ऋषय ऊचुः ।।
सूतसूत महाभाग धन्यस्त्वं शिवसक्तधीः ।। महाबलस्य लिंगस्य श्रावितेयं कथाद्भुता ।। १ ।।
sūtasūta mahābhāga dhanyastvaṃ śivasaktadhīḥ || mahābalasya liṃgasya śrāviteyaṃ kathādbhutā || 1 ||
उत्तरस्यां दिशायां च शिवलिंगानि यानि च ।। तेषां माहात्म्यमनघ वद त्वं पापनाशकम् ।। २।।
uttarasyāṃ diśāyāṃ ca śivaliṃgāni yāni ca || teṣāṃ māhātmyamanagha vada tvaṃ pāpanāśakam || 2||
सूत उवाच।।
शृणुतादरतो विप्रा औत्तराणां विशेषतः ।। माहात्म्यं शिवलिंगानां प्रवदामि समासतः ।। ३ ।।
śṛṇutādarato viprā auttarāṇāṃ viśeṣataḥ || māhātmyaṃ śivaliṃgānāṃ pravadāmi samāsataḥ || 3 ||
गोकर्णं क्षेत्रमपरं महापातकनाशनम् ।। महावनं च तत्रास्ति पवित्रमतिविस्तरम् ।। ४ ।।
gokarṇaṃ kṣetramaparaṃ mahāpātakanāśanam || mahāvanaṃ ca tatrāsti pavitramativistaram || 4 ||
तत्रास्ति चन्द्रभालाख्यं शिवलिंगमनुत्तमम् ।। रावणेन समानीतं सद्भक्त्या सर्वसिद्धिदम् ।। ५ ।।
tatrāsti candrabhālākhyaṃ śivaliṃgamanuttamam || rāvaṇena samānītaṃ sadbhaktyā sarvasiddhidam || 5 ||
तस्य तत्र स्थितिर्वैद्यनाथस्येव मुनीश्वराः ।। सर्वलोकहितार्थाय करुणासागरस्य च ।। ६ ।।
tasya tatra sthitirvaidyanāthasyeva munīśvarāḥ || sarvalokahitārthāya karuṇāsāgarasya ca || 6 ||
स्नानं कृत्वा तु गोकर्णे चन्द्रभालं समर्च्य च ।। शिवलोकमवाप्नोति सत्यंसत्यं न संशयः ।। ७ ।।
snānaṃ kṛtvā tu gokarṇe candrabhālaṃ samarcya ca || śivalokamavāpnoti satyaṃsatyaṃ na saṃśayaḥ || 7 ||
चन्द्रभालस्य लिंगस्य महिमा परमाद्भुतः ।। न शक्यो वर्णितुं व्यासाद्भक्तस्नेहितरस्य हि ।। ८ ।।
candrabhālasya liṃgasya mahimā paramādbhutaḥ || na śakyo varṇituṃ vyāsādbhaktasnehitarasya hi || 8 ||
चन्द्रभालमहादेव लिंगस्य महिमा महान् ।। यथाकथंचित्संप्रोक्तः परलिंगस्य वै शृणु ।। ९ ।।
candrabhālamahādeva liṃgasya mahimā mahān || yathākathaṃcitsaṃproktaḥ paraliṃgasya vai śṛṇu || 9 ||
दाधीचं शिवलिंगं तु मिश्रर्षिवरतीर्थके ।। दधीचिना मुनीशेन सुप्रीत्या च प्रतिष्ठितम् ।। 4.11.१० ।।
dādhīcaṃ śivaliṃgaṃ tu miśrarṣivaratīrthake || dadhīcinā munīśena suprītyā ca pratiṣṭhitam || 4.11.10 ||
तत्र गत्वा च तत्तीर्थे स्नात्वा सम्यग्विधानतः ।। शिवलिंगं समर्चेद्वै दाधीचेश्वरमादरात् ।। ११ ।।
tatra gatvā ca tattīrthe snātvā samyagvidhānataḥ || śivaliṃgaṃ samarcedvai dādhīceśvaramādarāt || 11 ||
दाधीचमूर्तिस्तत्रैव समर्च्या विधिपूर्वकम् ।। शिवप्रीत्यर्थमेवाशु तीर्थयात्रा फलार्थिभिः ।। १२ ।।
dādhīcamūrtistatraiva samarcyā vidhipūrvakam || śivaprītyarthamevāśu tīrthayātrā phalārthibhiḥ || 12 ||
एवं कृते मुनिश्रेष्ठाः कृतकृत्यो भवेन्नरः ।। इह सर्वसुखं भुक्त्वा परत्र गतिमाप्नुयात् ।। १३ ।।
evaṃ kṛte muniśreṣṭhāḥ kṛtakṛtyo bhavennaraḥ || iha sarvasukhaṃ bhuktvā paratra gatimāpnuyāt || 13 ||
नैमिषारण्यतीर्थे तु निखिलर्षिप्रतिष्ठितम् ।। ऋषीश्वरमिति ख्यातं शिवलिंगं सुखप्रदम् ।। १४।।
naimiṣāraṇyatīrthe tu nikhilarṣipratiṣṭhitam || ṛṣīśvaramiti khyātaṃ śivaliṃgaṃ sukhapradam || 14||
तद्दर्शनात्पूजनाच्च जनानां पापिनामपि ।। भुक्तिमुक्तिश्च तेषां तु परत्रेह मुनीश्वराः ।। १५।।
taddarśanātpūjanācca janānāṃ pāpināmapi || bhuktimuktiśca teṣāṃ tu paratreha munīśvarāḥ || 15||
हत्याहरणतीर्थे तु शिवलिंगमघापहम् ।। पूजनीयं विशेषेण हत्याकोटिविनाशनम् ।। १६ ।।
hatyāharaṇatīrthe tu śivaliṃgamaghāpaham || pūjanīyaṃ viśeṣeṇa hatyākoṭivināśanam || 16 ||
देवप्रयागतीर्थे तु ललितेश्वरनामकम्।।शिवलिंगं सदा पूज्यं नरैस्सर्वाघनाशनम् ।। १७ ।।
devaprayāgatīrthe tu laliteśvaranāmakam||śivaliṃgaṃ sadā pūjyaṃ naraissarvāghanāśanam || 17 ||
नयपालाख्यपुर्य्यां तु प्रसिद्धायां महीतले ।। लिंगं पशुपतीशाख्यं सर्वकामफलप्रदम् ।। १८ ।।
nayapālākhyapuryyāṃ tu prasiddhāyāṃ mahītale || liṃgaṃ paśupatīśākhyaṃ sarvakāmaphalapradam || 18 ||
शिरोभागस्वरूपेण शिवलिंगं तदस्ति हि ।। तत्कथां वर्णयिष्यामि केदारेश्वरवर्णने ।। १९ ।।
śirobhāgasvarūpeṇa śivaliṃgaṃ tadasti hi || tatkathāṃ varṇayiṣyāmi kedāreśvaravarṇane || 19 ||
तदारान्मुक्तिनाथाख्यं शिवलिंगं महाद्भुतम् ।। दर्शनादर्चनात्तस्य भुक्तिर्मुक्तिश्च लभ्यते।।4.11.२०।।
tadārānmuktināthākhyaṃ śivaliṃgaṃ mahādbhutam || darśanādarcanāttasya bhuktirmuktiśca labhyate||4.11.20||
इति वश्च समाख्यातं लिंगवर्णनमुत्तमम्।।चतुर्दिक्षु मुनिश्रेष्ठाः किमन्यच्छ्रोतुमिच्छथ।।२१।।
iti vaśca samākhyātaṃ liṃgavarṇanamuttamam||caturdikṣu muniśreṣṭhāḥ kimanyacchrotumicchatha||21||
इति श्रीशिवमहापुराणे चतुर्थ्यां कोटिरुद्रसंहितायां चन्द्रभालपशुपतिनाथलिंगमाहात्म्यवर्णनं नामैकादशोऽध्यायः ।। ११।।
iti śrīśivamahāpurāṇe caturthyāṃ koṭirudrasaṃhitāyāṃ candrabhālapaśupatināthaliṃgamāhātmyavarṇanaṃ nāmaikādaśo'dhyāyaḥ || 11||
ॐ श्री परमात्मने नमः
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
