| |
|

This overlay will guide you through the buttons:

Shloka 1
ऋषय ऊचुः ।।
सूत जानासि सकलं वस्तु व्यासप्रसादतः ॥ तवाज्ञातं न विद्येत तस्मात्पृच्छामहे वयम् ॥ १॥
sūta jānāsi sakalaṃ vastu vyāsaprasādataḥ .. tavājñātaṃ na vidyeta tasmātpṛcchāmahe vayam .. 1..
Shloka 2
लिंगं च पूज्यते लोके तत्त्वया कथितं च यत्॥तत्तथैव न चान्यद्वा कारणं विद्यते त्विह॥२॥
liṃgaṃ ca pūjyate loke tattvayā kathitaṃ ca yat..tattathaiva na cānyadvā kāraṇaṃ vidyate tviha..2..
Shloka 3
बाणरूपा श्रुता लोके पार्वती शिववल्लभा॥एतत्किं कारणं सूत कथय त्वं यथाश्रुतम्॥३॥
bāṇarūpā śrutā loke pārvatī śivavallabhā..etatkiṃ kāraṇaṃ sūta kathaya tvaṃ yathāśrutam..3..
Shloka 4
सूत उवाच ।।
कल्पभेदकथा चैव श्रुता व्यासान्मया द्विजाः ॥ तामेव कथयाम्यद्य श्रूयतामृषिसत्तमाः ॥ ४॥
kalpabhedakathā caiva śrutā vyāsānmayā dvijāḥ .. tāmeva kathayāmyadya śrūyatāmṛṣisattamāḥ .. 4..
Shloka 5
पुरा दारुवने जातं यद्वृत्तं तु द्विजन्मनाम्॥तदेव श्रूयतां सम्यक् कथयामि कथाश्रुतम् ॥ ५ ॥
purā dāruvane jātaṃ yadvṛttaṃ tu dvijanmanām..tadeva śrūyatāṃ samyak kathayāmi kathāśrutam .. 5 ..
Shloka 6
दारुनामवनं श्रेष्ठं तत्रासन्नृषिसत्तमाः॥शिवभक्तास्सदा नित्यं शिवध्यानपरायणाः ॥ ६॥
dārunāmavanaṃ śreṣṭhaṃ tatrāsannṛṣisattamāḥ..śivabhaktāssadā nityaṃ śivadhyānaparāyaṇāḥ .. 6..
Shloka 7
त्रिकालं शिवपूजां च कुर्वंति स्म निरन्तरम् ॥ नानाविधैः स्तवैर्दिव्यैस्तुष्टुवुस्ते मुनीश्वराः ॥ ७॥
trikālaṃ śivapūjāṃ ca kurvaṃti sma nirantaram .. nānāvidhaiḥ stavairdivyaistuṣṭuvuste munīśvarāḥ .. 7..
Shloka 8
ते कदाचिद्वने यातास्समिधाहरणाय च ॥ सर्वे द्विजर्षभाश्शैवाश्शिवध्यानपरायणाः ॥ ८ ॥
te kadācidvane yātāssamidhāharaṇāya ca .. sarve dvijarṣabhāśśaivāśśivadhyānaparāyaṇāḥ .. 8 ..
Shloka 9
एतस्मिन्नंतरे साक्षाच्छंकरो नील लोहितः ॥ विरूपं च समास्थाय परीक्षार्थं समागतः ॥ ९ ॥
etasminnaṃtare sākṣācchaṃkaro nīla lohitaḥ .. virūpaṃ ca samāsthāya parīkṣārthaṃ samāgataḥ .. 9 ..
Shloka 10
दिगम्बरोऽतितेजस्वी भूतिभूषणभूषितः॥स चेष्टामकरोद्दुष्टां हस्ते लिंगं विधारयन् ॥ 4.12.१० ॥
digambaro'titejasvī bhūtibhūṣaṇabhūṣitaḥ..sa ceṣṭāmakarodduṣṭāṃ haste liṃgaṃ vidhārayan .. 4.12.10 ..
Shloka 11
मनसा च प्रियं तेषां कर्तुं वै वनवासिनाम् ॥ जगाम तद्वनं प्रीत्या भक्तप्रीतो हरः स्वयम् ॥ ११ ॥
manasā ca priyaṃ teṣāṃ kartuṃ vai vanavāsinām .. jagāma tadvanaṃ prītyā bhaktaprīto haraḥ svayam .. 11 ..
Shloka 12
तं दृष्ट्वा ऋषिपत्न्यस्ताः परं त्रासमुपागताः ॥ विह्वला विस्मिताश्चान्यास्समाजग्मुस्तथा पुनः ॥ १२॥
taṃ dṛṣṭvā ṛṣipatnyastāḥ paraṃ trāsamupāgatāḥ .. vihvalā vismitāścānyāssamājagmustathā punaḥ .. 12..
Shloka 13
अलिलिंगुस्तथा चान्याः करं धृत्या तथापराः ॥ परस्परं तु संघर्षात्संमग्नास्ताः स्त्रियस्तदा ॥ १३ ॥
aliliṃgustathā cānyāḥ karaṃ dhṛtyā tathāparāḥ .. parasparaṃ tu saṃgharṣātsaṃmagnāstāḥ striyastadā .. 13 ..
Shloka 14
एतस्मिन्नेव समये ऋषिवर्याः समागमन्॥विरुद्धं तं च ते दृष्ट्वा दुःखिताः क्रोधमूर्च्छिताः ॥ १४॥
etasminneva samaye ṛṣivaryāḥ samāgaman..viruddhaṃ taṃ ca te dṛṣṭvā duḥkhitāḥ krodhamūrcchitāḥ .. 14..
Shloka 15
तदा दुःखमनुप्राप्ताः कोयं कोयं तथाऽबुवन् ॥ समस्ता ऋषयस्ते वै शिवमायाविमोहिताः ॥ १५ ॥
tadā duḥkhamanuprāptāḥ koyaṃ koyaṃ tathā'buvan .. samastā ṛṣayaste vai śivamāyāvimohitāḥ .. 15 ..
Shloka 16
यदा च नोक्तवान्किंचित्सोवधूतो दिगम्बरः ॥ ऊचुस्तं पुरुषं भीमं तदा ते परमर्षयः ॥ १६॥
yadā ca noktavānkiṃcitsovadhūto digambaraḥ .. ūcustaṃ puruṣaṃ bhīmaṃ tadā te paramarṣayaḥ .. 16..
Shloka 17
त्वया विरुद्धं क्रियते वेदमार्ग विलोपि यत् ॥ ततस्त्वदीयं तल्लिंगं पततां पृथिवीतले ॥ १७॥
tvayā viruddhaṃ kriyate vedamārga vilopi yat .. tatastvadīyaṃ talliṃgaṃ patatāṃ pṛthivītale .. 17..
Shloka 18
सूत उवाच ।।
इत्युक्ते तु तदा तैश्च लिंगं च पतितं क्षणात् ॥ अवधूतस्य तस्याशु शिवस्याद्भुतरूपिणः॥१८॥
ityukte tu tadā taiśca liṃgaṃ ca patitaṃ kṣaṇāt .. avadhūtasya tasyāśu śivasyādbhutarūpiṇaḥ..18..
Shloka 19
तल्लिंगं चाग्निवत्सर्वं यद्ददाह पुरा स्थितम् ॥ यत्रयत्र च तद्याति तत्रतत्र दहेत्पुनः ॥ १९॥
talliṃgaṃ cāgnivatsarvaṃ yaddadāha purā sthitam .. yatrayatra ca tadyāti tatratatra dahetpunaḥ .. 19..
Shloka 20
पाताले च गतं तश्च स्वर्गे चापि तथैव च ॥ भूमौ सर्वत्र तद्यातं न कुत्रापि स्थिरं हि तत् ॥ 4.12.२०॥
pātāle ca gataṃ taśca svarge cāpi tathaiva ca .. bhūmau sarvatra tadyātaṃ na kutrāpi sthiraṃ hi tat .. 4.12.20..
Shloka 21
लोकाश्च व्याकुला जाता ऋषयस्तेतिदुःखिताः ॥ न शर्म लेभिरे केचिद्देवाश्च ऋषयस्तथा ॥ २१॥
lokāśca vyākulā jātā ṛṣayastetiduḥkhitāḥ .. na śarma lebhire keciddevāśca ṛṣayastathā .. 21..
Shloka 22
न ज्ञातस्तु शिवो यैस्तु ते सर्वे च सुरर्षयः॥दुःखिता मिलिताश्शीघ्रं ब्रह्माणं शरणं ययुः ॥ २२ ॥
na jñātastu śivo yaistu te sarve ca surarṣayaḥ..duḥkhitā militāśśīghraṃ brahmāṇaṃ śaraṇaṃ yayuḥ .. 22 ..
Shloka 23
तत्र गत्वा च ते सर्वे नत्वा स्तुत्वा विधिं द्विजाः ॥ तत्सर्वमवदन्वृत्तं ब्रह्मणे सृष्टिकारिणे ॥ २३ ॥
tatra gatvā ca te sarve natvā stutvā vidhiṃ dvijāḥ .. tatsarvamavadanvṛttaṃ brahmaṇe sṛṣṭikāriṇe .. 23 ..
Shloka 24
ब्रह्मा तद्वचनं श्रुत्वा शिवमायाविमोहितान् ॥ ज्ञात्वा ताञ्च्छंकरं नत्वा प्रोवाच ऋषिसत्तमान् ॥ २४ ॥
brahmā tadvacanaṃ śrutvā śivamāyāvimohitān .. jñātvā tāñcchaṃkaraṃ natvā provāca ṛṣisattamān .. 24 ..
Shloka 25
।। ब्रह्मोवाच ।।
ज्ञातारश्च भवन्तो वै कुर्वते गर्हितं द्विजाः ॥ अज्ञातारो यदा कुर्युः किं पुनः कथ्यते पुनः ॥ २५ ॥
jñātāraśca bhavanto vai kurvate garhitaṃ dvijāḥ .. ajñātāro yadā kuryuḥ kiṃ punaḥ kathyate punaḥ .. 25 ..
Shloka 26
विरुद्ध्यैवं शिवं देवं कुशलं कस्समीहते ॥ मध्याह्नसमये यो वै नातिथिं च परामृशेत् ॥ २६॥
viruddhyaivaṃ śivaṃ devaṃ kuśalaṃ kassamīhate .. madhyāhnasamaye yo vai nātithiṃ ca parāmṛśet .. 26..
Shloka 27
तस्यैव सुकृतं नीत्वा स्वीयं च दुष्कृतं पुनः॥संस्थाप्य चातिथिर्याति किं पुनः शिवमेव वा ॥ २७ ॥
tasyaiva sukṛtaṃ nītvā svīyaṃ ca duṣkṛtaṃ punaḥ..saṃsthāpya cātithiryāti kiṃ punaḥ śivameva vā .. 27 ..
Shloka 28
यावल्लिंगं स्थिरं नैव जगतां त्रितये शुभम् ॥ जायते न तदा क्वापि सत्यमेतद्वदाम्यहम् ॥ २८ ॥
yāvalliṃgaṃ sthiraṃ naiva jagatāṃ tritaye śubham .. jāyate na tadā kvāpi satyametadvadāmyaham .. 28 ..
Shloka 29
भवद्भिश्च तथा कार्यं यथा स्वास्थ्यं भवेदिह ॥ शिवलिंगस्य ऋषयो मनसा संविचार्य्यताम् ॥ २९ ॥
bhavadbhiśca tathā kāryaṃ yathā svāsthyaṃ bhavediha .. śivaliṃgasya ṛṣayo manasā saṃvicāryyatām .. 29 ..
Shloka 30
सूत उवाच ।।
इत्युक्तास्ते प्रणम्योचुर्ब्रह्माणमृषयश्च वै ॥ किमस्माभिर्विधे कार्यं तत्कार्यं त्वं समादिश ॥ 4.12.३० ॥
ityuktāste praṇamyocurbrahmāṇamṛṣayaśca vai .. kimasmābhirvidhe kāryaṃ tatkāryaṃ tvaṃ samādiśa .. 4.12.30 ..
Shloka 31
इत्युक्तश्च मुनीशैस्तैस्सर्वलोकपितामहः ॥ मुनीशांस्तांस्तदा ब्रह्मा स्वयं प्रोवाच वै तदा ॥ ३१ ॥
ityuktaśca munīśaistaissarvalokapitāmahaḥ .. munīśāṃstāṃstadā brahmā svayaṃ provāca vai tadā .. 31 ..
Shloka 32
ब्रह्मोवाच ।।
आराध्य गिरिजां देवीं प्रार्थयन्तु सुराश्शिवम् ॥ योनिरूपा भवेच्चेद्वै तदा तत्स्थिरतां व्रजेत् ॥ ३२ ॥
ārādhya girijāṃ devīṃ prārthayantu surāśśivam .. yonirūpā bhaveccedvai tadā tatsthiratāṃ vrajet .. 32 ..
Shloka 33
तद्विधिम्प्रवदाम्यद्य सर्वे शृणुत सत्तमाः ॥ तामेव कुरुत प्रेम्णा प्रसन्ना सा भविष्यति ॥ ३३ ॥
tadvidhimpravadāmyadya sarve śṛṇuta sattamāḥ .. tāmeva kuruta premṇā prasannā sā bhaviṣyati .. 33 ..
Shloka 34
कुम्भमेकं च संस्थाप्य कृत्वाष्टदलमुत्तमम् ॥ दूर्वायवांकुरैस्तीर्थोदकमापूरयेत्ततः ॥ ३४॥
kumbhamekaṃ ca saṃsthāpya kṛtvāṣṭadalamuttamam .. dūrvāyavāṃkuraistīrthodakamāpūrayettataḥ .. 34..
Shloka 35
वेदमंत्रैस्ततस्तं वै कुंभं चैवाभिमंत्रयेत् ॥ श्रुत्युक्तविधिना तस्य पूजां कृत्वा शिवं स्मरन् ॥ ३५ ॥
vedamaṃtraistatastaṃ vai kuṃbhaṃ caivābhimaṃtrayet .. śrutyuktavidhinā tasya pūjāṃ kṛtvā śivaṃ smaran .. 35 ..
Shloka 36
तल्लिंगं तज्जलेनाभिषेचयेत्परमर्षयः ॥ शतरुद्रियमंत्रैस्तु प्रोक्षितं शांतिमाप्नुयात् ॥ ३६॥
talliṃgaṃ tajjalenābhiṣecayetparamarṣayaḥ .. śatarudriyamaṃtraistu prokṣitaṃ śāṃtimāpnuyāt .. 36..
Shloka 37
गिरिजां योनिरूपां च बाणं स्थाप्य शुभं पुनः ॥ तत्र लिंगं च तत्स्थाप्यं पुनश्चैवाभिमंत्रयेत् ॥ ३७ ॥
girijāṃ yonirūpāṃ ca bāṇaṃ sthāpya śubhaṃ punaḥ .. tatra liṃgaṃ ca tatsthāpyaṃ punaścaivābhimaṃtrayet .. 37 ..
Shloka 38
सुगन्धैश्चन्दनैश्चैव पुष्पधूपादिभिस्तथा ॥ नैवेद्यादिकपूजाभिस्तोषयेत्परमेश्वरम् ॥ ३८ ॥
sugandhaiścandanaiścaiva puṣpadhūpādibhistathā .. naivedyādikapūjābhistoṣayetparameśvaram .. 38 ..
Shloka 39
प्रणिपातैः स्तवैः पुण्यैर्वाद्यैर्गानैस्तथा पुनः ॥ ततः स्वस्त्ययनं कृत्वा जयेति व्याहरेत्तथा ॥ ३९ ॥
praṇipātaiḥ stavaiḥ puṇyairvādyairgānaistathā punaḥ .. tataḥ svastyayanaṃ kṛtvā jayeti vyāharettathā .. 39 ..
Shloka 40
प्रसन्नो भव देवेश जगदाह्लादकारक ॥ कर्ता पालयिता त्वञ्च संहर्ता त्वं निरक्षरः ॥ 4.12.४० ॥
prasanno bhava deveśa jagadāhlādakāraka .. kartā pālayitā tvañca saṃhartā tvaṃ nirakṣaraḥ .. 4.12.40 ..
Shloka 41
जगदादिर्जगद्योनिर्जगदन्तर्गतोपि च ॥ शान्तो भव महेशान सर्वांल्लोकांश्च पालय ॥ ४१ ॥
jagadādirjagadyonirjagadantargatopi ca .. śānto bhava maheśāna sarvāṃllokāṃśca pālaya .. 41 ..
Shloka 42
एवं कृते विधौ स्वास्थ्यं भविष्यति न संशय ॥ विकारो न त्रिलोकेस्मिन्भविष्यति सुखं सदा ॥ ४२ ॥
evaṃ kṛte vidhau svāsthyaṃ bhaviṣyati na saṃśaya .. vikāro na trilokesminbhaviṣyati sukhaṃ sadā .. 42 ..
Shloka 43
सूत उवाच ।।
इत्युक्तास्ते द्विजा देवाः प्रणिपत्य पितामहम् ॥ शिवं तं शरणं प्राप्तस्सर्वलोकसुखेप्सया ॥ ४३॥
ityuktāste dvijā devāḥ praṇipatya pitāmaham .. śivaṃ taṃ śaraṇaṃ prāptassarvalokasukhepsayā .. 43..
Shloka 44
पूजितः परया भक्त्या प्रार्थितः शंकरस्तदा ॥ सुप्रसन्नस्ततो भूत्वा तानुवाच महेश्वरः ॥ ४४॥
pūjitaḥ parayā bhaktyā prārthitaḥ śaṃkarastadā .. suprasannastato bhūtvā tānuvāca maheśvaraḥ .. 44..
Shloka 45
महेश्वर उवाच ।।
हे देवा ऋषयः सर्वे मद्वचः शृणुतादरात् ॥ योनिरूपेण मल्लिंगं धृतं चेत्स्यात्तदा सुखम् ॥ ४५ ॥
he devā ṛṣayaḥ sarve madvacaḥ śṛṇutādarāt .. yonirūpeṇa malliṃgaṃ dhṛtaṃ cetsyāttadā sukham .. 45 ..
Shloka 46
पार्वतीं च विना नान्या लिंगं धारयितुं क्षमा॥तया धृतं च मल्लिंगं द्रुतं शान्तिं गमिष्यति ॥ ४६ ॥
pārvatīṃ ca vinā nānyā liṃgaṃ dhārayituṃ kṣamā..tayā dhṛtaṃ ca malliṃgaṃ drutaṃ śāntiṃ gamiṣyati .. 46 ..
Shloka 47
सूत उवाच।।
तच्छ्रुत्वा ऋषिभिर्देवैस्सुप्रसन्नैर्मुनीश्वराः ॥ गृहीत्वा चैव ब्रह्माणं गिरिजा प्रार्थिता तदा ॥ ४७ ॥
tacchrutvā ṛṣibhirdevaissuprasannairmunīśvarāḥ .. gṛhītvā caiva brahmāṇaṃ girijā prārthitā tadā .. 47 ..
Shloka 48
प्रसन्नां गिरिजां कृत्वा वृषभध्वजमेव च ॥ पूर्वोक्तं च विधिं कृत्वा स्थापितं लिंगमुत्तमम् ॥ ४८ ॥
prasannāṃ girijāṃ kṛtvā vṛṣabhadhvajameva ca .. pūrvoktaṃ ca vidhiṃ kṛtvā sthāpitaṃ liṃgamuttamam .. 48 ..
Shloka 49
मंत्रोक्तेन विधानेन देवाश्च ऋषयस्तथा ॥ चक्रुः प्रसन्नां गिरिजां शिवं च धर्महेतवे ॥ ४९॥
maṃtroktena vidhānena devāśca ṛṣayastathā .. cakruḥ prasannāṃ girijāṃ śivaṃ ca dharmahetave .. 49..
Shloka 50
समानर्चुर्विशेषेण सर्वे देवर्षयः शिवम् ॥ ब्रह्मा विष्णुः परे चैव त्रैलोक्यं सचराचरम् ॥ 4.12.५० ॥
samānarcurviśeṣeṇa sarve devarṣayaḥ śivam .. brahmā viṣṇuḥ pare caiva trailokyaṃ sacarācaram .. 4.12.50 ..
Shloka 51
सुप्रसन्नः शिवो जातः शिवा च जगदम्बिका॥धृतं तया च तल्लिंगं तेन रूपेण वै तदा ॥ ५१ ॥
suprasannaḥ śivo jātaḥ śivā ca jagadambikā..dhṛtaṃ tayā ca talliṃgaṃ tena rūpeṇa vai tadā .. 51 ..
Shloka 52
लोकानां स्थापिते लिंगे कल्याणं चाभवत्तदा ॥ प्रसिद्धं चैव तल्लिंगं त्रिलोक्यामभवद्द्विजाः ॥ ५२॥
lokānāṃ sthāpite liṃge kalyāṇaṃ cābhavattadā .. prasiddhaṃ caiva talliṃgaṃ trilokyāmabhavaddvijāḥ .. 52..
Shloka 53
हाटकेशमिति ख्यातं तच्छिवाशिवमित्यपि॥पूजनात्तस्य लोकानां सुखं भवति सर्वथा ॥ ५३ ॥
hāṭakeśamiti khyātaṃ tacchivāśivamityapi..pūjanāttasya lokānāṃ sukhaṃ bhavati sarvathā .. 53 ..
Shloka 54
इह सर्वसमृद्धिः स्यान्नानासुखवहाधिका ॥ परत्र परमा मुक्तिर्नात्र कार्या विचारणा ॥ ५४ ॥
iha sarvasamṛddhiḥ syānnānāsukhavahādhikā .. paratra paramā muktirnātra kāryā vicāraṇā .. 54 ..
Shloka 55
इति श्रीशिवमहापुराणे चतुर्थ्यां कोटिरुद्रसंहितायां लिंगस्वरूपकारणवर्णनं नाम द्वादशोऽध्यायः ॥ १२॥
iti śrīśivamahāpurāṇe caturthyāṃ koṭirudrasaṃhitāyāṃ liṃgasvarūpakāraṇavarṇanaṃ nāma dvādaśo'dhyāyaḥ .. 12..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In