| |
|

This overlay will guide you through the buttons:

Shloka 1
व्यास उवाच ।।
नारायणश्च भगवान् वीर्याधानं चकार ह ॥ तुलस्याः केन यत्नेन योनौ तद्वक्तुमर्हसि ॥ १ ॥
nārāyaṇaśca bhagavān vīryādhānaṃ cakāra ha .. tulasyāḥ kena yatnena yonau tadvaktumarhasi .. 1 ..
Shloka 2
सनत्कुमार उवाच ।।
नारायणो हि देवानां कार्यकर्ता सतां गतिः ॥ शंखचूडस्य रूपेण रेमे तद्रमया सह ॥ २॥
nārāyaṇo hi devānāṃ kāryakartā satāṃ gatiḥ .. śaṃkhacūḍasya rūpeṇa reme tadramayā saha .. 2..
Shloka 3
तदेव शृणु विष्णोश्च चरितं प्रमुदावहम्॥ शिवशासनकर्तुश्च मातुश्च जगतां हरेः॥ ३॥
tadeva śṛṇu viṣṇośca caritaṃ pramudāvaham.. śivaśāsanakartuśca mātuśca jagatāṃ hareḥ.. 3..
Shloka 4
रणमध्ये व्योमवचः श्रुत्वा देवेन शंभुना॥ प्रेरितश्शंखचूडस्य गृहीत्वा कवचं परम्॥ ४॥
raṇamadhye vyomavacaḥ śrutvā devena śaṃbhunā.. preritaśśaṃkhacūḍasya gṛhītvā kavacaṃ param.. 4..
Shloka 5
विप्ररूपेण त्वरितं मायया निजया हरिः॥ जगाम शंखचूडस्य रूपेण तुलसीगृहम् ॥ ५॥
viprarūpeṇa tvaritaṃ māyayā nijayā hariḥ.. jagāma śaṃkhacūḍasya rūpeṇa tulasīgṛham .. 5..
Shloka 6
दुन्दुभिं वादयामास तुलसी द्वारसन्निधौ ॥ जयशब्दं च तत्रैव बोधयामास सुन्दरीम्॥ ६॥
dundubhiṃ vādayāmāsa tulasī dvārasannidhau .. jayaśabdaṃ ca tatraiva bodhayāmāsa sundarīm.. 6..
Shloka 7
तच्छ्रुत्वा चैव सा साध्वी परमानन्दसंयुता॥ राजमार्गं गवाक्षेण ददर्श परमादरात्॥ ७॥
tacchrutvā caiva sā sādhvī paramānandasaṃyutā.. rājamārgaṃ gavākṣeṇa dadarśa paramādarāt.. 7..
Shloka 8
ब्राह्मणेभ्यो धनं दत्त्वा कारयामास मंगलम्॥ द्रुतं चकार शृंगारं ज्ञात्वाऽऽयातं निजं पतिम् ॥ ८॥
brāhmaṇebhyo dhanaṃ dattvā kārayāmāsa maṃgalam.. drutaṃ cakāra śṛṃgāraṃ jñātvā''yātaṃ nijaṃ patim .. 8..
Shloka 9
अवरुह्य रथाद्विष्णुस्तद्देव्याभवनं ययौ ॥ शंखचूडस्वरूपः स मायावी देवकार्यकृत् ॥ ९ ॥
avaruhya rathādviṣṇustaddevyābhavanaṃ yayau .. śaṃkhacūḍasvarūpaḥ sa māyāvī devakāryakṛt .. 9 ..
Shloka 10
दृष्ट्वा तं च पुरः प्राप्तं स्वकांतं सा मुदान्विता ॥ तत्पादौ क्षालयामास ननाम च रुरोद च ॥ 2.5.41.१० ॥
dṛṣṭvā taṃ ca puraḥ prāptaṃ svakāṃtaṃ sā mudānvitā .. tatpādau kṣālayāmāsa nanāma ca ruroda ca .. 2.5.41.10 ..
Shloka 11
रत्नसिंहासने रम्ये वासयामास मंगलम् ॥ ताम्बूलं च ददौ तस्मै कर्पूरादिसुवासितम् ॥ ११ ॥
ratnasiṃhāsane ramye vāsayāmāsa maṃgalam .. tāmbūlaṃ ca dadau tasmai karpūrādisuvāsitam .. 11 ..
Shloka 12
अद्य मे सफलं जन्म जीवनं संबभूव ह ॥ रणे गतं च प्राणेशं पश्यंत्याश्च पुनर्गृहे॥ १२॥
adya me saphalaṃ janma jīvanaṃ saṃbabhūva ha .. raṇe gataṃ ca prāṇeśaṃ paśyaṃtyāśca punargṛhe.. 12..
Shloka 13
इत्युक्त्वा सकटाक्षं सा निरीक्ष्य सस्मितं मुदा ॥ पप्रच्छ रणवृत्तांतं कांतं मधुरया गिरा ॥ १३॥
ityuktvā sakaṭākṣaṃ sā nirīkṣya sasmitaṃ mudā .. papraccha raṇavṛttāṃtaṃ kāṃtaṃ madhurayā girā .. 13..
Shloka 14
तुलस्युवाच ।।
असंख्यविश्वसंहर्ता स देवप्रवरः प्रभुः ॥ यस्याज्ञावर्त्तिनो देवा विष्णुब्रह्मादयस्सदा ॥ १४ ॥
asaṃkhyaviśvasaṃhartā sa devapravaraḥ prabhuḥ .. yasyājñāvarttino devā viṣṇubrahmādayassadā .. 14 ..
Shloka 15
त्रिदेवजनकस्सोत्र त्रिगुणात्मा च निर्गुणः ॥ भक्तेच्छया च सगुणो हरिब्रह्मप्रवर्तकः ॥ १५॥
tridevajanakassotra triguṇātmā ca nirguṇaḥ .. bhaktecchayā ca saguṇo haribrahmapravartakaḥ .. 15..
Shloka 16
कुबेरस्य प्रार्थनया गुणरूपधरो हरः ॥ कैलासवासी गणपः परब्रह्म सतां गतिः ॥ १६ ॥
kuberasya prārthanayā guṇarūpadharo haraḥ .. kailāsavāsī gaṇapaḥ parabrahma satāṃ gatiḥ .. 16 ..
Shloka 17
यस्यैकपलमात्रेण कोटिब्रह्मांडसंक्षयः ॥ विष्णुब्रह्मादयोऽतीता बहवः क्षणमात्रतः ॥ १७॥
yasyaikapalamātreṇa koṭibrahmāṃḍasaṃkṣayaḥ .. viṣṇubrahmādayo'tītā bahavaḥ kṣaṇamātrataḥ .. 17..
Shloka 18
कर्तुं सार्द्धं च तेनैव समरं त्वं गतः प्रभो ॥ कथं बभूव संग्रामस्तेन देवसहायिना ॥ १८॥
kartuṃ sārddhaṃ ca tenaiva samaraṃ tvaṃ gataḥ prabho .. kathaṃ babhūva saṃgrāmastena devasahāyinā .. 18..
Shloka 19
कुशली त्वमिहायातस्तं जित्वा परमेश्वरम् ॥ कथं बभूव विजयस्तव ब्रूहि तदेव मे ॥ १९॥
kuśalī tvamihāyātastaṃ jitvā parameśvaram .. kathaṃ babhūva vijayastava brūhi tadeva me .. 19..
Shloka 20
श्रुत्वेत्थं तुलसीवाक्यं स विहस्य रमापतिः ॥ शंखचूडरूपधरस्तामुवाचामृतं वचः ॥ 2.5.41.२०॥
śrutvetthaṃ tulasīvākyaṃ sa vihasya ramāpatiḥ .. śaṃkhacūḍarūpadharastāmuvācāmṛtaṃ vacaḥ .. 2.5.41.20..
Shloka 21
भगवानुवाच ।।
यदाहं रणभूमौ च जगाम समरप्रियः ॥ कोलाहलो महान् जातः प्रवृत्तोऽभून्महारणः ॥ २१ ॥
yadāhaṃ raṇabhūmau ca jagāma samarapriyaḥ .. kolāhalo mahān jātaḥ pravṛtto'bhūnmahāraṇaḥ .. 21 ..
Shloka 22
देवदानवयोर्युद्धं संबभूव जयैषिणोः ॥ दैत्याः पराजितास्तत्र निर्जरैर्बलगर्वितैः ॥ २२ ॥
devadānavayoryuddhaṃ saṃbabhūva jayaiṣiṇoḥ .. daityāḥ parājitāstatra nirjarairbalagarvitaiḥ .. 22 ..
Shloka 23
तदाहं समरं तत्राकार्षं देवैर्बलोत्कटैः ॥ पराजिताश्च ते देवाश्शंकरं शरणं ययुः ॥ २३॥
tadāhaṃ samaraṃ tatrākārṣaṃ devairbalotkaṭaiḥ .. parājitāśca te devāśśaṃkaraṃ śaraṇaṃ yayuḥ .. 23..
Shloka 24
रुद्रोऽपि तत्सहायार्थमाजगाम रणं प्रति॥ तेनाहं वै चिरं कालमयौत्संबलदर्पित ॥ २४॥
rudro'pi tatsahāyārthamājagāma raṇaṃ prati.. tenāhaṃ vai ciraṃ kālamayautsaṃbaladarpita .. 24..
Shloka 25
आवयोस्समरः कान्ते पूर्णमब्दं बभूव ह ॥ नाशो बभूव सर्वेषामसुराणां च कामिनि ॥ २५॥
āvayossamaraḥ kānte pūrṇamabdaṃ babhūva ha .. nāśo babhūva sarveṣāmasurāṇāṃ ca kāmini .. 25..
Shloka 26
प्रीतिं च कारयामास ब्रह्मा च स्वयमावयोः ॥ देवानामधिकाराश्च प्रदत्ता ब्रह्मशासनात् ॥ २६॥
prītiṃ ca kārayāmāsa brahmā ca svayamāvayoḥ .. devānāmadhikārāśca pradattā brahmaśāsanāt .. 26..
Shloka 27
मयागतं स्वभवनं शिवलोकं शिवो गतः ॥ सर्वस्वास्थ्यमतीवाप दूरीभूतो ह्युपद्रवः ॥ २७॥
mayāgataṃ svabhavanaṃ śivalokaṃ śivo gataḥ .. sarvasvāsthyamatīvāpa dūrībhūto hyupadravaḥ .. 27..
Shloka 28
सनत्कुमार उवाच ।।
इत्युक्त्वा जगतां नाथः शयनं च चकार ह ॥ रेमे रमापतिस्तत्र रमया स तया मुदा ॥ २८॥
ityuktvā jagatāṃ nāthaḥ śayanaṃ ca cakāra ha .. reme ramāpatistatra ramayā sa tayā mudā .. 28..
Shloka 29
सा साध्वी सुखसंभावकर्षणस्य व्यतिक्रमात् ॥ सर्वं वितर्कयामास कस्त्वमेवेत्युवाच सा ॥ २९ ॥
sā sādhvī sukhasaṃbhāvakarṣaṇasya vyatikramāt .. sarvaṃ vitarkayāmāsa kastvamevetyuvāca sā .. 29 ..
Shloka 30
तुलस्युवाच ।।
को वा त्वं वद मामाशु भुक्ताहं मायया त्वया ॥ दूरीकृतं यत्सतीत्वमथ त्वां वै शपाम्यहम्॥ 2.5.41.३०॥
ko vā tvaṃ vada māmāśu bhuktāhaṃ māyayā tvayā .. dūrīkṛtaṃ yatsatītvamatha tvāṃ vai śapāmyaham.. 2.5.41.30..
Shloka 31
सनत्कुमार उवाच ।।
तुलसीवचनं श्रुत्वा हरिश्शापभयेन च॥ दधार लीलया ब्रह्मन्स्वमूर्तिं सुमनोहराम्॥ ३१॥
tulasīvacanaṃ śrutvā hariśśāpabhayena ca.. dadhāra līlayā brahmansvamūrtiṃ sumanoharām.. 31..
Shloka 32
तद्दृष्ट्वा तुलसीरूपं ज्ञात्वा विष्णुं तु चिह्नतः ॥ पातिव्रत्यपरित्यागात् क्रुद्धा सा तमुवाच ह ॥ ३२॥
taddṛṣṭvā tulasīrūpaṃ jñātvā viṣṇuṃ tu cihnataḥ .. pātivratyaparityāgāt kruddhā sā tamuvāca ha .. 32..
Shloka 33
तुलस्युवाच ।।
हे विष्णो ते दया नास्ति पाषाणसदृशं मनः ॥ पतिधर्मस्य भंगेन मम स्वामी हतः खलु ॥ ३३॥
he viṣṇo te dayā nāsti pāṣāṇasadṛśaṃ manaḥ .. patidharmasya bhaṃgena mama svāmī hataḥ khalu .. 33..
Shloka 34
पाषाणसदृशस्त्वं च दयाहीनो यतः खलः ॥ तस्मात्पाषाणरूपस्त्वं मच्छापेन भवाधुना ॥ ३४ ॥
pāṣāṇasadṛśastvaṃ ca dayāhīno yataḥ khalaḥ .. tasmātpāṣāṇarūpastvaṃ macchāpena bhavādhunā .. 34 ..
Shloka 35
ये वदंति दयासिन्धुं त्वां भ्रांतास्ते न संशयः ॥ भक्तो विनापराधेन परार्थे च कथं हतः ॥ ३५॥
ye vadaṃti dayāsindhuṃ tvāṃ bhrāṃtāste na saṃśayaḥ .. bhakto vināparādhena parārthe ca kathaṃ hataḥ .. 35..
Shloka 36
सनत्कुमार उवाच।।
इत्युक्त्वा तुलसी सा वै शंखचूडप्रिया सती ॥ भृशं रुरोद शोकार्ता विललाप भृशं मुहुः॥ ३६॥
ityuktvā tulasī sā vai śaṃkhacūḍapriyā satī .. bhṛśaṃ ruroda śokārtā vilalāpa bhṛśaṃ muhuḥ.. 36..
Shloka 37
ततस्तां रुदतीं दृष्ट्वा स विष्णुः परमेश्वरः ॥ सस्मार शंकरं देवं येन संमोहितं जगत् ॥ ३७॥
tatastāṃ rudatīṃ dṛṣṭvā sa viṣṇuḥ parameśvaraḥ .. sasmāra śaṃkaraṃ devaṃ yena saṃmohitaṃ jagat .. 37..
Shloka 38
ततः प्रादुर्बभूवाथ शंकरो भक्तवत्सलः ॥ हरिणा प्रणतश्चासीत्संनुतो विनयेन सः ॥ ३८ ॥
tataḥ prādurbabhūvātha śaṃkaro bhaktavatsalaḥ .. hariṇā praṇataścāsītsaṃnuto vinayena saḥ .. 38 ..
Shloka 39
शोकाकुलं हरिं दृष्ट्वा विलपंतीं च तत्प्रियाम् ॥ नयेन बोधयामास तं तां कृपणवत्सलाम् ॥ ३९ ॥
śokākulaṃ hariṃ dṛṣṭvā vilapaṃtīṃ ca tatpriyām .. nayena bodhayāmāsa taṃ tāṃ kṛpaṇavatsalām .. 39 ..
Shloka 40
शंकर उवाच ।।
मा रोदीस्तुलसि त्वं हि भुंक्ते कर्मफलं जनः ॥ सुखदुःखदो न कोप्यस्ति संसारे कर्मसागरे ॥ 2.5.41.४० ॥
mā rodīstulasi tvaṃ hi bhuṃkte karmaphalaṃ janaḥ .. sukhaduḥkhado na kopyasti saṃsāre karmasāgare .. 2.5.41.40 ..
Shloka 41
प्रस्तुतं शृणु निर्दुःखं शृणोति सुमना हरिः ॥ द्वयोस्सुखकरं यत्तद्ब्रवीमि सुखहेतवे ॥ ४१ ॥
prastutaṃ śṛṇu nirduḥkhaṃ śṛṇoti sumanā hariḥ .. dvayossukhakaraṃ yattadbravīmi sukhahetave .. 41 ..
Shloka 42
तपस्त्वया कृतं भद्रे तस्यैव तपसः फलम् ॥ तदन्यथा कथं स्याद्वै जातं त्वयि तथा च तत् ॥ ४२ ॥
tapastvayā kṛtaṃ bhadre tasyaiva tapasaḥ phalam .. tadanyathā kathaṃ syādvai jātaṃ tvayi tathā ca tat .. 42 ..
Shloka 43
इदं शरीरं त्यक्त्वा च दिव्यदेहं विधाय च॥ रमस्व हरिणा नित्यं रमया सदृशी भव ॥ ४३॥
idaṃ śarīraṃ tyaktvā ca divyadehaṃ vidhāya ca.. ramasva hariṇā nityaṃ ramayā sadṛśī bhava .. 43..
Shloka 44
तवेयं तनुरुत्सृष्टा नदीरूपा भवेदिह ॥ भारते पुण्यरूपा सा गण्डकीति च विश्रुता ॥ ४४॥
taveyaṃ tanurutsṛṣṭā nadīrūpā bhavediha .. bhārate puṇyarūpā sā gaṇḍakīti ca viśrutā .. 44..
Shloka 45
कियत्कालं महादेवि देवपूजनसाधने ॥ प्रधानरूपा तुलसी भविष्यति वरेण मे ॥ ४५ ॥
kiyatkālaṃ mahādevi devapūjanasādhane .. pradhānarūpā tulasī bhaviṣyati vareṇa me .. 45 ..
Shloka 46
स्वर्गं मर्त्ये च पाताले तिष्ठ त्वं हरिसन्निधौ ॥ भव त्वं तुलसीवृक्षो वरा पुष्पेषु सुन्दरी ॥ ४६ ॥
svargaṃ martye ca pātāle tiṣṭha tvaṃ harisannidhau .. bhava tvaṃ tulasīvṛkṣo varā puṣpeṣu sundarī .. 46 ..
Shloka 47
वृक्षाधिष्ठातृदेवी त्वं वैकुंठे दिव्यरूपिणी ॥ सार्द्धं रहसि हरिणा नित्यं क्रीडां करिष्यसि ॥ ४७॥
vṛkṣādhiṣṭhātṛdevī tvaṃ vaikuṃṭhe divyarūpiṇī .. sārddhaṃ rahasi hariṇā nityaṃ krīḍāṃ kariṣyasi .. 47..
Shloka 48
नद्यधिष्ठातृदेवी या भारते बहु पुण्यदा ॥ लवणोदस्य पत्नी सा हर्यंशस्य भविष्यसि ॥ ४८॥
nadyadhiṣṭhātṛdevī yā bhārate bahu puṇyadā .. lavaṇodasya patnī sā haryaṃśasya bhaviṣyasi .. 48..
Shloka 49
हरिर्वे शैलरूपी च गंडकी तीरसंनिधौ ॥ संकरिष्यत्यधिष्ठानं भारते तव शापतः ॥ ४९ ॥
harirve śailarūpī ca gaṃḍakī tīrasaṃnidhau .. saṃkariṣyatyadhiṣṭhānaṃ bhārate tava śāpataḥ .. 49 ..
Shloka 50
तत्र कोट्यश्च कीटाश्च तीक्ष्णदंष्ट्रा भयंकराः ॥ तच्छित्त्वा कुहरे चक्रं करिष्यंति तदीयकम् ॥ 2.5.41.५०॥
tatra koṭyaśca kīṭāśca tīkṣṇadaṃṣṭrā bhayaṃkarāḥ .. tacchittvā kuhare cakraṃ kariṣyaṃti tadīyakam .. 2.5.41.50..
Shloka 51
शालग्रामशिला सा हि तद्भेदादतिपुण्यदा॥ लक्ष्मीनारायणाख्यादिश्चक्रभेदाद्भविष्यति ॥ ५१॥
śālagrāmaśilā sā hi tadbhedādatipuṇyadā.. lakṣmīnārāyaṇākhyādiścakrabhedādbhaviṣyati .. 51..
Shloka 52
शालग्रामशिला विष्णो तुलस्यास्तव संगमः ॥ सदा सादृश्यरूपा या बहुपुण्यविवर्द्धिनी ॥ ५२ ॥
śālagrāmaśilā viṣṇo tulasyāstava saṃgamaḥ .. sadā sādṛśyarūpā yā bahupuṇyavivarddhinī .. 52 ..
Shloka 53
तुलसीपत्रविच्छेदं शालग्रामे करोति यः ॥ तस्य जन्मान्तरे भद्रे स्त्रीविच्छेदो भविष्यति ॥ ५३ ॥
tulasīpatravicchedaṃ śālagrāme karoti yaḥ .. tasya janmāntare bhadre strīvicchedo bhaviṣyati .. 53 ..
Shloka 54
तुलसीपत्रविच्छेदं शंखं हित्वा करोति यः ॥ भार्याहीनो भवेत्सोपि रोगी स्यात्सप्तजन्मसु ॥ ५४ ॥
tulasīpatravicchedaṃ śaṃkhaṃ hitvā karoti yaḥ .. bhāryāhīno bhavetsopi rogī syātsaptajanmasu .. 54 ..
Shloka 55
शालग्रामश्च तुलसी शंखं चैकत्र एव हि ॥ यो रक्षति महाज्ञानी स भवेच्छ्रीहरिप्रियः ॥ ५५ ॥
śālagrāmaśca tulasī śaṃkhaṃ caikatra eva hi .. yo rakṣati mahājñānī sa bhavecchrīharipriyaḥ .. 55 ..
Shloka 56
त्वं प्रियः शंखचूडस्य चैकमन्वन्तरावधि ॥ शंखेन सार्द्धं त्वद्भेदः केवलं दुःखदस्तव ॥ ५६ ॥
tvaṃ priyaḥ śaṃkhacūḍasya caikamanvantarāvadhi .. śaṃkhena sārddhaṃ tvadbhedaḥ kevalaṃ duḥkhadastava .. 56 ..
Shloka 57
सनत्कुमार उवाच ।।
इत्युक्त्वा शंकरस्तत्र माहात्म्यमूचिवांस्तदा ॥ शालग्रामशिलायाश्च तुलस्या बहुपुण्यदम् ॥ ५७ ॥
ityuktvā śaṃkarastatra māhātmyamūcivāṃstadā .. śālagrāmaśilāyāśca tulasyā bahupuṇyadam .. 57 ..
Shloka 58
ततश्चांतर्हितो भूत्वा मोदयित्वा हरिं च ताम् ॥ जगाम् स्वालयं शंभुः शर्मदो हि सदा सताम् ॥ ५८ ॥
tataścāṃtarhito bhūtvā modayitvā hariṃ ca tām .. jagām svālayaṃ śaṃbhuḥ śarmado hi sadā satām .. 58 ..
Shloka 59
इति श्रुत्वा वचश्शंभोः प्रसन्ना तु तुलस्यभूत् ॥ तद्देहं च परित्यज्य दिव्यरूपा बभूव ह ॥ ५९ ॥
iti śrutvā vacaśśaṃbhoḥ prasannā tu tulasyabhūt .. taddehaṃ ca parityajya divyarūpā babhūva ha .. 59 ..
Shloka 60
प्रजगाम तया सार्द्धं वैकुंठं कमलापतिः ॥ सद्यस्तद्देहजाता च बभूव गंडकी नदी ॥ 2.5.41.६० ॥
prajagāma tayā sārddhaṃ vaikuṃṭhaṃ kamalāpatiḥ .. sadyastaddehajātā ca babhūva gaṃḍakī nadī .. 2.5.41.60 ..
Shloka 61
शैलोभूदच्युतस्सोऽपि तत्तीरे पुण्यदो नृणाम् ॥ कुर्वंति तत्र कीटाश्च छिद्रं बहुविधं मुने ॥ ६१ ॥
śailobhūdacyutasso'pi tattīre puṇyado nṛṇām .. kurvaṃti tatra kīṭāśca chidraṃ bahuvidhaṃ mune .. 61 ..
Shloka 62
जले पतंति यास्तत्र शिलास्तास्त्वतिपुण्यदाः ॥ स्थलस्था पिंगला ज्ञेयाश्चोपतापाय चैव हि ॥ ६२ ॥
jale pataṃti yāstatra śilāstāstvatipuṇyadāḥ .. sthalasthā piṃgalā jñeyāścopatāpāya caiva hi .. 62 ..
Shloka 63
इत्येवं कथितं सर्वं तव प्रश्नानुसारतः ॥ चरितं पुण्यदं शंभोः सर्वकामप्रदं नृणाम् ॥ ६३ ॥
ityevaṃ kathitaṃ sarvaṃ tava praśnānusārataḥ .. caritaṃ puṇyadaṃ śaṃbhoḥ sarvakāmapradaṃ nṛṇām .. 63 ..
Shloka 64
आख्यानमिदमाख्यातं विष्णुमाहात्म्यमिश्रितम् ॥ भुक्तिमुक्तिप्रदं पुण्यं किं भूयः श्रोतुमिच्छसि ॥ ६४ ॥
ākhyānamidamākhyātaṃ viṣṇumāhātmyamiśritam .. bhuktimuktipradaṃ puṇyaṃ kiṃ bhūyaḥ śrotumicchasi .. 64 ..
Shloka 65
इति श्रीशिवमहापुराणे द्वितीयायां रुद्रसंहितायां पञ्चमे युद्धखंडे शंखचूडव धोपाख्याने तुलसीशापवर्णनं नामैकचत्वारिंशोऽध्यायः ॥ ४१ ॥
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍava dhopākhyāne tulasīśāpavarṇanaṃ nāmaikacatvāriṃśo'dhyāyaḥ .. 41 ..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In