।। ब्रह्मोवाच ।।
तस्मिन्नवसरे ज्ञात्वानुकूलं समयं रतिः ।। सुप्रसन्ना च तम्प्राह शङ्करं दीनवत्सलम् ।। १ ।।
tasminnavasare jñātvānukūlaṃ samayaṃ ratiḥ || suprasannā ca tamprāha śaṅkaraṃ dīnavatsalam || 1 ||
रतिरुवाच ।।
गृहीत्वा पार्वतीं प्राप्तं सौभाग्यमतिदुर्लभम् ।। किमर्थं प्राणनाथो मे निस्स्वार्थं भस्मसात्कृतः ।। २ ।।
gṛhītvā pārvatīṃ prāptaṃ saubhāgyamatidurlabham || kimarthaṃ prāṇanātho me nissvārthaṃ bhasmasātkṛtaḥ || 2 ||
जीवयात्रा पतिं मे हि कामव्या पारमात्मनि ।। कुरु दूरं च सन्तापं समविश्लेषहेतुकम् ।। ३।।
jīvayātrā patiṃ me hi kāmavyā pāramātmani || kuru dūraṃ ca santāpaṃ samaviśleṣahetukam || 3||
विवाहोत्सव एतस्मिन् सुखिनो निखिला जनाः ।। अहमेका महेशान दुःखिनी स्वपतिम्विना ।। ४।।
vivāhotsava etasmin sukhino nikhilā janāḥ || ahamekā maheśāna duḥkhinī svapatimvinā || 4||
सनाथां कुरु मान्देव प्रसन्नो भव शङ्कर ।। स्वोक्तं सत्यम्विधेहि त्वं दीनबन्धो पर प्रभो ।। ५ ।।
sanāthāṃ kuru māndeva prasanno bhava śaṅkara || svoktaṃ satyamvidhehi tvaṃ dīnabandho para prabho || 5 ||
त्वाम्विना कस्समर्थोत्र त्रैलोक्ये सचराचरे ।। नाशने मम दुःखस्य ज्ञात्वेति करुणां कुरु ।। ६।।
tvāmvinā kassamarthotra trailokye sacarācare || nāśane mama duḥkhasya jñātveti karuṇāṃ kuru || 6||
सोत्सवे स्वविवाहेऽस्मिन्सर्वानन्द प्रदायिनी ।। सोत्सवामपि मां नाथ कुरु दीनकृपाकर ।। ७ ।।
sotsave svavivāhe'sminsarvānanda pradāyinī || sotsavāmapi māṃ nātha kuru dīnakṛpākara || 7 ||
जीविते मम नाथे हि पार्वत्या प्रियया सह ।। सुविहारः प्रपूर्णश्च भविष्यति न संशयः ।। ८ ।।
jīvite mama nāthe hi pārvatyā priyayā saha || suvihāraḥ prapūrṇaśca bhaviṣyati na saṃśayaḥ || 8 ||
सर्वं कर्तुं समर्थोसि यतस्त्वं परमेश्वरः ।। किम्बहूक्त्यात्र सर्वेश जीवयाशु पतिं मम ।। ९ ।।
sarvaṃ kartuṃ samarthosi yatastvaṃ parameśvaraḥ || kimbahūktyātra sarveśa jīvayāśu patiṃ mama || 9 ||
।। ब्रह्मोवाच ।।
तदित्युक्त्वा कामभस्म ददौ सग्रन्धिबन्धनम् ।। रुरोद पुरतश्शम्भोर्नाथ नाथेत्युदीर्य्य च ।। 2.3.51.१० ।।
tadityuktvā kāmabhasma dadau sagrandhibandhanam || ruroda purataśśambhornātha nāthetyudīryya ca || 2.3.51.10 ||
रतिरोदनमाकर्ण्य सरस्वत्यादयः स्त्रियः ।। रुरुदुस्सकला देव्यः प्रोचुर्दीनतरं वचः ।। ११।।
ratirodanamākarṇya sarasvatyādayaḥ striyaḥ || rurudussakalā devyaḥ procurdīnataraṃ vacaḥ || 11||
।। देव्य ऊचुः ।।
भक्तवत्सलनामा त्वं दीनबन्धुर्दयानिधिः ।। काम जीवय सोत्साहां रति कुरु नमोऽस्तु ते ।। १२।।
bhaktavatsalanāmā tvaṃ dīnabandhurdayānidhiḥ || kāma jīvaya sotsāhāṃ rati kuru namo'stu te || 12||
ब्रह्मोवाच ।।
इति तद्वचनं श्रुत्वा प्रसन्नोऽभून्महेश्वरः।। कृपादृष्टिं चकाराशु करुणासागरः प्रभुः ।। १३ ।।
iti tadvacanaṃ śrutvā prasanno'bhūnmaheśvaraḥ|| kṛpādṛṣṭiṃ cakārāśu karuṇāsāgaraḥ prabhuḥ || 13 ||
सुधादृष्ट्या शूलभृतो भस्मतो निर्गतः स्मरः ।। तद्रूपवेषचिह्नात्मा सुन्दरोद्भुतमूर्तिमान् ।। १४।।
sudhādṛṣṭyā śūlabhṛto bhasmato nirgataḥ smaraḥ || tadrūpaveṣacihnātmā sundarodbhutamūrtimān || 14||
तद्रूपश्च तदाकारसंस्मितं सधनुश्शरम् ।। दृष्ट्वा पतिं रतिस्तं च प्रणनाम महेश्वरम् ।। १५।।
tadrūpaśca tadākārasaṃsmitaṃ sadhanuśśaram || dṛṣṭvā patiṃ ratistaṃ ca praṇanāma maheśvaram || 15||
कृतार्थाभूच्छिवं देवं तुष्टाव च कृताञ्जलिः ।। प्राणनाथप्रदं पत्या जीवितेन पुनःपुनः ।। १६।।
kṛtārthābhūcchivaṃ devaṃ tuṣṭāva ca kṛtāñjaliḥ || prāṇanāthapradaṃ patyā jīvitena punaḥpunaḥ || 16||
कामस्य स्तुतिमाकर्ण्य सनारीकस्य शङ्करः ।। प्रसन्नोऽभवदत्यंतमुवाच करुणार्द्रधीः ।। १७ ।।
kāmasya stutimākarṇya sanārīkasya śaṅkaraḥ || prasanno'bhavadatyaṃtamuvāca karuṇārdradhīḥ || 17 ||
शङ्कर उवाच ।।
प्रसन्नोहं तव स्तुत्या सनारीकस्य चित्तज ।। स्वयंभव वरम्बूहि वाञ्छितं तद्ददामि ते ।। १८ ।।
prasannohaṃ tava stutyā sanārīkasya cittaja || svayaṃbhava varambūhi vāñchitaṃ taddadāmi te || 18 ||
ब्रह्मोवाच ।।
इति शम्भुवचः श्रुत्वा महानदन्स्स्मरस्ततः ।। उवाच साञ्जलिर्नम्रो गद्गदाक्षरया गिरा ।। १९ ।।
iti śambhuvacaḥ śrutvā mahānadanssmarastataḥ || uvāca sāñjalirnamro gadgadākṣarayā girā || 19 ||
।। काम उवाच ।।
देवदेव महादेव करुणासागर प्रभो ।। यदि प्रसन्नस्सर्वेशः ममानन्दकरो भव ।। 2.3.51.२० ।।
devadeva mahādeva karuṇāsāgara prabho || yadi prasannassarveśaḥ mamānandakaro bhava || 2.3.51.20 ||
क्षमस्व मेऽपराधं हि यत्कृतश्च पुरा प्रभो ।। स्वजनेषु पराम्प्रीतिं भक्तिन्देहि स्वपादयोः ।। २१ ।।
kṣamasva me'parādhaṃ hi yatkṛtaśca purā prabho || svajaneṣu parāmprītiṃ bhaktindehi svapādayoḥ || 21 ||
ब्रह्मोवाच ।।
इत्याकर्ण्य स्मरवचः प्रसन्नः परमेश्वरःॐ मित्युक्त्वाऽब्रवीत्तं वै विहसन्करुणानिधिः ।। २२ ।।
ityākarṇya smaravacaḥ prasannaḥ parameśvaraḥॐ mityuktvā'bravīttaṃ vai vihasankaruṇānidhiḥ || 22 ||
ईश्वर उवाच ।।
हे कामाहं प्रसन्नोऽस्मि भयन्त्यज महामते ।। गच्छ विष्णुसमीपञ्च बहिस्थाने स्थितो भव ।। २३ ।।
he kāmāhaṃ prasanno'smi bhayantyaja mahāmate || gaccha viṣṇusamīpañca bahisthāne sthito bhava || 23 ||
ब्रह्मोवाच ।। ।।
तच्छ्रुत्वा शिरसा नत्वा परिक्रम्य स्तुवन्विभुम् ।। बहिर्गत्वा हरिन्देवान्प्रणम्य समुपास्त सः ।। २४ ।।
tacchrutvā śirasā natvā parikramya stuvanvibhum || bahirgatvā harindevānpraṇamya samupāsta saḥ || 24 ||
कामं सम्भाष्य देवाश्च ददुस्तस्मै शुभाशिषम् ।। विष्ण्वादयः प्रसन्नास्ते प्रोचुः स्मृत्वा शिवं हृदि ।। २५ ।।
kāmaṃ sambhāṣya devāśca dadustasmai śubhāśiṣam || viṣṇvādayaḥ prasannāste procuḥ smṛtvā śivaṃ hṛdi || 25 ||
देवा ऊचुः ।।
धन्यस्त्वं स्मर सन्दग्धः शिवेनानुग्रहीकृतः ।। जीवयामास सत्त्वांशकृपादृष्ट्या खिलेश्वरः ।। २६ ।।
dhanyastvaṃ smara sandagdhaḥ śivenānugrahīkṛtaḥ || jīvayāmāsa sattvāṃśakṛpādṛṣṭyā khileśvaraḥ || 26 ||
सुखदुःखदो न चान्योऽस्ति यतस्स्वकृतभृक् पुमान् ।। काले रक्षा विवाहश्च निषेकः केन वार्यते ।। २७ ।
sukhaduḥkhado na cānyo'sti yatassvakṛtabhṛk pumān || kāle rakṣā vivāhaśca niṣekaḥ kena vāryate || 27 |
ब्रह्मोवाच ।।
इत्युक्त्वा ते च सम्मान्य तं सुखेनामरास्तदा ।। सन्तस्थुस्तत्र विष्ण्वाद्यास्सर्वे लब्धमनोरथाः ।। २८ ।।
ityuktvā te ca sammānya taṃ sukhenāmarāstadā || santasthustatra viṣṇvādyāssarve labdhamanorathāḥ || 28 ||
सोपि प्रमुदितस्तत्र समुवास शिवाज्ञया ।। जयशब्दो नमश्शब्दस्साधुशब्दो बभूव ह ।। २९।।
sopi pramuditastatra samuvāsa śivājñayā || jayaśabdo namaśśabdassādhuśabdo babhūva ha || 29||
ततश्शम्भुर्वासगेहे वामे संस्थाप्य पार्वतीम् ।। मिष्टान्नं भोजयामास तं च सा च मुदान्विता ।। 2.3.51.३० ।।
tataśśambhurvāsagehe vāme saṃsthāpya pārvatīm || miṣṭānnaṃ bhojayāmāsa taṃ ca sā ca mudānvitā || 2.3.51.30 ||
अथ शम्भुर्भवाचारी तत्र कृत्यम्विधाय तत् ।। मेनामामंत्र्य शैलं च जनवासं जगाम सः ।। ३१।।
atha śambhurbhavācārī tatra kṛtyamvidhāya tat || menāmāmaṃtrya śailaṃ ca janavāsaṃ jagāma saḥ || 31||
महोत्सवस्तदा चासीद्वेदध्वनिरभून्मुने ।। वाद्यानि वादयामासुर्जनाश्चतुर्विधानि च ।। ३२ ।।
mahotsavastadā cāsīdvedadhvanirabhūnmune || vādyāni vādayāmāsurjanāścaturvidhāni ca || 32 ||
शम्भुरागत्य स्वस्थानं ववन्दे च मुनींस्तदा ।। हरिं च मां भवाचाराद्वन्दितोऽभूत्सुरादिभिः ।। ३३ ।।
śambhurāgatya svasthānaṃ vavande ca munīṃstadā || hariṃ ca māṃ bhavācārādvandito'bhūtsurādibhiḥ || 33 ||
जयशब्दो बभूवाथ नम श्शब्दस्तथैव च ।। वेदध्वनिश्च शुभदः सर्वविघ्नविदारणः ।। ३४ ।।
jayaśabdo babhūvātha nama śśabdastathaiva ca || vedadhvaniśca śubhadaḥ sarvavighnavidāraṇaḥ || 34 ||
अथ विष्णुरहं शक्रस्सर्वे देवाश्च सर्षयः ।। सिद्धा उपसुरा नागास्तुष्टुवुस्ते पृथक्पृथक् ।। ३५ ।।
atha viṣṇurahaṃ śakrassarve devāśca sarṣayaḥ || siddhā upasurā nāgāstuṣṭuvuste pṛthakpṛthak || 35 ||
देवा ऊचुः ।।
जय शम्भोऽखिलाधार जय नाम महेश्वर ।। जय रुद्र महादेव जय विश्व म्भर प्रभो ।। ३६ ।।
jaya śambho'khilādhāra jaya nāma maheśvara || jaya rudra mahādeva jaya viśva mbhara prabho || 36 ||
जय कालीपते स्वामिञ्जयानन्दप्रवर्धक ।। जय त्र्यम्बक सर्वेश जय मायापते विभो ।। ३७ ।।
jaya kālīpate svāmiñjayānandapravardhaka || jaya tryambaka sarveśa jaya māyāpate vibho || 37 ||
जय निर्गुण निष्काम कारणातीत सर्वग ।। जय लीलाखिलाधार धृतरूप नमोऽस्तु ते।। ३८।।
jaya nirguṇa niṣkāma kāraṇātīta sarvaga || jaya līlākhilādhāra dhṛtarūpa namo'stu te|| 38||
जय स्वभक्तसत्कामप्रदेश करुणाकर।। जय सानन्दसद्रूप जय मायागुणाकृते ।। ३९।।
jaya svabhaktasatkāmapradeśa karuṇākara|| jaya sānandasadrūpa jaya māyāguṇākṛte || 39||
जयोग्र मृड सर्वात्मन् दीनबन्धो दयानिधे ।। जयाविकार मायेश वाङ्मनोतीतविग्रह ।। 2.3.51.४०।।
jayogra mṛḍa sarvātman dīnabandho dayānidhe || jayāvikāra māyeśa vāṅmanotītavigraha || 2.3.51.40||
ब्रह्मोवाच ।।
इति स्तुत्वा महेशानं गिरिजानायकम्प्रभुम् ।। सिषेविरे परप्रीत्या विष्ण्वाद्यास्ते यथोचितम् ।। ४१ ।।
iti stutvā maheśānaṃ girijānāyakamprabhum || siṣevire paraprītyā viṣṇvādyāste yathocitam || 41 ||
अथ शम्भुर्महेशानो लीलात्ततनुरीश्वरः ।। ददौ मानवरन्तेषां सर्वेषान्तत्र नारद।। ४२।।
atha śambhurmaheśāno līlāttatanurīśvaraḥ || dadau mānavaranteṣāṃ sarveṣāntatra nārada|| 42||
विष्ण्वाद्यास्तेऽखिलास्तात प्राप्याज्ञाम्परमेशितुः।। अतिहृष्टाः प्रसन्नास्याः स्वस्थानञ्जग्मुरादृताः ।। ४३ ।।
viṣṇvādyāste'khilāstāta prāpyājñāmparameśituḥ|| atihṛṣṭāḥ prasannāsyāḥ svasthānañjagmurādṛtāḥ || 43 ||
इति श्रीशिवमहापुराणे ब्रह्मनारदसम्वादे द्वितीयायां रुद्रसंहितायां तृतीये पार्वतीखण्डे कामसंजीवनवर्णनं नामैकपञ्चाशत्तमोऽध्यायः।। ५१।।
iti śrīśivamahāpurāṇe brahmanāradasamvāde dvitīyāyāṃ rudrasaṃhitāyāṃ tṛtīye pārvatīkhaṇḍe kāmasaṃjīvanavarṇanaṃ nāmaikapañcāśattamo'dhyāyaḥ|| 51||
ॐ श्री परमात्मने नमः
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
