| |
|

This overlay will guide you through the buttons:

Shloka 1
ब्रह्मोवाच ।।
त्वयि देवमुने याते पार्वती हृष्टमानसा ॥ तपस्साध्यं हरं मेने तपोर्थं मन आदधे ॥ १ ॥
tvayi devamune yāte pārvatī hṛṣṭamānasā .. tapassādhyaṃ haraṃ mene taporthaṃ mana ādadhe .. 1 ..
Shloka 2
ततः सख्यौ समादाय जयां च विजयां तथा॥ मातरं पितरं चैव सखीभ्यां पर्यपृच्छत ॥ २॥
tataḥ sakhyau samādāya jayāṃ ca vijayāṃ tathā.. mātaraṃ pitaraṃ caiva sakhībhyāṃ paryapṛcchata .. 2..
Shloka 3
प्रथमं पितरं गत्वा हिमवन्तं नगेश्वरम् ॥ पर्यपृच्छत्सुप्रणम्य विनयेन समन्विता ॥ ३ ॥
prathamaṃ pitaraṃ gatvā himavantaṃ nageśvaram .. paryapṛcchatsupraṇamya vinayena samanvitā .. 3 ..
Shloka 4
सख्यावूचतुः ।।
हिमवञ्च्छ्रूयतां पुत्री वचनं कथ्यतेऽधुना ॥ सा स्वयं चैव देहस्य रूपस्यापि तथा पुनः ॥ ४ ॥
himavañcchrūyatāṃ putrī vacanaṃ kathyate'dhunā .. sā svayaṃ caiva dehasya rūpasyāpi tathā punaḥ .. 4 ..
Shloka 5
भवतो हि कुलस्यास्य साफल्यं कर्तुमिच्छति ॥ तपसा साधनीयोऽसौ नान्यथा दृश्यतां व्रजेत् ॥ ५॥
bhavato hi kulasyāsya sāphalyaṃ kartumicchati .. tapasā sādhanīyo'sau nānyathā dṛśyatāṃ vrajet .. 5..
Shloka 6
तस्माच्च पर्वतश्रेष्ठ देह्याज्ञां भवताधुना ॥ तपः करोतु गिरिजा वनं गत्वेति सादरम् ॥ ६॥
tasmācca parvataśreṣṭha dehyājñāṃ bhavatādhunā .. tapaḥ karotu girijā vanaṃ gatveti sādaram .. 6..
Shloka 7
ब्रह्मोवाच ।।
इत्येवं च तदा पृष्टस्सखीभ्यां मुनिसत्तम ॥ पार्वत्या सुविचार्याथ गिरिराजोऽब्रवीदिदम् ॥ ७ ॥
ityevaṃ ca tadā pṛṣṭassakhībhyāṃ munisattama .. pārvatyā suvicāryātha girirājo'bravīdidam .. 7 ..
Shloka 8
हिमालय उवाच ।।
मह्यं च रोचतेऽत्यर्थं मेनायै रुच्यतां पुनः ॥ यथेदं भवितव्यं च किमतः परमुत्तमम् ॥ ८ ॥
mahyaṃ ca rocate'tyarthaṃ menāyai rucyatāṃ punaḥ .. yathedaṃ bhavitavyaṃ ca kimataḥ paramuttamam .. 8 ..
Shloka 9
साफल्यं तु मदीयस्य कुलस्य च न संशयः ॥ मात्रे तु रुच्यते चेद्वै ततः शुभतरं नु किम्॥ ९॥
sāphalyaṃ tu madīyasya kulasya ca na saṃśayaḥ .. mātre tu rucyate cedvai tataḥ śubhataraṃ nu kim.. 9..
Shloka 10
ब्रह्मोवाच ।।
इत्येवं वचनं पित्रा प्रोक्तं श्रुत्वा तु ते तदा ॥ जग्मतुर्मातरं सख्यौ तदाज्ञप्ते तया सह ॥ 2.3.22.१० ॥
ityevaṃ vacanaṃ pitrā proktaṃ śrutvā tu te tadā .. jagmaturmātaraṃ sakhyau tadājñapte tayā saha .. 2.3.22.10 ..
Shloka 11
गत्वा तु मातरं तस्याः पार्वत्यास्ते च नारद ॥ सुप्रणम्य करो बध्वोचतुर्वचनमादरात् ॥ ११ ॥
gatvā tu mātaraṃ tasyāḥ pārvatyāste ca nārada .. supraṇamya karo badhvocaturvacanamādarāt .. 11 ..
Shloka 12
सख्यावूचतुः ।।
मातस्त्वं वचनं पुत्र्याः शृणु देवि नमोऽस्तु ते ॥ सुप्रसन्नतया तद्वै श्रुत्वा कर्तुमिहार्हसि ॥ १२॥
mātastvaṃ vacanaṃ putryāḥ śṛṇu devi namo'stu te .. suprasannatayā tadvai śrutvā kartumihārhasi .. 12..
Shloka 13
तप्तुकामा तु ते पुत्री शिवार्थं परमं तपः॥ प्राप्तानुज्ञा पितुश्चैव तुभ्यं च परिपृच्छति ॥ १३ ॥
taptukāmā tu te putrī śivārthaṃ paramaṃ tapaḥ.. prāptānujñā pituścaiva tubhyaṃ ca paripṛcchati .. 13 ..
Shloka 14
इयं स्वरूपसाफल्यं कर्तुकामा पतिव्रते ॥ त्वदाज्ञया यदि जायेत तप्यते च तथा तपः ॥ १४ ॥
iyaṃ svarūpasāphalyaṃ kartukāmā pativrate .. tvadājñayā yadi jāyeta tapyate ca tathā tapaḥ .. 14 ..
Shloka 15
।। ब्रह्मोवाच ।।
इत्युक्त्वा च ततस्सख्यौ तूष्णीमास्तां मुनीश्वर ॥ नांगीचकार मेना सा तद्वाक्यं खिन्नमानसा ॥ १५ ॥
ityuktvā ca tatassakhyau tūṣṇīmāstāṃ munīśvara .. nāṃgīcakāra menā sā tadvākyaṃ khinnamānasā .. 15 ..
Shloka 16
ततस्सा पार्वती प्राह स्वयमेवाथ मातरम् ॥ करौ बद्ध्वा विनीतात्मा स्मृत्वा शिवपदांबुजम् ॥ १६॥
tatassā pārvatī prāha svayamevātha mātaram .. karau baddhvā vinītātmā smṛtvā śivapadāṃbujam .. 16..
Shloka 17
पार्वत्युवाच ।।
मातस्तप्तुं गमिष्यामि प्रातः प्राप्तुं महेश्वरम् ॥ अनुजानीहि मां गंतुं तपसेऽद्य तपोवनम् ॥ १७ ॥
mātastaptuṃ gamiṣyāmi prātaḥ prāptuṃ maheśvaram .. anujānīhi māṃ gaṃtuṃ tapase'dya tapovanam .. 17 ..
Shloka 18
इत्याकर्ण्य वचः पुत्र्या मेना दुःख मुपागता ॥ सोपाहूय तदा पुत्रीमुवाच विकला सती ॥ १८ ॥
ityākarṇya vacaḥ putryā menā duḥkha mupāgatā .. sopāhūya tadā putrīmuvāca vikalā satī .. 18 ..
Shloka 19
मेनोवाच ।।
दुःखितासि शिवे पुत्री तपस्तप्तुं पुरा यदि ॥ तपश्चर गृहेऽद्य त्वं न बहिर्गच्छ पार्वति ॥ १९ ॥
duḥkhitāsi śive putrī tapastaptuṃ purā yadi .. tapaścara gṛhe'dya tvaṃ na bahirgaccha pārvati .. 19 ..
Shloka 20
कुत्र यासि तपः कर्तुं देवास्संति गृहे मम ॥ तीर्थानि च समस्तानि क्षेत्राणि विविधानि च ॥ 2.3.22.२० ॥
kutra yāsi tapaḥ kartuṃ devāssaṃti gṛhe mama .. tīrthāni ca samastāni kṣetrāṇi vividhāni ca .. 2.3.22.20 ..
Shloka 21
कर्तव्यो न हठः पुत्रि गंतव्यं न बहिः क्वचित् ॥ साधितं किं त्वया पूर्वं पुनः किं साधयिष्यसि ॥ २१॥
kartavyo na haṭhaḥ putri gaṃtavyaṃ na bahiḥ kvacit .. sādhitaṃ kiṃ tvayā pūrvaṃ punaḥ kiṃ sādhayiṣyasi .. 21..
Shloka 22
शरीरं कोमलं वत्से तपस्तु कठिनं महत् ॥ एवस्मात्तु त्वया कार्यं तपोऽत्र न बहिर्व्रज ॥ २२॥
śarīraṃ komalaṃ vatse tapastu kaṭhinaṃ mahat .. evasmāttu tvayā kāryaṃ tapo'tra na bahirvraja .. 22..
Shloka 23
स्त्रीणां तपोवनगतिर्न श्रुता कामनार्थिनी ॥ तस्मात्त्वं पुत्रि मा कार्षीस्तपोर्थं गमनं प्रति ॥ २३॥
strīṇāṃ tapovanagatirna śrutā kāmanārthinī .. tasmāttvaṃ putri mā kārṣīstaporthaṃ gamanaṃ prati .. 23..
Shloka 24
।। ब्रह्मोवाच ।।
इत्येवं बहुधा पुत्री तन्मात्रा विनवारिता ॥ संवेदे न सुखं किंचिद्विनाराध्य महेश्वरम् ॥ २४॥
ityevaṃ bahudhā putrī tanmātrā vinavāritā .. saṃvede na sukhaṃ kiṃcidvinārādhya maheśvaram .. 24..
Shloka 25
तपोनिषिद्धा तपसे वनं गंतुं च मेनया ॥ हेतुना तेन सोमेति नाम प्राप शिवा तदा ॥ २५॥
taponiṣiddhā tapase vanaṃ gaṃtuṃ ca menayā .. hetunā tena someti nāma prāpa śivā tadā .. 25..
Shloka 26
अथ तां दुखितां ज्ञात्वा मेना शैलप्रिया शिवाम् ॥ निदेशं सा ददौ तस्याः पार्वत्यास्तपसे मुने ॥ २६॥
atha tāṃ dukhitāṃ jñātvā menā śailapriyā śivām .. nideśaṃ sā dadau tasyāḥ pārvatyāstapase mune .. 26..
Shloka 27
मातुराज्ञां च संप्राप्य सुव्रता मुनिसत्तम ॥ ततः स्वांते सुखं लेभे पार्वती स्मृतशंकरा॥ २७॥
māturājñāṃ ca saṃprāpya suvratā munisattama .. tataḥ svāṃte sukhaṃ lebhe pārvatī smṛtaśaṃkarā.. 27..
Shloka 28
मातरं पितरं साथ प्रणिपत्य मुदा शिवा ॥ सखीभ्यां च शिवं स्मृत्वा तपस्तप्तुं समुद्गता॥ २८॥
mātaraṃ pitaraṃ sātha praṇipatya mudā śivā .. sakhībhyāṃ ca śivaṃ smṛtvā tapastaptuṃ samudgatā.. 28..
Shloka 29
हित्वा मतान्यनेकानि वस्त्राणि विविधानि च॥ वल्कलानि धृतान्याशु मौंजीं बद्ध्वा तु शोभनाम् ॥ २९॥
hitvā matānyanekāni vastrāṇi vividhāni ca.. valkalāni dhṛtānyāśu mauṃjīṃ baddhvā tu śobhanām .. 29..
Shloka 30
हित्वा हारं तथा चर्म्म मृगस्य परमं धृतम् ॥ जगाम तपसे तत्र गंगावतरणं प्रति॥ 2.3.22.३०॥
hitvā hāraṃ tathā carmma mṛgasya paramaṃ dhṛtam .. jagāma tapase tatra gaṃgāvataraṇaṃ prati.. 2.3.22.30..
Shloka 31
शंभुना कुर्वता ध्यानं यत्र दग्धो मनोभवः॥ गंगावतरणो नाम प्रस्थो हिमवतस्स च ॥ ३१ ॥
śaṃbhunā kurvatā dhyānaṃ yatra dagdho manobhavaḥ.. gaṃgāvataraṇo nāma prastho himavatassa ca .. 31 ..
Shloka 32
हरशून्योऽथ ददृशे स प्रस्थो हिमभूभृतः ॥ काल्या तत्रेत्य भोस्तात पार्वत्या जगदम्बया ॥ ३२ ॥
haraśūnyo'tha dadṛśe sa prastho himabhūbhṛtaḥ .. kālyā tatretya bhostāta pārvatyā jagadambayā .. 32 ..
Shloka 33
यत्र स्थित्वा पुरा शंभुस्तप्तवान्दुस्तरं तपः ॥ तत्र क्षणं तु सा स्थित्वा बभूव विरहार्दिता ॥ ३३ ॥
yatra sthitvā purā śaṃbhustaptavāndustaraṃ tapaḥ .. tatra kṣaṇaṃ tu sā sthitvā babhūva virahārditā .. 33 ..
Shloka 34
हा हरेति शिवा तत्र रुदन्ती सा गिरेस्सुता ॥ विललापातिदुःखार्ता चिन्ताशोकसमन्विता ॥ ३४ ॥
hā hareti śivā tatra rudantī sā giressutā .. vilalāpātiduḥkhārtā cintāśokasamanvitā .. 34 ..
Shloka 35
ततश्चिरेण सा मोहं धैर्य्या त्संस्तभ्य पार्वती ॥ नियमायाऽभवत्तत्र दीक्षिता हिमवत्सुता ॥ ३५ ॥
tataścireṇa sā mohaṃ dhairyyā tsaṃstabhya pārvatī .. niyamāyā'bhavattatra dīkṣitā himavatsutā .. 35 ..
Shloka 36
तपश्चकार सा तत्र शृंगितीर्थे महोत्तमे ॥ गौरीशिखर नामासीत्तत्तपःकरणाद्धि तत् ॥ ३६ ॥
tapaścakāra sā tatra śṛṃgitīrthe mahottame .. gaurīśikhara nāmāsīttattapaḥkaraṇāddhi tat .. 36 ..
Shloka 37
सुंदराश्च द्रुमास्तत्र पवित्राश्शिवया मुने ॥ आरोपिताः परीक्षार्थं तपसः फलभागिनः ॥ ३७ ॥
suṃdarāśca drumāstatra pavitrāśśivayā mune .. āropitāḥ parīkṣārthaṃ tapasaḥ phalabhāginaḥ .. 37 ..
Shloka 38
भूभिशुद्धिं ततः कृत्वा वेदीं निर्माय सुन्दरी ॥ तथा तपस्समारब्धं मुनीनामपि दुष्करम् ॥ ३८ ॥
bhūbhiśuddhiṃ tataḥ kṛtvā vedīṃ nirmāya sundarī .. tathā tapassamārabdhaṃ munīnāmapi duṣkaram .. 38 ..
Shloka 39
विगृह्य मनसा सर्वाणींद्रियाणि सहाशु सा ॥ समुपस्थानिके तत्र चकार परमं तपः ॥ ३९ ।
vigṛhya manasā sarvāṇīṃdriyāṇi sahāśu sā .. samupasthānike tatra cakāra paramaṃ tapaḥ .. 39 .
Shloka 40
ग्रीष्मे च परितो वह्निं प्रज्वलंतं दिवानिशम् ॥ कृत्वा तस्थौ च तन्मध्ये सततं जपती मनुम ॥ 2.3.22.४० ॥
grīṣme ca parito vahniṃ prajvalaṃtaṃ divāniśam .. kṛtvā tasthau ca tanmadhye satataṃ japatī manuma .. 2.3.22.40 ..
Shloka 41
सततं चैव वर्षासु स्थंडिले सुस्थिरासना ॥ शिलापृष्ठे च संसिक्ता बभूव जलधारया॥ ४१॥
satataṃ caiva varṣāsu sthaṃḍile susthirāsanā .. śilāpṛṣṭhe ca saṃsiktā babhūva jaladhārayā.. 41..
Shloka 42
शीते जलांतरे शश्वत्तस्थौ सा भक्तितत्परा॥ अनाहारातपत्तत्र नीहारे निशासु च॥ ४२॥
śīte jalāṃtare śaśvattasthau sā bhaktitatparā.. anāhārātapattatra nīhāre niśāsu ca.. 42..
Shloka 43
एवं तपः प्रकुर्वाणा पंचाक्षरजपे रता ॥ दध्यौ शिवं शिवा तत्र सर्वकामफलप्रदम्॥ ४३॥
evaṃ tapaḥ prakurvāṇā paṃcākṣarajape ratā .. dadhyau śivaṃ śivā tatra sarvakāmaphalapradam.. 43..
Shloka 44
स्वारोपिताच्छुभान्वृक्षान्सखीभिस्सिंचती मुदा॥ प्रत्यहं सावकाशे सा तत्रातिथ्यमकल्पयत्॥ ४४॥
svāropitācchubhānvṛkṣānsakhībhissiṃcatī mudā.. pratyahaṃ sāvakāśe sā tatrātithyamakalpayat.. 44..
Shloka 45
वातश्चैव तथा शीतवृष्टिश्च विविधा तथा॥ दुस्सहोऽपि तथा घर्म्मस्तया सेहे सुचित्तया॥ ४५॥
vātaścaiva tathā śītavṛṣṭiśca vividhā tathā.. dussaho'pi tathā gharmmastayā sehe sucittayā.. 45..
Shloka 46
दुःखं च विविधं तत्र गणितं न तयागतम् ॥ केवलं मन आधाय शिवे सासीत्स्थिता मुने ॥ ४६॥
duḥkhaṃ ca vividhaṃ tatra gaṇitaṃ na tayāgatam .. kevalaṃ mana ādhāya śive sāsītsthitā mune .. 46..
Shloka 47
प्रथमं फलभोगेन द्वितीयं पर्णभोजनैः॥ तपः प्रकुर्वती देवी क्रमान्निन्येऽमिताः समाः ॥ ४७॥
prathamaṃ phalabhogena dvitīyaṃ parṇabhojanaiḥ.. tapaḥ prakurvatī devī kramānninye'mitāḥ samāḥ .. 47..
Shloka 48
ततः पर्णान्यपि शिवा निरस्य हिमवत्सुता॥ निराहाराभवद्देवी तपश्चरणसंरता॥ ४८॥
tataḥ parṇānyapi śivā nirasya himavatsutā.. nirāhārābhavaddevī tapaścaraṇasaṃratā.. 48..
Shloka 49
आहारे त्यक्तपर्णाभूद्यस्माद्धिमवतः सुतः ॥ तेन देवैरपर्णेति कथिता नामतः शिवा॥ ४९॥
āhāre tyaktaparṇābhūdyasmāddhimavataḥ sutaḥ .. tena devairaparṇeti kathitā nāmataḥ śivā.. 49..
Shloka 50
एका पादस्थिता सासीच्छिवं संस्मृत्य पार्वती॥ पंचाक्षरं जपंती च मनुं तेपे तपो महत् ॥ 2.3.22.५० ॥
ekā pādasthitā sāsīcchivaṃ saṃsmṛtya pārvatī.. paṃcākṣaraṃ japaṃtī ca manuṃ tepe tapo mahat .. 2.3.22.50 ..
Shloka 51
चीरवल्कलसंवीता जटासंघातधारिणी॥ शिवचिंतनसंसक्ता जिगाय तपसा मुनीम् ॥ ५१॥
cīravalkalasaṃvītā jaṭāsaṃghātadhāriṇī.. śivaciṃtanasaṃsaktā jigāya tapasā munīm .. 51..
Shloka 52
एवं तस्यास्तपस्यन्त्या चिंतयंत्या महेश्वरम् ॥ त्रीणि वर्ष सहस्राणि जग्मुः काल्यास्तपोवने ॥ ५२॥
evaṃ tasyāstapasyantyā ciṃtayaṃtyā maheśvaram .. trīṇi varṣa sahasrāṇi jagmuḥ kālyāstapovane .. 52..
Shloka 53
षष्टिवर्षसहस्राणि यत्र तेपे तपो हरः ॥ तत्र क्षणमथोषित्वा चिंतयामास सा शिवा ॥ ५३॥
ṣaṣṭivarṣasahasrāṇi yatra tepe tapo haraḥ .. tatra kṣaṇamathoṣitvā ciṃtayāmāsa sā śivā .. 53..
Shloka 54
नियमस्थां महादेव किं मां जानासि नाधुना ॥ येनाहं सुचिरं तेन नानुयाता तवोरता ॥ ५४॥
niyamasthāṃ mahādeva kiṃ māṃ jānāsi nādhunā .. yenāhaṃ suciraṃ tena nānuyātā tavoratā .. 54..
Shloka 55
लोके वेदे च गिरिशो मुनिभिर्गीयते सदा ॥ शंकरस्य हि सर्वज्ञस्सर्वात्मा सर्वदर्शनः॥ ५५॥
loke vede ca giriśo munibhirgīyate sadā .. śaṃkarasya hi sarvajñassarvātmā sarvadarśanaḥ.. 55..
Shloka 56
सर्वभूतिप्रदो देवस्सर्वभावानुभावनः ॥ भक्ताभीष्टप्रदो नित्यं सर्वक्लेशनिवारणः ॥ ५६॥
sarvabhūtiprado devassarvabhāvānubhāvanaḥ .. bhaktābhīṣṭaprado nityaṃ sarvakleśanivāraṇaḥ .. 56..
Shloka 57
सर्वकामान्परित्यज्य यदि चाहं वृषध्वजे॥ अनुरक्ता तदा सोत्र संप्रसीदतु शंकरः ॥ ५७ ॥
sarvakāmānparityajya yadi cāhaṃ vṛṣadhvaje.. anuraktā tadā sotra saṃprasīdatu śaṃkaraḥ .. 57 ..
Shloka 58
यदि नारद तत्रोक्तमंत्रो जप्तश्शराक्षरः ॥ सुभक्त्या विधिना नित्यं संप्रसीदतु शंकरः ॥ ५८ ॥
yadi nārada tatroktamaṃtro japtaśśarākṣaraḥ .. subhaktyā vidhinā nityaṃ saṃprasīdatu śaṃkaraḥ .. 58 ..
Shloka 59
यदि भक्त्या शिवस्याहं निर्विकारा यथोदितम् ॥ सर्वेश्वरस्य चात्यंतं संप्रसीदतु शंकरः ॥ ५९ ॥
yadi bhaktyā śivasyāhaṃ nirvikārā yathoditam .. sarveśvarasya cātyaṃtaṃ saṃprasīdatu śaṃkaraḥ .. 59 ..
Shloka 60
एवं चिंतयती नित्यं तेपे सा सुचिरं तपः ॥ अधोमुखी निर्विकारा जटावल्कलधारिणी ॥ 2.3.22.६० ॥
evaṃ ciṃtayatī nityaṃ tepe sā suciraṃ tapaḥ .. adhomukhī nirvikārā jaṭāvalkaladhāriṇī .. 2.3.22.60 ..
Shloka 61
तथा तया तपस्तप्तं मुनीनामपि दुष्करम् ॥ स्मृत्वा च पुरुषास्तत्र परमं विस्मयं गताः ॥ ६१ ॥
tathā tayā tapastaptaṃ munīnāmapi duṣkaram .. smṛtvā ca puruṣāstatra paramaṃ vismayaṃ gatāḥ .. 61 ..
Shloka 62
तत्तपोदर्शनार्थं हि समाजग्मुश्च तेऽखिलाः ॥ धन्यान्निजान्मन्यमाना जगदुश्चेति सम्मताः ॥ ६२ ॥
tattapodarśanārthaṃ hi samājagmuśca te'khilāḥ .. dhanyānnijānmanyamānā jagaduśceti sammatāḥ .. 62 ..
Shloka 63
महतां धर्म्मवृद्धेषु गमनं श्रेय उच्यते ॥ प्रमाणं तपसो नास्ति मान्यो धर्म्मस्सदा बुधैः ॥ ६३ ॥
mahatāṃ dharmmavṛddheṣu gamanaṃ śreya ucyate .. pramāṇaṃ tapaso nāsti mānyo dharmmassadā budhaiḥ .. 63 ..
Shloka 64
श्रुत्वा दृष्ट्वा तपोऽस्यास्तु किमन्यैः क्रियते तपः ॥ अस्मात्तपोऽधिकं लोके न भूतं न भविष्यति ॥ ६४ ॥
śrutvā dṛṣṭvā tapo'syāstu kimanyaiḥ kriyate tapaḥ .. asmāttapo'dhikaṃ loke na bhūtaṃ na bhaviṣyati .. 64 ..
Shloka 65
जल्पंत इति ते सर्वे सुप्रशस्य शिवातपः ॥ जग्मुः स्वं धाम मुदिताः कठिनांगाश्च ये ह्यपि ॥ ६५ ॥
jalpaṃta iti te sarve supraśasya śivātapaḥ .. jagmuḥ svaṃ dhāma muditāḥ kaṭhināṃgāśca ye hyapi .. 65 ..
Shloka 66
अन्यच्छृणु महर्षे त्वं प्रभावं तपसोऽधुना ॥ पार्वत्या जगदम्बायाः पराश्चर्य्यकरं महत् ॥ ६६ ॥
anyacchṛṇu maharṣe tvaṃ prabhāvaṃ tapaso'dhunā .. pārvatyā jagadambāyāḥ parāścaryyakaraṃ mahat .. 66 ..
Shloka 67
तदाश्रमगता ये च स्वभावेन विरोधिनः ॥ तेप्यासँस्तत्प्रभावेण विरोधरहि तास्तदा ॥ ६७॥
tadāśramagatā ye ca svabhāvena virodhinaḥ .. tepyāsam̐statprabhāveṇa virodharahi tāstadā .. 67..
Shloka 68
सिंहा गावश्च सततं रागादिदोषसंयुताः ॥ तन्महिम्ना च ते तत्र नाबाधंत परस्परम् ॥ ६८ ॥
siṃhā gāvaśca satataṃ rāgādidoṣasaṃyutāḥ .. tanmahimnā ca te tatra nābādhaṃta parasparam .. 68 ..
Shloka 69
अथान्ये च मुनिश्रेष्ठ मार्ज्जारा मूषकादयः ॥ निसर्गाद्वैरिणो यत्र विक्रियंते स्म न क्वचित् ॥ ६९॥
athānye ca muniśreṣṭha mārjjārā mūṣakādayaḥ .. nisargādvairiṇo yatra vikriyaṃte sma na kvacit .. 69..
Shloka 70
वृक्षाश्च सफलास्तत्र तृणानि विविधानि च ॥ पुष्पाणि च विचित्राणि तत्रासन्मुनिसत्तम ॥ 2.3.22.७० ॥
vṛkṣāśca saphalāstatra tṛṇāni vividhāni ca .. puṣpāṇi ca vicitrāṇi tatrāsanmunisattama .. 2.3.22.70 ..
Shloka 71
तद्वनं च तदा सर्वं कैलासेनोपमान्वितम् ॥ जातं च तपस्तस्यास्सिद्धिरूपमभूत्तदा ॥ ७१ ॥
tadvanaṃ ca tadā sarvaṃ kailāsenopamānvitam .. jātaṃ ca tapastasyāssiddhirūpamabhūttadā .. 71 ..
Shloka 72
इति श्रीशिवमहापुराणे द्वितीयायां रुद्रसं० तृतीये पार्वती० पार्वतीतपोव० नाम द्वाविंशोऽध्यायः ॥ २२ ॥ ।
iti śrīśivamahāpurāṇe dvitīyāyāṃ rudrasaṃ0 tṛtīye pārvatī0 pārvatītapova0 nāma dvāviṃśo'dhyāyaḥ .. 22 .. .

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In