| |
|

This overlay will guide you through the buttons:

Shloka 1
सनत्कुमार उवाच ।।
इत्याकर्ण्य मुनेर्वाक्यमुपमन्योर्महात्मनः ॥ जातभक्तिर्महादेवे कृष्णः प्रोवाच तं मुनिम् ॥ १ ॥
ityākarṇya munervākyamupamanyormahātmanaḥ .. jātabhaktirmahādeve kṛṣṇaḥ provāca taṃ munim .. 1 ..
Shloka 2
।। श्रीकृष्ण उवाच ।।
उपमन्यो मुने तात कृपां कुरु ममोपरि ॥ ये ये शिवं समाराध्य कामानापुश्च तान्वद ॥ २ ॥
upamanyo mune tāta kṛpāṃ kuru mamopari .. ye ye śivaṃ samārādhya kāmānāpuśca tānvada .. 2 ..
Shloka 3
सनत्कुमार उवाच ।।
इत्याकर्ण्योपमन्युस्स मुनिश्शैववरो महान् ॥ कृष्णवाक्यं सुप्रशस्य प्रत्युवाच कृपानिधिः ॥ ३ ॥
ityākarṇyopamanyussa muniśśaivavaro mahān .. kṛṣṇavākyaṃ supraśasya pratyuvāca kṛpānidhiḥ .. 3 ..
Shloka 4
उपमन्युरुवाच।।
यैर्यैर्भवाराधनतः प्राप्तो हृत्काम एव हि ॥ तांस्तान्भक्तान्प्रवक्ष्यामि शृणु त्वं वै यदूद्वह ॥ ४ ॥
yairyairbhavārādhanataḥ prāpto hṛtkāma eva hi .. tāṃstānbhaktānpravakṣyāmi śṛṇu tvaṃ vai yadūdvaha .. 4 ..
Shloka 5
शर्वात्सर्वामरैश्वर्य्यं हिरण्यकशिपुः पुरा ॥ वर्षाणां दशलक्षाणि सोऽलभच्चन्द्रशेखरात् ॥ ५ ॥
śarvātsarvāmaraiśvaryyaṃ hiraṇyakaśipuḥ purā .. varṣāṇāṃ daśalakṣāṇi so'labhaccandraśekharāt .. 5 ..
Shloka 6
तस्याऽथ पुत्रप्रवरो नन्दनो नाम विश्रुतः ॥ स च शर्ववरादिन्द्रं वर्षायुतमधोनयत्॥६॥
tasyā'tha putrapravaro nandano nāma viśrutaḥ .. sa ca śarvavarādindraṃ varṣāyutamadhonayat..6..
Shloka 7
विष्णुचक्रं च तद्धोरं वज्रमाखण्डलस्य च ॥ शीर्णं पुराऽभवत्कृष्ण तदंगेषु महाहवे ॥ ७ ॥
viṣṇucakraṃ ca taddhoraṃ vajramākhaṇḍalasya ca .. śīrṇaṃ purā'bhavatkṛṣṇa tadaṃgeṣu mahāhave .. 7 ..
Shloka 8
न शस्त्राणि वहंत्यंगे धर्मतस्तस्य धीमतः ॥ ग्रहस्यातिबलस्याजौ चक्रवज्रमुखान्यपि ॥ ८॥
na śastrāṇi vahaṃtyaṃge dharmatastasya dhīmataḥ .. grahasyātibalasyājau cakravajramukhānyapi .. 8..
Shloka 9
अर्द्यमानाश्च विबुधा ग्रहेण सुबलीयसा ॥ देवदत्तवरा जघ्नुरसुरेन्द्रास्सुरान्भृशम् ॥ ९॥
ardyamānāśca vibudhā graheṇa subalīyasā .. devadattavarā jaghnurasurendrāssurānbhṛśam .. 9..
Shloka 10
तुष्टो विद्युत्प्रभस्यापि त्रैलोक्येश्वरता मदात् ॥ शतवर्षसहस्राणि सर्वलोकेश्वरो भवः ॥ 5.2.१० ॥
tuṣṭo vidyutprabhasyāpi trailokyeśvaratā madāt .. śatavarṣasahasrāṇi sarvalokeśvaro bhavaḥ .. 5.2.10 ..
Shloka 11
तथा पुत्रसहस्राणामयुतं च ददौ शिवः ॥ मम चानुचरो नित्यं भविष्यस्यब्रवीदिति ॥ ११॥
tathā putrasahasrāṇāmayutaṃ ca dadau śivaḥ .. mama cānucaro nityaṃ bhaviṣyasyabravīditi .. 11..
Shloka 12
कुशद्वीपे शुभं राज्यमददाद्भगवान्भवः ॥ स तस्मै शङ्करः प्रीत्या वासुदेव प्रहृष्टधीः ॥ १२॥
kuśadvīpe śubhaṃ rājyamadadādbhagavānbhavaḥ .. sa tasmai śaṅkaraḥ prītyā vāsudeva prahṛṣṭadhīḥ .. 12..
Shloka 13
धात्रा सृष्टश्शतमखो दैत्यो वर्षशतं पुरा ॥ तपः कृत्वा सहस्रं तु पुत्राणामलभद्भवात् ॥ १३ ॥
dhātrā sṛṣṭaśśatamakho daityo varṣaśataṃ purā .. tapaḥ kṛtvā sahasraṃ tu putrāṇāmalabhadbhavāt .. 13 ..
Shloka 14
याज्ञवल्क्य इति ख्यातो गीतो वेदेषु वै मुनिः॥आराध्य स महादेवं प्राप्तवाञ्ज्ञानमुत्तमम् ॥ १४॥
yājñavalkya iti khyāto gīto vedeṣu vai muniḥ..ārādhya sa mahādevaṃ prāptavāñjñānamuttamam .. 14..
Shloka 15
वेदव्यासस्तु यो नाम्ना प्राप्तवानतुलं यशः॥सोऽपि शंकरमाराध्य त्रिकालज्ञानमाप्तवान्॥१५॥
vedavyāsastu yo nāmnā prāptavānatulaṃ yaśaḥ..so'pi śaṃkaramārādhya trikālajñānamāptavān..15..
Shloka 16
इन्द्रेण वालखिल्यास्ते परिभूतास्तु शङ्करात् ॥ लेभिरे सोमहर्तारं गरुडं सर्वदुर्जयम् ॥ १६॥
indreṇa vālakhilyāste paribhūtāstu śaṅkarāt .. lebhire somahartāraṃ garuḍaṃ sarvadurjayam .. 16..
Shloka 17
आपः प्रनष्टाः सर्वाश्च पूर्वरोषात्कपर्द्दिनः ॥ शर्वं समकपालेन देवैरिष्ट्वा प्रवर्तितम् ॥ १७॥
āpaḥ pranaṣṭāḥ sarvāśca pūrvaroṣātkaparddinaḥ .. śarvaṃ samakapālena devairiṣṭvā pravartitam .. 17..
Shloka 18
अत्रेर्भार्य्या चानसूया त्रीणि वर्षशतानि च ॥ मुशलेषु निराहारा सुप्त्वा शर्वात्ततस्सुतान् ॥ १८ ॥
atrerbhāryyā cānasūyā trīṇi varṣaśatāni ca .. muśaleṣu nirāhārā suptvā śarvāttatassutān .. 18 ..
Shloka 19
दत्तात्रेयं मुनिं लेभे चन्द्रं दुर्वाससं तथा ॥ गंगां प्रवर्तयामास चित्रकूटे पतिव्रता ॥ १९ ॥
dattātreyaṃ muniṃ lebhe candraṃ durvāsasaṃ tathā .. gaṃgāṃ pravartayāmāsa citrakūṭe pativratā .. 19 ..
Shloka 20
विकर्णश्च महादेवं तथा भक्तसुखावहम् ॥ प्रसाद्य महतीं सिद्धिमाप्तवान्मधुसूदन ॥ 5.2.२० ॥
vikarṇaśca mahādevaṃ tathā bhaktasukhāvaham .. prasādya mahatīṃ siddhimāptavānmadhusūdana .. 5.2.20 ..
Shloka 21
चित्रसेनो नृपश्शंभुं प्रसाद्य दृढभक्तिमान् ॥ समस्तनृपभीतिभ्योऽभयं प्रापातुलं च कम् ॥ २१॥
citraseno nṛpaśśaṃbhuṃ prasādya dṛḍhabhaktimān .. samastanṛpabhītibhyo'bhayaṃ prāpātulaṃ ca kam .. 21..
Shloka 22
श्रीकरो गोपिकासूनुर्नृपपूजाविलोकनात् ॥ जातभक्तिर्महादेवे परमां सिद्धिमाप्तवान् ॥ २२ ॥
śrīkaro gopikāsūnurnṛpapūjāvilokanāt .. jātabhaktirmahādeve paramāṃ siddhimāptavān .. 22 ..
Shloka 23
चित्राङ्गदो नृपसुतस्सीमन्तिन्याः पतिर्हरे ॥ शिवानुग्रहतो मग्नो यमुनायां मृतो न हि॥२३॥
citrāṅgado nṛpasutassīmantinyāḥ patirhare .. śivānugrahato magno yamunāyāṃ mṛto na hi..23..
Shloka 24
स च तक्षालयं गत्वा तन्मैत्रीं प्राप्य सुव्रतः ॥ आयातः स्वगृहं प्रीतो नानाधनसमन्वितः ॥ २४॥
sa ca takṣālayaṃ gatvā tanmaitrīṃ prāpya suvrataḥ .. āyātaḥ svagṛhaṃ prīto nānādhanasamanvitaḥ .. 24..
Shloka 25
सीमंतिनी प्रिया तस्य सोमव्रतपरायणा॥शिवानुग्रहतः कृष्ण लेभे सौभाग्यमुत्तमम् ॥ २५ ॥
sīmaṃtinī priyā tasya somavrataparāyaṇā..śivānugrahataḥ kṛṣṇa lebhe saubhāgyamuttamam .. 25 ..
Shloka 26
तत्प्रभावाद्व्रते तस्मिन्नेको द्विजसुतः पुरा ॥ कश्चित्स्त्रीत्वं गतो लोभात्कृतदाराकृतिश्छलात् ॥ २६॥
tatprabhāvādvrate tasminneko dvijasutaḥ purā .. kaścitstrītvaṃ gato lobhātkṛtadārākṛtiśchalāt .. 26..
Shloka 27
चंचुका पुंश्चली दुष्टा गोकर्णे द्विजतः पुरा ॥ श्रुत्वा धर्मकथां शंभोर्भक्त्या प्राप परां गतिम् ॥ २७ ॥
caṃcukā puṃścalī duṣṭā gokarṇe dvijataḥ purā .. śrutvā dharmakathāṃ śaṃbhorbhaktyā prāpa parāṃ gatim .. 27 ..
Shloka 28
स्वस्त्र्यनुग्रहतः पापी बिंदुगो चंचुकापतिः ॥ श्रुत्वा शिवपुराणं स सद्गतिं प्राप शांकरीम् ॥ २८ ॥
svastryanugrahataḥ pāpī biṃdugo caṃcukāpatiḥ .. śrutvā śivapurāṇaṃ sa sadgatiṃ prāpa śāṃkarīm .. 28 ..
Shloka 29
पिंगला गणिका ख्याता मदराह्वो द्विजाधमः ॥ शैवमृषभमभ्यर्च्य लेभाते सद्गतिं च तौ ॥ २९ ॥
piṃgalā gaṇikā khyātā madarāhvo dvijādhamaḥ .. śaivamṛṣabhamabhyarcya lebhāte sadgatiṃ ca tau .. 29 ..
Shloka 30
महानन्दाभिधा कश्चिद्वेश्या शिवपदादृता ॥ दृढात्पणात्सुप्रसाद्य शिवं लेभे च सद्गतिम् ॥ 5.2.३० ॥
mahānandābhidhā kaścidveśyā śivapadādṛtā .. dṛḍhātpaṇātsuprasādya śivaṃ lebhe ca sadgatim .. 5.2.30 ..
Shloka 31
कैकेयी द्विजबालाः च सादराह्वा शिवव्रता ॥ परमं हि सुखं प्राप शिवेशव्रतधारणात् ॥ ३१ ॥
kaikeyī dvijabālāḥ ca sādarāhvā śivavratā .. paramaṃ hi sukhaṃ prāpa śiveśavratadhāraṇāt .. 31 ..
Shloka 32
विमर्षणश्च नृपतिश्शिवभक्तिं विधाय वै ॥ गतिं लेभे परां कृष्ण शिवानुग्रहतः पुरा ॥ ३२ ॥
vimarṣaṇaśca nṛpatiśśivabhaktiṃ vidhāya vai .. gatiṃ lebhe parāṃ kṛṣṇa śivānugrahataḥ purā .. 32 ..
Shloka 33
दुर्जनश्च नृपः पापी बहुस्त्रीलंपटः खलः ॥ शिवभक्त्या शिवं प्राप निर्लिप्तः सर्वकर्मसु ॥ ३३ ॥
durjanaśca nṛpaḥ pāpī bahustrīlaṃpaṭaḥ khalaḥ .. śivabhaktyā śivaṃ prāpa nirliptaḥ sarvakarmasu .. 33 ..
Shloka 34
सस्त्रीकश्शबरो नाम्ना शंकरश्च शिवव्रती ॥ चिताभस्मरतो भक्त्या लेभे तद्गतिमुत्तमाम् ॥ ३४ ॥
sastrīkaśśabaro nāmnā śaṃkaraśca śivavratī .. citābhasmarato bhaktyā lebhe tadgatimuttamām .. 34 ..
Shloka 35
सौमिनी नाम चाण्डाली संपूज्याज्ञानतो हि सा ॥ लेभे शैवीं गतिं कृष्ण शंकरानुग्रहात्परात् ॥ ३५ ॥
sauminī nāma cāṇḍālī saṃpūjyājñānato hi sā .. lebhe śaivīṃ gatiṃ kṛṣṇa śaṃkarānugrahātparāt .. 35 ..
Shloka 36
महाकालाभिधो व्याधो किरातः परहिंसकः ॥ समभ्यर्च्य शिवं भक्त्या लेभे सद्गतिमुत्तमाम् ॥ ३६ ॥
mahākālābhidho vyādho kirātaḥ parahiṃsakaḥ .. samabhyarcya śivaṃ bhaktyā lebhe sadgatimuttamām .. 36 ..
Shloka 37
दुर्वासा मुनिशार्दूलश्शिवानुग्रहतः पुरा ॥ तस्तार स्वमतं लोके शिवभक्तिं विमुक्तिदाम्॥३७॥
durvāsā muniśārdūlaśśivānugrahataḥ purā .. tastāra svamataṃ loke śivabhaktiṃ vimuktidām..37..
Shloka 38
कौशिकश्च समाराध्य शंकरं लोक शंकरम् ॥ ब्राह्मणोऽभूत्क्षत्रियश्च द्वितीय इव पद्मभूः ॥ ३६॥
kauśikaśca samārādhya śaṃkaraṃ loka śaṃkaram .. brāhmaṇo'bhūtkṣatriyaśca dvitīya iva padmabhūḥ .. 36..
Shloka 39
शिवमभ्यर्च्य सद्भक्त्या विरंचिश्शैवसत्तमः ॥ अभूत्सर्गकरः कृष्ण सर्वलोकपितामहः ॥ ३९॥
śivamabhyarcya sadbhaktyā viraṃciśśaivasattamaḥ .. abhūtsargakaraḥ kṛṣṇa sarvalokapitāmahaḥ .. 39..
Shloka 40
मार्कण्डेयो मुनिवरश्चिरंजीवी महाप्रभुः॥शिवभक्तवरः श्रीमाञ्शिवानुग्रहतो हरे ॥ 5.2.४०॥
mārkaṇḍeyo munivaraściraṃjīvī mahāprabhuḥ..śivabhaktavaraḥ śrīmāñśivānugrahato hare .. 5.2.40..
Shloka 41
देवेन्द्रो हि महाशैवस्त्रैलोक्यं बुभुजे पुरा॥शिवानुग्रहतः कृष्ण सर्वदेवाधिपः प्रभुः ॥ ४१॥
devendro hi mahāśaivastrailokyaṃ bubhuje purā..śivānugrahataḥ kṛṣṇa sarvadevādhipaḥ prabhuḥ .. 41..
Shloka 42
बलिपुत्रो महाशैवश्शिवानुग्रहतो वशी॥बाणो बभूव ब्रह्माण्डनायकस्सकलेश्वरः ॥ ४२॥
baliputro mahāśaivaśśivānugrahato vaśī..bāṇo babhūva brahmāṇḍanāyakassakaleśvaraḥ .. 42..
Shloka 43
हरिश्शक्तिश्च सद्भक्त्या दधीचश्च महेश्वरः ॥ शिवानुग्रहतोऽभूवंस्तथा रामो हि शांकरः ॥ ४३॥
hariśśaktiśca sadbhaktyā dadhīcaśca maheśvaraḥ .. śivānugrahato'bhūvaṃstathā rāmo hi śāṃkaraḥ .. 43..
Shloka 44
कणादो भार्गवश्चैव गुरुर्गौतम एव च ॥ शिवभक्त्या बभूवुस्ते महाप्रभव ईश्वरा ॥ ४४ ॥
kaṇādo bhārgavaścaiva gururgautama eva ca .. śivabhaktyā babhūvuste mahāprabhava īśvarā .. 44 ..
Shloka 45
शाकल्यश्शंसितात्मा च नववर्षशातान्यपि ॥ भवमाराधयामास मनोयज्ञेन माधव॥४५॥
śākalyaśśaṃsitātmā ca navavarṣaśātānyapi .. bhavamārādhayāmāsa manoyajñena mādhava..45..
Shloka 46
तुतोष भगवानाह ग्रंथकर्ता भविष्यसि॥वत्साक्षय्या च ते कीर्तिस्त्रैलोक्ये प्रभविष्यति॥४६॥
tutoṣa bhagavānāha graṃthakartā bhaviṣyasi..vatsākṣayyā ca te kīrtistrailokye prabhaviṣyati..46..
Shloka 47
अक्षयं च कुलं तेऽस्तु महर्षिभिरलंकृतम् ॥ भविष्यसि ऋषिश्रेष्ठ सूत्रकर्ता ततस्ततः॥४७॥
akṣayaṃ ca kulaṃ te'stu maharṣibhiralaṃkṛtam .. bhaviṣyasi ṛṣiśreṣṭha sūtrakartā tatastataḥ..47..
Shloka 48
इत्येवं शंकरात्प्राप वरं मुनिवरस्स वै ॥ त्रैलोक्ये विततश्चासीत्पूज्यश्च यदुनन्दन ॥ ४८॥
ityevaṃ śaṃkarātprāpa varaṃ munivarassa vai .. trailokye vitataścāsītpūjyaśca yadunandana .. 48..
Shloka 49
सावर्णिरिति विख्यात ऋषिरासीत्कृते युगे ॥ इह तेन तपस्तप्तं षष्टिवर्षशतानि च ॥ ४९ ॥
sāvarṇiriti vikhyāta ṛṣirāsītkṛte yuge .. iha tena tapastaptaṃ ṣaṣṭivarṣaśatāni ca .. 49 ..
Shloka 50
तमाह भगवान्रुद्रस्साक्षात्तुष्टोस्मि तेऽनघ ॥ ग्रंथकृल्लोकविख्यातो भवितास्यजरामरः ॥ 5.2.५० ॥
tamāha bhagavānrudrassākṣāttuṣṭosmi te'nagha .. graṃthakṛllokavikhyāto bhavitāsyajarāmaraḥ .. 5.2.50 ..
Shloka 51
एवंविधो महादेवः पुण्यपूर्वतरैस्ततः ॥ समर्च्चितश्शुभान्कामान्प्रददाति यथेप्सितान् ॥ ५१ ॥
evaṃvidho mahādevaḥ puṇyapūrvataraistataḥ .. samarccitaśśubhānkāmānpradadāti yathepsitān .. 51 ..
Shloka 52
एकेनैव मुखेनाहं वक्तुं भगवतो गुणाः ॥ ये संति तान्न शक्नोमि ह्यपि वर्षशतैरपि ॥ ५२ ॥
ekenaiva mukhenāhaṃ vaktuṃ bhagavato guṇāḥ .. ye saṃti tānna śaknomi hyapi varṣaśatairapi .. 52 ..
Shloka 53
इति श्रीशिवमहापुराणे पंचम्यामुमासंहितायां सनत्कुमारव्याससंवादे उपमन्यूपदेशो नाम द्वितीयोऽध्यायः ॥ २ ॥
iti śrīśivamahāpurāṇe paṃcamyāmumāsaṃhitāyāṃ sanatkumāravyāsasaṃvāde upamanyūpadeśo nāma dvitīyo'dhyāyaḥ .. 2 ..

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In