Gyaandweep | Rig Veda Mandala , 8

आ प्र द्र॑व परा॒वतो॑ऽर्वा॒वत॑श्च वृत्रहन् । मध्वः॒ प्रति॒ प्रभ॑र्मणि ॥ ८.०८२.०१ ॥

ā pra drava parāvato'rvāvataśca vṛtrahan | madhvaḥ prati prabharmaṇi || 8.082.01 ||

ती॒व्राः सोमा॑स॒ आ ग॑हि सु॒तासो॑ मादयि॒ष्णवः॑ । पिबा॑ द॒धृग्यथो॑चि॒षे ॥ ८.०८२.०२ ॥

tīvrāḥ somāsa ā gahi sutāso mādayiṣṇavaḥ | pibā dadhṛgyathociṣe || 8.082.02 ||

इ॒षा म॑न्द॒स्वादु॒ तेऽरं॒ वरा॑य म॒न्यवे॑ । भुव॑त्त इन्द्र॒ शं हृ॒दे ॥ ८.०८२.०३ ॥

iṣā mandasvādu te'raṃ varāya manyave | bhuvatta indra śaṃ hṛde || 8.082.03 ||

आ त्व॑शत्र॒वा ग॑हि॒ न्यु१॒॑क्थानि॑ च हूयसे । उ॒प॒मे रो॑च॒ने दि॒वः ॥ ८.०८२.०४ ॥

ā tvaśatravā gahi nyu1kthāni ca hūyase | upame rocane divaḥ || 8.082.04 ||

तुभ्या॒यमद्रि॑भिः सु॒तो गोभिः॑ श्री॒तो मदा॑य॒ कम् । प्र सोम॑ इन्द्र हूयते ॥ ८.०८२.०५ ॥

tubhyāyamadribhiḥ suto gobhiḥ śrīto madāya kam | pra soma indra hūyate || 8.082.05 ||

इन्द्र॑ श्रु॒धि सु मे॒ हव॑म॒स्मे सु॒तस्य॒ गोम॑तः । वि पी॒तिं तृ॒प्तिम॑श्नुहि ॥ ८.०८२.०६ ॥

indra śrudhi su me havamasme sutasya gomataḥ | vi pītiṃ tṛptimaśnuhi || 8.082.06 ||

य इ॑न्द्र चम॒सेष्वा सोम॑श्च॒मूषु॑ ते सु॒तः । पिबेद॑स्य॒ त्वमी॑शिषे ॥ ८.०८२.०७ ॥

ya indra camaseṣvā somaścamūṣu te sutaḥ | pibedasya tvamīśiṣe || 8.082.07 ||

यो अ॒प्सु च॒न्द्रमा॑ इव॒ सोम॑श्च॒मूषु॒ ददृ॑शे । पिबेद॑स्य॒ त्वमी॑शिषे ॥ ८.०८२.०८ ॥

yo apsu candramā iva somaścamūṣu dadṛśe | pibedasya tvamīśiṣe || 8.082.08 ||

यं ते॑ श्ये॒नः प॒दाभ॑रत्ति॒रो रजां॒स्यस्पृ॑तम् । पिबेद॑स्य॒ त्वमी॑शिषे ॥ ८.०८२.०९ ॥

yaṃ te śyenaḥ padābharattiro rajāṃsyaspṛtam | pibedasya tvamīśiṣe || 8.082.09 ||

Languages