| |
|

This overlay will guide you through the buttons:

Shloka 1
ऋषय ऊचुः
ज्योतिषां चैव लिंगानां माहात्म्यं कथयाधुना ॥ उत्पत्तिं च तथा तेषां ब्रूहि सर्वं यथाश्रुतम् ॥ १ ॥
jyotiṣāṃ caiva liṃgānāṃ māhātmyaṃ kathayādhunā .. utpattiṃ ca tathā teṣāṃ brūhi sarvaṃ yathāśrutam .. 1 ..
Shloka 2
सूत उवाच ।।
शृण्वन्तु विप्रा वक्ष्यामि तन्माहात्म्यं जनिं तथा ॥ संक्षेपतो यथाबुद्धि सद्गुरोश्च मया श्रुतम् ॥ २ ॥
śṛṇvantu viprā vakṣyāmi tanmāhātmyaṃ janiṃ tathā .. saṃkṣepato yathābuddhi sadgurośca mayā śrutam .. 2 ..
Shloka 3
एतेषां चैव माहात्म्यं वक्तुं वर्षशतैरपि ॥ शक्यते न मुनिश्रेष्ठास्तथापि कथयामि वः ॥ ३ ॥
eteṣāṃ caiva māhātmyaṃ vaktuṃ varṣaśatairapi .. śakyate na muniśreṣṭhāstathāpi kathayāmi vaḥ .. 3 ..
Shloka 4
सोमनाथश्च तेषां वै प्रथमः परिकीर्तितः ॥ तन्माहात्म्यं शृणु मुने प्रथमं सावधानतः ॥ ४ ॥
somanāthaśca teṣāṃ vai prathamaḥ parikīrtitaḥ .. tanmāhātmyaṃ śṛṇu mune prathamaṃ sāvadhānataḥ .. 4 ..
Shloka 5
सप्तविंशन्मिताः कन्या दक्षेण च महात्मना ॥ तेन चन्द्रमसे दत्ता अश्विन्याद्या मुनीश्वराः ॥ ५॥
saptaviṃśanmitāḥ kanyā dakṣeṇa ca mahātmanā .. tena candramase dattā aśvinyādyā munīśvarāḥ .. 5..
Shloka 6
चन्द्रं च स्वामिनं प्राप्य शोभमाना विशेषतः ॥ चन्द्रोऽपि चैव ताः प्राप्य शोभते स्म निरन्तरम् ॥ ६ ॥
candraṃ ca svāminaṃ prāpya śobhamānā viśeṣataḥ .. candro'pi caiva tāḥ prāpya śobhate sma nirantaram .. 6 ..
Shloka 7
हेम्ना चैव मणिर्भाति मणिना हेम चैव हि ॥ एवं च समये तस्य यज्जातं श्रूयतामिति ॥ ७ ॥
hemnā caiva maṇirbhāti maṇinā hema caiva hi .. evaṃ ca samaye tasya yajjātaṃ śrūyatāmiti .. 7 ..
Shloka 8
सर्वास्वपि च पत्नीषु रोहिणीनाम या स्मृता ॥ यथैका सा प्रिया चासीत्तथान्या न कदाचन ॥ ८ ॥
sarvāsvapi ca patnīṣu rohiṇīnāma yā smṛtā .. yathaikā sā priyā cāsīttathānyā na kadācana .. 8 ..
Shloka 9
अन्याश्च दुःखमापन्नाः पितरं शरणं ययुः ॥ गत्वा तस्मै च यद्दुःखं तथा ताभिर्निवेदितम् ॥ ९ ॥
anyāśca duḥkhamāpannāḥ pitaraṃ śaraṇaṃ yayuḥ .. gatvā tasmai ca yadduḥkhaṃ tathā tābhirniveditam .. 9 ..
Shloka 10
दक्षस्स च तथा श्रुत्वा दुःखं च प्राप्तावांस्तदा ॥ समागत्य द्विजाश्चन्द्रं शान्त्यावोचद्वचस्तदा ॥ 4.14.१० ॥
dakṣassa ca tathā śrutvā duḥkhaṃ ca prāptāvāṃstadā .. samāgatya dvijāścandraṃ śāntyāvocadvacastadā .. 4.14.10 ..
Shloka 11
दक्ष उवाच ।।
विमले च कुले त्वं हि समुत्पन्नः कलानिधे ॥ आश्रितेषु च सर्वेषु न्यूनाधिक्यं कथं तव ॥ ११ ॥
vimale ca kule tvaṃ hi samutpannaḥ kalānidhe .. āśriteṣu ca sarveṣu nyūnādhikyaṃ kathaṃ tava .. 11 ..
Shloka 12
कृतं चेत्तकृतं तच्च न कर्तव्यं त्वया पुनः ॥ वर्तनं विषमत्वेन नरकप्रदमीरितम् ॥ १२ ॥
kṛtaṃ cettakṛtaṃ tacca na kartavyaṃ tvayā punaḥ .. vartanaṃ viṣamatvena narakapradamīritam .. 12 ..
Shloka 13
सूत उवाच ।।
दक्षश्चैव च संप्रार्थ्य चन्द्रं जामातरं स्वयम्॥जगाम मन्दिरं स्वं वै निश्चयं परमं गतः ॥ १३॥
dakṣaścaiva ca saṃprārthya candraṃ jāmātaraṃ svayam..jagāma mandiraṃ svaṃ vai niścayaṃ paramaṃ gataḥ .. 13..
Shloka 14
चंद्रोऽपि वचनं तस्य न चकार विमोहितः ॥ शिवमायाप्रभावेण यया संमोहितं जगत् ॥ १४ ॥
caṃdro'pi vacanaṃ tasya na cakāra vimohitaḥ .. śivamāyāprabhāveṇa yayā saṃmohitaṃ jagat .. 14 ..
Shloka 15
शुभं भावि यदा यस्य शुभं भवति तस्य वै ॥ अशुभं च यदा भावि कथं तस्य शुभं भवेत् ॥ १५॥
śubhaṃ bhāvi yadā yasya śubhaṃ bhavati tasya vai .. aśubhaṃ ca yadā bhāvi kathaṃ tasya śubhaṃ bhavet .. 15..
Shloka 16
चन्द्रोऽपि बलवद्भाविवशान्मेने न तद्वचः ॥ रोहिण्यां च समासक्तो नान्यां मेने कदाचन ॥ १६॥
candro'pi balavadbhāvivaśānmene na tadvacaḥ .. rohiṇyāṃ ca samāsakto nānyāṃ mene kadācana .. 16..
Shloka 17
तच्छ्रुत्वा पुनरागत्य स्वयं दुःखसमन्वितः ॥ प्रार्थयामास चन्द्रं स दक्षो दक्षस्सुनीतितः ॥ १७ ॥
tacchrutvā punarāgatya svayaṃ duḥkhasamanvitaḥ .. prārthayāmāsa candraṃ sa dakṣo dakṣassunītitaḥ .. 17 ..
Shloka 18
दक्ष उवाच ।।
श्रूयतां चन्द्र यत्पूर्वं प्रार्थितो बहुधा मया ॥ न मानितं त्वया यस्मात्तस्मात्त्वं च क्षयी भव ॥ १८॥
śrūyatāṃ candra yatpūrvaṃ prārthito bahudhā mayā .. na mānitaṃ tvayā yasmāttasmāttvaṃ ca kṣayī bhava .. 18..
Shloka 19
सूत उवाच।।
इत्युक्ते तेन चन्द्रो वै क्षयी जातः क्षणादिह ॥ हाहाकारो महानासीत्तदेन्दौ क्षीणतां गते ॥ १९ ॥
ityukte tena candro vai kṣayī jātaḥ kṣaṇādiha .. hāhākāro mahānāsīttadendau kṣīṇatāṃ gate .. 19 ..
Shloka 20
देवर्षयस्तदा सर्वे किं कार्य्यं हा कथं भवेत् ॥ इति दुःखं समापन्ना विह्वला ह्यभवन्मुने ॥ 4.14.२० ॥
devarṣayastadā sarve kiṃ kāryyaṃ hā kathaṃ bhavet .. iti duḥkhaṃ samāpannā vihvalā hyabhavanmune .. 4.14.20 ..
Shloka 21
विज्ञापिताश्च चन्द्रेण सर्वे शक्रादयस्सुराः ॥ ऋषयश्च वसिष्ठाद्या ब्रह्माणं शरणं ययु ॥ २१॥
vijñāpitāśca candreṇa sarve śakrādayassurāḥ .. ṛṣayaśca vasiṣṭhādyā brahmāṇaṃ śaraṇaṃ yayu .. 21..
Shloka 22
गत्वापि तु तदा प्रोचुस्तद्वृत्तं निखिलं मुने ॥ ब्रह्मणे ऋषयो देवा नत्वा नुत्वातिविह्वलाः ॥ २२ ॥
gatvāpi tu tadā procustadvṛttaṃ nikhilaṃ mune .. brahmaṇe ṛṣayo devā natvā nutvātivihvalāḥ .. 22 ..
Shloka 23
ब्रह्मापि तद्वचः श्रुत्वा विस्मयं परमं ययौ ॥ शिवमायां सुप्रशस्य श्रावयंस्तानुवाच ह ॥ २३ ॥
brahmāpi tadvacaḥ śrutvā vismayaṃ paramaṃ yayau .. śivamāyāṃ supraśasya śrāvayaṃstānuvāca ha .. 23 ..
Shloka 24
ब्रह्मोवाच ।।
अहो कष्टं महज्जातं सर्वलोकस्य दुःखदम् ॥ चन्द्रस्तु सर्वदा दुष्टो दक्षश्च शप्तवानमुम् ॥ २४ ॥
aho kaṣṭaṃ mahajjātaṃ sarvalokasya duḥkhadam .. candrastu sarvadā duṣṭo dakṣaśca śaptavānamum .. 24 ..
Shloka 25
सर्वं दुष्टेन चन्द्रेण कृतं कर्माप्यनेकशः ॥ श्रूयतामृषयो देवाश्चन्द्रकृत्यं पुरातनम् ॥ २५॥
sarvaṃ duṣṭena candreṇa kṛtaṃ karmāpyanekaśaḥ .. śrūyatāmṛṣayo devāścandrakṛtyaṃ purātanam .. 25..
Shloka 26
बृहस्पतेर्गृहं गत्वा तारा दुष्टेन वै हृता ॥ तस्य भार्या पुनश्चैव स दैत्यान्समुपस्थितः ॥ २६॥
bṛhaspatergṛhaṃ gatvā tārā duṣṭena vai hṛtā .. tasya bhāryā punaścaiva sa daityānsamupasthitaḥ .. 26..
Shloka 27
समाश्रितस्तदा दैत्यान्युद्धं देवैश्चकार ह ॥ मयाऽत्रिणा निषिद्धश्च तस्मै तारां ददौ शशी ॥ २५७ ॥
samāśritastadā daityānyuddhaṃ devaiścakāra ha .. mayā'triṇā niṣiddhaśca tasmai tārāṃ dadau śaśī .. 257 ..
Shloka 28
तां च गर्भवतीं दृष्ट्वा न गृह्णामीति सोऽब्रवीत् ॥ अस्माभिर्वारितो जीवः कृच्छ्राज्जग्राह तां तदा ॥ २८ ॥
tāṃ ca garbhavatīṃ dṛṣṭvā na gṛhṇāmīti so'bravīt .. asmābhirvārito jīvaḥ kṛcchrājjagrāha tāṃ tadā .. 28 ..
Shloka 29
यदि गर्भं जहातीह गृह्णामीत्यब्रवीत्पुनः ॥ गर्भे मया पुनस्तत्र त्याजिते मुनिसत्तमाः ॥ २९ ॥
yadi garbhaṃ jahātīha gṛhṇāmītyabravītpunaḥ .. garbhe mayā punastatra tyājite munisattamāḥ .. 29 ..
Shloka 30
कस्यायं च पुनर्गर्भस्सोमस्येति च साऽब्रवीत् ॥ पश्चात्तेन गृहीता सा मया च वारितेन वै ॥ 4.14.३० ॥
kasyāyaṃ ca punargarbhassomasyeti ca sā'bravīt .. paścāttena gṛhītā sā mayā ca vāritena vai .. 4.14.30 ..
Shloka 31
एवंविधानि चन्द्रस्य दुश्चारित्राण्यनेकशः ॥ वर्ण्यंते किं पुनस्तानि सोऽद्यापि कुरुते कथम् ॥ ३१॥
evaṃvidhāni candrasya duścāritrāṇyanekaśaḥ .. varṇyaṃte kiṃ punastāni so'dyāpi kurute katham .. 31..
Shloka 32
यज्जातं तत्सुसंजातं नान्यथा भवति ध्रुवम् ॥ अतः परमुपायं वो वक्ष्यामि शृणुतादरात् ॥ ३२ ॥
yajjātaṃ tatsusaṃjātaṃ nānyathā bhavati dhruvam .. ataḥ paramupāyaṃ vo vakṣyāmi śṛṇutādarāt .. 32 ..
Shloka 33
प्रभासके शुभे क्षेत्रे व्रजेश्चन्द्रस्सदैवतैः ॥ शिवमाराधयेत्तत्र मृत्युञ्जयविधानतः ॥ ३३ ॥
prabhāsake śubhe kṣetre vrajeścandrassadaivataiḥ .. śivamārādhayettatra mṛtyuñjayavidhānataḥ .. 33 ..
Shloka 34
निधायेशं पुरस्तत्र चन्द्रस्तपतु नित्यशः ॥ प्रसन्नश्च शिवः पश्चादक्षयं तं करिष्यति ॥ ३४॥
nidhāyeśaṃ purastatra candrastapatu nityaśaḥ .. prasannaśca śivaḥ paścādakṣayaṃ taṃ kariṣyati .. 34..
Shloka 35
सूत उवाच ।।
इति श्रुत्वा वचस्तस्य ब्रह्मणस्ते सुरर्षयः ॥ संनिवृत्याययुस्सर्वे यत्र दक्षविधू ततः ॥ ३५ ॥
iti śrutvā vacastasya brahmaṇaste surarṣayaḥ .. saṃnivṛtyāyayussarve yatra dakṣavidhū tataḥ .. 35 ..
Shloka 36
गृहीत्वा ते ततश्चन्द्रं दक्षं चाश्वास्य निर्जराः ॥ प्रभासे ऋषयश्चक्रुस्तत्र गत्वाखिलाश्च वै ॥ ३६ ॥
gṛhītvā te tataścandraṃ dakṣaṃ cāśvāsya nirjarāḥ .. prabhāse ṛṣayaścakrustatra gatvākhilāśca vai .. 36 ..
Shloka 37
आवाह्य तीर्थवर्याणि सरस्वत्यादिकानि च ॥ पार्थिवेन तदा पूजां मृत्युञ्जयविधानतः ॥ ३७॥
āvāhya tīrthavaryāṇi sarasvatyādikāni ca .. pārthivena tadā pūjāṃ mṛtyuñjayavidhānataḥ .. 37..
Shloka 38
ते देवाश्च तदा सर्वे ऋषयो निर्मलाशयाः ॥ स्थाप्य चन्द्रं प्रभासे च स्वंस्वं धाम ययुर्मुदा ॥ ३८॥
te devāśca tadā sarve ṛṣayo nirmalāśayāḥ .. sthāpya candraṃ prabhāse ca svaṃsvaṃ dhāma yayurmudā .. 38..
Shloka 39
चन्द्रेण च तपस्तप्तं पण्मासं च निरंतरम् ॥ मृत्युंजयेन मंत्रेण पूजितो वृषभध्वजः ॥ ३९॥
candreṇa ca tapastaptaṃ paṇmāsaṃ ca niraṃtaram .. mṛtyuṃjayena maṃtreṇa pūjito vṛṣabhadhvajaḥ .. 39..
Shloka 40
दशकोटिमितं मन्त्रं समावृत्य शशी च तम् ॥ ।ध्यात्वा मृत्युञ्जयं मन्त्रं तस्थौ निश्चलमानसः ॥ 4.14.४० ॥
daśakoṭimitaṃ mantraṃ samāvṛtya śaśī ca tam .. .dhyātvā mṛtyuñjayaṃ mantraṃ tasthau niścalamānasaḥ .. 4.14.40 ..
Shloka 41
तं दृष्ट्वा शंकरो देवः प्रसन्नोऽभूत्ततः प्रभुः ॥ आविर्भूय विधुं प्राह स्वभक्तं भक्तवत्सलः ॥ ४१॥
taṃ dṛṣṭvā śaṃkaro devaḥ prasanno'bhūttataḥ prabhuḥ .. āvirbhūya vidhuṃ prāha svabhaktaṃ bhaktavatsalaḥ .. 41..
Shloka 42
शंकर उवाच।।
वरं वृणीष्व भद्रं ते मनसा यत्समीप्सितम्॥प्रसन्नोऽहं शशिन्सर्वं दास्ये वरमनुत्तमम् ॥ ४२॥
varaṃ vṛṇīṣva bhadraṃ te manasā yatsamīpsitam..prasanno'haṃ śaśinsarvaṃ dāsye varamanuttamam .. 42..
Shloka 43
चंद्र उवाच ।।
यदि प्रसन्नो देवेश किमसाध्यं भवेन्मम ॥ तथापि मे शरीरस्य क्षयं वारय शंकर॥४३॥
yadi prasanno deveśa kimasādhyaṃ bhavenmama .. tathāpi me śarīrasya kṣayaṃ vāraya śaṃkara..43..
Shloka 44
क्षंतव्यो मेऽपराधश्च कल्याणं कुरु सर्वदा॥इत्युक्ते च तदा तेन शिवो वचनमब्रवीत्॥४४॥
kṣaṃtavyo me'parādhaśca kalyāṇaṃ kuru sarvadā..ityukte ca tadā tena śivo vacanamabravīt..44..
Shloka 45
शिव उवाच।।
पक्षे च क्षीयतां चन्द्र कला ते च दिनेदिने॥पुनश्च वर्द्धतां पक्षे सा कला च निरंतरम् ॥ ४५ ॥
pakṣe ca kṣīyatāṃ candra kalā te ca dinedine..punaśca varddhatāṃ pakṣe sā kalā ca niraṃtaram .. 45 ..
Shloka 46
सूत उवाच ।।
एवं सति तदा देवा हर्षनिर्भरमानसाः ॥ ऋषयश्च तथा सर्वे समाजग्मुर्द्रुतं द्विजाः॥४६॥
evaṃ sati tadā devā harṣanirbharamānasāḥ .. ṛṣayaśca tathā sarve samājagmurdrutaṃ dvijāḥ..46..
Shloka 47
आगत्य च तदा सर्वे चन्द्रायाशिषमब्रुवन् ॥ शिवं नत्वा करौ बद्ध्वा प्रार्थयामासुरादरात्॥४७॥
āgatya ca tadā sarve candrāyāśiṣamabruvan .. śivaṃ natvā karau baddhvā prārthayāmāsurādarāt..47..
Shloka 48
देवाः ऊचुः।।
देवदेव महादेव परमेश नमोऽस्तु ते ॥ उमया सहितश्शंभो स्वामिन्नत्र स्थिरो भव ॥ ४८ ॥
devadeva mahādeva parameśa namo'stu te .. umayā sahitaśśaṃbho svāminnatra sthiro bhava .. 48 ..
Shloka 49
सूत उवाच।।
ततश्चन्द्रेण सद्भक्त्या संस्तुतश्शंकरः पुरा ॥ निराकारश्च साकारः पुनश्चैवाभवत्प्रभुः ॥ ४९ ॥
tataścandreṇa sadbhaktyā saṃstutaśśaṃkaraḥ purā .. nirākāraśca sākāraḥ punaścaivābhavatprabhuḥ .. 49 ..
Shloka 50
प्रसन्नश्च स देवानां क्षेत्रमाहात्म्यहेतवे ॥ चन्द्रस्य यशसे तत्र नाम्ना चन्द्रस्य शंकरः ॥ 4.14.५० ॥
prasannaśca sa devānāṃ kṣetramāhātmyahetave .. candrasya yaśase tatra nāmnā candrasya śaṃkaraḥ .. 4.14.50 ..
Shloka 51
सोमेश्वरश्च नामासीद्विख्यातो भुवन त्रये ॥ क्षयकुष्ठादिरोगाणां नाशकः पूजनाद्द्विजाः ॥ ५१॥
someśvaraśca nāmāsīdvikhyāto bhuvana traye .. kṣayakuṣṭhādirogāṇāṃ nāśakaḥ pūjanāddvijāḥ .. 51..
Shloka 52
धन्योऽयं कृतकृत्योयं यन्नाम्ना शंकरस्स्वयम्॥स्थितश्च जगतां नाथः पावयञ्जगतीतलम्॥५२॥
dhanyo'yaṃ kṛtakṛtyoyaṃ yannāmnā śaṃkarassvayam..sthitaśca jagatāṃ nāthaḥ pāvayañjagatītalam..52..
Shloka 53
तत्कुंडं तैश्च तत्रैव सर्वैर्देवैः प्रतिष्ठितम्॥शिवेन ब्रह्मणा तत्र ह्यविभक्तं तु तत्पुनः॥५३॥
tatkuṃḍaṃ taiśca tatraiva sarvairdevaiḥ pratiṣṭhitam..śivena brahmaṇā tatra hyavibhaktaṃ tu tatpunaḥ..53..
Shloka 54
चन्द्रकुण्डं प्रसिद्धं च पृथिव्यां पापनाशनम्॥तत्र स्नाति नरो यस्स सर्वैः पापैः प्रमुच्यते ॥ ५४ ॥
candrakuṇḍaṃ prasiddhaṃ ca pṛthivyāṃ pāpanāśanam..tatra snāti naro yassa sarvaiḥ pāpaiḥ pramucyate .. 54 ..
Shloka 55
रोगास्सर्वे क्षयाद्याश्च ह्यसाध्या ये भवंति वै॥ते सर्वे च क्षयं यान्ति षण्मासं स्नानमात्रतः ॥ ५५ ॥
rogāssarve kṣayādyāśca hyasādhyā ye bhavaṃti vai..te sarve ca kṣayaṃ yānti ṣaṇmāsaṃ snānamātrataḥ .. 55 ..
Shloka 56
प्रभासं च परिक्रम्य पृथिवीक्रमसंभवम् ॥ फलं प्राप्नोति शुद्धात्मा मृतः स्वर्गे महीयते ॥ ५६॥
prabhāsaṃ ca parikramya pṛthivīkramasaṃbhavam .. phalaṃ prāpnoti śuddhātmā mṛtaḥ svarge mahīyate .. 56..
Shloka 57
सोमलिंगं नरो दृष्ट्वा सर्वपापात्प्रमुच्यते ॥ लब्ध्वा फलं मनोभीष्टं मृतस्स्वर्गं समीहते ॥ ५७ ॥
somaliṃgaṃ naro dṛṣṭvā sarvapāpātpramucyate .. labdhvā phalaṃ manobhīṣṭaṃ mṛtassvargaṃ samīhate .. 57 ..
Shloka 58
यद्यत्फलं समुद्दिश्य कुरुते तीर्थमुत्तमम्॥तत्तत्फलमवाप्नोति सर्वथा नात्र संशयः॥५८॥
yadyatphalaṃ samuddiśya kurute tīrthamuttamam..tattatphalamavāpnoti sarvathā nātra saṃśayaḥ..58..
Shloka 59
इति ते ऋषयो देवाः फलं दृष्ट्वा तथाविधम् ॥ मुदा शिवं नमस्कृत्य गृहीत्वा चन्द्रमक्षयम् ॥ ५९ ॥
iti te ṛṣayo devāḥ phalaṃ dṛṣṭvā tathāvidham .. mudā śivaṃ namaskṛtya gṛhītvā candramakṣayam .. 59 ..
Shloka 60
परिक्रम्य च तत्तीर्थं प्रशंसन्तश्च ते ययुः ॥ चंद्रश्चापि स्वकीयं च कार्य्यं चक्रे पुरातनम् ॥ 4.14.६० ॥
parikramya ca tattīrthaṃ praśaṃsantaśca te yayuḥ .. caṃdraścāpi svakīyaṃ ca kāryyaṃ cakre purātanam .. 4.14.60 ..
Shloka 61
इति सर्वः समाख्यातः सोमेशस्य समुद्भवः ॥ एवं सोमेश्वरं लिंगं समुत्पन्नं मुनीश्वराः ॥ ६१ ॥
iti sarvaḥ samākhyātaḥ someśasya samudbhavaḥ .. evaṃ someśvaraṃ liṃgaṃ samutpannaṃ munīśvarāḥ .. 61 ..
Shloka 62
यः शृणोति तदुत्पत्तिं श्रावयेद्वा परान्नरः ॥ सर्वान्कामानवाप्नोति सर्वपापैः प्रमुच्यते ॥ ६२ ॥
yaḥ śṛṇoti tadutpattiṃ śrāvayedvā parānnaraḥ .. sarvānkāmānavāpnoti sarvapāpaiḥ pramucyate .. 62 ..
Shloka 63
इति श्रीशिवमहापुराणे चतुर्थ्यां कोटिरुद्रसंहितायां सोमनाथज्योतिर्लिंगोत्पत्तिवर्णनं नाम चतुर्दशोऽध्यायः ॥ १४ ॥ ।
iti śrīśivamahāpurāṇe caturthyāṃ koṭirudrasaṃhitāyāṃ somanāthajyotirliṃgotpattivarṇanaṃ nāma caturdaśo'dhyāyaḥ .. 14 .. .

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In