त्वम॑ग्ने बृ॒हद्वयो॒ दधा॑सि देव दा॒शुषे॑ । क॒विर्गृ॒हप॑ति॒र्युवा॑ ॥ ८.१०२.०१ ॥
tvamagne bṛhadvayo dadhāsi deva dāśuṣe | kavirgṛhapatiryuvā || 8.102.01 ||
स न॒ ईळा॑नया स॒ह दे॒वाँ अ॑ग्ने दुव॒स्युवा॑ । चि॒किद्वि॑भान॒वा व॑ह ॥ ८.१०२.०२ ॥
sa na īळ्ānayā saha devāँ agne duvasyuvā | cikidvibhānavā vaha || 8.102.02 ||
त्वया॑ ह स्विद्यु॒जा व॒यं चोदि॑ष्ठेन यविष्ठ्य । अ॒भि ष्मो॒ वाज॑सातये ॥ ८.१०२.०३ ॥
tvayā ha svidyujā vayaṃ codiṣṭhena yaviṣṭhya | abhi ṣmo vājasātaye || 8.102.03 ||
औ॒र्व॒भृ॒गु॒वच्छुचि॑मप्नवान॒वदा हु॑वे । अ॒ग्निं स॑मु॒द्रवा॑ससम् ॥ ८.१०२.०४ ॥
aurvabhṛguvacchucimapnavānavadā huve | agniṃ samudravāsasam || 8.102.04 ||
हु॒वे वात॑स्वनं क॒विं प॒र्जन्य॑क्रन्द्यं॒ सहः॑ । अ॒ग्निं स॑मु॒द्रवा॑ससम् ॥ ८.१०२.०५ ॥
huve vātasvanaṃ kaviṃ parjanyakrandyaṃ sahaḥ | agniṃ samudravāsasam || 8.102.05 ||
आ स॒वं स॑वि॒तुर्य॑था॒ भग॑स्येव भु॒जिं हु॑वे । अ॒ग्निं स॑मु॒द्रवा॑ससम् ॥ ८.१०२.०६ ॥
ā savaṃ savituryathā bhagasyeva bhujiṃ huve | agniṃ samudravāsasam || 8.102.06 ||
अ॒ग्निं वो॑ वृ॒धन्त॑मध्व॒राणां॑ पुरू॒तम॑म् । अच्छा॒ नप्त्रे॒ सह॑स्वते ॥ ८.१०२.०७ ॥
agniṃ vo vṛdhantamadhvarāṇāṃ purūtamam | acchā naptre sahasvate || 8.102.07 ||
अ॒यं यथा॑ न आ॒भुव॒त्त्वष्टा॑ रू॒पेव॒ तक्ष्या॑ । अ॒स्य क्रत्वा॒ यश॑स्वतः ॥ ८.१०२.०८ ॥
ayaṃ yathā na ābhuvattvaṣṭā rūpeva takṣyā | asya kratvā yaśasvataḥ || 8.102.08 ||
अ॒यं विश्वा॑ अ॒भि श्रियो॒ऽग्निर्दे॒वेषु॑ पत्यते । आ वाजै॒रुप॑ नो गमत् ॥ ८.१०२.०९ ॥
ayaṃ viśvā abhi śriyo'gnirdeveṣu patyate | ā vājairupa no gamat || 8.102.09 ||
विश्वे॑षामि॒ह स्तु॑हि॒ होतॄ॑णां य॒शस्त॑मम् । अ॒ग्निं य॒ज्ञेषु॑ पू॒र्व्यम् ॥ ८.१०२.१० ॥
viśveṣāmiha stuhi hotṝṇāṃ yaśastamam | agniṃ yajñeṣu pūrvyam || 8.102.10 ||
शी॒रं पा॑व॒कशो॑चिषं॒ ज्येष्ठो॒ यो दमे॒ष्वा । दी॒दाय॑ दीर्घ॒श्रुत्त॑मः ॥ ८.१०२.११ ॥
śīraṃ pāvakaśociṣaṃ jyeṣṭho yo dameṣvā | dīdāya dīrghaśruttamaḥ || 8.102.11 ||
तमर्व॑न्तं॒ न सा॑न॒सिं गृ॑णी॒हि वि॑प्र शु॒ष्मिण॑म् । मि॒त्रं न या॑त॒यज्ज॑नम् ॥ ८.१०२.१२ ॥
tamarvantaṃ na sānasiṃ gṛṇīhi vipra śuṣmiṇam | mitraṃ na yātayajjanam || 8.102.12 ||
उप॑ त्वा जा॒मयो॒ गिरो॒ देदि॑शतीर्हवि॒ष्कृतः॑ । वा॒योरनी॑के अस्थिरन् ॥ ८.१०२.१३ ॥
upa tvā jāmayo giro dediśatīrhaviṣkṛtaḥ | vāyoranīke asthiran || 8.102.13 ||
यस्य॑ त्रि॒धात्ववृ॑तं ब॒र्हिस्त॒स्थावसं॑दिनम् । आप॑श्चि॒न्नि द॑धा प॒दम् ॥ ८.१०२.१४ ॥
yasya tridhātvavṛtaṃ barhistasthāvasaṃdinam | āpaścinni dadhā padam || 8.102.14 ||
प॒दं दे॒वस्य॑ मी॒ळ्हुषोऽना॑धृष्टाभिरू॒तिभिः॑ । भ॒द्रा सूर्य॑ इवोप॒दृक् ॥ ८.१०२.१५ ॥
padaṃ devasya mīळ्huṣo'nādhṛṣṭābhirūtibhiḥ | bhadrā sūrya ivopadṛk || 8.102.15 ||
अग्ने॑ घृ॒तस्य॑ धी॒तिभि॑स्तेपा॒नो दे॑व शो॒चिषा॑ । आ दे॒वान्व॑क्षि॒ यक्षि॑ च ॥ ८.१०२.१६ ॥
agne ghṛtasya dhītibhistepāno deva śociṣā | ā devānvakṣi yakṣi ca || 8.102.16 ||
तं त्वा॑जनन्त मा॒तरः॑ क॒विं दे॒वासो॑ अङ्गिरः । ह॒व्य॒वाह॒मम॑र्त्यम् ॥ ८.१०२.१७ ॥
taṃ tvājananta mātaraḥ kaviṃ devāso aṅgiraḥ | havyavāhamamartyam || 8.102.17 ||
प्रचे॑तसं त्वा क॒वेऽग्ने॑ दू॒तं वरे॑ण्यम् । ह॒व्य॒वाहं॒ नि षे॑दिरे ॥ ८.१०२.१८ ॥
pracetasaṃ tvā kave'gne dūtaṃ vareṇyam | havyavāhaṃ ni ṣedire || 8.102.18 ||
न॒हि मे॒ अस्त्यघ्न्या॒ न स्वधि॑ति॒र्वन॑न्वति । अथै॑ता॒दृग्भ॑रामि ते ॥ ८.१०२.१९ ॥
nahi me astyaghnyā na svadhitirvananvati | athaitādṛgbharāmi te || 8.102.19 ||
यद॑ग्ने॒ कानि॒ कानि॑ चि॒दा ते॒ दारू॑णि द॒ध्मसि॑ । ता जु॑षस्व यविष्ठ्य ॥ ८.१०२.२० ॥
yadagne kāni kāni cidā te dārūṇi dadhmasi | tā juṣasva yaviṣṭhya || 8.102.20 ||
यदत्त्यु॑प॒जिह्वि॑का॒ यद्व॒म्रो अ॑ति॒सर्प॑ति । सर्वं॒ तद॑स्तु ते घृ॒तम् ॥ ८.१०२.२१ ॥
yadattyupajihvikā yadvamro atisarpati | sarvaṃ tadastu te ghṛtam || 8.102.21 ||
अ॒ग्निमिन्धा॑नो॒ मन॑सा॒ धियं॑ सचेत॒ मर्त्यः॑ । अ॒ग्निमी॑धे वि॒वस्व॑भिः ॥ ८.१०२.२२ ॥
agnimindhāno manasā dhiyaṃ saceta martyaḥ | agnimīdhe vivasvabhiḥ || 8.102.22 ||
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
