| |
|

This overlay will guide you through the buttons:

Shloka 1
सनत्कुमार उवाच ।।
अथ वीरगणै रुद्रो रौद्ररूपो महाप्रभुः ॥ अभ्यगाद्वृषभारूढस्संग्रामं प्रहसन्निव ॥ १ ॥
atha vīragaṇai rudro raudrarūpo mahāprabhuḥ .. abhyagādvṛṣabhārūḍhassaṃgrāmaṃ prahasanniva .. 1 ..
Shloka 2
रुद्रमायांतमालोक्य सिंहनादैर्गणाः पुनः ॥ निवृत्ताः संगरे रौद्रा ये हि पूर्वं पराजिताः ॥ २ ॥
rudramāyāṃtamālokya siṃhanādairgaṇāḥ punaḥ .. nivṛttāḥ saṃgare raudrā ye hi pūrvaṃ parājitāḥ .. 2 ..
Shloka 3
वीर शब्दं च कुर्वन्तस्तेऽप्यन्ये शांकरा गणाः ॥ सोत्सवास्सायुधा दैत्यान्निजघ्नुश्शरवृष्टिभिः ॥ ३ ॥
vīra śabdaṃ ca kurvantaste'pyanye śāṃkarā gaṇāḥ .. sotsavāssāyudhā daityānnijaghnuśśaravṛṣṭibhiḥ .. 3 ..
Shloka 4
दैत्या हि भीषणं रुद्रं सर्वे दृष्ट्वा विदुद्रुवुः ॥ शांकरं पुरुषं दृष्ट्वा पातकानीव तद्भयात् ॥ ४ ॥
daityā hi bhīṣaṇaṃ rudraṃ sarve dṛṣṭvā vidudruvuḥ .. śāṃkaraṃ puruṣaṃ dṛṣṭvā pātakānīva tadbhayāt .. 4 ..
Shloka 5
अथो जलंधरो दैत्यान्निवृत्तान्प्रेक्ष्य संगरे ॥ अभ्यधावत्स चंडीशं मुंचन्बाणान्सहस्रशः ॥ ५ ॥
atho jalaṃdharo daityānnivṛttānprekṣya saṃgare .. abhyadhāvatsa caṃḍīśaṃ muṃcanbāṇānsahasraśaḥ .. 5 ..
Shloka 6
निशुंभशुंभप्रमुखा दैत्येन्द्राश्च सहस्रशः ॥ अभिजग्मुश्शिवं वेगाद्रोषात्संदष्टदच्छदाः ॥ ६ ॥
niśuṃbhaśuṃbhapramukhā daityendrāśca sahasraśaḥ .. abhijagmuśśivaṃ vegādroṣātsaṃdaṣṭadacchadāḥ .. 6 ..
Shloka 7
कालनेमिस्तथा वीरः खड्गरोमा बलाहकः ॥ घस्मरश्च प्रचंडश्चापरे चापि शिवं ययुः ॥ ७ ॥
kālanemistathā vīraḥ khaḍgaromā balāhakaḥ .. ghasmaraśca pracaṃḍaścāpare cāpi śivaṃ yayuḥ .. 7 ..
Shloka 8
बाणैस्संछादयामासुर्द्रुतं रुद्रगणांश्च ते ॥ अंगानि चिच्छिदुर्वीराः शुंभाद्या निखिला मुने ॥ ८॥
bāṇaissaṃchādayāmāsurdrutaṃ rudragaṇāṃśca te .. aṃgāni cicchidurvīrāḥ śuṃbhādyā nikhilā mune .. 8..
Shloka 9
बाणांधकारसंछन्नं दृष्ट्वा गणबलं हरः ॥ तद्बाणजालमाच्छिद्य बाणैराववृते नभः ॥ ९ ॥
bāṇāṃdhakārasaṃchannaṃ dṛṣṭvā gaṇabalaṃ haraḥ .. tadbāṇajālamācchidya bāṇairāvavṛte nabhaḥ .. 9 ..
Shloka 10
दैत्यांश्च बाणवात्याभिः पीडितानकरोत्तदा ॥ प्रचंडबाणजालोघैरपातयत भूतले ॥ 2.5.22.१०॥
daityāṃśca bāṇavātyābhiḥ pīḍitānakarottadā .. pracaṃḍabāṇajāloghairapātayata bhūtale .. 2.5.22.10..
Shloka 11
खड्गरोमशिरः कायात्तथा परशुनाच्छिनत् ॥ बलाहकस्य च शिरः खट्वांगेनाकरोद्द्विधा ॥ ११॥
khaḍgaromaśiraḥ kāyāttathā paraśunācchinat .. balāhakasya ca śiraḥ khaṭvāṃgenākaroddvidhā .. 11..
Shloka 12
स बद्ध्वा घस्मरं दैत्यं पाशेनाभ्यहनद्भुवि ॥ महावीर प्रचंडं च चकर्त्त विशिखेन ह ॥ १२ ॥
sa baddhvā ghasmaraṃ daityaṃ pāśenābhyahanadbhuvi .. mahāvīra pracaṃḍaṃ ca cakartta viśikhena ha .. 12 ..
Shloka 13
वृषभेण हताः केचित्केचिद्बाणैर्निपातिता ॥ न शेकुरसुराः स्थातुं गजा सिंहार्दिता इव ॥ १३॥
vṛṣabheṇa hatāḥ kecitkecidbāṇairnipātitā .. na śekurasurāḥ sthātuṃ gajā siṃhārditā iva .. 13..
Shloka 14
ततः क्रोधपरीतात्मा दैत्यान्धिक्कृतवान्रणे ॥ शुंभादिकान्महादैत्यः प्रहसन्प्राह धैर्यवान्॥ १४॥
tataḥ krodhaparītātmā daityāndhikkṛtavānraṇe .. śuṃbhādikānmahādaityaḥ prahasanprāha dhairyavān.. 14..
Shloka 15
जलंधर उवाच ।।
किं व उच्चरितैर्मातुर्धावद्भिः पृष्ठतो हतैः ॥ न हि भीतवधः श्लाघ्यः स्वर्गदः शूरमानिनाम् ॥ १५॥
kiṃ va uccaritairmāturdhāvadbhiḥ pṛṣṭhato hataiḥ .. na hi bhītavadhaḥ ślāghyaḥ svargadaḥ śūramāninām .. 15..
Shloka 16
यदि वः प्रधने श्रदा सारो वा क्षुल्लका हृदि ॥ अग्रे तिष्ठत मात्रं मे न चेद्ग्राम्यसुखे स्पृहा॥ १६ ॥
yadi vaḥ pradhane śradā sāro vā kṣullakā hṛdi .. agre tiṣṭhata mātraṃ me na cedgrāmyasukhe spṛhā.. 16 ..
Shloka 17
रणे मृत्युर्वरश्चास्ति सर्वकामफलप्रदः ॥ यशःप्रदो विशेषेण मोक्षदोऽपि प्रकीर्त्तितः ॥ १७॥
raṇe mṛtyurvaraścāsti sarvakāmaphalapradaḥ .. yaśaḥprado viśeṣeṇa mokṣado'pi prakīrttitaḥ .. 17..
Shloka 18
सूर्यस्य मंडलं भित्त्वा यायाद्वै परमं पदम् ॥ परिव्राट् परमज्ञानी रणे यत्संमुखे हतः ॥ १८॥
sūryasya maṃḍalaṃ bhittvā yāyādvai paramaṃ padam .. parivrāṭ paramajñānī raṇe yatsaṃmukhe hataḥ .. 18..
Shloka 19
मृत्योर्भयं न कर्तव्यं कदाचित्कुत्रचिद्बुधैः॥ अनिर्वार्यो यतो ह्येष उपायैर्निखिलैरपि ॥ १९॥
mṛtyorbhayaṃ na kartavyaṃ kadācitkutracidbudhaiḥ.. anirvāryo yato hyeṣa upāyairnikhilairapi .. 19..
Shloka 20
मृत्युर्जन्मवतां वीरा देहेन सह जायते॥ अद्य वाब्दशतात् वा मृत्युर्वै प्राणिनां ध्रुवः ॥ 2.5.22.२०॥
mṛtyurjanmavatāṃ vīrā dehena saha jāyate.. adya vābdaśatāt vā mṛtyurvai prāṇināṃ dhruvaḥ .. 2.5.22.20..
Shloka 21
तन्मृत्युभयमुत्सार्य युध्यध्वं समरे मुदा ॥ सर्वथा परमानन्द इहामुत्राप्यसंशयः ॥ २१॥
tanmṛtyubhayamutsārya yudhyadhvaṃ samare mudā .. sarvathā paramānanda ihāmutrāpyasaṃśayaḥ .. 21..
Shloka 22
सनत्कुमार उवाच ।।
इत्युक्त्वा बोधयामास स्ववीरान्बहुशस्स हि॥ धैर्यं दधुर्न ते भीता पलायंत रणाद्द्रुतम् ॥ २२॥
ityuktvā bodhayāmāsa svavīrānbahuśassa hi.. dhairyaṃ dadhurna te bhītā palāyaṃta raṇāddrutam .. 22..
Shloka 23
अथ दृष्ट्वा स्वसैन्यं तत्पलायनपरायणम् ॥ चुक्रोधाति महावीरस्सिंधुपुत्रो जलंधरः ॥ २३॥
atha dṛṣṭvā svasainyaṃ tatpalāyanaparāyaṇam .. cukrodhāti mahāvīrassiṃdhuputro jalaṃdharaḥ .. 23..
Shloka 24
ततः क्रोधपरीतात्मा क्रोधाद्रुद्रं जलंधरः॥ आह्वापयामास रणे तीव्राशनिसमस्वनः ॥ २४ ॥
tataḥ krodhaparītātmā krodhādrudraṃ jalaṃdharaḥ.. āhvāpayāmāsa raṇe tīvrāśanisamasvanaḥ .. 24 ..
Shloka 25
।। जलंधर उवाच ।।
युद्ध्यस्वाद्य मया सार्द्धं किमेभिर्निहतैस्तव ॥ यच्च किञ्चिद्बलं तेऽस्ति तद्दर्शय जटाधर ॥ २५॥
yuddhyasvādya mayā sārddhaṃ kimebhirnihataistava .. yacca kiñcidbalaṃ te'sti taddarśaya jaṭādhara .. 25..
Shloka 26
सनत्कुमार उवाच ।।
इत्युक्त्वा बाण सप्तत्या जघान वृषभध्वजम् ॥ जलंधरो महादैत्यश्शंभुमक्लिष्टकारिणम् ॥ २६ ॥
ityuktvā bāṇa saptatyā jaghāna vṛṣabhadhvajam .. jalaṃdharo mahādaityaśśaṃbhumakliṣṭakāriṇam .. 26 ..
Shloka 27
तानप्राप्तान्महादेवो जलंधरशरान्द्रुतम्॥ निजैर्हि निशितैर्बाणैश्चिच्छेद प्रहसन्निव॥ २७॥
tānaprāptānmahādevo jalaṃdharaśarāndrutam.. nijairhi niśitairbāṇaiściccheda prahasanniva.. 27..
Shloka 28
ततो हयान्ध्वजं छत्रं धनुश्चिच्छेद सप्तभिः ॥ जलंधरस्य दैत्यस्य न तच्चित्रं हरे मुने ॥ २८ ॥
tato hayāndhvajaṃ chatraṃ dhanuściccheda saptabhiḥ .. jalaṃdharasya daityasya na taccitraṃ hare mune .. 28 ..
Shloka 29
स च्छिन्नधन्वा विरथः पाथोधितनयोऽसुरः ॥ अभ्यधावच्छिवं क्रुद्धो गदामुद्यम्य वेगवान्॥ २९ ॥
sa cchinnadhanvā virathaḥ pāthodhitanayo'suraḥ .. abhyadhāvacchivaṃ kruddho gadāmudyamya vegavān.. 29 ..
Shloka 30
प्रभुर्गदां च तत्क्षिप्तां सहसैव महेश्वरः ॥ पाराशर्यं महालीलो द्रुतं बाणैर्द्विधाकरोत् ॥ 2.5.22.३०॥
prabhurgadāṃ ca tatkṣiptāṃ sahasaiva maheśvaraḥ .. pārāśaryaṃ mahālīlo drutaṃ bāṇairdvidhākarot .. 2.5.22.30..
Shloka 31
तथापि मुष्टिमुद्यम्य महाक्रुद्धो महासुरः ॥ अभ्युद्ययौ महावेगाद्द्रुतं तं तज्जिघांसया॥ ३१॥
tathāpi muṣṭimudyamya mahākruddho mahāsuraḥ .. abhyudyayau mahāvegāddrutaṃ taṃ tajjighāṃsayā.. 31..
Shloka 32
तावदेवेश्वरेणाशु बाणोघैस्स जलंधरः ॥ अक्लिष्टकर्मकारेण क्रोशमात्रमपाकृतः ॥ ३२॥
tāvadeveśvareṇāśu bāṇoghaissa jalaṃdharaḥ .. akliṣṭakarmakāreṇa krośamātramapākṛtaḥ .. 32..
Shloka 33
ततो जलंधरो दैत्यो रुद्रं मत्वा बलाधिकम् ॥ ससर्ज मायां गांधर्वीमद्भुतां रुद्रमोहिनीम्॥ ३३॥
tato jalaṃdharo daityo rudraṃ matvā balādhikam .. sasarja māyāṃ gāṃdharvīmadbhutāṃ rudramohinīm.. 33..
Shloka 34
तस्य मायाप्रभावात्तु गंधर्वाप्सरसां गणाः ॥ आविर्भूता अनेके च रुद्रमोहनहेतवे॥ ३४॥
tasya māyāprabhāvāttu gaṃdharvāpsarasāṃ gaṇāḥ .. āvirbhūtā aneke ca rudramohanahetave.. 34..
Shloka 35
ततो जगुश्च ननृतुर्गंधर्वाप्सरसां गणाः॥ तालवेणुमृदंगांश्च वादयन्तिस्म चापरे ॥ ३५॥
tato jaguśca nanṛturgaṃdharvāpsarasāṃ gaṇāḥ.. tālaveṇumṛdaṃgāṃśca vādayantisma cāpare .. 35..
Shloka 36
तद्दृष्ट्वा महदाश्चर्यं गणै रुद्रो विमोहितः ॥ पतितान्यपि शस्त्राणि करेभ्यो न विवेद सः ॥ ३६॥
taddṛṣṭvā mahadāścaryaṃ gaṇai rudro vimohitaḥ .. patitānyapi śastrāṇi karebhyo na viveda saḥ .. 36..
Shloka 37
एकाग्रीभूतमालोक्य रुद्रं दैत्यो जलंधरः॥ कामतस्स जगामाशु यत्र गौरी स्थिताऽभवत्॥ ३७ ॥
ekāgrībhūtamālokya rudraṃ daityo jalaṃdharaḥ.. kāmatassa jagāmāśu yatra gaurī sthitā'bhavat.. 37 ..
Shloka 38
युद्धे शुंभनिशुंभाख्यौ स्थापयित्वा महाबलौ ॥ दशदोर्दण्डपंचास्यस्त्रिनेत्रश्च जटाधरः ॥ ३८॥
yuddhe śuṃbhaniśuṃbhākhyau sthāpayitvā mahābalau .. daśadordaṇḍapaṃcāsyastrinetraśca jaṭādharaḥ .. 38..
Shloka 39
महावृषभमारूढस्सर्वथा रुद्रसंनिभः ॥ आसुर्य्या मायया व्यास स बभूव जलंधरः ॥ ३९॥
mahāvṛṣabhamārūḍhassarvathā rudrasaṃnibhaḥ .. āsuryyā māyayā vyāsa sa babhūva jalaṃdharaḥ .. 39..
Shloka 40
अथ रुद्रं समायातमालोक्य भववल्लभा ॥ अभ्याययौ सखीमध्यात्तद्दर्शनपथेऽभवत् ॥ 2.5.22.४०॥
atha rudraṃ samāyātamālokya bhavavallabhā .. abhyāyayau sakhīmadhyāttaddarśanapathe'bhavat .. 2.5.22.40..
Shloka 41
यावद्ददर्श चार्वंगी पार्वतीं दनुजेश्वरः ॥ तावत्स वीर्यं मुमुचे जडांगश्चाभवत्तदा॥ ४१ ॥
yāvaddadarśa cārvaṃgī pārvatīṃ danujeśvaraḥ .. tāvatsa vīryaṃ mumuce jaḍāṃgaścābhavattadā.. 41 ..
Shloka 42
अथ ज्ञात्वा तदा गौरी दानवं भयविह्वला ॥ जगामांतर्हिता वेगात्सा तदोत्तरमानसम्॥ ४२॥
atha jñātvā tadā gaurī dānavaṃ bhayavihvalā .. jagāmāṃtarhitā vegātsā tadottaramānasam.. 42..
Shloka 43
तामदृश्य ततो दैत्यः क्षणाद्विद्युल्लतामिव॥ जवेनागात्पुनर्योद्धुं यत्र देवो महेश्वरः ॥ ४३॥
tāmadṛśya tato daityaḥ kṣaṇādvidyullatāmiva.. javenāgātpunaryoddhuṃ yatra devo maheśvaraḥ .. 43..
Shloka 44
पार्वत्यपि महाविष्णुं सस्मार मनसा तदा ॥ तावद्ददर्श तं देवं सोपविष्टं समीपगम् ॥ ४४॥
pārvatyapi mahāviṣṇuṃ sasmāra manasā tadā .. tāvaddadarśa taṃ devaṃ sopaviṣṭaṃ samīpagam .. 44..
Shloka 45
तं दृष्ट्वा पार्वती विष्णुं जगन्माता शिवप्रिया ॥ प्रसन्नमनसोवाच प्रणमंतं कृतांजलिम् ॥ ४५॥
taṃ dṛṣṭvā pārvatī viṣṇuṃ jaganmātā śivapriyā .. prasannamanasovāca praṇamaṃtaṃ kṛtāṃjalim .. 45..
Shloka 46
पार्वत्युवाच ।।
विष्णो जलंधरो दैत्यः कृतवान्परमाद्भुतम् ॥ तत्किं न विदितं तेऽस्ति चेष्टितं तस्य दुर्मतेः ॥ ४६ ॥
viṣṇo jalaṃdharo daityaḥ kṛtavānparamādbhutam .. tatkiṃ na viditaṃ te'sti ceṣṭitaṃ tasya durmateḥ .. 46 ..
Shloka 47
तच्छ्रुत्वा जगदम्बाया वचनं गरुडध्वजः ॥ प्रत्युवाच शिवां नत्वा सांजलिर्नम्रकंधरः ॥ ४७ ॥
tacchrutvā jagadambāyā vacanaṃ garuḍadhvajaḥ .. pratyuvāca śivāṃ natvā sāṃjalirnamrakaṃdharaḥ .. 47 ..
Shloka 48
।। श्रीभगवानुवाच ।।
भवत्याः कृपया देवि तद्वृत्तं विदितं मया ॥ यदाज्ञापय मां मातस्तत्कुर्य्यां त्वदनुज्ञया ॥ ४८॥
bhavatyāḥ kṛpayā devi tadvṛttaṃ viditaṃ mayā .. yadājñāpaya māṃ mātastatkuryyāṃ tvadanujñayā .. 48..
Shloka 49
सनत्कुमार उचाच ।।
तच्छ्रुत्वा विष्णुवचन्ं पुनरप्याह पार्वती ॥ हृषीकेशं जगन्माता धर्मनीतिं सुशिक्षयन् ॥ ४९ ॥
tacchrutvā viṣṇuvacanṃ punarapyāha pārvatī .. hṛṣīkeśaṃ jaganmātā dharmanītiṃ suśikṣayan .. 49 ..
Shloka 50
पार्वत्युवाच ।।
तेनैव दर्शितः पन्था बुध्यस्व त्वं तथैव हि ॥ तत्स्त्रीपातिव्रतं धर्मं भ्रष्टं कुरु मदाज्ञया ॥ 2.5.22.५०॥
tenaiva darśitaḥ panthā budhyasva tvaṃ tathaiva hi .. tatstrīpātivrataṃ dharmaṃ bhraṣṭaṃ kuru madājñayā .. 2.5.22.50..
Shloka 51
नान्यथा स महादैत्यो भवेद्वध्यो रमेश्वर॥ पातिव्रतसमो नान्यो धर्मोऽस्ति पृथिवीतले ॥ ५१ ॥
nānyathā sa mahādaityo bhavedvadhyo rameśvara.. pātivratasamo nānyo dharmo'sti pṛthivītale .. 51 ..
Shloka 52
सनत्कुमार उवाच ।।
इत्यनुज्ञां समाकर्ण्य शिरसाधाय तां हरिः ॥ छल कर्त्तुं जगामाशु पुनर्जालंधरं पुरम् ॥ ५२ ॥
ityanujñāṃ samākarṇya śirasādhāya tāṃ hariḥ .. chala karttuṃ jagāmāśu punarjālaṃdharaṃ puram .. 52 ..
Shloka 53
इति श्रीशिवमहापुराणे द्वितीयायां रुद्रसंहितायांपञ्चमे युद्धखंडे जलंधरवधोपाख्याने जलंधरयुद्धवर्णनंनाम द्वाविंशोऽध्यायः ॥ २२ ॥
iti śrīśivamahāpurāṇe dvitīyāyāṃ rudrasaṃhitāyāṃpañcame yuddhakhaṃḍe jalaṃdharavadhopākhyāne jalaṃdharayuddhavarṇanaṃnāma dvāviṃśo'dhyāyaḥ .. 22 ..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In