ॐ नमः शिवाय ।
ॐ namaḥ śivāya |
।। श्रीगणेशाय नमः ।।
|| śrīgaṇeśāya namaḥ ||
।। श्रीगौरीशंकराभ्यां नमः ।।
|| śrīgaurīśaṃkarābhyāṃ namaḥ ||
।। नारद उवाच ।।
|| nārada uvāca ||
श्रुतमस्माभिरानंदप्रदं चरितमुत्तमम् ।। गृहस्थस्यैव शंभोश्च गणस्कंदादिसत्कथम् ।। १।।
śrutamasmābhirānaṃdapradaṃ caritamuttamam || gṛhasthasyaiva śaṃbhośca gaṇaskaṃdādisatkatham || 1||
इदानीं ब्रूहि सुप्रीत्या चरितं वरमुत्तमम् ।। शंकरो हि यथा रुद्रो जघान विहरन्खलान् ।। २।।
idānīṃ brūhi suprītyā caritaṃ varamuttamam || śaṃkaro hi yathā rudro jaghāna viharankhalān || 2||
कथं ददाह भगवान्नगराणि सुरद्विषाम् ।। त्रीण्येकेन च बाणेन युगपत्केन वीर्यवान् ।। ३।।
kathaṃ dadāha bhagavānnagarāṇi suradviṣām || trīṇyekena ca bāṇena yugapatkena vīryavān || 3||
एतत्सर्वं समाचक्ष्व चरितं शशिमौलिनः ।। देवर्षिसुखदं शश्वन्मायाविहरतः प्रभोः ।। ४ ।।
etatsarvaṃ samācakṣva caritaṃ śaśimaulinaḥ || devarṣisukhadaṃ śaśvanmāyāviharataḥ prabhoḥ || 4 ||
।। ब्रह्मोवाच ।।
एवमेतत्पुरा पृष्टो व्यासेन ऋषिसत्तमः ।। सनत्कुमारं प्रोवाच तदेव कथयाम्यहम् ।। ५।।
evametatpurā pṛṣṭo vyāsena ṛṣisattamaḥ || sanatkumāraṃ provāca tadeva kathayāmyaham || 5||
सनत्कुमार उवाच ।।
शृणु व्यास महाप्राज्ञ चरितं शशिमौलिनः ।। यथा ददाह त्रिपुरं बाणेनैकेन विश्व हृत्।। ६।।
śṛṇu vyāsa mahāprājña caritaṃ śaśimaulinaḥ || yathā dadāha tripuraṃ bāṇenaikena viśva hṛt|| 6||
शिवात्मजेन स्कन्देन निहते तारकासुरे।। तत्पुत्रास्तु त्रयो दैत्याः पर्यतप्यन्मुनीश्वर।। ७।।
śivātmajena skandena nihate tārakāsure|| tatputrāstu trayo daityāḥ paryatapyanmunīśvara|| 7||
तारकाख्यस्तु तज्जेष्ठो विद्युन्माली च मध्यमः ।। कमलाक्षः कनीयांश्च सर्वे तुल्यबलास्सदा ।। ८।।
tārakākhyastu tajjeṣṭho vidyunmālī ca madhyamaḥ || kamalākṣaḥ kanīyāṃśca sarve tulyabalāssadā || 8||
जितेन्द्रियास्ससन्नद्धास्संयतास्सत्यवादिनः ।। दृढचित्ता महावीरा देवद्रोहिण एव च ।। ९ ।।
jitendriyāssasannaddhāssaṃyatāssatyavādinaḥ || dṛḍhacittā mahāvīrā devadrohiṇa eva ca || 9 ||
ते तु मेरुगुहां गत्वा तपश्चक्रुर्महाद्भुतम् ।। त्रयस्सर्वान्सुभोगांश्च विहाय सुमनोहरान् ।। 2.5.1.१० ।।
te tu meruguhāṃ gatvā tapaścakrurmahādbhutam || trayassarvānsubhogāṃśca vihāya sumanoharān || 2.5.1.10 ||
वसंते सर्वकामांश्च गीतवादित्रनिस्स्वनम् ।। विहाय सोत्सवं तेपुस्त्रयस्ते तारकात्मजाः।। ११।।
vasaṃte sarvakāmāṃśca gītavāditranissvanam || vihāya sotsavaṃ tepustrayaste tārakātmajāḥ|| 11||
ग्रीष्मे सूर्यप्रभां जित्वा दिक्षु प्रज्वाल्य पावकम् ।। तन्मध्यसंस्थाः सिद्ध्यर्थं जुहुवुर्हव्यमादरात् ।। १२।।
grīṣme sūryaprabhāṃ jitvā dikṣu prajvālya pāvakam || tanmadhyasaṃsthāḥ siddhyarthaṃ juhuvurhavyamādarāt || 12||
महाप्रतापपतितास्सर्वेप्यासन् सुमूर्छिताः ।। वर्षासु गतसंत्रासा वृष्टिं मूर्द्धन्यधारयन् ।। १३।।
mahāpratāpapatitāssarvepyāsan sumūrchitāḥ || varṣāsu gatasaṃtrāsā vṛṣṭiṃ mūrddhanyadhārayan || 13||
शरत्काले प्रसूतं तु भोजनं तु बुभुक्षिताः ।। रम्यं स्निग्धं स्थिरं हृद्यं फलं मूलमनुत्तमम्।। १४।।
śaratkāle prasūtaṃ tu bhojanaṃ tu bubhukṣitāḥ || ramyaṃ snigdhaṃ sthiraṃ hṛdyaṃ phalaṃ mūlamanuttamam|| 14||
संयमात्क्षुत्तृषो जित्वा पानान्युच्चावचान्यपि ।। बुभुक्षितेभ्यो दत्त्वा तु बुभूवुरुपला इव ।। १५।।
saṃyamātkṣuttṛṣo jitvā pānānyuccāvacānyapi || bubhukṣitebhyo dattvā tu bubhūvurupalā iva || 15||
संस्थितास्ते महात्मानो निराधाराश्चतुर्दिशम् ।। हेमंते गिरिमाश्रित्य धैर्येण परमेण तु ।। १६ ।।
saṃsthitāste mahātmāno nirādhārāścaturdiśam || hemaṃte girimāśritya dhairyeṇa parameṇa tu || 16 ||
तुषारदेहसंछन्ना जलक्लिन्नेन वाससा ।। आसाद्य देहं क्षौमेण शिशिरे तोयमध्यगाः ।। १७ ।।
tuṣāradehasaṃchannā jalaklinnena vāsasā || āsādya dehaṃ kṣaumeṇa śiśire toyamadhyagāḥ || 17 ||
अनिर्विण्णास्ततस्सर्वे क्रमशोऽवर्द्धयंस्तपः ।। तेपुस्त्रयस्ते तत्पुत्रा विधिमुद्दिश्य सत्तमाः ।। १८ ।।
anirviṇṇāstatassarve kramaśo'varddhayaṃstapaḥ || tepustrayaste tatputrā vidhimuddiśya sattamāḥ || 18 ||
तप उग्रं समास्थाय नियमे परमे स्थिता ।। तपसा कर्षयामासुर्देहान् स्वान् दानवोत्तमाः ।। १९।।
tapa ugraṃ samāsthāya niyame parame sthitā || tapasā karṣayāmāsurdehān svān dānavottamāḥ || 19||
वर्षाणां शतकं चैव पदमेकं निधाय च ।। भूमौ स्थित्वा परं तत्र तेपुस्ते बलवत्तराः ।। 2.5.1.२० ।।
varṣāṇāṃ śatakaṃ caiva padamekaṃ nidhāya ca || bhūmau sthitvā paraṃ tatra tepuste balavattarāḥ || 2.5.1.20 ||
ते सहस्रं तु वर्षाणां वातभक्षास्सुदारुणाः ।। तपस्तेपुर्दुरात्मानः परं तापमुपागताः ।। २१ ।।
te sahasraṃ tu varṣāṇāṃ vātabhakṣāssudāruṇāḥ || tapastepurdurātmānaḥ paraṃ tāpamupāgatāḥ || 21 ||
वर्षाणां तु सहस्रं वै मस्तकेनास्थितास्तथा ।। वर्षाणां तु शतेनैव ऊर्द्ध्वबाहव आसिताः ।। २२।।
varṣāṇāṃ tu sahasraṃ vai mastakenāsthitāstathā || varṣāṇāṃ tu śatenaiva ūrddhvabāhava āsitāḥ || 22||
एवं दुःखं परं प्राप्ता दुराग्रहपरा इमे ।। ईदृक्ते संस्थिता दैत्या दिवारात्रमतंद्रिता ।। २३ ।।
evaṃ duḥkhaṃ paraṃ prāptā durāgrahaparā ime || īdṛkte saṃsthitā daityā divārātramataṃdritā || 23 ||
एवं तेषां गतः कालो महान् सुतपतां मुने ।। ब्रह्मात्मनां तारकाणां धर्मेणेति मतिर्मम ।। २४ ।।
evaṃ teṣāṃ gataḥ kālo mahān sutapatāṃ mune || brahmātmanāṃ tārakāṇāṃ dharmeṇeti matirmama || 24 ||
प्रादुरासीत्ततो ब्रह्मा सुरासुरगुरुर्महान् ।। संतुष्टस्तपसा तेषां वरं दातुं महायशाः ।। २५ ।।
prādurāsīttato brahmā surāsuragururmahān || saṃtuṣṭastapasā teṣāṃ varaṃ dātuṃ mahāyaśāḥ || 25 ||
मुनिदेवासुरैस्सार्द्धं सांत्वपूर्वमिदं वचः ।। ततस्तानब्रवीत्सर्वान् सर्वभूतपितामहः ।। २५ ।।
munidevāsuraissārddhaṃ sāṃtvapūrvamidaṃ vacaḥ || tatastānabravītsarvān sarvabhūtapitāmahaḥ || 25 ||
ब्रह्मोवाच ।।
प्रसन्नोऽस्मि महादैत्या युष्माकं तपसा मुने ।। सर्वं दास्यामि युष्मभ्यं वरं ब्रूत यदीप्सितम् ।। २७ ।।
prasanno'smi mahādaityā yuṣmākaṃ tapasā mune || sarvaṃ dāsyāmi yuṣmabhyaṃ varaṃ brūta yadīpsitam || 27 ||
किमर्थं सुतपस्तप्तं कथयध्वं सुरद्विषां ।। सर्वेषां तपसो दाता सर्वकर्तास्मि सर्वदा ।। २८ ।।
kimarthaṃ sutapastaptaṃ kathayadhvaṃ suradviṣāṃ || sarveṣāṃ tapaso dātā sarvakartāsmi sarvadā || 28 ||
सनत्कुमार उवाच ।।
तस्य तद्वचनं श्रुत्वा शनैस्ते स्वात्मनो गतम् ।। ऊचुः प्रांजलयस्सर्वे प्रणिपत्य पितामहम् ।। २९ ।।
tasya tadvacanaṃ śrutvā śanaiste svātmano gatam || ūcuḥ prāṃjalayassarve praṇipatya pitāmaham || 29 ||
दैत्या ऊचुः ।।
यदि प्रसन्नो देवेश यदि देयो वरस्त्वया ।। अवध्यत्वं च सर्वेषां सर्वभूतेषु देहिनः ।। 2.5.1.३० ।।
yadi prasanno deveśa yadi deyo varastvayā || avadhyatvaṃ ca sarveṣāṃ sarvabhūteṣu dehinaḥ || 2.5.1.30 ||
स्थिरान् कुरु जगन्नाथ पांतु नः परिपंथिनः ।। जरारोगादयस्सर्वे नास्मान्मृत्युरगात् क्वचित् ।। ३१ ।।
sthirān kuru jagannātha pāṃtu naḥ paripaṃthinaḥ || jarārogādayassarve nāsmānmṛtyuragāt kvacit || 31 ||
अजराश्चामरास्सर्वे भवाम इति नो मतम् ।। समृत्यवः करिष्यामस्सर्वानन्यांस्त्रिलोकके ।। ३२।।
ajarāścāmarāssarve bhavāma iti no matam || samṛtyavaḥ kariṣyāmassarvānanyāṃstrilokake || 32||
लक्ष्म्या किं तद्विपुलया किं कार्यं हि पुरोत्तमैः ।। अन्यैश्च विपुलैर्भोगैस्स्थानैश्वर्येण वा पुनः ।। ३३ ।।
lakṣmyā kiṃ tadvipulayā kiṃ kāryaṃ hi purottamaiḥ || anyaiśca vipulairbhogaissthānaiśvaryeṇa vā punaḥ || 33 ||
यत्रैव मृत्युना ग्रस्तो नियतं पंचभिर्दिनैः ।। व्यर्थं तस्याखिलं ब्रह्मन् निश्चितं न इतीव हि ।। ३४ ।।
yatraiva mṛtyunā grasto niyataṃ paṃcabhirdinaiḥ || vyarthaṃ tasyākhilaṃ brahman niścitaṃ na itīva hi || 34 ||
सनत्कुमार उवाच ।।
इति श्रुत्वा वचस्तेषां दैत्यानां च तपस्विनाम् ।। प्रत्युवाच शिवं स्मृत्वा स्वप्रभुं गिरिशं विधिः ।। ३५।।
iti śrutvā vacasteṣāṃ daityānāṃ ca tapasvinām || pratyuvāca śivaṃ smṛtvā svaprabhuṃ giriśaṃ vidhiḥ || 35||
ब्रह्मोवाच ।।
नास्ति सर्वामरत्वं च निवर्तध्वमतोऽसुराः ।। अन्यं वरं वृणीध्वं वै यादृशो वो हि रोचते ।। ३६ ।।
nāsti sarvāmaratvaṃ ca nivartadhvamato'surāḥ || anyaṃ varaṃ vṛṇīdhvaṃ vai yādṛśo vo hi rocate || 36 ||
जातो जनिष्यते नूनं जंतुः कोप्यसुराः क्वचित् ।। अजरश्चामरो लोके न भविष्यति भूतले ।। ३७ ।।
jāto janiṣyate nūnaṃ jaṃtuḥ kopyasurāḥ kvacit || ajaraścāmaro loke na bhaviṣyati bhūtale || 37 ||
ऋते तु खंडपरशोः कालकालाद्धरेस्तथा ।। तौ धर्माधर्मपरमावव्यक्तौ व्यक्तरूपिणौ ।। ३८।।
ṛte tu khaṃḍaparaśoḥ kālakālāddharestathā || tau dharmādharmaparamāvavyaktau vyaktarūpiṇau || 38||
संपीडनाय जगतो यदि स क्रियते तपः ।। सफलं तद्गतं वेद्यं तस्मात्सुविहितं तपः ।। ३९।।
saṃpīḍanāya jagato yadi sa kriyate tapaḥ || saphalaṃ tadgataṃ vedyaṃ tasmātsuvihitaṃ tapaḥ || 39||
तद्विचार्य स्वयं बुद्ध्या न शक्यं यत्सुरासुरैः ।। दुर्लभं वा सुदुस्साध्यं मृत्युं वंचयतानघाः ।। 2.5.1.४०।।
tadvicārya svayaṃ buddhyā na śakyaṃ yatsurāsuraiḥ || durlabhaṃ vā sudussādhyaṃ mṛtyuṃ vaṃcayatānaghāḥ || 2.5.1.40||
तत्किंचिन्मरणे हेतुं वृणीध्वं सत्त्वमाश्रिताः ।। येन मृत्युर्नैव वृतो रक्षतस्तत्पृथक् पृथक् ।। ४१।।
tatkiṃcinmaraṇe hetuṃ vṛṇīdhvaṃ sattvamāśritāḥ || yena mṛtyurnaiva vṛto rakṣatastatpṛthak pṛthak || 41||
सनत्कुमार उवाच ।।
एतद्विधिवचः श्रुत्वा मुहूर्त्तं ध्यानमास्थिताः ।। प्रोचुस्ते चिंतयित्वाथ सर्वलोकपितामहम् ।। ४२।।
etadvidhivacaḥ śrutvā muhūrttaṃ dhyānamāsthitāḥ || procuste ciṃtayitvātha sarvalokapitāmaham || 42||
दैत्या ऊचुः।।
भगवन्नास्ति नो वेश्म पराक्रमवतामपि ।। अधृष्याः शात्रवानां तु यन्न वत्स्यामहे सुखम् ।। ४३ ।।
bhagavannāsti no veśma parākramavatāmapi || adhṛṣyāḥ śātravānāṃ tu yanna vatsyāmahe sukham || 43 ||
पुराणि त्रीणि नो देहि निर्मायात्यद्भुतानि हि ।। सर्वसंपत्समृद्धान्य प्रधृष्याणि दिवौकसाम्।। ४४।।
purāṇi trīṇi no dehi nirmāyātyadbhutāni hi || sarvasaṃpatsamṛddhānya pradhṛṣyāṇi divaukasām|| 44||
वयं पुराणि त्रीण्येव समास्थाय महीमिमाम्।। चरिष्यामो हि लोकेश त्वत्प्रसादाज्जगद्गुरो ।। ४५ ।।
vayaṃ purāṇi trīṇyeva samāsthāya mahīmimām|| cariṣyāmo hi lokeśa tvatprasādājjagadguro || 45 ||
तारकाक्षस्ततः प्राह यदभेद्यं सुरैरपि ।। करोति विश्वकर्मा तन्मम हेममयं पुरम्।। ४६ ।।
tārakākṣastataḥ prāha yadabhedyaṃ surairapi || karoti viśvakarmā tanmama hemamayaṃ puram|| 46 ||
ययाचे कमलाक्षस्तु राजतं सुमहत्पुरम् ।। विद्युन्माली च संहृष्टो वज्रायसमयं महत्।। ४७।।
yayāce kamalākṣastu rājataṃ sumahatpuram || vidyunmālī ca saṃhṛṣṭo vajrāyasamayaṃ mahat|| 47||
पुरेष्वेतेषु भो ब्रह्मन्नेकस्थानस्थितेषु च ।। मध्याह्नाभिजिते काले शीतांशौ पुष्प संस्थिते ।। ४८ ।।
pureṣveteṣu bho brahmannekasthānasthiteṣu ca || madhyāhnābhijite kāle śītāṃśau puṣpa saṃsthite || 48 ||
उपर्युपर्यदृष्टेषु व्योम्नि लीलाभ्रसंस्थिते ।। वर्षत्सु कालमेघेषु पुष्करावर्तनामसु ।। ४९ ।।
uparyuparyadṛṣṭeṣu vyomni līlābhrasaṃsthite || varṣatsu kālamegheṣu puṣkarāvartanāmasu || 49 ||
तथा वर्षसहस्राते समेष्यामः परस्परम् ।। एकीभावं गमिष्यंति पुराण्येतानि नान्यथा ।। 2.5.1.५०।।
tathā varṣasahasrāte sameṣyāmaḥ parasparam || ekībhāvaṃ gamiṣyaṃti purāṇyetāni nānyathā || 2.5.1.50||
सर्वदेवमयो देवस्सर्वेषां मे कुहेलया।। असंभवे रथे तिष्ठन् सर्वोपस्करणान्विते ।। ५१ ।।
sarvadevamayo devassarveṣāṃ me kuhelayā|| asaṃbhave rathe tiṣṭhan sarvopaskaraṇānvite || 51 ||
असंभाव्यैककांडेन भिनत्तु नगराणि नः ।। निर्वैरः कृत्तिवासास्तु योस्माकमिति नित्यशः ।। ५२ ।
asaṃbhāvyaikakāṃḍena bhinattu nagarāṇi naḥ || nirvairaḥ kṛttivāsāstu yosmākamiti nityaśaḥ || 52 |
वंद्यः पूज्योभिवाद्यश्च सोस्माकं निर्दहेत्कथम् ।। इति चेतसि संधाय तादृशो भुवि दुर्लभः ।। ५३ ।।
vaṃdyaḥ pūjyobhivādyaśca sosmākaṃ nirdahetkatham || iti cetasi saṃdhāya tādṛśo bhuvi durlabhaḥ || 53 ||
सनत्कुमार उवाच ।।
एतच्छ्रुत्वा वचस्तेषां ब्रह्मा लोकपितामहः ।। एवमस्तीति तान् प्राह सृष्टिकर्ता स्मरञ्शिवम् ।। ५४।।
etacchrutvā vacasteṣāṃ brahmā lokapitāmahaḥ || evamastīti tān prāha sṛṣṭikartā smarañśivam || 54||
आज्ञां ददौ मयस्यापि कुत्र त्वं नगरत्रयम् ।। कांचनं राजतं चैव आयसं चेति भो मय ।। ५५।।
ājñāṃ dadau mayasyāpi kutra tvaṃ nagaratrayam || kāṃcanaṃ rājataṃ caiva āyasaṃ ceti bho maya || 55||
इत्यादिश्य मयं ब्रह्मा प्रत्यक्षं प्राविशद्दिवम् ।। तेषां तारकपुत्राणां पश्यतां निजधाम हि ।। ५६।।
ityādiśya mayaṃ brahmā pratyakṣaṃ prāviśaddivam || teṣāṃ tārakaputrāṇāṃ paśyatāṃ nijadhāma hi || 56||
ततो मयश्च तपसा चक्रे धीरः पुराण्यथ ।। कांचनं तारकाक्षस्य कमलाक्षस्य राजतम् ।। ५७।।
tato mayaśca tapasā cakre dhīraḥ purāṇyatha || kāṃcanaṃ tārakākṣasya kamalākṣasya rājatam || 57||
विद्युन्माल्यायसं चैव त्रिविधं दुर्गमुत्तमम् ।। स्वर्गे व्योम्नि च भूमौ च क्रमाज्ज्ञेयानि तानि वै ।। ५८।।
vidyunmālyāyasaṃ caiva trividhaṃ durgamuttamam || svarge vyomni ca bhūmau ca kramājjñeyāni tāni vai || 58||
दत्वा तेभ्यो सुरेभ्यश्च पुराणि त्रीणि वै मयः ।। प्रविवेश स्वयं तत्र हितकामपरायणः ।। ५९ ।।
datvā tebhyo surebhyaśca purāṇi trīṇi vai mayaḥ || praviveśa svayaṃ tatra hitakāmaparāyaṇaḥ || 59 ||
एवं पुत्रत्रयं प्राप्य प्रविष्टास्तारकात्मजाः ।। बुभुजुस्सकलान्भोगान्महाबलपराक्रमाः ।। 2.5.1.६० ।।
evaṃ putratrayaṃ prāpya praviṣṭāstārakātmajāḥ || bubhujussakalānbhogānmahābalaparākramāḥ || 2.5.1.60 ||
कल्पद्रुमैश्च संकीर्णं गजवाजिसमाकुलम् ।। नानाप्रासादसंकीर्णं मणिजालसमा वृतम् ।। ६१ ।। ।।
kalpadrumaiśca saṃkīrṇaṃ gajavājisamākulam || nānāprāsādasaṃkīrṇaṃ maṇijālasamā vṛtam || 61 || ||
सूर्यमण्डलसंकाशैर्विमानैस्सर्वतोमुखैः ।। पद्मरागमयैश्चैव शोभितं चन्द्रसन्निभैः ।। ६२ ।।
sūryamaṇḍalasaṃkāśairvimānaissarvatomukhaiḥ || padmarāgamayaiścaiva śobhitaṃ candrasannibhaiḥ || 62 ||
प्रासादैर्गोपुरैर्दिव्यैः कैलासशिखरोपमैः ।। दिव्यस्त्रीजनसंकीर्णैर्गंधर्वैस्सिद्धचारणैः ।। ६३ ।।
prāsādairgopurairdivyaiḥ kailāsaśikharopamaiḥ || divyastrījanasaṃkīrṇairgaṃdharvaissiddhacāraṇaiḥ || 63 ||
रुद्रालयैः प्रतिगृहमग्निहोत्रैः प्रतिष्ठितैः ।। द्विजोत्तमैश्शास्त्र ज्ञैश्शिवभक्तिरतैस्सदा ।। ६४ ।।
rudrālayaiḥ pratigṛhamagnihotraiḥ pratiṣṭhitaiḥ || dvijottamaiśśāstra jñaiśśivabhaktirataissadā || 64 ||
वापीकूपतडागैश्च दीर्घिकाभिस्सुशोभितम् ।। उद्यानवनवृक्षैश्च स्वर्गच्युत गुणोत्तमैः ।। ६५ ।।
vāpīkūpataḍāgaiśca dīrghikābhissuśobhitam || udyānavanavṛkṣaiśca svargacyuta guṇottamaiḥ || 65 ||
नदीनदसरिन्मुख्यपुष्करैः शोभितं सदा ।। सर्वकामफलाद्यैश्चानेकैर्वृक्षैर्मनोहरम् ।। ६६ ।।
nadīnadasarinmukhyapuṣkaraiḥ śobhitaṃ sadā || sarvakāmaphalādyaiścānekairvṛkṣairmanoharam || 66 ||
मत्तमातंगयूथैश्च तुरंगैश्च सुशोभनैः ।। रथैश्च विविधाकारैश्शिबिकाभिरलंकृतम् ।। ६७।।
mattamātaṃgayūthaiśca turaṃgaiśca suśobhanaiḥ || rathaiśca vividhākāraiśśibikābhiralaṃkṛtam || 67||
समयादिशिकैश्चैव क्रीडास्थानैः पृथक्पृथक् ।। वेदाध्ययनशालाभिर्विविधाभिः पृथक्पृथक् ।। ६८ ।।
samayādiśikaiścaiva krīḍāsthānaiḥ pṛthakpṛthak || vedādhyayanaśālābhirvividhābhiḥ pṛthakpṛthak || 68 ||
अदृष्टं मनसा वाचा पापान्वितनरैस्सदा ।। महात्मभिश्शुभाचारैः पुण्यवद्भिः प्रवीक्ष्यते ।। ६९ ।।
adṛṣṭaṃ manasā vācā pāpānvitanaraissadā || mahātmabhiśśubhācāraiḥ puṇyavadbhiḥ pravīkṣyate || 69 ||
पतिव्रताभिः सर्वत्र पावितं स्थलमुत्तमम् ।। पतिसेवनशीलाभिर्विमुखाभिः कुधर्मतः ।। 2.5.1.७०।।
pativratābhiḥ sarvatra pāvitaṃ sthalamuttamam || patisevanaśīlābhirvimukhābhiḥ kudharmataḥ || 2.5.1.70||
दैत्यशूरैर्महाभागैस्सदारैस्ससुतैर्द्विजैः ।। श्रौतस्मार्तार्थतत्त्वज्ञैस्स्वधर्मनिरतैर्युतम्।। ७१।।
daityaśūrairmahābhāgaissadāraissasutairdvijaiḥ || śrautasmārtārthatattvajñaissvadharmaniratairyutam|| 71||
व्यूढोरस्कैर्वृषस्कंधैस्सामयुद्धधरैस्सदा।। प्रशांतैः कुपितैश्चैव कुब्जैर्वामनकैस्तथा।। ७२।।
vyūḍhoraskairvṛṣaskaṃdhaissāmayuddhadharaissadā|| praśāṃtaiḥ kupitaiścaiva kubjairvāmanakaistathā|| 72||
नीलोत्पलदलप्रख्यैर्नीलकुंचितमूर्द्धजैः ।। मयेन रक्षितैस्सर्वैश्शिक्षितैर्युद्धलालसैः ।। ७३ ।।
nīlotpaladalaprakhyairnīlakuṃcitamūrddhajaiḥ || mayena rakṣitaissarvaiśśikṣitairyuddhalālasaiḥ || 73 ||
वरसमररतैर्युतं समंतादजशिवपूजनया विशुद्धवीर्यैः ।। रविमरुतमहेन्द्रसंनिकाशैस्सुरमथनैस्सुदृढैस्सुसेवितं यत् ।। ७४।।
varasamararatairyutaṃ samaṃtādajaśivapūjanayā viśuddhavīryaiḥ || ravimarutamahendrasaṃnikāśaissuramathanaissudṛḍhaissusevitaṃ yat || 74||
शास्त्रवेदपुराणेषु येये धर्माः प्रकीर्तिताः ।। शिवप्रियास्सदा देवास्ते धर्मास्तत्र सर्वतः ।। ७५ ।।
śāstravedapurāṇeṣu yeye dharmāḥ prakīrtitāḥ || śivapriyāssadā devāste dharmāstatra sarvataḥ || 75 ||
एवं लब्धवरास्ते तु दैतेयास्तारकात्मजाः ।। शैवं मयमुपाश्रित्य निवसंति स्म तत्र ह ।। ७६ ।।
evaṃ labdhavarāste tu daiteyāstārakātmajāḥ || śaivaṃ mayamupāśritya nivasaṃti sma tatra ha || 76 ||
सर्वं त्रैलोक्यमुत्सार्य प्रविश्य नगराणि ते ।। कुर्वंति स्म महद्राज्यं शिवमार्गरतास्सदा ।। ७७ ।।
sarvaṃ trailokyamutsārya praviśya nagarāṇi te || kurvaṃti sma mahadrājyaṃ śivamārgaratāssadā || 77 ||
ततो महान् गतः कालो वसतां पुण्यकर्मणाम् ।। यथासुखं यथाजोषं सद्राज्यं कुर्वतां मुने ।। ७८ ।।
tato mahān gataḥ kālo vasatāṃ puṇyakarmaṇām || yathāsukhaṃ yathājoṣaṃ sadrājyaṃ kurvatāṃ mune || 78 ||
इति श्रीशिवमहापुराणे द्वितीयायां रुद्रसंहितायां पञ्चमे युद्धखण्डे त्रिपुरवधोपाख्याने त्रिपुरवर्णनं नाम प्रथमोऽध्यायः ।। १ ।।
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe tripuravadhopākhyāne tripuravarṇanaṃ nāma prathamo'dhyāyaḥ || 1 ||
ॐ श्री परमात्मने नमः
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
