| |
|

This overlay will guide you through the buttons:

Shloka 1
शृण्वथो गिरिशस्याद्यावतारान् दशसंख्यकान् ॥ महाकलमुखान् भक्त्योपासनाकाण्डसेवितान् ॥ १ ॥
śṛṇvatho giriśasyādyāvatārān daśasaṃkhyakān .. mahākalamukhān bhaktyopāsanākāṇḍasevitān .. 1 ..
Shloka 2
तत्राद्यो हि महाकालो भुक्तिमुक्तिप्रदस्सताम् ॥ शक्तिस्तत्र महाकाली भक्तेप्सितफलप्रदा ॥ २॥
tatrādyo hi mahākālo bhuktimuktipradassatām .. śaktistatra mahākālī bhaktepsitaphalapradā .. 2..
Shloka 3
तारनामा द्वितीयश्च तारा शक्तिस्तथैव सा ॥ भुक्तिमुक्तिप्रदौ चोभौ स्वसेवकसुखप्रदौ ॥ ३॥
tāranāmā dvitīyaśca tārā śaktistathaiva sā .. bhuktimuktipradau cobhau svasevakasukhapradau .. 3..
Shloka 4
भुवनेशो हि बालाह्वस्तृतीयः परिकीर्तितः ॥ भुवनेशी शिवा तत्र बालाह्वा सुखदा सताम् ॥ ४ ॥
bhuvaneśo hi bālāhvastṛtīyaḥ parikīrtitaḥ .. bhuvaneśī śivā tatra bālāhvā sukhadā satām .. 4 ..
Shloka 5
श्रीविद्येशः षोडशाह्वः श्रीर्विद्या षोडशी शिवा ॥ चतुर्थो भक्त सुखदो भुक्तिमुक्तिफलप्रदः ॥ ५ ॥
śrīvidyeśaḥ ṣoḍaśāhvaḥ śrīrvidyā ṣoḍaśī śivā .. caturtho bhakta sukhado bhuktimuktiphalapradaḥ .. 5 ..
Shloka 6
पञ्चमो भैरवः ख्यातः सर्वदा भक्तकामदः ॥ भैरवी गिरिजा तत्र सदुपासककामदा ॥ ६ ॥
pañcamo bhairavaḥ khyātaḥ sarvadā bhaktakāmadaḥ .. bhairavī girijā tatra sadupāsakakāmadā .. 6 ..
Shloka 7
छिन्नमस्तकनामासौ शिवः षष्ठः प्रकीर्तितः ॥ भक्तकामप्रदा चैव गिरिजा छिन्नमस्तका ॥ ७ ॥
chinnamastakanāmāsau śivaḥ ṣaṣṭhaḥ prakīrtitaḥ .. bhaktakāmapradā caiva girijā chinnamastakā .. 7 ..
Shloka 8
धूमवान् सप्तमः शम्भुस्सर्वकामफलप्रदः ॥ धूमवती शिवा तत्र सदुपासककामदा ॥ ८ ॥
dhūmavān saptamaḥ śambhussarvakāmaphalapradaḥ .. dhūmavatī śivā tatra sadupāsakakāmadā .. 8 ..
Shloka 9
शिवावतारः सुखदो ह्यष्टमो बगलामुखः ॥ शक्तिस्तत्र महानन्दा विख्याता बगलामुखी ॥ ९ ॥
śivāvatāraḥ sukhado hyaṣṭamo bagalāmukhaḥ .. śaktistatra mahānandā vikhyātā bagalāmukhī .. 9 ..
Shloka 10
शिवावतारो मातङ्गो नवमः परिकीर्तितः ॥ मातंगी तत्र शर्वाणी सर्वकामफलप्रदा ॥ 3.17.१० ॥
śivāvatāro mātaṅgo navamaḥ parikīrtitaḥ .. mātaṃgī tatra śarvāṇī sarvakāmaphalapradā .. 3.17.10 ..
Shloka 11
दशमः कमलः शम्भुर्भुक्तिमुक्तिफलप्रदः ॥ कमला गिरिजा तत्र स्वभक्तपरिपालिनी ॥ ११ ॥
daśamaḥ kamalaḥ śambhurbhuktimuktiphalapradaḥ .. kamalā girijā tatra svabhaktaparipālinī .. 11 ..
Shloka 12
एते दशमिताः शैवा अवतारास्सुखप्रदाः ॥ भुक्तिमुक्तिप्रदाश्चैव भक्तानां सर्वदास्सताम् ॥ १२॥
ete daśamitāḥ śaivā avatārāssukhapradāḥ .. bhuktimuktipradāścaiva bhaktānāṃ sarvadāssatām .. 12..
Shloka 13
एते दशावतारा हि शंकरस्य महात्मनः ॥ नानासुखप्रदा नित्यं सेवतां निर्विकारतः ॥ १ ३॥
ete daśāvatārā hi śaṃkarasya mahātmanaḥ .. nānāsukhapradā nityaṃ sevatāṃ nirvikārataḥ .. 1 3..
Shloka 14
एतद्दशावताराणां माहात्म्यं वर्णितं मुने ॥ सर्वकामप्रदं ज्ञेयं तंत्रशास्त्रादिगर्भितम् ॥ १४॥
etaddaśāvatārāṇāṃ māhātmyaṃ varṇitaṃ mune .. sarvakāmapradaṃ jñeyaṃ taṃtraśāstrādigarbhitam .. 14..
Shloka 15
एतासामादिशक्तीनामद्भुतो महिमा मुने ॥ सर्वकामप्रदो ज्ञेयस्तत्रंशास्त्रादिगर्भितः ॥ १५॥
etāsāmādiśaktīnāmadbhuto mahimā mune .. sarvakāmaprado jñeyastatraṃśāstrādigarbhitaḥ .. 15..
Shloka 16
शत्रुमारणकार्य्यादौ तत्तच्छक्तिः परा मता ॥ खल दण्डकरी नित्यम्ब्रह्मतेजोविवर्द्धिनी॥ १६॥
śatrumāraṇakāryyādau tattacchaktiḥ parā matā .. khala daṇḍakarī nityambrahmatejovivarddhinī.. 16..
Shloka 17
इत्युक्तास्ते मया ब्रह्मन्नवतारा महेशितुः॥सशक्तिका दशमिता महाकालमुखाश्शुभाः॥ १७॥
ityuktāste mayā brahmannavatārā maheśituḥ..saśaktikā daśamitā mahākālamukhāśśubhāḥ.. 17..
Shloka 18
शैवपर्वसु सर्वेषु योऽधीते भक्तितत्परः ॥ एतदाख्यानममलं सोतिशम्भुप्रियो भवेत् ॥ १८॥
śaivaparvasu sarveṣu yo'dhīte bhaktitatparaḥ .. etadākhyānamamalaṃ sotiśambhupriyo bhavet .. 18..
Shloka 19
ब्रह्मणो ब्रह्मवर्चस्वी क्षत्रियो विजयी भवेत ॥ धनाधिपो हि वैश्यः स्याच्छूद्रः सुखमवाप्नुयात् ॥ १९॥
brahmaṇo brahmavarcasvī kṣatriyo vijayī bhaveta .. dhanādhipo hi vaiśyaḥ syācchūdraḥ sukhamavāpnuyāt .. 19..
Shloka 20
शांकरा निजधर्मस्थाः शृण्वन्तश्चरितन्त्विदम्॥सुखिनः स्युर्विशेषेण शिवभक्ता भवन्तु च ॥ 3.17.२०॥
śāṃkarā nijadharmasthāḥ śṛṇvantaścaritantvidam..sukhinaḥ syurviśeṣeṇa śivabhaktā bhavantu ca .. 3.17.20..
Shloka 21
इति श्रीशिवमहापुराणे तृतीयायां शतरुद्रसंहितायां शिवदशावतारवर्णनं नाम सप्तदशोऽध्यायः ॥ १७।
iti śrīśivamahāpurāṇe tṛtīyāyāṃ śatarudrasaṃhitāyāṃ śivadaśāvatāravarṇanaṃ nāma saptadaśo'dhyāyaḥ .. 17.

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In