसुन्धराम् ॥ ९ ॥
patitaiḥ parvatākārairvānarairabhisaṃvṛtām . śastraiśca patitairdīptairdadṛśāte vasundharām .. 9 ..
Shloka 10
सुग्रीवमङ्गदं नीलं शरभं गन्धमादनम् । जाम्बवन्तं सुषेणं च वेगदर्शनमेव च ॥ १० ॥
sugrīvamaṅgadaṃ nīlaṃ śarabhaṃ gandhamādanam . jāmbavantaṃ suṣeṇaṃ ca vegadarśanameva ca .. 10 ..
Shloka 11
मैन्दं नलं ज्योतिमुखं द्विविदं चापि वानरम् । विभीषणो हनूमांश्च ददृशाते हतान् रणे ॥ ११ ॥
maindaṃ nalaṃ jyotimukhaṃ dvividaṃ cāpi vānaram . vibhīṣaṇo hanūmāṃśca dadṛśāte hatān raṇe .. 11 ..
Shloka 12
सप्तषष्टिर्हताः कोट्यो वानराणां तरस्विनाम् । अह्नः पञ्चमशेषेण वल्लभेन स्वयम्भुवः ॥ १२॥
saptaṣaṣṭirhatāḥ koṭyo vānarāṇāṃ tarasvinām . ahnaḥ pañcamaśeṣeṇa vallabhena svayambhuvaḥ .. 12..
Shloka 13
सागरौघनिभं भीमं दृष्ट्वा बाणार्दितं बलम् । मार्गते जाम्बवन्तं च हनूमान्सविभीषणः ॥ १३॥
sāgaraughanibhaṃ bhīmaṃ dṛṣṭvā bāṇārditaṃ balam . mārgate jāmbavantaṃ ca hanūmānsavibhīṣaṇaḥ .. 13..
Shloka 14
स्वभावजरया युक्तं वृद्धं शरशतैश्चितम् । प्रजापतिसुतं वीरं शाम्यन्तमिव पावकम् ॥ १४॥
svabhāvajarayā yuktaṃ vṛddhaṃ śaraśataiścitam . prajāpatisutaṃ vīraṃ śāmyantamiva pāvakam .. 14..
Shloka 15
दृष्ट्वा समभिसंक्रम्य पौलस्त्यो वाक्यमब्रवीत् । कच्चिदार्य शरैस्तीक्ष्णैर्न प्राणा ध्वंसितास्तव ॥ १५॥
dṛṣṭvā samabhisaṃkramya paulastyo vākyamabravīt . kaccidārya śaraistīkṣṇairna prāṇā dhvaṃsitāstava .. 15..
Shloka 16
विभीषणवचः श्रुत्वा जाम्बवानृक्षपुङ्गवः । कृच्छ्रादभ्युद्गिरन् वाक्यमिदं वचनमब्रवीत् ॥ १६॥
vibhīṣaṇavacaḥ śrutvā jāmbavānṛkṣapuṅgavaḥ . kṛcchrādabhyudgiran vākyamidaṃ vacanamabravīt .. 16..
Shloka 17
नैरृतेन्द्र महावीर्य स्वरेण त्वाभिलक्षये । विध्दगात्रः शितैर्बाणैर्न त्वां पश्यामि चक्षुषा ॥ १७॥
nairṛtendra mahāvīrya svareṇa tvābhilakṣaye . vidhdagātraḥ śitairbāṇairna tvāṃ paśyāmi cakṣuṣā .. 17..
Shloka 18
अञ्जना सुप्रजा येन मातरिश्वा च सुव्रत । हनूमान्वानरश्रेष्ठः प्राणान्धारयते क्व चित् ॥ १८॥
añjanā suprajā yena mātariśvā ca suvrata . hanūmānvānaraśreṣṭhaḥ prāṇāndhārayate kva cit .. 18..
Shloka 19
श्रुत्वा जाम्बवतो वाक्यमुवाचेदं विभीषणः । आर्यपुत्रावतिक्रम्य कस्मात्पृच्छसि मारुतिम् ॥ १९॥
śrutvā jāmbavato vākyamuvācedaṃ vibhīṣaṇaḥ . āryaputrāvatikramya kasmātpṛcchasi mārutim .. 19..
Shloka 20
नैव राजनि सुग्रीवे नाङ्गदे नापि राघवे । आर्य सन्दर्शितः स्नेहो यथा वायुसुते परः ॥ २०॥
naiva rājani sugrīve nāṅgade nāpi rāghave . ārya sandarśitaḥ sneho yathā vāyusute paraḥ .. 20..
Shloka 21
विभीषणवचः श्रुत्वा जाम्बवान्वाक्यमब्रवीत् । शृणु नैरृतशार्दूल यस्मात् पृच्छामि मारुतिम् ॥ २१॥
vibhīṣaṇavacaḥ śrutvā jāmbavānvākyamabravīt . śṛṇu nairṛtaśārdūla yasmāt pṛcchāmi mārutim .. 21..
Shloka 22
अस्मिञ्जीवति वीरे तु हतमप्यहतं बलम् । हनूमत्युज्झितप्राणे जीवन्तोऽपि मृता वयंम॥ २२॥
asmiñjīvati vīre tu hatamapyahataṃ balam . hanūmatyujjhitaprāṇe jīvanto'pi mṛtā vayaṃma.. 22..
Shloka 23
धरते मारुतिस्तात मारुतप्रतिमो यदि । वैश्वानरसमो वीर्ये जीविताशा ततो भवेत् ॥ २३॥
dharate mārutistāta mārutapratimo yadi . vaiśvānarasamo vīrye jīvitāśā tato bhavet .. 23..
Shloka 24
ततो वृद्धमुपागम्य नियमेनाभ्यवादयत् । गृह्य जाम्बवतः पादौ हनूमान्मारुतात्मजः ॥ २४॥
tato vṛddhamupāgamya niyamenābhyavādayat . gṛhya jāmbavataḥ pādau hanūmānmārutātmajaḥ .. 24..
Shloka 25
श्रुत्वा हनुमतो वाक्यं तदा विव्यथितेन्द्रियः । पुनर्जातमिवात्मानं मन्यते स्मर्क्षपुङ्गवः ॥ २५॥
śrutvā hanumato vākyaṃ tadā vivyathitendriyaḥ . punarjātamivātmānaṃ manyate smarkṣapuṅgavaḥ .. 25..
Shloka 26
ततोऽब्रवीन्महातेजा हनूमन्तं स जाम्बवान् । आगच्छ हरिशार्दूल वानरांस्त्रातुमर्हसि ॥ २६॥
tato'bravīnmahātejā hanūmantaṃ sa jāmbavān . āgaccha hariśārdūla vānarāṃstrātumarhasi .. 26..
Shloka 27
नान्यो विक्रमपर्याप्तस्त्वमेषां परमः सखा । त्वत्पराक्रमकालोऽयं नान्यं पश्यामि कञ्चन ॥ २७॥
nānyo vikramaparyāptastvameṣāṃ paramaḥ sakhā . tvatparākramakālo'yaṃ nānyaṃ paśyāmi kañcana .. 27..
Shloka 28
ऋक्षवानरवीराणामनीकानि प्रहर्षय । विशल्यौ कुरु चाप्येतौ सादितौ रामलक्ष्मणौ ॥ २८॥
ṛkṣavānaravīrāṇāmanīkāni praharṣaya . viśalyau kuru cāpyetau sāditau rāmalakṣmaṇau .. 28..
Shloka 29
गत्वा परममध्वानमुपर्युपरि सागरम् । हिमवन्तं नगश्रेष्ठं हनूमन्गन्तुमर्हसि ॥ २९॥
gatvā paramamadhvānamuparyupari sāgaram . himavantaṃ nagaśreṣṭhaṃ hanūmangantumarhasi .. 29..
Shloka 30
ततः काञ्चनमत्युच्चमृषभं पर्वतोत्तमम् । कैलासशिखरं चापि द्रक्ष्यस्यरिनिषूदन ॥ ३०॥
tataḥ kāñcanamatyuccamṛṣabhaṃ parvatottamam . kailāsaśikharaṃ cāpi drakṣyasyariniṣūdana .. 30..
Shloka 31
तयोः शिखरयोर्मध्ये प्रदीप्तमतुलप्रभम् । सर्वौषधियुतं वीर द्रक्ष्यस्यौषधिपर्वतम् ॥ ३१॥
tayoḥ śikharayormadhye pradīptamatulaprabham . sarvauṣadhiyutaṃ vīra drakṣyasyauṣadhiparvatam .. 31..
Shloka 32
तस्य वानरशार्दूल चतस्रो मूर्ध्नि सम्भवाः । द्रक्ष्यस्योषधयो दीप्ता दीपयन्तीर्दिशो दश ॥ ३२॥
tasya vānaraśārdūla catasro mūrdhni sambhavāḥ . drakṣyasyoṣadhayo dīptā dīpayantīrdiśo daśa .. 32..
Shloka 33
मृतसञ्जीवनीं चैव विशल्यकरणीमपि । सौवर्णकरणीं चैव सन्धानीं च महौषधीम् ॥ ३३॥
mṛtasañjīvanīṃ caiva viśalyakaraṇīmapi . sauvarṇakaraṇīṃ caiva sandhānīṃ ca mahauṣadhīm .. 33..
Shloka 34
ताः सर्वा हनुमन्गृह्य क्षिप्रमागन्तुमर्हसि । आश्वासय हरीन्प्राणैर्योज्य गन्धवहात्मजः ॥ ३४॥
tāḥ sarvā hanumangṛhya kṣipramāgantumarhasi . āśvāsaya harīnprāṇairyojya gandhavahātmajaḥ .. 34..
Shloka 35
श्रुत्वा जाम्बवतो वाक्यं हनूमान् मारुतात्मजः । आपूर्यत बलोद्धर्षैस्तोयवेगैरिवार्णवः ॥ ३५॥
śrutvā jāmbavato vākyaṃ hanūmān mārutātmajaḥ . āpūryata baloddharṣaistoyavegairivārṇavaḥ .. 35..
Shloka 36
स पर्वततटाग्रस्थः पीडयन् पर्वतोत्तरम् । हनूमान्दृश्यते वीरो द्वितीय इव पर्वतः ॥ ३६॥
sa parvatataṭāgrasthaḥ pīḍayan parvatottaram . hanūmāndṛśyate vīro dvitīya iva parvataḥ .. 36..
Shloka 37
हरिपादविनिर्भिन्नो निषसाद स पर्वतः । न शशाक तदाऽऽत्मानं वोढुं भृशनिपीडितः ॥ ३७॥
haripādavinirbhinno niṣasāda sa parvataḥ . na śaśāka tadā''tmānaṃ voḍhuṃ bhṛśanipīḍitaḥ .. 37..
Shloka 38
तस्य पेतुर्नगा भूमौ हरिवेगाच्च जज्वलुः । शृङ्गाणि च व्यशीर्यन्त पीडितस्य हनूमता ॥ ३८॥
tasya peturnagā bhūmau harivegācca jajvaluḥ . śṛṅgāṇi ca vyaśīryanta pīḍitasya hanūmatā .. 38..
Shloka 39
तस्मिन्सम्पीड्यमाने तु भग्नद्रुमशिलातले । न शेकुर्वानराः स्थातुं घूर्णमाने नगोत्तमे ॥ ३९॥
tasminsampīḍyamāne tu bhagnadrumaśilātale . na śekurvānarāḥ sthātuṃ ghūrṇamāne nagottame .. 39..
Shloka 40
सा घूर्णितमहाद्वारा प्रभग्नगृहगोपुरा । लङ्का त्रासाकुला रात्रौ प्रनृत्तेवाभवत्तदा ॥ ४०॥
sā ghūrṇitamahādvārā prabhagnagṛhagopurā . laṅkā trāsākulā rātrau pranṛttevābhavattadā .. 40..
Shloka 41
पृथिवीधरसङ्काशो निपीड्य धरणीधरम् । पृथिवीं क्षोभयामास सार्णवां मारुतात्मजः ॥ ४१॥
pṛthivīdharasaṅkāśo nipīḍya dharaṇīdharam . pṛthivīṃ kṣobhayāmāsa sārṇavāṃ mārutātmajaḥ .. 41..
Shloka 42
आरुरोह तदा तस्माद्धरिर्मलयपर्वतम् । मेरुमन्दरसङ्काशं नानाप्रस्रवणाकुलम् ॥ 42 ॥
āruroha tadā tasmāddharirmalayaparvatam . merumandarasaṅkāśaṃ nānāprasravaṇākulam .. 42 ..
Shloka 43
नानाद्रुमलताकीर्णं विकासिकमलोत्पलम् । सेवितंदेवगन्धर्वैष्षष्टियोजनमुच्छ्रितम् ॥ 43 ॥
nānādrumalatākīrṇaṃ vikāsikamalotpalam . sevitaṃdevagandharvaiṣṣaṣṭiyojanamucchritam .. 43 ..
Shloka 44
विद्याधरैर्मुनिगणैरप्सरोभिर्निषेवितम् । नानामृगगणाकीर्णं बहुकन्दरशोभितम् ॥ 44 ॥
vidyādharairmunigaṇairapsarobhirniṣevitam . nānāmṛgagaṇākīrṇaṃ bahukandaraśobhitam .. 44 ..
Shloka 45
सर्वानाकुलयंस्तत्र यक्षगन्धर्वकिन्नरान् । हनुमान् मेघसङ्काशो ववृधे मारुतात्मजः ॥ 45 ॥
sarvānākulayaṃstatra yakṣagandharvakinnarān . hanumān meghasaṅkāśo vavṛdhe mārutātmajaḥ .. 45 ..
Shloka 46
पद्भ्यां तु शैलमापीड्य वडवामुखवन्मुखम् । विवृत्योग्रं ननादोच्चैस्त्रासयन्निव राक्षसान् ॥ 46 ॥
padbhyāṃ tu śailamāpīḍya vaḍavāmukhavanmukham . vivṛtyograṃ nanādoccaistrāsayanniva rākṣasān .. 46 ..
Shloka 47
तस्य नानद्यमानस्य श्रुत्वा निनदमद्भुतम् । लङ्कास्था राक्षसाः सर्वे न शेकुः स्पन्दितुं भयात् ॥ 47 ॥
tasya nānadyamānasya śrutvā ninadamadbhutam . laṅkāsthā rākṣasāḥ sarve na śekuḥ spandituṃ bhayāt .. 47 ..
Shloka 48
नमस्कृत्वाथ रामाय मारुतिर्भीमविक्रमः । राघवार्थे परं कर्म समैहत परन्तपः ॥ 48 ॥
namaskṛtvātha rāmāya mārutirbhīmavikramaḥ . rāghavārthe paraṃ karma samaihata parantapaḥ .. 48 ..
Shloka 49
स पुच्छमुद्यम्य भुजङ्गकल्पं विनम्य पृष्ठं श्रवणे निकुच्य । विवृत्य वक्त्रं वडवामुखाभमापुप्लुवे व्योम्नि स चण्डवेगः ॥ 49 ॥
sa pucchamudyamya bhujaṅgakalpaṃ vinamya pṛṣṭhaṃ śravaṇe nikucya . vivṛtya vaktraṃ vaḍavāmukhābhamāpupluve vyomni sa caṇḍavegaḥ .. 49 ..
Shloka 50
स वृक्षखण्डांस्तरसा जहार शैलाञ्शिलाः प्राकृतवानरांश् च । बाहूरुवेगोद्गतसम्प्रणुन्नास् ते क्षीणवेगाः सलिले निपेतुः ॥ 50 ॥
sa vṛkṣakhaṇḍāṃstarasā jahāra śailāñśilāḥ prākṛtavānarāṃś ca . bāhūruvegodgatasampraṇunnās te kṣīṇavegāḥ salile nipetuḥ .. 50 ..
Shloka 51
स तौ प्रसार्योरगभोगकल्पौ भुजौ भुजङ्गारिनिकाशवीर्यः । जगाम शैलं नगराजमग्र्यं दिशः प्रकर्षन्निव वायुसूनुः ॥ 51 ॥
sa tau prasāryoragabhogakalpau bhujau bhujaṅgārinikāśavīryaḥ . jagāma śailaṃ nagarājamagryaṃ diśaḥ prakarṣanniva vāyusūnuḥ .. 51 ..
Shloka 52
स सागरं घूर्णितबीचिमालं तदम्भशं भ्रामितसर्वसत्त्वम् । समीक्षमाणः सहसा जगाम चक्रं यथा विष्णुकराग्रमुक्तम् ॥ 52 ॥
sa sāgaraṃ ghūrṇitabīcimālaṃ tadambhaśaṃ bhrāmitasarvasattvam . samīkṣamāṇaḥ sahasā jagāma cakraṃ yathā viṣṇukarāgramuktam .. 52 ..
Shloka 53
स पर्वतान् पक्षिगणान् सरांसि नदीस्तटाकानि पुरोत्तमानि । स्फीताञ्जनांस्तानपि सम्प्रपश्यञ् जगाम वेगात् पितृतुल्यवेगः ॥ 53 ॥
sa parvatān pakṣigaṇān sarāṃsi nadīstaṭākāni purottamāni . sphītāñjanāṃstānapi samprapaśyañ jagāma vegāt pitṛtulyavegaḥ .. 53 ..
Shloka 54
आदित्यपथमाश्रित्य जगाम स गतश्रमः । हनूमांस्त्वरितो वीरः पितृतुल्यपराक्रमः ॥ 54 ॥
ādityapathamāśritya jagāma sa gataśramaḥ . hanūmāṃstvarito vīraḥ pitṛtulyaparākramaḥ .. 54 ..
Shloka 55
जवेन महता युक्तो मारुतिर्वातरंहसा । जगाम हरिशार्दूलो दिशछ शब्देन नादयन् ॥ 55 ॥
javena mahatā yukto mārutirvātaraṃhasā . jagāma hariśārdūlo diśacha śabdena nādayan .. 55 ..
Shloka 56
स्म्मरन्जाम्बवतो वाक्यं मारुतिर्वातरंहसा । ददर्श सहसा चापि हिमवन्तं महाकपिः ॥ 56 ॥
smmaranjāmbavato vākyaṃ mārutirvātaraṃhasā . dadarśa sahasā cāpi himavantaṃ mahākapiḥ .. 56 ..
Shloka 57
नानाप्रस्रवणोपेतं बहुकन्दरनिर्झरम् । श्वेताभ्रचयसङ्काशैः शिखरैश्चारुदर्शनैः । शोभितं विविधैर्वृक्षैरगमत् पर्वतोत्तमम् ॥ 57 ॥
nānāprasravaṇopetaṃ bahukandaranirjharam . śvetābhracayasaṅkāśaiḥ śikharaiścārudarśanaiḥ . śobhitaṃ vividhairvṛkṣairagamat parvatottamam .. 57 ..
Shloka 58
स तं समासाद्य महानगेन्द्रम् अतिप्रवृद्धोत्तमघोरशृङ्गम् । ददर्श पुण्यानि महाश्रमाणि सुरर्षिसङ्घोत्तमसेवितानि ॥ 58 ॥
sa taṃ samāsādya mahānagendram atipravṛddhottamaghoraśṛṅgam . dadarśa puṇyāni mahāśramāṇi surarṣisaṅghottamasevitāni .. 58 ..
Shloka 59
स ब्रह्मकोशं रजतालयं च शक्रालयं रुद्रशरप्रमोक्षम् । हयाननं ब्रह्मशिरश्च दीप्तं ददर्श वैवस्वत किङ्करांश् च ॥ 59 ॥
sa brahmakośaṃ rajatālayaṃ ca śakrālayaṃ rudraśarapramokṣam . hayānanaṃ brahmaśiraśca dīptaṃ dadarśa vaivasvata kiṅkarāṃś ca .. 59 ..
Shloka 60
वज्रालयं वैश्वरणालयं च सूर्यप्रभं सूर्यनिबन्धनं च । ब्रह्मालयं शङ्करकार्मुकं च ददर्श नाभिं च वसुन्धरायाः ॥ 60 ॥
vajrālayaṃ vaiśvaraṇālayaṃ ca sūryaprabhaṃ sūryanibandhanaṃ ca . brahmālayaṃ śaṅkarakārmukaṃ ca dadarśa nābhiṃ ca vasundharāyāḥ .. 60 ..
Shloka 61
कैलासमग्र्यं हिमवच्छिलां च तं वै वृष काञ्चनशैलमग्र्यम् । प्रदीप्तसर्वौषधिसम्प्रदीप्तं ददर्श सर्वौषधिपर्वतेन्द्रम् ॥ 61 ॥
kailāsamagryaṃ himavacchilāṃ ca taṃ vai vṛṣa kāñcanaśailamagryam . pradīptasarvauṣadhisampradīptaṃ dadarśa sarvauṣadhiparvatendram .. 61 ..
Shloka 62
स तं समीक्ष्यानलरश्मिदीप्तं विसिष्मिये वासवदूतसूनुः । आप्लुत्य तं चौषधिपर्वतेन्द्रं तत्रौषधीनां विचयं चकार ॥ 62 ॥
sa taṃ samīkṣyānalaraśmidīptaṃ visiṣmiye vāsavadūtasūnuḥ . āplutya taṃ cauṣadhiparvatendraṃ tatrauṣadhīnāṃ vicayaṃ cakāra .. 62 ..
Shloka 63
स योजनसहस्राणि समतीत्य महाकपिः । दिव्यौषधिधरं शैलं व्यचरन्मारुतात्मजः ॥ 63 ॥
sa yojanasahasrāṇi samatītya mahākapiḥ . divyauṣadhidharaṃ śailaṃ vyacaranmārutātmajaḥ .. 63 ..
Shloka 64
महौषध्यस्ततः सर्वास्तस्मिन् पर्वतसत्तमे । विज्ञायार्थिनमायान्तं ततो जग्मुरदर्शनम् ॥ 64 ॥
mahauṣadhyastataḥ sarvāstasmin parvatasattame . vijñāyārthinamāyāntaṃ tato jagmuradarśanam .. 64 ..
Shloka 65
स ता महात्मा हनुमानपश्यंश्चुकोप रोषाच्च भृशं ननाद । अमृष्यमाणोऽग्निनिकाशचक्षुर्महीधरेन्द्रं तमुवाच वाक्यम् ॥ 65 ॥
sa tā mahātmā hanumānapaśyaṃścukopa roṣācca bhṛśaṃ nanāda . amṛṣyamāṇo'gninikāśacakṣurmahīdharendraṃ tamuvāca vākyam .. 65 ..
Shloka 66
किमेतदेवं सुविनिश्चितं ते यद्राघवे नासि कृतानुकम्पः । पश्याद्य मद्बाहुबलाभिभूतो विकीर्णमात्मानमथो नगेन्द्र ॥ 66 ॥
kimetadevaṃ suviniścitaṃ te yadrāghave nāsi kṛtānukampaḥ . paśyādya madbāhubalābhibhūto vikīrṇamātmānamatho nagendra .. 66 ..
Shloka 67
स तस्य शृङ्गं सनगं सनागं सकाञ्चनं धातुसहस्रजुष्टम् । विकीर्णकूटं ज्वलिताग्रसानुं प्रगृह्य वेगात् सहसोन्ममाथ ॥ 67 ॥
sa tasya śṛṅgaṃ sanagaṃ sanāgaṃ sakāñcanaṃ dhātusahasrajuṣṭam . vikīrṇakūṭaṃ jvalitāgrasānuṃ pragṛhya vegāt sahasonmamātha .. 67 ..
Shloka 68
स तं समुत्पाट्य खमुत्पपात वित्रास्य लोकान्ससुरान्सुरेन्द्रान् । संस्तूयमानः खचरैरनेकैर्जगाम वेगाद् गरुडोग्रवेग ॥ 68 ॥
sa taṃ samutpāṭya khamutpapāta vitrāsya lokānsasurānsurendrān . saṃstūyamānaḥ khacarairanekairjagāma vegād garuḍogravega .. 68 ..
Shloka 69
स भास्कराध्वानमनुप्रपन्नस्तद् भास्कराभं शिखरं प्रगृह्य । बभौ तदा भास्करसंनिकाशो रवेः समीपे प्रतिभास्कराभः ॥ 69 ॥
sa bhāskarādhvānamanuprapannastad bhāskarābhaṃ śikharaṃ pragṛhya . babhau tadā bhāskarasaṃnikāśo raveḥ samīpe pratibhāskarābhaḥ .. 69 ..
Shloka 70
स तेन शैलेन भृशं रराज शैलोपमो गन्धवहात्मजस्तु । सहस्रधारेण सपावकेन चक्रेण खे विष्णुरिवार्पितेन ॥ 70 ॥
sa tena śailena bhṛśaṃ rarāja śailopamo gandhavahātmajastu . sahasradhāreṇa sapāvakena cakreṇa khe viṣṇurivārpitena .. 70 ..
Shloka 71
तं वानराः प्रेक्ष्य तदा विनेदुः स तानपि प्रेक्ष्य मुदा ननाद । तेषां समुद्घुष्टरवं निशम्य लङ्कालया भीमतरं विनेदुः ॥ 71 ॥
taṃ vānarāḥ prekṣya tadā vineduḥ sa tānapi prekṣya mudā nanāda . teṣāṃ samudghuṣṭaravaṃ niśamya laṅkālayā bhīmataraṃ vineduḥ .. 71 ..
Shloka 72
ततो महात्मा निपपात तस्मिञ् शैलोत्तमे वानरसैन्यमध्ये । हर्युत्तमेभ्यः शिरसाभिवाद्य विभीषणं तत्र च सस्वजे सः ॥ 72 ॥
tato mahātmā nipapāta tasmiñ śailottame vānarasainyamadhye . haryuttamebhyaḥ śirasābhivādya vibhīṣaṇaṃ tatra ca sasvaje saḥ .. 72 ..
Shloka 73
तावप्युभौ मानुषराजपुत्रौ तं गन्धमाघ्राय महौषधीनाम् । बभूवतुस्तत्र तदा विशल्यावुत्तस्थुरन्ये च हरिप्रवीराः ॥ 73 ॥
tāvapyubhau mānuṣarājaputrau taṃ gandhamāghrāya mahauṣadhīnām . babhūvatustatra tadā viśalyāvuttasthuranye ca haripravīrāḥ .. 73 ..
Shloka 74
सर्वे विशल्या विरुजाः क्षणेन हरिप्रवीराश्च हताश्च ये स्युः । गन्धेन तासां प्रवरौषधीनां सुप्ता निशान्तेष्विव सम्प्रबुद्धाः ॥ 74 ॥
sarve viśalyā virujāḥ kṣaṇena haripravīrāśca hatāśca ye syuḥ . gandhena tāsāṃ pravarauṣadhīnāṃ suptā niśānteṣviva samprabuddhāḥ .. 74 ..
Shloka 75
यदाप्रभृति लङ्कायां युध्यन्ते हरिराक्षसाः । तदाप्रभृति मानार्थमाज्ञया रावणस्य च ॥ 75 ॥
yadāprabhṛti laṅkāyāṃ yudhyante harirākṣasāḥ . tadāprabhṛti mānārthamājñayā rāvaṇasya ca .. 75 ..
Shloka 76
ये हन्यन्ते रणे तत्र राक्षसाः कपिकुञ्जरैः । हता हतास्तु क्षिप्यन्ते सर्व एव तु सागरे ॥ 76 ॥
ye hanyante raṇe tatra rākṣasāḥ kapikuñjaraiḥ . hatā hatāstu kṣipyante sarva eva tu sāgare .. 76 ..
Shloka 77
ततो हरिर्गन्धवहात्मजस्तु तमोषधीशैलमुदग्रवीर्यः । निनाय वेगाद्धिमवन्तमेव पुनश्च रामेण समाजगाम ॥ 77 ॥
tato harirgandhavahātmajastu tamoṣadhīśailamudagravīryaḥ . nināya vegāddhimavantameva punaśca rāmeṇa samājagāma .. 77 ..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In