| |
|

This overlay will guide you through the buttons:

Shloka 1
।। सनत्कुमार उवाच ।।
अथ ब्रह्मादयो देवा मुनयश्चाखिलास्तथा ॥ तुष्टुवुर्देवदेवेशं वाग्भिरिष्टाभिरानताः ॥ १॥
atha brahmādayo devā munayaścākhilāstathā .. tuṣṭuvurdevadeveśaṃ vāgbhiriṣṭābhirānatāḥ .. 1..
Shloka 2
देवा ऊचुः ।।
देवदेव महादेव शरणागतवत्सल ॥ साधुसौख्यप्रदस्त्वं हि सर्वदा भक्तदुःखहा ॥ २॥
devadeva mahādeva śaraṇāgatavatsala .. sādhusaukhyapradastvaṃ hi sarvadā bhaktaduḥkhahā .. 2..
Shloka 3
त्वं महाद्भुतसल्लीलो भक्तिगम्यो दुरासदः ॥ दुराराध्योऽसतां नाथ प्रसन्नस्सर्वदा भव ॥ ३।
tvaṃ mahādbhutasallīlo bhaktigamyo durāsadaḥ .. durārādhyo'satāṃ nātha prasannassarvadā bhava .. 3.
Shloka 4
वेदोऽपि महिमानं ते न जानाति हि तत्त्वतः ॥ यथामति महात्मानस्सर्वे गायंति सद्यशः ॥ ४॥
vedo'pi mahimānaṃ te na jānāti hi tattvataḥ .. yathāmati mahātmānassarve gāyaṃti sadyaśaḥ .. 4..
Shloka 5
माहात्म्यमतिगूढं ते सहस्रवदनादयः ॥ सदा गायंति सुप्रीत्या पुनंति स्वगिरं हि ते ॥ ५ ॥
māhātmyamatigūḍhaṃ te sahasravadanādayaḥ .. sadā gāyaṃti suprītyā punaṃti svagiraṃ hi te .. 5 ..
Shloka 6
कृपया तव देवेश ब्रह्मज्ञानी भवेज्जडः ॥ भक्तिगम्यस्सदा त्वं वा इति वेदा ब्रुवंति हि ॥ ६ ॥
kṛpayā tava deveśa brahmajñānī bhavejjaḍaḥ .. bhaktigamyassadā tvaṃ vā iti vedā bruvaṃti hi .. 6 ..
Shloka 7
त्वं वै दीनदयालुश्च सर्वत्र व्यापकस्सदा ॥ आविर्भवसि सद्भक्त्या निर्विकारस्सतां गतिः ॥ ७ ॥
tvaṃ vai dīnadayāluśca sarvatra vyāpakassadā .. āvirbhavasi sadbhaktyā nirvikārassatāṃ gatiḥ .. 7 ..
Shloka 8
भक्त्यैव ते महेशान बहवस्सिद्धिमागताः ॥ इह सर्वसुखं भुक्त्वा दुःखिता निर्विकारतः ॥ ८ ।
bhaktyaiva te maheśāna bahavassiddhimāgatāḥ .. iha sarvasukhaṃ bhuktvā duḥkhitā nirvikārataḥ .. 8 .
Shloka 9
पुरा यदुपतिर्भक्तो दाशार्हस्सिद्धिमागतः॥ कलावती च तत्पत्नी भक्त्यैव परमां प्रभो॥ ९॥
purā yadupatirbhakto dāśārhassiddhimāgataḥ.. kalāvatī ca tatpatnī bhaktyaiva paramāṃ prabho.. 9..
Shloka 10
तथा मित्रसहो राजा मदयंती च तत्प्रिया॥ भक्त्यैव तव देवेश कैवल्यं परमं ययौ ॥ 2.5.25.१० ॥
tathā mitrasaho rājā madayaṃtī ca tatpriyā.. bhaktyaiva tava deveśa kaivalyaṃ paramaṃ yayau .. 2.5.25.10 ..
Shloka 11
सौमिनी नाम तनया कैकेयाग्रभुवस्तथा ॥ तव भक्त्या सुखं प्राप परं सद्योगिदुर्लभम् ॥ ११॥
sauminī nāma tanayā kaikeyāgrabhuvastathā .. tava bhaktyā sukhaṃ prāpa paraṃ sadyogidurlabham .. 11..
Shloka 12
विमर्षणो नृपवरस्सप्तजन्मावधि प्रभो ॥ भुक्त्वा भोगांश्च विविधांस्त्वद्भक्त्या प्राप सद्गतिम् ॥ १२॥
vimarṣaṇo nṛpavarassaptajanmāvadhi prabho .. bhuktvā bhogāṃśca vividhāṃstvadbhaktyā prāpa sadgatim .. 12..
Shloka 13
चन्द्रसेनो नृपवरस्त्वद्भक्त्या सर्वभोगभुक् ॥ दुःखमुक्तः सुखं प्राप परमत्र परत्र च ॥ १३॥
candraseno nṛpavarastvadbhaktyā sarvabhogabhuk .. duḥkhamuktaḥ sukhaṃ prāpa paramatra paratra ca .. 13..
Shloka 14
गोपीपुत्रः श्रीकरस्ते भक्त्या भुक्त्वेह सद्गतिम् ।परं सुखं महावीरशिष्यः प्राप परत्र वै ॥ १४ ॥
gopīputraḥ śrīkaraste bhaktyā bhuktveha sadgatim .paraṃ sukhaṃ mahāvīraśiṣyaḥ prāpa paratra vai .. 14 ..
Shloka 15
त्वं सत्यरथभूजानेर्दुःखहर्ता गतिप्रदः ॥ धर्मगुप्तं राजपुत्रमतार्षीस्सुखिनं त्विह ॥ ॥ १५ ॥
tvaṃ satyarathabhūjānerduḥkhahartā gatipradaḥ .. dharmaguptaṃ rājaputramatārṣīssukhinaṃ tviha .. .. 15 ..
Shloka 16
तथा शुचिव्रतं विप्रमदरिद्रं महाप्रभो ॥ त्वद्भक्तिवर्तिनं मात्रा ज्ञानिनं कृपयाऽकरोः ॥ १६॥
tathā śucivrataṃ vipramadaridraṃ mahāprabho .. tvadbhaktivartinaṃ mātrā jñāninaṃ kṛpayā'karoḥ .. 16..
Shloka 17
चित्रवर्मा नृपवरस्त्वद्भक्त्या प्राप सद्गतिम् ॥ इह लोके सदा भुक्त्वा भोगानमरदुर्लभान् ॥ १७ ॥
citravarmā nṛpavarastvadbhaktyā prāpa sadgatim .. iha loke sadā bhuktvā bhogānamaradurlabhān .. 17 ..
Shloka 18
चन्द्रांगदो राजपुत्रस्सीमंतिन्या स्त्रिया सह ॥ विहाय सकलं दुःखं सुखी प्राप महागतिम् ॥ १८ ॥
candrāṃgado rājaputrassīmaṃtinyā striyā saha .. vihāya sakalaṃ duḥkhaṃ sukhī prāpa mahāgatim .. 18 ..
Shloka 19
द्विजो मंदरनामापि वेश्यागामी खलोऽधमः ॥ त्वद्भक्तः शिव संपूज्य तया सह गतिं गतः ॥ १९॥
dvijo maṃdaranāmāpi veśyāgāmī khalo'dhamaḥ .. tvadbhaktaḥ śiva saṃpūjya tayā saha gatiṃ gataḥ .. 19..
Shloka 20
भद्रायुस्ते नृपसुतस्सुखमाप गतव्यथः ॥ त्वद्भक्तकृपया मात्रा गतिं च परमां प्रभो ॥ 2.5.25.२०॥
bhadrāyuste nṛpasutassukhamāpa gatavyathaḥ .. tvadbhaktakṛpayā mātrā gatiṃ ca paramāṃ prabho .. 2.5.25.20..
Shloka 21
सर्वस्त्रीभोगनिरतो दुर्जनस्तव सेवया ॥ विमुक्तोऽभूदपि सदा भक्ष्यभोजी महेश्वर॥ २१ ॥
sarvastrībhoganirato durjanastava sevayā .. vimukto'bhūdapi sadā bhakṣyabhojī maheśvara.. 21 ..
Shloka 22
शंबरश्शंकरे भक्तश्चिताभस्मधरस्सदा ॥ नियमाद्भस्मनश्शंभो स्वस्त्रिया ते पुरं गतः ॥ २२ ॥
śaṃbaraśśaṃkare bhaktaścitābhasmadharassadā .. niyamādbhasmanaśśaṃbho svastriyā te puraṃ gataḥ .. 22 ..
Shloka 23
भद्रसेनस्य तनयस्तथा मंत्रिसुतः प्रभो ॥ सुधर्मशुभकर्माणौ सदा रुद्राक्षधारिणौ ॥ २३ ॥
bhadrasenasya tanayastathā maṃtrisutaḥ prabho .. sudharmaśubhakarmāṇau sadā rudrākṣadhāriṇau .. 23 ..
Shloka 24
त्वत्कृपातश्च तौ मुक्तावास्तां भुक्तेह सत्सुखम् ॥ पूर्वजन्मनि यौ कीशकुक्कुटौ रुद्रभूषणौ ॥ २४॥
tvatkṛpātaśca tau muktāvāstāṃ bhukteha satsukham .. pūrvajanmani yau kīśakukkuṭau rudrabhūṣaṇau .. 24..
Shloka 25
पिंगला च महानन्दा वेश्ये द्वे तव भक्तितः ॥ सद्गतिं प्रापतुर्नाथ भक्तोद्धारपरायण ॥ २५॥
piṃgalā ca mahānandā veśye dve tava bhaktitaḥ .. sadgatiṃ prāpaturnātha bhaktoddhāraparāyaṇa .. 25..
Shloka 26
शारदा विप्रतनया बालवैधव्यमागता ॥ तव भक्तेः प्रभावात्तु पुत्रसौभा ग्यवत्यभूत् ॥ २६ ॥
śāradā vipratanayā bālavaidhavyamāgatā .. tava bhakteḥ prabhāvāttu putrasaubhā gyavatyabhūt .. 26 ..
Shloka 27
बिन्दुगो द्विजमात्रो हि वेश्याभोगी च तत्प्रिया ॥ वंचुका त्वद्यशः श्रुत्वा परमां गतिमाययौ ॥ २७ ॥
bindugo dvijamātro hi veśyābhogī ca tatpriyā .. vaṃcukā tvadyaśaḥ śrutvā paramāṃ gatimāyayau .. 27 ..
Shloka 28
इत्यादि बहवस्सिद्धिं गता जीवास्तव प्रभो ॥ भक्तिभावान्महेशान दीनबन्धो कृपालय ॥ २८ ॥
ityādi bahavassiddhiṃ gatā jīvāstava prabho .. bhaktibhāvānmaheśāna dīnabandho kṛpālaya .. 28 ..
Shloka 29
त्वं परः प्रकृतेर्ब्रह्म पुरुषात्परमेश्वर ॥ निर्गुणस्त्रिगुणाधारो ब्रह्मविष्णुहरात्मकः ॥ २९ ॥
tvaṃ paraḥ prakṛterbrahma puruṣātparameśvara .. nirguṇastriguṇādhāro brahmaviṣṇuharātmakaḥ .. 29 ..
Shloka 30
नानाकर्मकरो नित्यं निर्विकारोऽखिलेश्वरः ॥ वयं ब्रह्मादयस्सर्वे तव दासा महेश्वर ॥ 2.5.25.३० ॥
nānākarmakaro nityaṃ nirvikāro'khileśvaraḥ .. vayaṃ brahmādayassarve tava dāsā maheśvara .. 2.5.25.30 ..
Shloka 31
प्रसन्नो भव देवेश रक्षास्मान्सर्वदा शिव ॥ त्वत्प्रजाश्च वयं नाथ सदा त्वच्छरणं गताः ॥ ३१ ॥
prasanno bhava deveśa rakṣāsmānsarvadā śiva .. tvatprajāśca vayaṃ nātha sadā tvaccharaṇaṃ gatāḥ .. 31 ..
Shloka 32
सनत्कुमार उवाच ।।
इति स्तुत्वा च ते देवा ब्रह्माद्यास्समुनीश्वराः ॥ तूष्णीं बभूवुर्हि तदा शिवांघ्रिद्वन्द्वचेतसः ॥ ३२ ॥
iti stutvā ca te devā brahmādyāssamunīśvarāḥ .. tūṣṇīṃ babhūvurhi tadā śivāṃghridvandvacetasaḥ .. 32 ..
Shloka 33
अथ शंभुर्महेशानः श्रुत्वा देवस्तुतिं शुभाम्॥ दत्त्वा वरान्वरान्सद्यस्तत्रैवांतर्दधे प्रभुः ॥ ३३ ॥
atha śaṃbhurmaheśānaḥ śrutvā devastutiṃ śubhām.. dattvā varānvarānsadyastatraivāṃtardadhe prabhuḥ .. 33 ..
Shloka 34
देवास्सर्वेऽपि मुदिता ब्रह्माद्या हतशत्रवः ॥ स्वं स्वं धाम ययुः प्रीता गायंतः शिवसद्यशः ॥ ३४ ॥
devāssarve'pi muditā brahmādyā hataśatravaḥ .. svaṃ svaṃ dhāma yayuḥ prītā gāyaṃtaḥ śivasadyaśaḥ .. 34 ..
Shloka 35
इदं परममाख्यानं जलंधरविमर्दनम् ॥ महेशचरितं पुण्यं महाघौघविनाशनम् ॥ ३५ ॥
idaṃ paramamākhyānaṃ jalaṃdharavimardanam .. maheśacaritaṃ puṇyaṃ mahāghaughavināśanam .. 35 ..
Shloka 36
देवस्तुतिरियं पुण्या सर्वपापप्रणाशिनी ॥ सर्वसौख्यप्रदा नित्यं महेशानंददायिनी ॥ ३६ ॥
devastutiriyaṃ puṇyā sarvapāpapraṇāśinī .. sarvasaukhyapradā nityaṃ maheśānaṃdadāyinī .. 36 ..
Shloka 37
यः पठेत्पाठयेद्वापि समाख्यानमिदं द्वयम् ॥ भुक्त्वेह परं सौख्यं गाणपत्यमवाप्नुयात् ॥ ३७ ॥
yaḥ paṭhetpāṭhayedvāpi samākhyānamidaṃ dvayam .. bhuktveha paraṃ saukhyaṃ gāṇapatyamavāpnuyāt .. 37 ..
Shloka 38
इति श्रीशिवमहापुराणे द्वितीयायां रुद्रसंहितायां पञ्चमे युद्धखण्डे जलंधरवधोपाख्याने देवस्तुतिवर्णनं नाम पंचविंशोऽध्यायः ॥ २५ ॥
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhopākhyāne devastutivarṇanaṃ nāma paṃcaviṃśo'dhyāyaḥ .. 25 ..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In